Panangtungpal iti Dedikasiontayo iti “Inaldaw-aldaw”
“No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan iti inaldaw-aldaw ket agtultuloy a surotennak.”—LUCAS 9:23.
1. Aniat’ maysa a pakarukodan ti balligitayo kas Kristiano?
“TALAGA kadi a dedikadotayo a lallaki?” Ti sungbat daytoy a saludsod, sigun ken John F. Kennedy, ti maika-35 a Presidente ti Estados Unidos, ket maysa a pakarukodan ti balligi dagidiay agtakem iti gobierno. Mabalin nga agserbi ti saludsod nga addaan naun-uneg a kaipapanan kas pannubok iti balligitayo kas Kristiano a ministro.
2. Kasanot’ panangdepinar ti maysa a diksionario iti sao a “dedikasion”?
2 Ngem, ania kadi ti dedikasion? Iti Webster’s Ninth New Collegiate Dictionary, nadepinar dayta kas “maysa a tignay wenno seremonia ti panagdedikar iti maysa a dios wenno iti sagrado a pakausaran,” “panangipaay wenno panangilasin para iti maysa a partikular a panggep,” “managsakripisio a debosion.” Agparang a ti “managsakripisio a debosion” ti kayat a sawen ni John F. Kennedy idi inaramatna ti sao. Para iti maysa a Kristiano, saan la a dayta ti kaipapanan ti dedikasion.
3. Ania ti Nakristianuan a dedikasion?
3 Kinuna ni Jesu-Kristo kadagiti adalanna: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan ket agtultuloy a surotennak.” (Mateo 16:24) Saan laeng a ti panagdaydayaw iti Domingo wenno no sumarsarungkar iti lugar a pagdaydayawan ti ramanen ti pannakailasin maipaay iti nasantuan a pakausaran. Ramanenna ti intero nga estilo ti panagbiag ti maysa a tao. Ti panagbalin a Kristiano kaipapananna ti panangtallikud iti bagi wenno panangilibak iti bagi bayat nga agserserbi iti Dios a pinagserbian ni Jesu-Kristo, ni Jehova. Mainayon pay, ibaklay ti maysa a Kristiano ti “kayona a pagtutuokan” babaen ti panangibturna iti aniaman a rigat a lak-amenna gaput’ panagbalinna a pasurot ni Kristo.
Ti Naan-anay nga Ulidan
4. Aniat’ insimbolo ti bautismo ni Jesus?
4 Idi adda ditoy daga, impakita ni Jesus no aniat’ ramanen ti panangidedikar iti bagi ken Jehova. Kastoy ti kaririknana: “Sakripisio ken daton saanmo a kinayat, ngem insaganam ti maysa a bagi a maipaay kaniak.” Sana innayon: “Adtoy! Umayak (iti lukot ti libro naisurat ti maipapan kaniak) tapno aramidek ti pagayatam, O Dios.” (Hebreo 10:5-7) Kas maysa a kameng ti dedikado a nasion, isut’ dedikadon ken Jehova manipud pannakayanakna. Kaskasdi, idi irugina ti ministeriona ditoy daga, nagpabautisar kas simbolo ti panangidatagna iti bagina a mangaramid iti pagayatan ni Jehova, a kenkuana, pakairamanan ti panangipaayna iti biagna kas daton a subbot. No kasta, nangipaay iti ulidan para kadagiti Kristiano nga aramidenda ti aniaman a pagayatan ni Jehova.
