Apay a Rumbeng nga Interesadokayo iti Relihion?
ITI tunggal pagilian iti rabaw ti daga, adda dagiti interesado iti relihion. Iti sabali a bangir, adu met ti agkuna a sipaprangka a saanda nga interesado iti relihion. Ngem kasta aya a kanayon ti panagriknada?
Ti pakabuklan ti tao ipakitana a saan a mapnek ti tao kadagiti material a banag laeng. Kasapulan ti tao ti espiritualidad. Ti inaldaw a panagbiag a naipamaysa iti pananggun-od kadagiti pisikal a kasapulan laeng, a mabaetbaetan iti sagpaminsan a panaglinglingay, dina mapennek a naan-anay dagiti akin-uneg a kasapulan ti maysa a tao. Saan a kas kadagiti animal, kayat ti tao a maammuan no, ‘Ania ti panggep ti biag?’ ‘Kastoy lattan aya daytoy ababa a biag, nga adu ti makaay-ayo ken adu met ti nalaad?’ Naisaludsodyo kadin dagitoy?
Kaskasdi, riniwriw a tao a sibibiag ita ti dimmakkel kadagiti lugar a nangupay iti aniaman a pudpudno nga interes iti relihion. Mabalin a nagtaud dayta nga impluensia kadagiti dadakkelda, mannursuro, kakadua, wenno uray iti gobierno.
Inlawlawag ni Skalabrino, maysa a baro a taga-Albania, nga iti sidong ti turay a Komunismo naisuro kadagiti tattao nga awan ti Dios. Maysa pay, napeggad kadakuada a pagsasaritaan ti relihion; no pagsasaritaanda dayta mabalin a maibaludda. Ngem, idi 1991, idi adda idiay Switzerland kas maysa a refugee, isut’ naikkan iti gundaway nga agadal iti Biblia. Inawatna. Apay?
Bueno, idiay Albania nadamagna nga adda maysa a libro a kas iti Biblia, ngem awan a pulos ti ammona maipapan iti dayta. Gapuna, idi damo mabalin a saan a ti tarigagayna a makatarus iti Biblia ti kangrunaan a nakatignayanna. Nupay naibaga kenkuana a maadalnanto ti maipapan iti panggep ti Dios iti sangatauan ken iti daga, nakitana a maysa met dayta a gundaway a maparang-ayna ti panangaramatna iti lokal a pagsasao. Di nagbayag, nupay kasta, nabigbigna a pinennek ti maad-adalna ti nasged nga akin-uneg a panagtarigagayna kadagiti naespirituan a banag. Naragsakan a nakaammo maipapan iti baro a lubong nga inkari ti Dios, a sadiay agarinto ti talna, maysa a lubong a dagiti tattao mabalinda ti agbiag nga agnanayon ken tagiragsaken nga aglaplapusanan amin a banag a nasken iti biag. Rimmayray ti interesna idi naammuanna a mabalinda a sangapamiliaan ti agbalin a paset daytoy baro a lubong. Gapu ta dina kayat a bukbukodan ti naimbag a damag, tineleponuanna ti pamiliana idiay Albania tapno iranudna daytoy kadakuada.
Nasdaaw met ni Aleksei, nga agnanaed idiay Russia, iti epekto ti umiso a pannakaammo iti Biblia iti biag ti maysa a tao. Gapu ta naimameg kadagiti parikut ken awan masarakanna a makapnek a panangilawlawag maipapan iti panggep ti biag, pinanggepna ti agpakamatay. Ngem napan pay nga umuna idiay Finlandia tapno sarungkaranna ti maysa a gayyem. Idi nakalugan iti tren nga agturong sadiay, naibagana dagiti parikutna kadagiti nakalugananna. Saksi ni Jehova ti maysa kadagitoy, a nangparegta kenkuana nga agadal iti Biblia agsipud ta makaipaay dayta kadagiti solusion kadagiti kasta a parikut. Nagduadua ni Aleksei. Idi agawiden, kasta met laeng ti napasamak. Adda manen Saksi a nakasaritana a nangibaga kenkuana nga agpadada idi ti parikut ngem nakatulong kenkuana ti Biblia a nangparmek kadagitoy. Pinaregtana met ni Aleksei nga agadal ti Biblia. Idi sumangpet iti pagtaenganna, naguni ti telepono. Ti sabali a gayyemna ti immawag, a makipagad-adal kadagiti Saksi ken nakaragragsak. Napanunot ni Aleksei a nalabit talaga a maipaay ti Biblia ti kasapulanna, ngem ammona a saanna a maawatan dayta no awan ti tumulong kenkuana. Immannugot a makipagadal a regular iti Biblia kadagiti Saksi ni Jehova iti pagtaengan, ken rinugianna ti makigimong. Nabiitna la a naawatan no apay a nakaragragsak dagidiay paidaldalan kadagiti sursuro ti Biblia, nupay maipasangoda met kadagiti parikut a gagangay iti sangatauan.
Buyogen ti nauneg a pannakaawat iti pakabuklan ti tao, kinuna ni Jesu-Kristo: “Saan laeng a tinapay ti mabalin a pagbiag ti tao.” (Mateo 4:4, The New English Bible) Kinunana pay: “Naragsak dagidiay sipapanunot iti naespirituan a kasapulanda.” (Mateo 5:3) Naragsakda agsipud ta sipapanunotda a naan-anay iti kasapulanda, mangaramidda kadagiti umiso nga addang tapno mapennekda dayta, ken mapaspasaranda ti pammendision ti Dios. Nupay kasta, saan a mapennek ti naespirituan a kasapulantayo babaen ti basta pannakikameng laeng iti maysa nga iglesia wenno itatabuno kadagiti relihiuso a serbisio. Mabalin a makaabbukay iti rikna ti relihion a naipamaysa kangrunaanna iti ritual, ngem mangipaay aya kadagiti napaypayso a solusion kadagiti parikut iti biag? Uray pay no itantandudo ti maysa a relihion dagiti napateg ken nasayaat a prinsipio, no dina mailawlawag ti pudpudno a panggep ti biag, mapennekna aya ti naespirituan a kasapulanyo? Napatpateg pay, mangiturong aya ti panangalagad iti kasta a relihion iti nasayaat a relasion iti Dios? No awan dayta, saantay a magun-od ti pudpudno a pannakapnek.
Iti daytoy banag, adu a tao ti agbirbirok iti maysa a banag a saanda pay a nasarakan.
[Ladawan iti panid 3]
Pudpudno kadi a mapennek dagiti naespirituan a kasapulanyo babaen ti pannakikameng iti maysa nga iglesia?
[Ladawan iti panid 4]
Nasarakan dagiti adu nga idi naawatanda ti Biblia, naaddaan ti biagda iti baro a kaipapanan