“Manipud iti Ngiwat Dagiti Ubbing”
IDI ubing pay ni Samuel, sititibker a kimpet kadagiti nalinteg a prinsipio iti laksid ti kinadakes dagiti annak a lallaki ti Nangato a Padi a ni Eli. (1 Samuel 2:22; 3:1) Idi kaaldawan ni Eliseo, nangipaay iti nabileg a pammaneknek ti maysa a balasitang nga Israelita a nakayawan idiay Siria iti apona a babai. (2 Ar-ari 5:2-4) Idi agtawen ni Jesus iti 12, situtured a nagsao kadagiti mannursuro ti Israel, a nagsalsaludsod ken nangipaay kadagiti sungbat a namagsiddaaw kadagiti agim-imdeng. (Lucas 2:46-48) Iti intero a historia, simamatalek a nagserserbi ken Jehova dagiti agtutubo a managdaydayawna.
Ipakpakita kadi dagiti agtutubo itatta ti isu met laeng a matalek a kababalin? Wen! Ipakita dagiti report manipud kadagiti sanga nga opisina ti Watch Tower Society a nakaad-adu a manamati nga agtutubo ti ‘mangitulnog iti bagbagida a siaayat’ iti panagserbi ken Jehova. (Salmo 110:3) Dagiti nasayaat a resulta ti panangikagumaanda paregtaenna ti amin a Kristiano, agtutubo ken nataengan, a ‘di sumuko iti panagaramid ti nasayaat.’—Galacia 6:9.
Ti maysa a nasayaat nga ulidan isu ni Ayumi, maysa a balasitang a Haponesa a nagbalin nga agibumbunannag idi agtawen iti innem ken pinagbalinna a kalat ti panangpaneknek kadagiti amin a kaklasena. Isut’ napalubosan a mangikabil iti sumagmamano a publikasion iti libraria ti siled a pagadalan, a nakasagana a mangsungbat iti aniaman a mabalin nga isaludsod dagiti kaeskuelaanna. Gistay kabesado amin dagiti kaklase agraman ti mannursurona dagiti publikasion. Iti las-ud ti innem a tawen a panageskuelana iti elementaria, nakayurnos ni Ayumi ti 13 a panagadal iti Biblia. Nabautisaran idi adda iti maikapat a tukad, ket maysa kadagiti gagayyemna nga inyadalanna ti nabautisaran idi adda iti maikanem a tukad. Maysa pay, ti ina ken dua a manangen daytoy nga estudiante iti Biblia ket nakipagadal ken nabautisaran met.
Maysa a Pammaneknek ti Naimbag a Kababalin
“Taginayonenyo a nasayaat ti kababalinyo iti tengnga dagiti nasion,” kinuna ni apostol Pedro, ket ipappapuso dagiti agtutubo a Kristiano daytoy a bilin. (1 Pedro 2:12) Kas banagna, masansan a mangipaay iti nasayaat a pammaneknek ti naimbag a kababalinda. Idiay Cameroon a pagilian ti Africa, maysa a lalaki ti timmabuno iti maikadua a gundaway iti maysa a gimong ti kongregasion dagiti Saksi ni Jehova ket nairana a nakiabay iti maysa nga ubing a babai. Idi awisen ti agpalpalawag dagiti agdengdengngeg a mangbirok iti maysa a teksto iti Biblia, nadlaw ti lalaki a nabirokan a dagus ti ubing ti bersikulo iti Bibliana ket sipapasnek a nangsurot iti pannakabasa daytoy. Naawis ti lalaki iti kababalin ti ubing ta idi malpas ti gimong, inasitganna ti nagpalawag ket kinunana: “Tinignaynak daytoy nga ubing a makipagadal ti Biblia kadakayo.”
