Ti Rag-o ni Jehova Isu ti Sarikedkedtayo

“Nasantuan daytoy nga aldaw iti Apotayo, ket dikay lumdaang, ta ti rag-o ni Jehova isu ti sarikedkedyo.”​—NEHEMIAS 8:10.

1, 2. (a) Ania ti sarikedked? (b) Kasano nga impakita ni David nga isut’ nagkamang ken Jehova?

NI Jehova ket maysa a sarikedked nga awan kaaspingna. Ket ania kadi ti sarikedked? Maysa dayta a nabakudan a lugar a pagtalgedan wenno pakaisalakanan. Imbilang ni David iti nagkauna nga Israel ti Dios kas sarikedkedna. Kas pagarigan, usigenyo ti kanta nga indaton ni David iti Kangatuan “idi aldaw a ni Jehova inispalna iti ima dagiti amin a kabusorna ken iti ima ni Saul,” nga ari ti Israel.​—Salmo 18, paulo.

² Rinugian ni David dayta a makaibuyog-rikna a kanta kadagitoy a sasao: “Siak ayatenka, O Jehova a pigsak. Ni Jehova isu ti batok ken sarikedkedko ken Mangispal kaniak. Ti Diosko isu ti batok. Agkamangak kenkuana, a kalasagko ken sara ti pannakaisalakanko, nangato a baluartek.” (Salmo 18:1, 2) Di nainkalintegan a pinagtalaw ken inanup ni Ari Saul, nagkamang ni nalinteg a David ken ni Jehova, no kasano a mabalin nga agkamang ti maysa a tao iti nasarikedkedan a lugar tapno maispal iti didigra.

3. Apay a napasaran dagiti Judio idi kaaldawan ni Esdras ti “dakkel unay a rag-o”?

³ Ti rag-o nga ited ni Jehova ket maysa a nalagda a sarikedked kadagidiay magmagna iti dalanna kas natarnaw a tattao. (Proverbio 2:6-8; 10:29) Siempre, tapno magun-odda ti inted-Dios a rag-o, masapul nga aramiden dagiti tattao ti pagayatan ti Dios. Iti daytoy a banag, usigenyo ti napasamak idiay Jerusalem idi 468 K.K.P. Nangipaay ni Esdras a komukopia ken dagiti sabsabali pay iti pannakaawat babaen ti nabagas a panangibasada iti Linteg. Kalpasanna, ginutugotda dagiti umili: “Inkayon, mangankayo iti nalukmeg a bambanag ken uminumkayo iti nasam-it a bambanag, ket patulodanyo iti apag daydiay a di naisaganaan ti uray aniaman; ta nasantuan daytoy nga aldaw iti Apotayo, ket dikay lumdaang, ta ti rag-o ni Jehova isu ti sarikedkedyo.” Adda idi “dakkel unay a rag-o” bayat nga inyaplikar dagiti Judio ti pannakaammo a nagun-odda ken sirarag-o a rinambakanda ti Piesta dagiti Abong-abong. (Nehemias 8:1-12) Dagidiay a ti ‘rag-o ni Jehova isu ti sarikedkedda’ napabilegda nga agdaydayaw ken agserbi kenkuana. Yantangay ti rag-o ni Jehova ti sarikedkedda, namnamaentayo a rumbeng nga agrag-o met dagiti tattao ti Dios itatta. No kasta, ania ti dadduma kadagiti rason nga agrag-oda kadagitoy nga aldaw?

‘Agrag-okayo iti Isuamin’

