Siraragsak a Panagpasakop iti Autoridad
“Nagbalinkayo a natulnog manipud iti puso.”—ROMA 6:17.
1, 2. (a) Ania nga espiritu ti agraraira iti lubong ita, ken ania ti gubuayanna ken ti epektona? (b) Kasano nga ipakpakita dagiti dedikado nga adipen ni Jehova a naidumada?
MAKAPAKIGTOT ti panagraira iti kaaldawantayo “ti espiritu nga agtigtignay ita kadagiti annak ti kinasukir.” Maysa dayta nga espiritu ti di malapdan a panagwaywayas, nga aggapu ken Satanas, ti “agturay iti pannakabalin ti angin.” Addaan daytoy nga espiritu, daytoy nga “angin,” wenno dominante a managimbubukod ken nasukir a kababalin, iti “kinaturay,” wenno pannakabalin, iti kaaduan iti sangatauan. Daytoy ti maysa a makagapu no apay a mapaspasaran ti lubong ti maawagan krisis ti autoridad.—Efeso 2:2.
2 Makaparagsak, saan a pumpunnuen dagiti dedikado nga adipen ni Jehova ita dagiti naespirituan a baráda iti daytoy narugit nga “angin,” wenno espiritu ti yaalsa. Ammoda nga “um-umayen ti pungtot ti Dios kadagiti annak ti kinasukir.” Innayon ni apostol Pablo: “Gapuna dikay agbalin a mannakiraman kadakuada.” (Efeso 5:6, 7) Ngem ketdi, ikagkagumaan dagiti pudno a Kristiano ti “mapno iti espiritu [ni Jehova],” ken umin-inumda iti “sirib manipud ngato,” a “nadalus, sumaganad natalna, nainkalintegan, sisasagana nga agtulnog.”—Efeso 5:17, 18; Santiago 3:17.
Situtulok a Panagpasakop iti Kinasoberano ni Jehova
3. Ania ti tulbek iti situtulok a panagpasakop, ken ania a dakkel a leksion ti isuro kadatayo ti historia?
3 Ti tulbek iti situtulok a panagpasakop isu ti panangbigbig iti lehitimo nga autoridad. Ipakita ti pakasaritaan ti sangatauan a ti panangilaksid iti kinasoberano ni Jehova saan a mangyeg iti kinaragsak. Saan a nangyeg ti kasta a panangilaksid iti kinaragsak kada Adan ken Eva, kasta met iti nangisungsong iti yaalsada, ni Satanas a Diablo. (Genesis 3:16-19) Iti agdama a nagdakes a kasasaadna, addaan ni Satanas iti “dakkel nga unget” ta ammona nga ababan ti tiempona. (Apocalipsis 12:12) Ti kinatalna ken kinaragsak ti sangatauan, wen, ti intero nga uniberso, agpannuray iti sapasap a panangbigbig iti nalinteg a kinasoberano ni Jehova.—Salmo 103:19-22.
4. (a) Ania a kita ti panagpasakop ken panagtulnog ti kayat ni Jehova nga ipakita dagiti adipenna? (b) Iti ania a rumbeng a kumbinsidotayo, ken kasano nga inyebkas ti salmista daytoy?
4 Kaskasdi, gapu kadagiti nakaskasdaaw pannakatimbengda a kababalinna, saan a mapnek ni Jehova iti mapilpilit a panagtulnog. Ay, wen, isu ket mannakabalin! Ngem saan a naulpit. Isu ket maysa a Dios ti ayat, ken kayatna nga agtulnog kenkuana dagiti nasaririt a parsuana a situtulok, gapu iti ayat. Kayatna nga agpasakopda iti kinasoberanona gapu ta naimpusuan a pinilida ti maipasidong iti nalinteg ken lehitimo a turayna, a kumbinsidoda nga awanen ti nasaysayaat pay kadakuada ngem ti agtulnog kenkuana iti agnanayon. Ti panagrikna ti kita ti tao a kayat ni Jehova iti unibersona ket kas iti panagrikna ti salmista a nangisurat: “Ti linteg ni Jehova awan pagkuranganna, pabaruenna ti kararua. Ti pammalagip ni Jehova manamnama, pagsiribenna ti nanengneng. Dagiti alagaden ni Jehova nalintegda, pagragsakenda ti puso; ti bilin ni Jehova nasin-aw, lawaganna dagiti mata. Ti buteng ken Jehova nadalus, agtalinaed nga agnanayon. Dagiti hudisial a pangngeddeng ni Jehova pudnoda; nalintegda amin a padapada.” (Salmo 19:7-9) Naan-anay a panagtalek iti kinaumiso ken kinalinteg ti kinasoberano ni Jehova—masapul a daytoy ti kababalintayo no kayattay ti agbiag iti baro a lubong ni Jehova.
