Makaad-adalkay Aya iti Naindaklan nga Instruktortayo?

“NAGADALAK iti kinaabogado iti lima a tawen iti maysa kadagiti kasasayaatan nga unibersidad idiay España,” inlawlawag ni Julio. “Ngem ti naammuak idi nangrugiak nga agadal iti Biblia ket nasaysayaat nga amang. Insuronak ti unibersidad no kasano ti agadal; insuronak ti Biblia no kasano ti agbiag.”

Babaen iti Biblia maammuantay ti pampanunot ti Dios, dagiti prinsipiona, ken pannursurona. Iladawan ti Kasuratan ni Jehova kas ti “Naindaklan nga Instruktor” gapu ta isu ti kalaingan a mannursuro iti uniberso. (Isaias 30:20) Iti literal, iti Hebreo a teksto, Isut’ maawagan kas “dagiti instruktor”​—maysa a pangkaaduan a mangipasimudaag iti kinalaing. Rumbeng nga ipalagip daytoy kadatayo a ti panagpaisuro ken Jehova ket nasaysayaat nga amang ngem iti panagsursuro iti sidong ti sabali a mannursuro.

Praktikal a Sirib Manipud ken Jehova

Apay a makagunggona unay ti nadiosan a sursuro? Umuna iti amin, gapu iti nakapatpateg a linaonna. Ti pannursuro ni Jehova mangted kadatayo iti ‘praktikal a kinasirib.’ Mainayon pay, ti inted-Dios a kinasirib “igagana ti biag” dagidiay mangipakat iti dayta.​—Proverbio 3:21, 22; Eclesiastes 7:12.

Nabigbig ti mammutar ti Salmo 119 a ti sirib ni Jehova ti nangsalaknib kenkuana iti intero a panagbiagna. Kas pagarigan, inkantana: “Ti linteg ti ngiwatmo nasayaat kaniak ngem rinibu a balitok ken pirak. No saan koma a ti lintegmo ti linglingayko, natayakon koma idi iti sennaayko. Dagiti bilbilinmo pagbalinendak a nanaknakem ngem dagiti kabusorko, ta agnanayonda kaniak. Ad-adda ti pannakaawatko ngem amin dagiti mannursuro kaniak, ta dagiti pangpaneknekmo isuda ti ut-utobek.”​—Salmo 119:72, 92, 98, 99.

Saan la a ti salmista ti kakaisuna a ‘natay koman iti sennaayna,’ no saan a gapu iti linteg ni Jehova. Ni Rosa, maysa nga agtutubo a babai a taga-España, ket nakumbinsir a naispal ti biagna gapu ta inyaplikarna dagiti nadiosan a prinsipio. “Idi agtawen ti 26, namindua a darasen a ginandatko ti agpakamatay,” linagipna.

Naigamer ni Rosa iti panagbalangkantis, kasta met iti alkohol ken panagabuso iti droga. “Maysa nga aldaw, idi naimamegak iti kinaawan namnama,” kunana, “maysa a pagassawaan a Saksi ti nakisarita kaniak no kasano a makatulong ti Biblia kadatayo a mangrisut kadagiti parikuttayo. Rinugiak ti agadal iti Sao ti Dios, a nasarakak a makaay-ayo. Iti las-ud ti makabulan naaddaanak iti bileg a mangdalus iti biagko ken mangabaruanan. Ita ta addaanakon iti panggep iti biag, diakon kasapulan ti agpannuray iti alkohol wenno kadagiti droga. Ken tangay tarigagayak unay ti agbalin a gayyem ni Jehova, determinadoakon nga agbiag a mayannurot kadagiti pagalagadanna. No saan a gapu kadagiti praktikal a kinasirib ti Sao ti Dios, sigurado a nagpakamatayak koma itan.”