4. Ania ti maysa a kangrunaan a gubuayan ti rag-o iti ili ni Jehova?

⁴ Ti maysa a naisangsangayan a pakaigapuan ti panagrag-o isu ti probision ni Jehova maipaay iti panaguummong a sangsangkamaysa. Dagiti asamblea ken kombension dagiti Saksi ni Jehova mangyeg ti rag-o kadakuada itatta, no kasano a dagiti tinawen a piesta a rinambakan dagiti Israelita nangyeg ti rag-o iti pusoda. Naibaga kadagiti umili ti Israel: “Pito nga aldaw a rambakamto ti piesta [dagiti abong-abong] ken ni Jehova a Diosmo iti disso a ni Jehova piliennanto, ta ni Jehova a Diosmo bendisionannakanto iti isuamin nga apitmo ken iti tunggal aramid ti imam, ket agrag-okayto iti isuamin.” (Deuteronomio 16:13-15) Wen, kayat ti Dios nga ‘agrag-oda iti isuamin.’ Pudno met dayta kadagiti pudno a Kristiano, ta ginutugot ni apostol Pablo dagiti kapammatianna: “Kankanayon nga agrag-okayo iti Apo. Maminsan pay a kunaek, Agrag-okayo!”​—Filipos 4:4.

5. (a) Ania ti rag-o, ket kasano a magun-od daytoy dagiti Kristiano? (b) Kasanotay a maaddaan iti rag-o iti laksid dagiti pakasuotan?

⁵ Yantangay kayat ni Jehova nga agrag-otayo, itedna kadatayo ti rag-o kas maysa kadagiti bunga ti nasantuan nga espirituna. (Galacia 5:22, 23) Ket ania kadi ti rag-o? Isu dayta ti makaay-ayo a rikna a patauden ti panangnamnama wenno pannakagun-od iti naimbag. Ti rag-o ket maysa a kasasaad ti napaypayso a kinaragsak, nalaus a ragsak pay ketdi. Daytoy a bunga ti nasantuan nga espiritu ti Dios ti mangpakired kadatayo iti sidong ti pakasuotan. “Gapu iti rag-o a naikabil iti sanguananna [ni Jesus] inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Hebreo 12:2) Insurat ni adalan a Santiago: “Ibilangyo amin a rag-o, kakabsatko, no maipasangokayo kadagiti nadumaduma a pakasuotan, yantangay ammoyo a daytoy nasubok a kualidad ti pammatiyo pataudenna ti panagibtur.” Ngem kasanon no ditay ammo ti aramidentayo iti sidong ti pakasuotan? No kasta mabalintay ti sitatalek a dumawat iti sirib tapno mapagballigiantay dayta. Ti panagtignay a maitunos iti nailangitan a sirib tulongannatay a mangrisut kadagiti parikut wenno mangsaranget kadagiti agnaynay a pakasuotan a di mapukaw ti rag-o ni Jehova.​—Santiago 1:2-8.

6. Aniat’ pakainaigan ti rag-o iti pudno a panagdaydayaw?

⁶ Pabilgennatayo ti rag-o nga ited ni Jehova a mangitandudo iti pudno a panagdaydayaw. Kasta ti napasamak idi kaaldawan da Nehemias ken Esdras. Dagiti Judio iti daydi a tiempo a ti rag-o ni Jehova isu ti sarikedkedda, napabilegda a mangyadelantar iti intereses ti pudno a panagdaydayaw. Ket bayat nga intandudoda ti panagdaydayaw ken Jehova, dimmakkel ti rag-oda. Pudno met dayta itatta. Kas managdaydayaw ni Jehova, adut’ rasontayo nga agrag-o iti kasta unay. Intay usigen ita ti dadduma pay kadagiti adu a rason nga agrag-otayo.

Pannakirelasion iti Dios Babaen ken Kristo

7. Maipanggep ken Jehova, aniat’ makagapu nga agrag-o dagiti Kristiano?

⁷ Ti nasinged a pannakirelasiontayo ken Jehova ti mamagbalin kadatayo a kararagsakan a tattao ditoy daga. Sakbay a nagbalintayo a Kristiano, pasetnatay idi ti nakillo a natauan a kagimongan ‘a nasipngetan iti isip ken naisina manipud iti biag a kukua ti Dios.’ (Efeso 4:18) Anian a ragsaktayo ta saantayon a naisina ken Jehova! Siempre, kasapulan ti panagregget tapno makapagtalinaedtayo iti anamongna. Masapul nga ‘agtalinaedtayo iti pammati, a naipasdek iti pamuon ken sititibker ken saan a maiyadayo iti namnama dayta naimbag a damag.’ (Colosas 1:21-23) Makapagrag-otayo ta inyasidegnatay ni Jehova iti Anakna maitunos iti mismo a sasao ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangiyasideg kenkuana.” (Juan 6:44) No pudpudno a kailalaantayo ti napateg a relasiontayo iti Dios babaen ken Kristo, agaluadtayo iti aniaman a mabalin a mangdadael iti dayta.