Siraragsak a Panagpasakop iti Aritayo
5. Kasano a nagunggonaan ni Jesus gapu iti panagtulnogna, ken ania ti sidadaan a bigbigentayo?
5 Ni Jesu-Kristo a mismo ti kasayaatan nga ulidan ti panagpasakop iti nailangitan nga Amana. Mabasatayo nga “impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.” Innayon ni Pablo: “Gapu itoy met laeng a rason isu intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket tunggal dila bigbigenda koma a sipapanayag a ni Jesu-Kristo ket Apo a maipaay a dayag ti Dios nga Ama.” (Filipos 2:8-11) Wen, siraragsak nga agparintumengtayo iti sanguanan ti Panguluen ken agturturayen nga Aritayo, ni Kristo Jesus.—Mateo 23:10.
6. Kasano a pinaneknekan ni Jesus nga isu ket maysa a saksi ken panguluen kadagiti il-ili, ken kasano nga agtultuloy ti “panangituray[na]” kalpasan ti dakkel a rigat?
6 Maipapan ken Kristo a Panguluentayo, impadto ni Jehova: “Adtoy! Isu ti intedko a maipaay a saksi kadagiti il-ili a mangipangulo ken agturay kadagiti il-ili.” (Isaias 55:4) Babaen ti ministeriona ditoy daga ken panangiturongna iti trabaho a panangasaba manipud langit kalpasan ti ipapatay ken panagungarna, pinaneknekan ni Jesus ti bagina kas maysa a “matalek ken napudno a saksi” ni Amana kadagiti tattao iti amin a nasion. (Apocalipsis 3:14; Mateo 28:18-20) Dagiti kasta nga il-ili ket ibagian ita ti dumakdakkel a bilang ti “dakkel a bunggoy,” a makalasatto iti “dakkel a rigat” iti panangipangulo ni Kristo. (Apocalipsis 7:9, 14) Ngem saan nga agpatingga dita ti panangipangulo ni Jesus. Agpautto ti “panangiturayna” iti sangaribu a tawen. Kadagiti natulnog a tattao, agtignayto a maitunos iti naganna a “Nakaskasdaaw a Mamagbaga, Mannakabalin a Dios, Agnanayon nga Ama, Prinsipe ti Kappia.”—Isaias 9:6, 7; Apocalipsis 20:6.
7. No kayattay nga iturongnatayo ni Kristo Jesus “kadagiti ubbog ti dandanum ti biag,” aniat’ masapul nga aramidentayo nga awan panagtaktak, ken aniat’ rumbeng nga aramidentayo tapno ayatendatayo da Jesus ken Jehova?
7 No kayattay ti magunggonaan manipud “kadagiti ubbog ti dandanum ti biag” a pangiturongan ti Kordero, ni Kristo Jesus, kadagiti nalinteg-panagpuspusoda a tattao, masapul a paneknekantayo nga awan panagtaktak babaen ti tignaytayo a siraragsak nga agpasakoptayo iti autoridadna kas Ari. (Apocalipsis 7:17; 22:1, 2; idiligyo ti Salmo 2:12.) Kinuna ni Jesus: “No ayatendak, tungpalenyonto dagiti bilinko. Ti addaan kadagiti bilinko ket tungpalenna ida, dayta a maysa isu ti agayat kaniak. Kasta met ti agayat kaniak ayatento ni Amak, ket isu ayatekto.” (Juan 14:15, 21) Kayatyo kadi nga ayatendakayo da Jesus ken ni Amana? No kasta, agpasakopkayo iti autoridadda.
Siraragsak nga Agtulnog Dagiti Manangaywan
8, 9. (a) Ania ti inted ni Kristo maipaay iti pannakapabileg ti kongregasion, ket iti ania a pamay-an a rumbeng nga agbalin dagitoy a lallaki a pagulidanan ti arban? (b) Kasano a naisimbolo iti libro nga Apocalipsis ti panagpasakop dagiti Kristiano a manangaywan, ken kasano ti pananggun-odda iti “natulnog a puso” iti panangtaming kadagiti hudisial a banag?