Idiay Sud Africa, adda maysa nga eskuelaan a sadiay adda 25 nga estudiante nga annak dagiti Saksi ni Jehova. Nagbanag iti nasayaat a pakasarsaritaan dagiti Saksi ni Jehova ti naimbag a kababalinda. Impudno ti maysa a mannursuro iti maysa a Saksi a naganak a dina maawatan no kasano a nabaelan dagiti Saksi a sanayen a naimbag dagiti annakda, nangnangruna ta napaneknekan a di kabaelan ti nakaikamenganna nga iglesia a tulongan dagiti agtutubo. Maysa a baro a mannursuro ti dimteng a tumulong iti eskuelaan ket dagus a nadlawna ti naimbag a kababalin dagiti ubbing a Saksi. Sinaludsodna iti maysa kadagiti ubbing a lallaki a Saksi no aniat’ aramidenna tapno agbalin a maysa kadagiti Saksi ni Jehova. Inlawlawagna a rumbeng nga agadal iti Biblia, ken inyurnosna a dagiti nagannakna ti mangsukay iti naipakita nga interes.
Idiay Costa Rica, nailasin ni Rigoberto ti aweng ti kinapudno idi aramaten ti dua a kaklasena ti Biblia a mangsungbat kadagiti saludsodna maipapan iti Trinidad, kararua, ken apuy iti impierno. Naaddaan iti positibo nga epekto kenkuana ti imbagada saan laeng a gapu iti laingda a mangaramat iti Kasuratan no di pay ket gapu iti nagsayaat a kababalinda a naiduma unay iti makitkitana kadagiti iglesia ti Kakristianuan. Iti laksid ti ibubusor ti pamiliana, nasayaat ti panagrang-ay ni Rigoberto iti panagadalna iti Biblia.
Idiay España, dua a Saksi ni Jehova—maysa kadakuada ti agtawen iti siam—ti simmarungkar iti maysa a lalaki nga agnagan Onofre. Nupay ti nataengan a Saksi ti kangrunaan nga agsasao, sursuroten ti agtutubo a Saksi dagiti Kasuratan ken nagadaw iti sumagmamano a teksto iti Biblia a maikabesana. Natignay ni Onofre. Inkeddengna a kayatna ti agadal iti Biblia iti isu met laeng a lugar a nakasursuruan daytoy ubing a lalaki a mangaramat a silalaing iti Kasuratan. Gapuna, nasapa pay iti sumaganad a Domingo, napan idiay Kingdom Hall. Nagur-uray iti ruar agingga iti mumalem, idi dimteng dagiti Saksi tapno makigimongda. Nanipud idin, nasayaat ti panagrang-ayna ket insimbolona ti dedikasionna itay nabiit babaen ti pannakabautisar iti danum.
Dagiti Epektibo nga Agtutubo a Saksi
Wen, us-usaren ni Jehova dagiti agtutubo kasta met dagiti natataengan a mangdanon kadagiti naemmat’ panagpuspusoda. Mapaneknekan nga ad-adda dayta iti maysa a kapadasan manipud Hungary. Sadiay, nadlaw ti maysa a nars iti ospital a tunggal sumarungkar dagiti bisita iti sangapulot’-tawenna a pasiente, itugotanda iti babasaen agraman taraon. Natukay ti interesna ta kayatna a maammuan no aniat’ pagaayat a basaen ti balasitang ket naduktalanna nga isu ti Biblia. Kinasarita ti nars ket kinunana idi kamaudiananna: “Iti damo pay laeng, pudno a sinursuruannakon.” Idi nakaruaren iti ospital ti balasitang, inawisna ti nars a tumabuno iti maysa a kombension, ngem pinaay ti nars. Nupay kasta, kamaudiananna, immanamong a tumabuno iti “Nadalus a Pagsasao” a Kombension Distrito. Di nagbayag kalpasanna, rinugianna ti agadal iti Biblia, ken nabautisaran makatawen kalpasanna—amin ket resulta ti panangaramat ti balasitang ti tiempona iti panagbasbasa iti literatura ti Biblia bayat nga adda idiay ospital.