8. Kasano a nakatulong ni Jesus iti naragsak a kasasaadtayo?

⁸ Maysa a dakkel a pakaigapuan iti panagrag-o ti pannakapakawan dagiti basol babaen ti pammati iti daton a subbot ni Jesus agsipud ta isu dayta ti mamagbalin a posible iti pannakirelasiontayo iti Dios. Gapu iti sipapakinakem a panagbasolna, inyeg ti immuna nga amatayo a ni Adan ti ipapatay iti intero a sangatauan. Nupay kasta, inlawlawag ni apostol Pablo: “Ti Dios irekomendana ti bukodna nga ayat kadatayo iti banag a, bayat a managbasoltayo pay laeng idi, ni Kristo natay a maipaay kadatayo.” Insurat pay ni Pablo: “No kasano a babaen ti maysa a labsing imbungana ti pannakakondenar iti amin a kita ti tattao, kasta met a babaen ti maysa nga aramid a panangpalinteg imbungana iti amin a kita ti tattao ti pannakaideklarada a nalinteg maipaay iti biag. Ta no kasano a babaen ti kinasukir ti maysa a tao adu ti naibilang a managbasol, kasta met a babaen ti panagtulnog ti maysa a tao adu ti maibilangto a nalinteg.” (Roma 5:8, 18, 19) Anian a rag-otayo ta pagragsakan ni Jehova a Dios a subboten dagiti annak ni Adan a mangaprobetsar iti kasta a naayat a probision!

Narelihiusuan a Pannakawayawaya ken Pannakalawlawag

9. Apay a naragsaktayo iti narelihiusuan a pamay-an?

⁹ Ti pannakawayawaya iti Babilonia a Dakkel, ti sangalubongan nga imperio ti ulbod a relihion, ket maysa pay a rason iti panagrag-o. Ti nadiosan a kinapudno ti nangwayawaya kadatayo. (Juan 8:32) Ket ti pannakawayawaya iti daytoy a narelihiusuan a balangkantis kaipapananna a ditay makiraman kadagiti basolna, aglak-am kadagiti saplitna, ken mairaman iti pannakadadaelna. (Apocalipsis 18:1-8) Awan a pulos ti pagladingitantayo iti pannakailikliktayo kadagita!

10. Ania a pannakalawlawag ti tagtagiragsakentayo kas ili ni Jehova?

¹⁰ Maysa pay a pakaigapuan iti dakkel a panagrag-o ti pannakaawat ken panangyaplikar iti Sao ti Dios iti biagtayo. Gapu ta nawayawayaantayon iti impluensia ti ulbod a relihion, tagtagiragsakentay ti lumawlawag a naespirituan a pannakaawat nga ipapaay ti nailangitan nga Amatayo babaen “ti matalek ken masirib nga adipen.” (Mateo 24:45-47) Kadagiti amin a tattao nga agbibiag ditoy daga, dagidiay laeng naan-anay ti debosionda ken Jehova ti addaan iti nasantuan nga espirituna ken iti naparaburan a pannakaawat iti Sao ken pagayatanna. Kas kinuna ni Pablo: “Kadatayo nga impalgak ida ti Dios [dagiti bambanag nga insaganana kadagidiay agayat kenkuana] babaen ti espirituna, ta ti espiritu sukimatenna ti isuamin a bambanag, uray pay dagiti nauneg a bambanag ti Dios.” (1 Corinto 2:9, 10) Mabalintay ti agyaman ken agrag-o ta tagtagiragsakentayo ti rumangrang-ay a pannakaawat a naipasimudaag iti sasao ti Proverbio 4:18: “Ti dana dagiti nalinteg kas iti aranaar ti agsapa a rumaniag a rumaniag agingga iti napaypayso nga aldaw.”