8 “Ti kongregasion agpaspasakop iti Kristo.” Kas Manangaywan daytoy, nangted [ni Kristo] kadagiti “sagut a tattao” maipaay iti “pannakapabileg” ti kongregasion. (Efeso 4:8, 11, 12; 5:24) Naibilin kadagitoy naespirituan a lallakay nga ‘ipastoranda ti arban ti Dios nga adda iti aywanda,’ a saanda nga ‘iturayan dagidiay tawid ti Dios, no di ket agbalinda a pagulidanan ti arban.’ (1 Pedro 5:1-3) Ni Jehova ti akinkukua iti arban, ket ni Kristo ti “naimbag a pastor” daytoy. (Juan 10:14) Yantangay siuumiso a namnamaen dagiti manangaywan ti situtulok a pannakitunos dagiti karnero nga impaaywan kadakuada da Jehova ken ni Kristo, rumbeng nga agbalinda a mismo a nasayaat nga ulidan ti kinamanagpasakop.—Aramid 20:28.
9 Idi umuna a siglo, nairepresentar iti simboliko a pamay-an dagiti napulotan a manangaywan kas adda “iti” makanawan nga ima ni Kristo, a mangipakpakita iti panagpasakopda kenkuana kas Ulo ti kongregasion. (Apocalipsis 1:16, 20; 2:1) Kasta met itatta, rebbeng nga agpasakop dagiti manangaywan kadagiti kongregasion dagiti Saksi ni Jehova iti panangiturong ni Kristo ken ‘ipakumbabada ti bagbagida iti babaen ti mannakabalin nga ima ti Dios.’ (1 Pedro 5:6) No makalikagumanda a mangtaming kadagiti hudisial a bambanag, kas ken Solomon kabayatan dagiti tawtawen ti kinamatalekna, rebbeng nga ikararagda ken Jehova: “Ikkam ngarud ti adipenmo iti maysa a natulnog a puso nga agukom iti ilim, tapno mabalinko nga ilasin ti naimbag ken ti dakes.” (1 Ar-ari 3:9) Ti natulnog a puso tignayenna ti maysa a panglakayen a mangmatmat kadagiti bambanag kas iti panangmatmat da Jehova ken ni Kristo Jesus tapno ti pangngeddeng a maaramid ditoy daga ket umasping la unay iti pangngeddeng a naaramid idiay langit.—Mateo 18:18-20.
10. Kasano nga ikagumaan dagiti amin a manangaywan a tuladen ni Jesus iti panangtratona kadagiti karnero?
10 Kasta met, ikagumaan dagiti agdaldaliasat a manangaywan ken dagiti panglakayen ti kongregasion a tuladen ti panangtrato ni Kristo kadagiti karnero. Saan a kas kadagiti Fariseo, saan a nangipaannurot ni Jesus iti nakaad-adu a paglintegan a narigat a tungpalen. (Mateo 23:2-11) Kinunana kadagiti marakarnero a tattao: “Umaykayo kaniak, dakayo amin a mabambannogan ken nadagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kaririknak ken napakumbaba ti pusok, ket makasarakkayto ti bang-ar a maipaay kadagiti kararuayo. Ta ti sangolko naasi ken ti awitko nalag-an.” (Mateo 11:28-30) Nupay pudno a masapul nga ‘awiten [ti tunggal Kristiano] ti bukodna nga awit,’ laglagipen koma dagiti pastor ti ulidan ni Jesus ken tulonganda dagiti kakabsatda a makarikna a ti aw-awitenda a responsabilidad kas Kristiano ket “naasi,” “nalag-an,” ken makaparagsak nga awiten.—Galacia 6:5.
Teokratiko a Panagpasakop
11. (a) Kasano a ti maysa a tao ket mabalin nga adda panagraemna iti kinaulo ket kaskasdi a saan a pudpudno a teokratiko? Yilustraryo. (b) Ania ti kayat a sawen ti panagbalin a pudpudno a teokratiko?