5. Kasano nga impakita ni Jesus ti mapagulidanan a panangmatmat kadagiti material a banag?
5 Kalpasan ti bautismona, sinurot ni Jesus ti wagas ti panagbiag a nangiturong kamaudiananna iti sakripisio nga ipapatay. Saan nga interesado a bumaknang wenno agbiag iti nam-ay. Ngem ketdi, naipamaysa ti biagna iti ministeriona. Binalakadanna dagiti adalanna nga “itultuloy[da] . . . a sapulen nga umuna ti pagarian ken ti kinalintegna,” ket tinungpalna a mismo dagitoy a sasao. (Mateo 6:33) Kinapudnona, kinunana pay ketdi iti naminsan: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan lugar a pangisaadanna ti ulona.” (Mateo 8:20) Mabalinna koma nga ibagaybagay dagiti sursurona tapno makaparuar iti kuarta kadagiti pasurotna. Kas maysa nga allawagi, mabalinna koma ti agbakasion tapno mangaramid iti napintas a muebles nga ilakona tapno maaddaan iti sumagmamano a kanayonan a pirak. Ngem dina inaramat ti laingna iti pananggun-od iti material a kinabaknang. Kas dedikado nga ad-adipen ti Dios, tultuladentay kadi ni Jesus babaen ti umiso a panangmatmattayo kadagiti material a banag?—Mateo 6:24-34.
6. Kasanotay a matulad ni Jesus iti panagbalin a managsakripisio, dedikado nga ad-adipen ti Dios?
6 Iti panangipangrunana iti panagserbi iti Dios, saan a ti bukodna a pagimbagan ti sinapul ni Jesus. Ti panagbiagna kabayatan ti tallo ket kagudua a tawen a [panangitungpalna iti] publiko a ministeriona ket maysa a panagsakripisio. Iti naminsan, kalpasan ti maysa nga okupado nga aldaw, a dina pay masangon ti mangan, situtulok a sinursuruan ni Jesus dagiti tattao a ‘nalalatan ken naiwarawara a kasla karkarnero nga awanan pastor.’ (Mateo 9:36; Marcos 6:31-34) Nupay “nabannog iti panagbaniagana,” ginundawayanna ti nakisarita iti maysa a Samaritana a dimteng iti bubon ni Jacob idiay Sicar. (Juan 4:6, 7, 13-15) Kanayon nga impangrunana ti pagimbagan dagiti sabsabali imbes a ti bukodna a pagimbagan. (Juan 11:5-15) Matuladtay ni Jesus babaen ti sipaparabur a panangisakripisiotayo iti bukodtayo a pagimbagan tapno makapagserbitayo iti Dios ken kadagiti sabsabali. (Juan 6:38) Babaen ti panangpampanunot no kasanotay a pudpudno a maay-ayo ti Dios imbes nga aramiden laeng ti kabassitan a makalikaguman, matungpaltayo ti dedikasiontayo.
7. Kasanotay a matulad ni Jesus iti kanayon a panangipaay iti dayaw ken Jehova?
7 Pulos a di inturong ni Jesus ti atension iti bagina babaen ti panangtulongna kadagiti tattao. Isu ket dedikado iti Dios a mangaramid iti pagayatanna. Isu a kanayon a siniguradona a ni Jehova, ti Amana, ti umawat iti amin a pammadayaw iti aniaman a nagapuananna. Idi inawagan ti maysa nga agturay iti “Naimbag a Mannursuro,” nga inaramatna ti sao a “naimbag” kas maysa a titulo, kinorehir ni Jesus daytoy babaen ti panangikunana: “Awan asinoman a naimbag, malaksid iti maysa, ti Dios.” (Lucas 18:18, 19; Juan 5:19, 30) Kas ken Jesus, naalibtaktay kadi a mangiturong iti dayaw ken Jehova imbes nga iti bagitayo?
8. (a) Kas maysa a dedikado a tao, kasano nga insina ni Jesus ti bagina iti lubong? (b) Kasanot’ rumbeng a panangtuladtayo kenkuana?
8 Iti intero a dedikado a panagbiagna ditoy daga, impakita ni Jesus nga inlasinna ti bagina maipaay iti nadiosan a serbisio. Tinaginayonna ti bagina a nadalus tapno maipaayna ti bagina “nga awan pakapilawanna ken di namulitan a kordero” kas daton a subbot. (1 Pedro 1:19; Hebreo 7:26) Inannurotna amin nga impaalagad ti Linteg Mosaiko, iti kasta tinungpalna dayta a Linteg. (Mateo 5:17; 2 Corinto 1:20) Nagbiag a maitunos iti mismo a pannursurona maipanggep iti moral. (Mateo 5:27, 28) Awan ti nainkalintegan a makapabasol kenkuana kadagiti dakes a motibo. Kinapudnona, ‘ginurana ti kinakillo.’ (Hebreo 1:9) Kas ad-adipen ti Dios, tuladentay koma ni Jesus, a pagtalinaedentay a nadalus ti panagbiagtayo ken uray dagiti motibotayo iti imatang ni Jehova.