Ni Ana Ruth, idiay El Salvador, ket adda iti maikadua a tawenna iti haiskul. Ugalina ti agibati iti literatura ti Biblia iti rabaw ti lamisaanna tapno mabasa ti dadduma no kayatda. Nadlawna a maawan sa maisubli ti literatura kalpasan ti sumagmamano a tiempo. Natakuatan ni Ana Ruth a ti maysa a kaeskuelaanna, ni Evelyn, ti mangbasbasa iti dayta. Di nagbayag, nagpayadal ni Evelyn ken rinugianna ti tumabuno kadagiti gimong ti kongregasion. Kamaudiananna, nabautisaran, ket ita agserserbi kas maysa a regular nga auxiliary pioneer. Ni Ana Ruth ket maysa a regular pioneer.
Idiay Panama, rinugian ti maysa a sister a yadalan ti maysa a babai a ti lakayna nangrugi a bumusor iti kinapudno agingga iti punto a dandani naisardeng ti panagadal. Nupay kasta, in-inut a simmayaat ti kababalin ti asawa a lalaki. Sumagmamano a panawen kalpasanna, indawat kenkuana ni manongna, a maysa a Saksi, nga ikabitna ti burglar alarm iti pagtaenganna. Bayat nga ikabkabitna ti alarma, malmalday a simmangpet ti siam-tawenna a kaanakanna a babai. Sinaludsodna [iti ubing] no aniat’ napasamak, ket kinunana a kagapgapuda ken ni manangna a mangyadal koma ti Biblia ngem saanda a nadatngan ti tao, isu nga awan a pulos ti nagapuananna para ken Jehova iti dayta nga aldaw. Kinuna ti ulitegna: “Apay a dinak kasabaan? Iti kasta adda magapuanam maipaay ken Jehova.” Siraragsak a nagtaray ti kaanakanna a mangala iti Bibliana, ket nairugi ti panagadal.
Agdengdengngeg ni nanangna (ti ipag ti lalaki). Impagarupna nga ang-angaw laeng amin dayta, ngem tunggal mapan ti lalaki iti pagtaenganna, idawatna iti kaanakanna a payadalan ti Biblia. Idi makita ti ina a saan nga agang-angaw ni kayongna ken addaan sumagmamano a narikut a salsaludsod, inkeddengna nga idaulona a mismo ti panagadal a kadua ti balasangna. Rinugian ti lalaki ti agadal iti mamindua iti makalawas ket napartak ti irarang-ayna. Kamaudiananna, nagdedikar ket naggiddanda ken ni baketna a nagpabautisar iti maysa nga asamblea—gapu iti nasayaat a kababalin ti ubing a kaanakanna.
Mangipaay iti Nasayaat a Pammaneknek ti Kinatured Dagiti Agtutubo
Kuna ti Biblia: “Bumilegka ket tumured koma ta pusom. Wen, mangnamnamaka ken Jehova.” (Salmo 27:14) Agaplikar dagitoy a sasao kadagiti amin nga adipen ti Dios, ket inyaplikar dagitoy dagiti agtutubo kasta met dagiti nataengan bayat ti napalabas a tawen. Idiay Australia, idi sumrek iti baro nga eskuelaanna ti limat’-tawenna nga ubing a babai, napan ni nanangna iti mannursuro tapno ilawlawagna ti pammati dagiti Saksi ni Jehova. Kinuna ti mannursuro: “Ammokon no ania dagiti patpatienyo. Nailawlawagen kaniak ti anakyo ti amin.” Saan a nagbain daytoy nga ubing a babai nga umasideg nga is-isuna iti mannursurona a mangilawlawag ti pammatina.