11 Turay ti Dios ti kayat a sawen ti teokrasia. Ramanen dayta ti prinsipio ti kinaulo a nayebkas idiay 1 Corinto 11:3. Ngem saan la a dayta ti kaipapananna. Mabalin nga agparang nga addaan ti maysa a tao iti panagraem iti kinaulo ket kaskasdi a saan a teokratiko iti naan-anay a kaipapanan ti sao. Kasano a kasta? Kas panangyilustrar, ti demokrasia ket gobierno dagiti umili, ket ti demokrata nadepinar kas “maysa a tao a mamati kadagiti prinsipio ti demokrasia.” Mabalin nga akuen ti maysa a tao nga isu ket demokratiko, makipaset iti panagpipili, ken aktibo pay ketdi a politiko. Ngem no, iti panagtigtignayna, lablabsingenna ti espiritu ti demokrasia ken amin a prinsipio a nainaig iti dayta, maikuna aya nga isu ket pudpudno a demokratiko? Kasta met, tapno pudpudno a teokratiko, ti maysa a tao masapul nga agpasakop iti kinaulo, saan laeng nga iti sao. Masapul a tuladenna dagiti wagas ken kababalin ni Jehova. Masapul a pudpudno nga iturturayan ni Jehova iti amin a pamay-an. Ken tangay ginaladan ni Jehova ti Anakna iti naan-anay a kinaturay, ti panagbalin a teokratiko kaipapananna met ti panangtulad ken Jesus.
12, 13. (a) Ania, iti partikular, ti ramanen ti panagbalin a teokratiko? (b) Ti aya teokratiko a panagpasakop ramanenna ti panangtungpal iti nakaad-adu a paglintegan? Yilustraryo.
12 Laglagipenyo, kayat ni Jehova ti situtulok a panagpasakop a tinignay ti ayat. Kasta ti wagas a panangiturayna iti uniberso. Isu ti mismo a personipikasion ti ayat. (1 Juan 4:8) Ni Kristo Jesus “ti silnag ti dayagna ken ti apag-isu a ladawan ti mismo a kina-isuna.” (Hebreo 1:3) Kalikagumanna kadagiti pudno nga adalanna nga agiinnayatda. (Juan 15:17) Isu a saan laeng a ti panagbalin a managpasakop ti ramanen ti panagbalin a teokratiko no di pay ket ti panagbalin a naayat. Mabalin a gupgopen daytoy a banag kas sumaganad: Turay ti Dios ti kayat a sawen ti teokrasia; ti Dios ket ayat; ngarud, ti teokrasia ket turay ti ayat.
13 Mabalin a panunoten ti maysa a panglakayen a tapno agbalin a teokratiko, rebbeng a tungpalen dagiti kakabsat dagiti amin a kita ti paglintegan. Pinagbalin dagiti dadduma a panglakayen a paglintegan dagiti singasing nga ipapaay “ti matalek ken masirib nga adipen.” (Mateo 24:45) Kas pagarigan, naisingasing idi a tapno nalaklaka a maam-ammo dagiti kakabsat iti kongregasion, nasayaat no baliwbaliwan ti maysa ti pagtugawanna idiay Kingdom Hall. Nairanta daytoy kas maysa a praktikal a singasing, saan a nainget a paglintegan. Ngem mabalin nga agannayas dagiti dadduma a panglakayen a pagbalinen dayta a paglintegan ken panunotenda a dagiti saan a sumursurot iti dayta ket saan a teokratiko. Kaskasdi, mabalin nga adu dagiti nasayaat a rason no apay a kaykayat ti maysa a kabsat a lalaki wenno babai ti agtugaw iti maysa a masnup a lugar. No saan a siaayat nga ikonsiderar ti maysa a panglakayen dagiti kasta a banag, isu kadi a mismo ket pudpudno a teokratiko? Tapno agbalin a teokratiko, “maaramid koma ti isuamin nga ar-aramidyo buyogen ti ayat.”—1 Corinto 16:14.
Siraragsak a Panagserbi
14, 15. (a) Kasano a mapaidaman ti maysa a panglakayen dagiti kakabsat a lallaki wenno babbai iti rag-oda iti panagserbi ken Jehova, ken apay a saan a teokratiko daytoy? (b) Kasano nga impakita ni Jesus nga apresiarenna ti ayat a nayebkas iti panagserbitayo, imbes a ti kaadu ti maipaaytayo? (c) Ania ti rumbeng nga ikonsiderar dagiti panglakayen?