Ti Namnama iti Pagarian ken ti Biag nga Agnanayon

11. Kasano a mairanranud kadagiti sabsabali ti makaparagsak a namnama iti Pagarian?

¹¹ Pagrag-oennatay met ti namnamatayo iti Pagarian. (Mateo 6:9, 10) Kas Saksi ni Jehova, nabayagen nga iwarwaragawagtayo a ti Pagarian ti Dios ti kakaisuna a namnama ti intero a sangatauan. Kas pagarigan, usigenyo ti tawen 1931, idi napanaganantayo iti Saksi ni Jehova babaen ti maysa a resolusion a sirarag-o a naanamongan iti 51 a kombension iti aglikmut ti lubong. (Isaias 43:10-12) Naipablaak dayta a resolusion ken ti maysa a naisangsangayan a palawag iti kombension ni J. F. Rutherford (presidente idi ti Watch Tower Society) iti bokleta a The Kingdom, the Hope of the World. Nairaman iti dayta ti maysa pay a resolusion a naanamongan iti dayta a kombension, a nangbabalaw iti Kakristianuan gapu iti panagapostatana ken panangumsina iti balakad ni Jehova. Inwaragawagna pay: “Ti namnama ti lubong isu ti pagarian ti Dios, ket awanen ti sabali a namnama.” Iti las-ud ti sumagmamano a bulan, nasurok a lima a milion a kopia daytoy a bokleta ti naiwaras dagiti Saksi ni Jehova iti amin a paset ti daga. Manipud idin, masansan nga ipatpatalgedtayo a ti Pagarian ti kakaisuna a namnama ti sangatauan.

12. Ania a makaparagsak a namnama iti biag ti naituyang kadagidiay agserserbi ken Jehova?

¹² Pagrag-oantay met ti namnamatayo nga agbiag nga agnanayon iti sidong ti turay ti Pagarian. Addaan ti “bassit nga ipastoran” dagiti napulotan a Kristiano iti naragsak a nailangitan a namnama. “Bendito koma ti Dios ken Ama ni Apotayo a Jesu-Kristo,” insurat ni apostol Pedro, “ta maitunos iti naindaklan nga asina impaayannatayo iti baro a pannakaiyanak nga agturong iti maysa a sibibiag a namnama babaen ti panagungar ni Jesu-Kristo manipud kadagiti natay, nga agturong iti maysa a di agrupsa ken di natulawan ken di agkupas a tawid. Naisagana dayta iti langlangit maipaay kadakayo.” (Lucas 12:32; 1 Pedro 1:3, 4) Itatta, sigagagar a mangnamnama ti kaaduan kadagiti Saksi ni Jehova iti biag nga agnanayon iti Paraiso iti sidong ti Pagarian. (Lucas 23:43; Juan 17:3) Awan a pulos ti mayasping ti aniaman a sabali nga ili ditoy daga kadagiti makaparagsak a namnamatayo. Anian ti panangipategtayo kadagitoy!

Naparaburan a Panagkakabsat

13. Kasanot’ rumbeng a panangmatmattayo iti sangalubongan a panagkakabsattayo?

¹³ Maysa met a gubuayan ti dakkel a rag-o ti panagbalin a paset ti kakaisuna a sangalubongan a panagkakabsat nga anamongan ti Dios. Makaparagsak, addaantay kadagiti makaay-ayo unay a kakadua ditoy daga. Tinukoy ni Jehova a Dios a mismo ti kaaldawantayo ket kinunana: “Pagkintayegekto dagiti amin a nasion, ket dagiti makaay-ayo a banag dagiti amin a nasion umaydanto; ket pusekekto daytoy a balay iti kinadayag.” (Haggeo 2:7) Pudno, imperpekto amin a Kristiano. Nupay kasta, inyasideg ni Jehova dagitoy a tattao iti bagina babaen ken Jesu-Kristo. (Juan 14:6) Yantangay inyasideg ni Jehova dagiti tattao iti bagina nga ibilangna a makaay-ayo, dumakkel ti rag-otayo no ipakitaantay ida ti nainkabsatan nga ayat, raemen unay ida, makitunos kadakuada kadagiti nadiosan nga aramid, saranayen ida kadagiti pakasuotan a dumteng iti biagda, ken ikararagan ida.