Nangipakita met iti tured ti limat’-tawenna a ni Andrea idiay Romania. Idi immikkat ni nanangna iti relihion nga Orthodox tapno agbalin a maysa a Saksi, nagkedked a dumngeg kenkuana dagiti kaarrubana. Maysa nga aldaw iti Panagadal iti Libro ti Kongregasion, nangngegan ni Andrea ti panangipaganetget ti manangaywan iti serbisio iti panagkasapulan a mangasaba kadagiti kaarruba. Pinanunotna a naimbag daytoy, ket idi makaawid kinunana ken ni nanangna: “Apaman a makapanawka nga agturong iti trabaho, bumangonak, kargaak iti literatura ti bagko kas iti ar-aramidem, Nanang, ket agkararagak ken Jehova tapno tulongannak a makisarita kadagiti kaarrubatayo maipapan iti kinapudno.”
Kabigatanna tinungpal ni Andrea ti inkarina. Iti kasta, kalpasan a nakaurnong iti tured, nagtimbre iti ruangan ti maysa a kaarruba. Idi luktan ti kaarruba ti ruangan, kinuna daytoy nga ubing: “Ammok a sipud idi nagbalin a maysa a Saksi ni nanang, diyon kayat isuna. Namin-adu a daras a pinadasnakayo a kasarita, ngem diyo kinayat ti dumngeg kenkuana. Makapaladingit daytoy kenkuana, ngem kayatko a maammuanyo nga ipatpategdakayo.” Kalpasanna, nangipaay ni Andrea iti nasayaat a pammaneknek. Iti las-ud ti maysa nga aldaw, nakaiwaras iti innem a libro, innem a magasin, uppat a bokleta, ken uppat a tract. Manipud idin, kanayonen a rummuar iti tay-ak ti serbisio.
Idiay Rwanda kasapulan nga agbalin a natured dagiti kakabsattayo gapu iti riribuk sadiay. Iti naminsan naipupok ti maysa a Saksi a pamilia iti maysa a kuarto, a sadiay nakasagana dagiti soldado a mangpapatay kadakuada. Indawat ti pamilia a mapalubosanda nga agkararag nga umuna. Napatgan daytoy, ket siuulimekda a nagkararag, malaksid iti anak a babai, a ni Deborah. Sigun iti maysa a report, nagkararag a sipipigsa ni Deborah: “Jehova, ita a lawas nakaipaimakami ken Tatang iti lima a magasin. Kasanokam a makasubli kadagitoy a tattao tapno suruan ida iti kinapudno ken tulongan ida a gumun-od iti biag? Maysa pay, kasanoak nga agbalin nga agibumbunannag ita? Kayatkon ti agpabautisar tapno agserbiak kenka.” Idi mangngegna daytoy, kinuna ti maysa a soldado: “Didakay mabalin a papatayen gapu iti daytoy nga ubing.” Simmungbat ni Deborah: “Pagyamanan.” Naisalakan ti pamilia.
Idi sibaballigi a simrek ni Jesus idiay Jerusalem idi umadanin ti panagngudo ti biagna ditoy daga, isut’ kinablaawan ti umariwekwek, agpukpukkaw a bunggoy. Dagiti ubbing kasta met dagiti natataengan ti mangbukel kadagiti bunggoy. Sigun iti rekord, “agpukpukkaw [dagiti ubbing a lallaki] idiay templo ket kunkunada: ‘Mangisalakanka, ikararagmi, iti Anak ni David!’” Idi nagrurod iti daytoy dagiti papangulo a saserdote ken dagiti eskriba, kinuna ni Jesus: “Dikay aya pulos nabasa daytoy, ‘Manipud iti ngiwat dagiti ubbing ken agsussuso nangipaayka iti dayaw’?”—Mateo 21:15, 16.
Saan aya a makaparagsak a makita nga uray ita pudno ti sasao ni Jesus? “Manipud iti ngiwat dagiti ubbing ken agsussuso”—ken, mabalintay nga inayon, dagiti tin-edyer ken dagiti agtutubo a lallaki ken babbai—maidaydayaw ni Jehova. Wen, no maipanggep iti panangidaydayaw ken Jehova, awan ti naikeddeng nga edad.—Joel 2:28, 29.