14 Ti panagbalin a teokratiko kaipapananna met ti siraragsak a panagserbi ken Jehova. Ni Jehova isu “ti naragsak a Dios.” (1 Timoteo 1:11) Kayatna nga isut’ pagserbian dagiti agdaydayaw kenkuana a siraragsak. Rebbeng a laglagipen dagidiay mangipappapilit kadagiti paglintegan a karaman kadagiti alagaden a masapul a “siaannad a tungpalen” ti Israel ti sumaganad: “Agragragsakkanto iti sango ni Jehova a Diosmo iti amin nga aramidem.” (Deuteronomio 12:1, 18) Rumbeng a maysa a pagragsakan, saan a dadagsen, ti aniaman nga aramidentayo iti panagserbi ken Jehova. Dakkel ti maaramidan dagiti panglakayen a mamagbalin kadagiti kakabsat a naragsak a mangaramid iti amin a kabaelanda iti panagserbi ken Jehova. Iti kasunganina, no saan a naannad dagiti panglakayen, mabalin a paidamanda dagiti dadduma a kakabsatda iti rag-oda. No, kas pagarigan, mangidiligdiligda, a komendaranda dagidiay nakaragpat wenno nakalab-aw iti promedio nga oras a nabusbos ti kongregasion iti panangasaba ken kasda la babbabalawen dagidiay saan a nakaragpat iti dayta, kasano ngata ti panagrikna dagidiay basbassit ti naireportda nga oras gapu iti nainkalintegan a rason? Saan ngata a riribuken daytoy ti konsiensiada ken paidamanna ida iti rag-oda?
15 Ti sumagmamano nga oras a mabusbos dagiti dadduma iti publiko a panangpaneknek mabalin nga itakderanda ti dakdakkel a panagregget ngem ti adu nga oras a busbusbosen dagiti dadduma iti panangasaba, gapu ta ub-ubingda, nasalsalun-atda, ken gapu kadagiti dadduma pay a kasasaad. Iti daytoy a banag, di rumbeng nga ukomen ida dagiti panglakayen. Kinapudnona, ni Jesus ti nangtedan ti Ama “iti kinaturay a mangukom.” (Juan 5:27) Binabalaw aya ni Jesus ti napanglaw a balo a babai gapu ta basbassit ti naipaayna ngem iti promedio? Saan, ammona no ania ti kaipapanan dagiti dua a babassit a sinsilio iti dayta a balo. Dagitoy “ti isuamin nga adda kenkuana, ti amin a pagbiagna.” Anian a naguneg a panagayat ken Jehova ti intakderan dagitoy! (Marcos 12:41-44) Rumbeng kadi a yaleng-aleng dagiti panglakayen ti naayat a panagregget dagidiay a ti kabaelanda nga ipaay ket basbassit ngem iti “promedio” no numero ti pagsasaritaan? No panagayat ken Jehova ti pagsasaritaan, mabalin a nangatngato ngem iti promedio dagiti kasta a panagregget!
16. (a) No mangaramat dagiti panglakayen kadagiti numero kadagiti palawagda, apay a kasapulanda ti pannakaawat ken kinatimbeng? (b) Kasano a matulongan dagiti kakabsat a mangparang-ay iti panagserbida?
16 Dagitoy kadi nadakamat ket rumbeng a pagbalinen ita a baro a “paglintegan” a dagiti numero—uray dagiti promedio—ket rumbeng a saan a pulos a madakamat? Saan! Ti punto ket, natimbeng koma dagiti manangaywan iti panangparegta kadagiti kakabsat a mangpalawa iti ministerioda ken iti panangtulong kadakuada a mangaramid iti amin a kabaelanda a siraragsak. (Galacia 6:4) Iti pangngarig ni Jesus maipapan kadagiti talento, intalek ti apo dagiti sanikuana kadagiti adipenna “tunggal maysa sigun iti bukodna a kabaelan.” (Mateo 25:14, 15) Kasta met, rumbeng nga ikonsiderar dagiti panglakayen dagiti kabaelan ti tunggal agibumbunannag iti Pagarian. Kalikaguman daytoy ti pannakaawat. Mabalin a dagiti dadduma, iti kinapudnona, kasapulanda ti pammaregta a mangaramid iti ad-adu pay. Mabalin nga apresiarenda ti tulong iti panangpasayaat iti panangorganisar iti aktibidadda. Aniaman ti kasasaad, no matulongan ida a mangaramid iti amin a kabaelanda a buyogen ti rag-o, mabalin a dayta a rag-o ti mangpabileg kadakuada a mangpalawa iti Nakristianuan nga aktibidadda no la ket posible.—Nehemias 8:10; Salmo 59:16; Jeremias 20:9.
