Sinaranay ti Dios a Di Makapagulbod

KAS INSALAYSAY NI MARY WILLIS

Dagiti epekto ti sangalubongan a krisis iti ekonomia ket nakadanonen kadagiti nasulinek a lugar ti Western Australia idi 1932. Iti dayta a tawen, idi a 19 pay laeng ti tawenko, naidestinokami ken ni Ellen Davies a mapan mangasaba iti teritoria a mangsaklaw iti agarup 100,000 a kilometro kuadrado. Mangrugikam iti bassit nga ili ti Wiluna, sumurok-kumurang a 950 kilometro iti amianan a daya ti pagtaenganmi idiay Perth, ti kabisera ti Western Australia.

ITI panagturongmi sadiay, nakilugankami ken ni Ellen iti paglugluganan dagiti mangiturturong iti tren a kaduami ti maysa a mannakigayyem a guardia iti dayta. No kasta nga agsardeng ti tren iti tunggal siding (maysa nga ababa a paset ti riles a pagsardengan), siaayat nga ibaga ti guardia kadakami no kasanot’ kapaut ti panagsardengmi iti dayta. Daytoy ti nangipaay kadakami ti gundaway a dumsaag pay laeng tapno mangasaba kadagiti tattao nga agnanaed kadagidiay naiputputong a lugar iti igid ti riles. Kamaudiananna, dimtengkam met laeng iti pagminasan a lugar ti Wiluna bayat a kapades ti napnuan-tapok nga alipugpog.

Nupay kasta, ti siding ti riles idiay Wiluna ket agarup tallo a kilometro ti kaadayona iti ili. Agpadakami a nakapsut, ket adda awitmi a tallo a nadadagsen a karton ti literatura kasta met ti dua a maleta ti bado. Aniat’ rumbeng nga aramidenmi? Inggalutmi ti maysa a karton iti immatiddog a kayo sa pinagsumbangiranmi a binitbit. Iti kastoy a pamay-an nga inawitmi dagiti karton, sinaggaysa. Namimpito a nagsublisublikami a nangibunag kadagiti tallo a karton ken dagiti maletami iti tallo a kilometro agingga iti ili. Masansan nga agsardengkami tapno paginanaen dagiti nabannog nga imami.

Uray nakataptapok, nabannog dagiti ima, ken napaksuyan dagiti saka, naragsakankam iti dayta a karit ken pannakigasanggasat. Agpada a nariknami nga adda kadakami ni Jehova, a sinaranaynakami tapno mapagballigianmi daytoy makakarit a panangirugi ti panangasaba kadagiti nasulinek a lugar. Di nagbayag nakitami ti pammendisionna iti trabahomi, gapu ta iti panangikagumaanmi iti daydiay a panagbiahe nagresulta iti panangawat ni agtutubo a Bob Horn iti kinapudno iti Biblia. Maragsakankami ta ni Bob ket nakapagserbi iti sumagmamano a tawen idiay Bethel ket nagtultuloy a nagserbi ken Jehova a simamatalek iti las-ud ti agarup 50 a tawen agingga iti ipapatayna idi 1982.

Manipud Wiluna nangasabakami kadagiti purok bayat ti panagdaliasatmi iti nasurok a 725 a kilometro nga agturong idiay Geraldton iti igid ti baybay. Manipud sadiay nagbiahekami a nagsubli idiay Perth. Adda met sumagmamano a rabii a naturogkami kadagiti layang a kuarto iti estasion ti tren ket naminsan iti pay ketdi maysa a bunton ti garami iti igid ti riles ti tren.

Awit-awitmi ti maysa a supot ti pungan a nagikkanmi kadagiti naaramid-balay a biskuit. Dagitoy ti nagserbi a taraonmi iti umuna a kagudua ti panagbiahemi. No dadduma teggedenmi ti taraonmi babaen ti panaginnawmi kadagiti pinggan ken panaglampaso kadagiti kasera ken panganan. Pasaray agtrabahokami iti kainaran nga agpuros kadagiti gisantes wenno bukbukel. Nakatulong met dagiti kontribusion dagiti interesado nga immawat kadagiti literatura iti Biblia kadagiti paggastuanmi.