Dagiti Pakaballaagan nga Ulidan
9. Ania a pakaballaagan nga ulidan ti tinukoy ni Pablo, ket apay a rumbeng nga usigentayo daytoy nga ulidan?
9 Maigidiat iti ulidan ni Jesus, addaantay kadagiti pakaballaagan nga ulidan dagiti Israelita. Uray pay kalpasan ti panangibagada nga aramidenda amin nga imbaga ni Jehova nga aramidenda, saanda nga inaramid ti pagayatanna. (Daniel 9:11) Pinaregta ni apostol Pablo dagiti Kristiano nga agsursuro iti napagteng dagiti Israelita. Sukimatentay ti dadduma kadagiti pasamak a tinukoy ni Pablo iti umuna a suratna kadagiti taga-Corinto ket kitaentayo no ania dagiti palab-og a nasken a liklikan dagiti dedikado nga adipen ti Dios iti tiempotayo.—1 Corinto 10:1-6, 11.
10. (a) Kasano a ‘tinarigagayan [dagiti Israelita] dagiti makadangran a bambanag’? (b) Apay nga ad-adda a manungsungbat dagiti Israelita iti maikadua a gundaway a panagtanabutobda gapu iti taraon, ket aniat’ masursurotayo iti daytoy a pakaballaagan nga ulidan?
10 Umuna, binallaagannatay ni Pablo a ditay “agtartarigagay kadagiti makadangran a bambanag.” (1 Corinto 10:6) Mabalin nga ipalagip dayta kadakayo daydi panagtanabutob dagiti Israelita gapu ta mana laeng ti adda a taraonda. Nangibaon ni Jehova kadagiti tukling kadakuada. Kasta met laeng ti napasamak agarup makatawen sakbayna idiay let-ang ti Sin, sakbay la unay ti panangyebkas dagiti Israelita iti dedikasionda ken Jehova. (Exodo 16:1-3, 12, 13) Ngem saan nga eksakto nga agpada ti kasasaad. Iti damo a panangipaay ni Jehova kadagiti tukling, dina pinagsungbat dagiti Israelita iti panagtanabutobda. Nupay kasta, iti daytoy a gundaway, naiduma dagiti bambanag. “Idi nga adda pay laeng ti lasag a di pay la nangalngal iti baet dagiti ngipenda, ti unget ni Jehova simged a maibusor kadagiti tattao, ket ni Jehova dinidigrana ti ili iti maysa a naindaklan unay nga angol.” (Numeros 11:4-6, 31-34) Aniat’ nagbalbaliw? Kas dedikado a nasion, manungsungbatda itan. Ti kinaawan panangipategda kadagiti probision ni Jehova intuggodna ida nga agtanabutob maibusor ken Jehova, iti laksid ti panangikarida nga aramidenda amin a sinao ni Jehova! Umasping iti dayta ti panagtanabutob maipanggep iti lamisaan ni Jehova ita. Awanan ti dadduma iti panangipateg kadagiti naespirituan a probision ni Jehova babaen “ti matalek ken masirib nga adipen.” (Mateo 24:45-47) Nupay kasta, laglagipenyo a ti dedikasiontayo kalikagumanna ti siyayaman a pananglaglagiptayo iti naaramidan ni Jehova maipaay kadatayo ken panangawat iti naespirituan a taraon nga ipapaay ni Jehova.
11. (a) Kasano a tinulawan dagiti Israelita ti panagdayawda ken Jehova iti idolatria? (b) Kasano a mabalin nga apektarannatayo ti maysa a kita ti idolatria?