Ti Talna nga Agtaud iti Siraragsak a Panagpasakop
17, 18. (a) Kasano a ti siraragsak a panagpasakop mangyeg kadatayo iti talna ken kinalinteg? (b) Ania ti magun-odantayo no pudpudno nga ipangagtayo dagiti bilin ti Dios?
17 Mangyeg kadatayo iti dakkel a talna ti siraragsak a panagpasakop iti lehitimo a kinasoberano ni Jehova. Kinuna ti salmista iti kararagna ken Jehova: “Dakkel a talna ti maadda kadagiti agayat iti lintegmo, ket awan kadakuada ti pakaitibkolan.” (Salmo 119:165) No tungpalentayo ti linteg ti Dios, magunggonaantayo. Kinuna ni Jehova iti Israel: “Kastoy ti kuna ni Jehova, ti Mannubbotmo, ti Santo ti Israel: ‘Siak ni Jehova a Diosmo, a mangisuro kenka a maipaay iti pagimbagam, a mangiturong kenka iti dalan a rumbeng a pagnaam. O no impangagmo la koma dagiti bilinko! Iti kasta ti talnam kasla koma iti maysa a karayan, ken ti kinalintegmo kasla koma kadagiti dalluyon ti baybay.’”—Isaias 48:17, 18.
18 Ti daton a subbot ni Kristo pakikappiaennatayo iti Dios. (2 Corinto 5:18, 19) No addaantayo iti pammati iti makasubbot a dara ni Kristo ken sipapasnek nga ikagumaantayo a parmeken dagiti pagkapuyantayo ken aramiden ti pagayatan ti Dios, mabang-arantayo manipud iti rikna a nakabasol. (1 Juan 3:19-23) Ti kasta a pammati, a napakuyogan iti aramid, ikkannatayo iti nalinteg a takder iti imatang ni Jehova ken iti nakaay-ayat a namnama a makalasat “iti dakkel a rigat” ken agbiag nga agnanayon iti baro a lubong ni Jehova. (Apocalipsis 7:14-17; Juan 3:36; Santiago 2:22, 23) Magun-odantayo amin dagitoy ‘no ipangagtayo dagiti bilin ti Dios.’
19. Iti ania nga agpannuray ti kinaragsaktayo ita ken ti namnamatayo iti biag nga agnanayon, ken kasano nga inyebkas ni David ti naimpusuan a pammatitayo?
19 Wen, agpannuray ti kinaragsaktayo ita ken ti namnamatayo iti biag nga agnanayon iti paraiso a daga iti sirarag-o a panagpasakop iti kinaturay ni Jehova kas Soberano nga Apo ti uniberso. Sapay koma ta ti panagriknatayo a kanayon ket kas iti panagrikna ni David, a nangikuna: “Kukuam, O Jehova, ti kinadakkel ken ti pannakabalin ken ti gloria ken ti balligi ken ti kinadayag; ta amin nga adda kadagiti langlangit ken iti daga kukuam. Kukuam ti pagarian, O Jehova, ket maitan-okka a kas ulo iti rabaw ti isuamin. Ita ngarud, O Diosmi, agyamankami kenka ken idaydayawmi ti nagloriaan a naganmo.”—1 Cronicas 29:11, 13.
Dagiti Punto a Laglagipen
◻ Ania a kita ti panagpasakop ken panagtulnog ti kayat ni Jehova nga ipakita dagiti adipenna?
◻ Kasano a nagunggonaan ni Jesus gapu iti panagtulnogna, ken ania ti masapul a paneknekantayo babaen ti aramidtayo?
◻ Kasano ti rumbeng a panangtulad dagiti amin a manangaywan ken ni Jesus iti panangtratona kadagiti karnero?
◻ Ania ti ramanen ti panagbalin a teokratiko?
◻ Aniada a bendision ti itden kadatayo ti siraragsak a panagpasakop?
[Ladawan iti panid 24]
Paregtaen dagiti panglakayen ti arban a siraragsak a mangaramid iti amin a kabaelanda
[Ladawan iti panid 26]
Maragsakan ni Jehova kadagidiay agtulnog kenkuana manipud iti puso