Pudno unay, makaispal-biag ti sirib nga aggapu ken Jehova. Ngarud, mabenepisiarantayo saan laeng nga iti napateg a linaon ti nadiosan a sursuro no di pay ket iti pamay-an nga ar-aramaten ni Jehova a mangisuro kadagiti adipenna. Yantangay ti Anak ti Dios, ni Jesu-Kristo, imbilinna kadatayo nga agbalin a mannursuro ken manangaramid-adalan, kayattay nga ammuen dagiti kaepektibuan a pamay-an ti panangisuro.​—Mateo 28:19, 20.

Ti Panangaramat ni Jehova Kadagiti Ilustrasion

Kunaen ti Ebanghelio ni Marcos a “no awan ti pangngarig di agsao [ni Jesus] kadakuada.” (Marcos 4:34) Saan a makapasiddaaw daytoy a pamay-an ti panangisuro ni Jesus. Tinuladna laeng ti maysa kadagiti pamay-an a pannakaidanon dagiti naimpadtuan a mensahe ni Jehova iti nasion ti Israel. Naglaon dagitoy kadagiti napnuan ladawan nga ilustrasion.​—Isaias 5:1-7; Jeremias 18:1-11; Ezequiel 15:2-7; Oseas 11:1-4.

Imutektekanyo, kas pagarigan, no kasano ti panangusar ni Jehova iti maysa a nabileg nga ilustrasion a mangisuro kadatayo nga awan serserbi dagiti idolo. Kunaen ti Isaias 44:14-17: “Adda tao a ti trabahona ket mangpukan kadagiti sedro; ken alaenna ti maysa a kita ti kayo, nagdakkelan pay ketdi a kayo . . . Mangimula iti parwa, ket . . . aramatento ti maysa a tao a pagpuor. Isu a mangala iti paset dayta ket aginudo. Wen, isu ti pasgedanna, ken agluto iti tinapay. Mangaramid met iti maysa a dios a pagrukbabanna. Aramidenna dayta a maysa a kinitikitan a ladawan, ket agparintumeng iti dayta. Puoranna ti kagudua dayta iti apuy. Iti kagudua dayta pagitunuanna iti lasag a sidaenna, ket mabussog. . . . Ngem ti matda kenkuana aramidenna a maysa a dios, nga isu ti kinitikitan a ladawan. Isu agrukbab itoy ken aglualo kenkuana ken kunana: ‘Isalakannak ta sika ti diosko.’” Dagiti ilustrasion a kas itoy ket nabileg a pamay-an iti panangtulong kadagiti nasingpet-panagpuspusona a tattao a mangilaksid iti idolatria ken iti ulbod a sursuro.

Dagiti Makasukisok-Kararua a Saludsod

Naglaon met ti Biblia kadagiti pagarigan no kasano nga ilinteg ni Jehova ti panagpampanunot ti dadduma nga ad-adipenna babaen dagiti mamagpanunot a saludsod. Ni patriarka a Job ti maysa kadagitoy. Siaanus a tinulongan ni Jehova a mangsukimat iti kinanumona no maidilig iti Dios. Naaramid daytoy babaen dagiti agsasaganad a saludsod, a pulos di masungbatan ni Job.

“Sadino aya ti yanmo idi inkabilko dagiti pamuon ti daga?” sinaludsod ni Jehova ken ni Job. “Asino aya ti nangpunit ti taaw kadagiti ruruangan? . . . Mareppetmo aya ti rummuok ti Kimah, wenno mapalukayam dagiti patapat ti Kesil? . . . Adda aya maysa a takkiagmo a kas iti pudno a Dios?” Dagitoy mamagpakumbaba a saludsod iramanna ti nagpateg a saludsod: “Pagbiddutennakto [ni Jehova] aya, tapno mapalintegka koma?”​—Job 38:4, 8, 31; 40:8, 9.

Dagitoy makasukisok a saludsod ti nangipabigbig ken Job nga isut’ nagsao nga awanan pannakaawat. Gapuna, pinagbabawyanna ti insaona ket nagbabawi. (Job 42:6) Kas iti daytoy a kaso, dagiti napili a salsaludsod mabalin a tumulong a mangilinteg iti di umiso a panagpampanunot iti biang dagiti annaktayo wenno dagiti adalan iti Biblia.