Ti nangpabileg kaniak a mangsalimetmet iti pammati ken Jehova ken siraragsak a mangsango kadagiti adu a narikut a kasasaad kadagidi nga al-aldaw isu ti ulidan ken nasapa a panangsanay ni nanang kaniak.

Maysa a Nakristianuan a Tawid

Adda natibker a pammati ni nanangko iti Namarsua, ken kas iti malagipko, kasaritanakami no kua nga ubbing maipapan kenkuana. Nupay kasta, nasubok a naan-anay ti pammatina idi matay ti pito-ti-tawenna a manongmi iti maysa a nasaem nga aksidente idiay eskuelaan. Ngem imbes a maluksaw iti Dios, rinugian ni nanangko nga ipasnek ti panagadal iti Biblia. Kayatna a maammuan, no mabalin, ti makagapu iti kakasta a trahedia. Nasupapakan ti panangsapulna iti kinapudno ti Biblia, ket insimbolona ti dedikasionna iti pudno a Dios, ni Jehova, babaen ti bautismo iti danum idi rugrugi ti 1920’s.

Manipud idin, masansan a ti kinasigurado dagiti kari ti Dios ti ipagpaganetgetna no kasarsaritanakami. Kanayonnakami a balbalakadan a laglagipenmi nga uray ania ti mapasamak, ‘ti Dios dina mabalin ti agulbod.’ (Tito 1:2) Kas banagna, siak ken ti kabsatko a babai ken dua kadagiti manongmi, agraman dagiti pamilia ken dagiti appomi, ket managdaydayaw itan ken ni Jehova a Dios. Dua kadagiti kaanakak a lallaki, da Alan ken Paul Mason, ti agserserbi kas agdaldaliasat a manangaywan.

Nasapa a Panagtarigagay a Mangasaba

Nakapuyak nga estudiante ken nagsardengak nga ageskuela idi 1926, idi 13 ti tawenko. Nupay kasta, naaddaanak ti nasged a tarigagay nga iranud kadagiti sabsabali ti naadalko manipud Biblia. Impagarup ni tatang a saan nga umdas ti adalko tapno makatulongak iti asinoman, ngem kinuna ni Nanang: “Uray no ibagana laeng kadagiti tattao ti maipapan iti umad-adani a gubat ti Armagedon ken ti naemma tawidenda ti daga, mangiwaragawag daytan iti Pagarian ti Dios.” Isu a nangrugiak a makiraman iti trabaho a panangasaba iti binalaybalay idi umuna a tawtawen ti kinatin-edyerko, nupay saanak a nabautisaran agingga idi 1930. Di nagbayag kalpasanna, nangrugiak iti amin-tiempo a trabaho a panagebanghelio iti lugar nga adda iti aglawlaw ti Perth.

Iti sumuno a tawen, idi 1931, rinugianmi nga usaren ti baro a nagantayo a Dagiti Saksi ni Jehova. Nupay kasta, adu a bumalay ti nagkedked iti panangaramattayo iti daytoy sagrado a nagan ti Dios ket sikukuspag a nagtignayda. Ngem nagtultuloyak iti ministerio nupay saan a nasayaat ti panangawat dagiti tao. Adda panagtalekko a ti Dios di makapagulbod idi inkarina a dagiti adipenna ‘makapagpannurayda iti bileg nga ipapaayna.’​—1 Pedro 4:11; Filipos 4:13.

Ti Pannakailasin iti “Dakkel a Bunggoy”

Idi 1935, naidestinuak iti sabali a bangir ti dakkel a kontinente ti Australia. Iti kasta, iti sumagmamano a tawen kalpasanna, nagserbiak kas maysa a payunir a ministro iti aglawlaw ti distrito ti New England iti estado ti New South Wales, agarup 4,000 a kilometro ti kaadayona iti dati a pagnanaedak idiay Perth.

Makiramramanak idi kadagiti emblema a tinapay nga awan lebadurana ken nalabaga nga arak iti tinawen a Panglaglagip iti ipapatay ni Jesus. Nupay isu daytoy ti naibilang nga umiso nga aramiden, nangruna kadagiti naregta nga amin-tiempo a ministro, pulos a diak narikna nga addaanak iti nailangitan a namnama. Kalpasanna, idi 1935, nailawlawag kadakami nga adda maur-urnong a dakkel a bunggoy a mangnamnama nga agbiag nga agnanayon ditoy daga. Adu kadakami ti naragsakan a nakaammo a pasetnakami dayta a dakkel a bunggoy, ket simmardengkamin a makiramraman kadagiti emblema. (Juan 10:16; Apocalipsis 7:9) Ti kinapudno ti Biblia ket in-inut a rumanraniag, kas inkari ni Jehova.​—Proverbio 4:18.