11 Kalpasanna, namallaag ni Pablo: “Dikay met agbalin a managrukbab iti didiosen, kas ti inaramid ti sumagmamano kadakuada.” (1 Corinto 10:7) Nalawag a tuktukoyen ditoy ti apostol ti panagrukbab iti sinan-urbon a baka a napasamak kalpasan la unay ti pannakitulag dagiti Israelita ken Jehova idiay Bantay Sinai. Mabalin a kunayo, ‘Kas dedikado nga adipen ni Jehova, diak makiraman iti idolatria uray kaano man.’ Nupay kasta, paliiwenyo ta iti panangmatmat dagiti Israelita, saanda nga insardeng ti panagdaydayawda ken Jehova; kaskasdi, nagrukbabda iti sinan-urbon a baka—banag a makarimon iti Dios. Aniat’ inraman daytoy a kita ti panagdayaw? Nagdaton dagiti tattao iti sanguanan ti baka, sada ‘nagtugaw a mangan ken uminum. Kalpasanna, timmakderda tapno agraragsakda.’ (Exodo 32:4-6) Itatta, mabalin nga akuen ti dadduma nga agdaydayawda ken Jehova. Ngem mabalin a naipamaysa ti biagda, saan nga iti panagdayaw ken Jehova, no di ket iti panangtagiragsak kadagiti bambanag iti daytoy a lubong, ket padpadasenda nga isamira kadagitoy ti panagserbida ken Jehova. Pudno, daytoy ket saan a kas iti kinakaro ti panagrukbab iti balitok a baka, ngem iti prinsipio, saan unay a naiduma daytoy. Ti panamagbalin iti bukod a tarigagay kas dios ket saan a panangtungpal iti dedikasion ken Jehova.—Filipos 3:19.
12. Manipud iti kapadasan dagiti Israelita mainaig ken ni Baal iti Peor, aniat’ masursurotayo maipapan iti panangtallikud iti bagitayo?
12 Nairaman met ti maysa a kita ti paglinglingayan iti sumaruno a pakaballaagan nga ulidan a dinakamat ni Pablo: “Ditay met iyugali ti pannakiabig, a kas iti sumagmamano kadakuada a nakiabig, tapno laeng mapasag, duapulo ket tallo a ribo kadakuada iti maysa nga aldaw.” (1 Corinto 10:8) Dagiti Israelita, a ginargari dagiti annak a babai ti Moab a makiraman iti imoral a pagraragsakan, naituggodda nga agdaydayaw ken ni Baal iti Peor idiay Sittim. (Numeros 25:1-3, 9) Ti panangtallikud iti bagitayo tapno aramiden ti pagayatan ni Jehova ramanenna ti panangawat kadagiti pagalagadanna iti moral a kinadalus. (Mateo 5:27-30) Iti daytoy a panawen a marmarpuogen dagiti pagalagadan, mapalagipantayo a nasken nga agtalinaedtay a nadalus iti amin a kita ti imoral a kababalin, nga agpasakuptayo iti autoridad ni Jehova a mangikeddeng no ania ti naimbag ken no ania ti dakes.—1 Corinto 6:9-11.
13. Kasanonatay a matulongan ti ulidan ni Finees a mangtarus iti ramanen ti dedikasion ken Jehova?
13 Nupay adu ti natnag iti silo ti pannakiabig idiay Sittim, adda dagiti nangtungpal iti nailian a dedikasion ken Jehova. Ti maysa kadakuada isu ni Finees, a naisangsangayan ti kinaregtana. Idi nakitana nga impan ti maysa a panguluen nga Israelita ti maysa a babai a taga-Madian iti uneg ti toldana, nangala a dagus ni Finees iti gayang ket dinuyokna ida. Kinuna ni Jehova ken ni Moises: “Ni Finees . . . pinagbaw-ingna ti pungtotko kadagiti annak ti Israel babaen ti dina panangipalubos iti pannakisalisal kaniak iti tengngada, a nakaigapuan ti diak panangibus kadagiti annak ti Israel iti panangipapilitko iti naipamaysa a debosion.” (Numeros 25:11) Di panangipalubos iti pannakisalisal ken Jehova—dayta ti kayat a sawen ti dedikasion. Ditay mabalin a palubosan ti aniaman a banag nga agsaad iti lugar a rumbeng a pagsaadan ti dedikasiontayo ken Jehova iti pusotayo. Tignayennatay met ti regtatayo ken Jehova a mangtaginayon iti kongregasion a nadalus babaen ti panangipulong iti nakaro nga imoralidad kadagiti panglakayen, a ditay panuynoyan dayta.