14. Ania a pammaregta ti magun-odtayo iti 1 Pedro 5:5-11?

¹⁴ Pagrag-oennatay amin dagitoy. Kinapudnona, ti rag-o ni Jehova isu ti sarikedked ti naespirituan a panagkakabsattayo iti intero a daga. Wen, aglak-amtay amin iti pannakaidadanes ken dadduma pay a pakarigatan. Ngem daytoy koma ti mamagdedekket ken mamagkaykaysa kadatayo kas paset ti maymaysa a pudpudno nga organisasion ti Dios ditoy daga. Kas kinuna ni Pedro, rumbeng nga agpakumbabatayo iti babaen ti mannakabalin nga ima ti Dios, a yallatiwtay kenkuana amin a pakaringgorantayo ta ammotayo nga isu ket maseknan kadatayo. Nasken nga agbalintay a nasiput agsipud ta kayatnatay nga alun-onen ti Diablo, ngem iti daytoy a banag saantay nga agmaymaysa, ta innayon ni Pedro: “Agtakderkayo a bumusor kenkuana, natibker iti pammati, yantangay ammoyo a dagiti isu met laeng a bambanag a sagsagabaen maitungtungpalda iti intero a timpuyog dagiti kakabsatyo ditoy lubong.” Ket pulos a dinto maduprak daytoy a naragsak a sangalubongan a panagkakabsat, ta mainanamatayo a ‘kalpasan ti panagsagabatayo iti apagbiit, ti Dios turposennanto a mismo ti panagsanaytayo ken patibkeren ken papigsaennatayto.’ (1 Pedro 5:5-11) Panunotenyo dayta. Agpaut iti agnanayon ti naragsak a panagkakabsattayo!

Biag nga Addaan Panggep

15. Apay a maikuna nga addaan panggep ti biag dagiti Saksi ni Jehova?

¹⁵ Naragsaktayo iti daytoy nariribuk a lubong agsipud ta adda panggep ti biagtayo. Naitalek kadatayo ti maysa a ministerio a mangparagsak kadatayo ken kadagiti sabsabali. (Roma 10:10) Awan duadua a maysa a makaparagsak a pribilehio ti agbalin a katrabahuan ti Dios. Maipapan itoy, kinuna ni Pablo: “Ania . . . ni Apolos? Wen, ania ni Pablo? Ministroda a babaen kadakuada nagbalinkayo a manamati, a kas iti inted ti Apo iti tunggal maysa. Nagmulaak, ni Apolos ti nagsibug, ngem intultuloy ti Dios a padpadakkelen dayta; iti kasta saan a ti agmula ti napateg wenno uray ti agsibug, no di ket ti Dios a mangpadakkel iti dayta. Ita ti agmula ken ti agsibug maymaysada, ngem tunggal maysa a tao awatennanto ti bukodna a gunggona sigun iti bukodna a panagbannog. Ta dakami ket katrabahuan ti Dios. Dakayo a tattao ti daga a talonen ti Dios, ti patakder ti Dios.”​—1 Corinto 3:5-9.

16, 17. Aniada a pagarigan ti mabalin a dakamaten a mangipaneknek a naragsak ken addaan panggep ti biag dagiti tattao ni Jehova?

¹⁶ Adu a pagarigan ti mabalin a dakamaten a mangipakita a ti panagserbi a simamatalek ken Jehova mangibunga iti biag nga addaan panggep a mamagrag-o kadatayo. Gagangayen ti kastoy a sasao: “Inwarasko ti panagkitak iti napusek a Kingdom Hall [iti aldaw a pannakaidedikar daytoy] ket nakitak nga adda sadiay dagiti walo a kameng ti pamiliak, a pakairamananmi ken baket ken ti tallo kadagiti annakmi ken dagiti assawada. . . . Pudno a naragsak ken addaan panggep ti biagmi ken baket iti panagserbimi iti Dios.”