Panangpatanor iti Panagtalek

Komusta met no kasapulan a tulongantayo ti maysa a makarikna iti kinaawan serserbi wenno di makabael? Ti makatulong iti daytoy a banag isu ti panagsarita da Jehova ken ni mammadtona a Moises. Idi tinudingan ti Dios ni Moises kas pannakangiwatna iti sango ni Faraon ken dagiti Israelita, narikna ti mammadto a dina kabaelan nga ibaklay ti naipaaramid kenkuana. “Naullayatak nga agsao ket natabbed ti dilak,” kinunana. Nupay kasta, insungbat ti Dios: “Asino ti nangaramid iti ngiwat ti tao? . . . Saan aya a siak, a Jehova? Inka ngarud ita, ket addaakto iti ngiwatmo ket isurokanto iti sawem.”​—Exodo 4:10-12.

Tinudingan ni Jehova ti kabsat ni Moises a ni Aaron kas pannakangiwatna, ket rinugianda nga ibanag ti trabahoda idiay Egipto. (Exodo 4:14-16) Adu kadagiti Saksi ni Jehova ti addaan iti kas narikna ni Moises a kinaawan kabaelan idi damo a makiramanda iti panagbalaybalay a ministerio wenno iti panangpaneknek iti lansangan. Kas iti kaso ni Moises, ti pannakaammo a saranayennatayo ni Jehova ken kasta met a kuyogennatayo ti maysa nga addaan kapadasan a ministro ti mabalin a tumulong kadatayo a mangparmek iti panagkedkedtayo. No kasano a nabaelan ni Moises a patanoren ti panagtalek agingga iti punto a nakaaramid iti nabibileg a bitla a masarakan iti intero a libro ti Biblia a Deuteronomio, babaen ti tulong ni Jehova mapatanortay met ti abilidadtayo nga agsao.

Maysa a Praktikal a Pagarigan

Nakapatpateg met ti napasnek a tarigagay a tumulong kadagiti dadduma. Dayta ti kababalin nga awan ken ni mammadto a Jonas. Tinudingan ni Jehova ni Jonas a mamakdaar kadagiti umili ti Nineve maipapan iti umad-adani a pannakadadael ti siudad. Makapasiddaaw ta nagbabawi dagiti umili ti Nineve. (Jonas 3:5) Kas banagna, intantan ni Jehova ti didigra. Nupay kasta, imbes a maragsakan unay iti panagballigi ti panangaskasabana, nagpungtot ni Jonas ta saan a natungpal ti impadtona. Kasano a tinulongan ni Jehova a maaddaan iti umiso a panangmatmat?

Nangaramat ni Jehova iti maysa a mula a tabungaw a mangisuro ken Jonas ti kinapateg ti pannakaseknan kadagiti dadduma. Simimilagro a dimmakkel ti mula iti agpatnag ken nangipaay iti makainana a linong ken Jonas, a nangipatakder iti kalapaw iti beddeng ti Nineve. ‘Nagragsak [ni Jonas] iti napalalo’ gapu iti daytoy nanumo a mula. Ngem insagana ni Jehova ti maysa nga igges a nangkibkib iti mula ket nagango daytoy. Gapu ta naibilag iti init ken iti napudot nga angin, nakapungtot ni Jonas ket kinunana: “Nasaysayaat kaniak ti ipapatay ngem ti panagbiag.” (Jonas 4:5-8) Aniat’ maadal iti daytoy?

Nagsao ni Jehova ken ni Jonas ket kinunana: “Kinailalaam ti tabungaw, isu a dika nagbannogan, ken dika met pinatubo, nga iti bayat ti maysa a rabii timmubo, ket iti bayat ti maysa a rabii napukaw. Ket siak awanto ngata ti kaasik iti Nineve, daydiay ili a dakkel, isu a yan ti nasurok a sangagasut ket duapulo a ribu a tattao a dida ammo ti makanawan ken makatigid, malaksid kadagiti adu a dinguen?”​—Jonas 4:9-11.