Dagiti Baro a Pamay-an ti Panangasaba

Idi ngalay ti 1930’s, rinugianmi nga usaren ti ponograpo iti ministeriomi. Iti kasta, kasapulan a mayaramidan ti bisikletami iti kargadera iti sango ken likud saan laeng a maipaay kadagiti nadadagsen a ponograpo no di pay ket kadagiti plaka ken bagmi a naglaon iti literatura. Kasapulan nga agannadak no napno ti bisikletak agsipud ta no matumba dayta, nakadagdagsen tapno bangonek manen!

Iti dayta met la a panawen a rinugianmi ti maaw-awagan nga information marches. Iti pannagnami kadagiti kangrunaan a kalsada dagiti ili, agukkorkam kadagiti plakard, wenno sandwich sign, a mangipakpakita kadagiti makaawis-atension nga slogan. Nakitak daytoy a trabaho a maysa a naisangsangayan a narikut a pannubok iti pammati, nangruna idi inaresto ken impupokdak nga agpatnag iti maysa a bassit a selda iti ili ti Lismore. Dakkel a pannakaibabain ti panangisaklangda kaniak iti korte kabigatanna a didak man la pinalubosan a mangsagaysay iti buokko! Ngem naminsan pay a sinaranaynak ni Jehova kas inkarina. Naabsuelto ti kaso gapu ta ti laeng pammabasol ti nangaresto a polis ket manginsulto kano iti relihionna ti plakard nga awitko.

Panagsubli Idiay Laud

Idi rugrugi ti 1940’s, natudingannak manen nga agpayunir kadagiti nasulinek nga ili idiay Western Australia. Ditoy nga intultuloyko a tinagiragsak dagiti nakallalagip a kapadasan ken dagiti naespirituan a bendision. Kabayatan iti panagserbik idiay Northam, nasarakak ti maysa nga okupado nga agtagibalay, ni Flo Timmins, ag-11 a kilometro ti kaadayona iti ili. Inawatna ti libro a Reconciliation, ket di nagbayag nagbalin a dedikado a Saksi ni Jehova a Dios. Aktibo pay laeng nga agserserbi iti Pagarian, ken ti anakna a babai, nga idi ket uppat ti tawenna pay laeng, ket dimmakkel a nagbalin a maysa nga special pioneer a ministro.

Ngem adda pay dagiti nakallalagip a kapadasan. Iti naminsan, bumalballasiwkam iti kaduak iti maysa a rangtay idiay Northam a nakalugan iti kalesa, idi kellaat a nagtaray ti kabalio a nakaparpardas, a kasta unay ti butengmi iti ngatuen dagiti umal-alikuno a danum ti Avon River. Kalpasan ti nasurok ngata a maysa a kilometro a panagtaray, bimmuntog ti kabalio.

Pannakiasawa ken Maysa a Pamilia

Idi 1950, nakikallaysaak ken Arthur Willis, a payunir met iti adu a tawen. Nagnaedkami idiay Western Australia iti ili ti Pingelly, a sadiay naparaburankami iti maysa nga anak a lalaki, ni Bentley, ken maysa nga anak a babai, ni Eunice. Idi dandanin agturpos dagiti ubbing, inkeddeng ni Arthur ti agpayunir manen. Ti nasayaat nga ulidan ti amada ti nangparegta kadagiti annakmi a mangrugi nga ag-regular pioneer apaman a kualipikadodan.

Masansan nga itugot ni Arthur dagiti ubbing kadagiti adayo a lugar iti away tapno mangasaba. No dadduma, agbayagda sadiay iti uneg ti makalawas wenno nasursurok pay, nga agtoltoldada kada rabii. No kasdiay nga awanda, mabatiak iti balay a mangasikaso ti negosio ti pamiliami a panaglako kadagiti muebles, a namagbalin a posible iti panagpayunirda a tallo.