¹⁷ Makaparagsak met a panunoten a mabalin ti asinoman, aniaman ti edadna, ti makairugi iti naragsak a panagbiag nga addaan pudpudno a panggep iti panagserbi ken Jehova. Kas pagarigan, nabautisaran kas maysa kadagiti Saksi ni Jehova idi agtawen iti 102 ti maysa a baket a nakasursuro iti kinapudno iti Biblia iti maysa a balay a pagtaraknan. Iti kasta, naturposna ti biagna nga addaan naragsak a panggep, a ‘nagbuteng iti pudno a Dios ken sinalimetmetanna dagiti bilinna.’​—Eclesiastes 12:13.

Maysa a Nalagda a Sarikedked

18. Aniat’ maaramidantayo tapno maparmek ti pannakaupay ken tapno manayonan ti rag-otayo?

¹⁸ Ti rag-o ni Jehova ket maysa a nalagda a sarikedked kadagiti matalek. Nupay kasta, ti pannakagun-od iti daytoy a rag-o dina kayat a sawen a pulos a ditay mapasaran dagiti naladingit a kanito a kas kadagidiay nangtignay ken Jesus a nangikuna idiay Getsemani: “Maleddaangan unay ti kararuak, uray agingga iti ipapatay.” (Marcos 14:32-34) Mabalin a nagbanag iti pannakaupay ti itutuloktayo kadagiti inaagum a ganuat. No kasta, baliwantayo ti kabibiagtayo. No nagmawmaw ti rag-otayo gapu iti sibubulos a panangibaklaytayo kadagiti nadagsen a Nainkasuratan a pagrebbengan, mabalintay ti mangaramid iti panagbalbaliw tapno mabang-arantayo ken maisubli ti rag-otayo. Kanayonanna, bendisionannatay ni Jehova iti rag-o no ikagumaantay nga ay-aywen babaen ti sipipinget a panangsaranget iti managbasol a lasag, iti dakes a lubong, ken iti Diablo.​—Galacia 5:24; 6:14; Santiago 4:7.

19. Kasanot’ rumbeng a panangmatmattayo iti aniaman a pribilehiotayo iti organisasion ti Dios?

¹⁹ Gapu kadagiti rason a nasalaysaytayo, ken adu a dadduma pay, addaantay iti dakkel a rag-o. Agibumbunannagtay man iti kongregasion wenno makiramraman iti amin-tiempo a serbisio, aduantay amin iti aramiden iti trabaho ti Apo, ket sigurado a pagrag-oennatay daytoy. (1 Corinto 15:58) Aniaman dagiti pribilehiotayo iti organisasion ni Jehova, pagyamanantay koma dagitoy ken sirarag-o nga itultuloytay ti mangipaay iti sagrado a panagserbi iti naayat, naragsak a Diostayo.​—1 Timoteo 1:11.

20. Aniat’ kadakkelan a pribilehiotayo, ket aniat’ masiguradotayo?

²⁰ Addaantay iti rason nga agrag-o kangrunaanna iti pribilehiotayo a mangawit iti naindaklan a nagan ni Jehova kas Saksina. Wen, imperpektotayo ken maipasangotayo iti adu a pakasuotan, ngem kanayon a sipapanunottay koma kadagiti nakaskasdaaw a bendision nga aw-awatentayo kas Saksi ni Jehova. Ken laglagipenyo, pulos a dinatayto paayen ti patpatgentayo a nailangitan nga Ama. Masiguradotayo a kanayon a bendisionannatayo no ti rag-o ni Jehova ti sarikedkedtayo.

Kasanoyo a Sungbatan?

◻ Ania ti “rag-o ni Jehova”?

◻ Kasano a magun-odan dagiti Kristiano ti pudpudno a rag-o?

◻ Ania dagiti sumagmamano a rason no apay a naragsak dagiti Saksi ni Jehova?

◻ Apay a ti rag-o ni Jehova ket maysa a nalagda a sarikedked?