Anian a nagbileg a praktikal a pagarigan! Ad-adda nga interesado ni Jonas iti mula a tabungaw ngem kadagiti rinibu a tattao. Nupay makomendaran ti pannakaseknan iti aniaman a paset ti pinarsua ti Dios, ti panangtulong a mangispal iti biag dagiti tattao ti kapatgan a trabahotayo.

Panangisuro a Buyogen ti Kinaanus

Kas iti natakuatan ni Jonas, saan a kanayon a nalaka nga itungpal ti ministeriotayo. (2 Timoteo 4:5) Nupay kasta, makatulong ti kinaanus kadagiti sabsabali.

Kasanot’ panagtignayyo no naginad wenno saan a nainkalintegan ti maysa kadagiti yad-adalanyo iti Biblia? Isuro kadatayo ti Naindaklan nga Instruktortayo no kasano a sanguen ti kasta a problema. Isut’ nangipakita iti naisangsangayan a kinaanus idi agsasaruno a sinaludsodan ni Abraham maipapan iti umad-adani a pannakaukom ti Sodoma ken Gomorra. “Pukawem met aya ti nasingpet a maikanunong iti nadangkes?” sinaludsod ni Abraham. “Kas pagarigan adda limapulo a nasingpet iti uneg ti ili,” impakpakaasi ni Abraham. “Pukawem kadi met ida ket dikanto ispalen ti disso maipuon kadagiti limapulo a nasingpet nga adda iti unegna?” Ti sungbat ni Jehova ti nanggutugot ken Abraham nga agtultuloy nga agpakaasi agingga a bimmaba ti bilang iti sangapulo. Ammo ni Jehova a ti laeng pamilia ni Lot ti maikari a maispal, ket naisaganan ti probision tapno maisalakan ti pamilia ni Lot. Ngem siaanus a pinalubosan ti Dios ni Abraham nga agtultuloy nga agsaludsod kenkuana agingga a natarusanna ti kinadakkel ti asi ni Jehova.​—Genesis 18:20-32.

Impakita ni Jehova ti konsiderasion iti limitado a pannakaawat ken ti pannakaseknan ni Abraham. No tarusantay met dagiti limitasion ti yad-adalantayo, tulongannatay dayta a mangipakita ti kinaanus bayat nga ikagumaanna a tarusan ti maysa a partikular a doktrina wenno sarangten ti maysa a naigamer nga aramid.

Itultuloyyo ti Agsursuro ken Jehova

Awan duadua a ni Jehova a Dios ti Naindaklan nga Instruktor. Babaen ti kakasta a pamay-an kas dagiti ilustrasion, saludsod, ken aktual a pagarigan, siaanus nga ipaayna ti pannakaawat. No tuladentay dagiti pamay-an ti panangisurona, agbalintay a mismo a nasaysayaat a mannursuro.

Yantangay dagidiay mangisuro kadagiti sabali rebbeng a dida liwayan nga isuro ti bagbagida, masapul nga itultuloytay ti ‘agpaisuro ken Jehova.’ (Isaias 54:13) Insurat ni Isaias: “Dagiti matam makitadanto ti Naindaklan nga Instruktormo. Ket dagiti lapayagmo makangngegdanto iti maysa a sao iti likudam a kunana: ‘Isu daytoy ti dalan. Magnakayo kenkuana, dakayo a tattao,’ intono agbaw-ingkayo iti makanawan, ken intono agbaw-ingkayo iti makatigid.” (Isaias 30:20, 21) Babaen ti panangitultuloy a magna iti dalan ni Jehova ken panangtulong kadagiti sabali a mangaramid ti kasta, mabalintay ti maaddaan iti naisangsangayan a pribilehio nga agsursuro manipud iti Naindaklan nga Instruktortayo iti agnanayon.

[Ladawan iti panid 28]

Sinaludsod ni Jehova ken Job: “Gapu aya iti bilinmo ti ngumatuan ti agila ket aramidenna ti umokna iti ngato?”

[Ladawan iti panid 28]

Babaen ti maysa a mula a tabungaw, sinursuruan ni Jehova ni Jonas nga agbalin nga ad-adda a maseknan kadagiti tattao