Panagserbi Kadagiti Aborigine

Iti maysa a bigat a kagapgapu laeng ti pamilia a nangasaba idiay away, adda di ninamnama a bisitami. Isu ket maysa nga Aborigine, a nagsaludsod: “Ania ti rumbeng nga aramidek tapno makasubliak?” Kasta unay ti siddaawmi idi damo. Kalpasanna naammuan ni Arthur nga isu ket maysa a nailaksid a tao iti kongregasion Kristiano iti adun a tawen gapu iti panagbartek. Manipud idin naaddaan iti dakes a pakasarsaritaan gapu iti nalabes a panaginum ken panagutang.

Inlawlawag ni Arthur no ania ti rumbeng nga aramidenna tapno makasubli iti nadalus nga organisasion ni Jehova. Siuulimek a pimmanaw a saan unay a nagsasao, ket aminkami ti nagpanunot no ania ti aramidenna. Awan uray maysa kadakami ti nanginanama iti napasamak iti simmaruno a sumagmamano a bulan. Kasla di nakappapati dagiti panagbalbaliw nga inaramid daydiay a lalaki! Saan laeng a simmardeng a nagbartek no di pay ket sinarungkaranna dagiti tattao iti distrito, nga impalagipna kadakuada dagiti utangna, ket kalpasanna binayadanna ti utangna! Itatta isu ket maysa manen a kabsat iti pammati, ket naminsan nagserbi kas payunir a ministro.

Adu dagiti Aborigine idiay Pingelly, ket tinagiragsakmi ti kasta unay a makapnek a ministerio, a tinultulonganmi dagitoy a napakumbaba a tattao a makasursuro ken umawat iti kinapudno ti Sao ti Dios. Anian a makapabileg pammati kaniak ti pannakipaset iti panangtulong kadagiti adu nga Aborigine iti Australia a makaammo iti kinapudno!

Maysa a kongregasion ti naipasdek idiay Pingelly, ket idi damo, kaaduan kadagiti kamengna ket Aborigine. Masapul a suruanmi ti adu kadakuada nga agbasa ken agsurat. Adu ti agil-ilem kadakuada kadagidi a tawtawen, ngem idi agangay in-inut met laeng a rinaem dagiti umili dagiti Saksi nga Aborigine gapu iti nadalus a panagbiagda ken gapu ta mapagtalkanda nga umili.

Ti Di-Maibus a Tulong ni Jehova

Ti ing-ingungotek nga asawa, ni Arthur, a nagserbi iti Dios a simamatalek iti uneg ti 57 a tawen, ket natay idi rugrugi ti 1986. Isut’ rinaraem unay dagiti amin a negosiante idiay Pingelly ken dagiti tao iti distrito. Naminsan manen a sinaranaynak ni Jehova, nga impaayannak ti bileg tapno madaerak daytoy kellaat nga ipupusay ti asawak.

Ti anakko a lalaki, a ni Bentley, ket agserserbi kas maysa a panglakayen idiay makin-amianan a paset ti Western Australia, a sadiay isu ken ti asawana a ni Lorna, pinadakkelda ti pamiliada iti kinapudno. Ti maysa pay a pagtaudan ti dakkel a rag-ok isu ti anakko a babai, a ni Eunice, a nagtultuloy iti panagserbina kas payunir agingga kadagitoy nga aldaw. Agserserbida ken ni lakayna, ni Jeff, a kas payunir. Makipagnanaedak kadakuada ita ken mabembendisionannak nga agserserbi kas auxiliary payunir a kanayon.

Iti uneg ti nasurok nga 60 a tawen, napasarak ti kaitungpalan ti naayat a kari ni Jehova a pabilgenna dagiti adipenna ken tulonganna ida nga agballigi iti aniaman a kasasaad a maipasango kadakuada. Isu ti mangipaay iti aniaman a kasapulantayo no pulos a ditay agduadua wenno iyaleng-aleng isuna. Napatibker ti pammatik gapu ta nariknak ti panagtignay ti ima ti Dios, ket napaneknekak no kasano nga ipaayna ti pammendisionna nga ad-adda pay ngem iti maawatantayo. (Malakias 3:10) Pudno la unay, ti Dios dina mabalin ti agulbod!

[Ladawan iti panid 27]

Ni Mary idi 1933

[Dagiti Ladawan iti panid 29]

Da Mary ken Arthur kadagiti maudi a tawenda