14. (a) Kasano a sinubok dagiti Israelita ni Jehova? (b) Kasanonatay a matulongan ti naan-anay a dedikasion ken Jehova a di “mabannog”?
14 Tinukoy ni Pablo ti sabali pay a pakaballaagan nga ulidan: “Ditay met subsuboken ni Jehova, kas ti sumagmamano kadakuada nga isu sinubsubokda, tapno laeng matayda babaen kadagiti serpiente.” (1 Corinto 10:9) Sarsaritaen ditoy ni Pablo daydi panagtanabutob dagiti Israelita ken Moises maibusor iti Dios idi “mangrugi a mabannogda gapu iti dalan.” (Numeros 21:4) Nakaaramidkay kadin iti kasta a biddut? Idi indedikaryo ti bagiyo ken Jehova, impagarupyo kadi a nakaas-asidegen ti Armagedon? At-atiddog kadi ti panagan-anus ni Jehova ngem iti ninamnamayo? Laglagipenyo, saantay nga indedikar ti bagitayo ken Jehova gapu laeng iti panawen wenno agingga laeng iti Armagedon. Agtultuloy iti agnanayon ti dedikasiontayo. Gapuna, “ditay koma sumuko iti panagaramid ti nasayaat, ta iti naikeddeng a panawen agapittayto no ditay mabannog.”—Galacia 6:9.
15. (a) Maibusor iti siasino a nagtanabutob dagiti Israelita? (b) Kasano a tignayennatay ti dedikasiontayo ken Jehova a mangraem iti teokratiko nga autoridad?
15 Kamaudiananna, namallaag ni Pablo maipapan kadagiti “managtanabutob” maibusor kadagiti nadutokan nga adipen ni Jehova. (1 Corinto 10:10) Sipupungtot a nagtanabutob dagiti Israelita kada Moises ken Aaron idi nangyeg iti dakes a damag ti 10 kadagiti 12 a managsimisim a naibaon a mangkita iti daga ti Canaan. Pinanggepda pay ketdi a suktan ni Moises kas panguloda ken agsubli idiay Egipto. (Numeros 14:1-4) Itatta, bigbigbigentay kadi dagiti mangidadaulo a naited kadatayo babaen ti panagtignay ti nasantuan nga espiritu ni Jehova? Iti pannakakitatayo iti aglaplapusanan [a sagana] iti naespirituan a lamisaan nga ipapaay ti klase matalek ken masirib nga adipen, nalawag no siasino ti us-usaren ni Jesus a mangipaay iti “taraon iti umiso a tiempo.” (Mateo 24:45) Ti amin-kararua a dedikasion ken Jehova kalikagumanna kadatayo ti panagraem kadagiti nadutokan nga adipenna. Sapay koma ta pulos a ditay tultuladen dagiti managtanabutob iti kaaldawantayo a nagbaw-ing iti baro a pangulo, no ar-arigen, a nangisubli kadakuada iti lubong.
Ar-aramidek Kadi ti Amin a Kabaelak?
16. Ania dagiti saludsod a mabalin a kayat dagiti dedikado nga adipen ti Dios nga isaludsod iti bagida?
16 Saan koma a natnag dagiti Israelita kadagita a nakaro a biddut no linaglagipda la koma nga awan kondisionna ti dedikasionda ken Jehova. Saan a kas kadagidiay awanan pammati nga Israelita, tinungpal ni Jesu-Kristo ti dedikasionna agingga iti ngudo ti biagna. Kas paspasurot ni Kristo, tuladentay ti ulidanna iti amin-kararua a debosion, nga agbiagtayo “saanen nga agpaay kadagiti tarigagay dagiti tattao, no di ket agpaay iti pagayatan ti Dios.” (1 Pedro 4:2; idiligyo ti 2 Corinto 5:15.) Pagayatan ni Jehova itatta a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Gapuna, masapul nga ikasabatayo “daytoy naimbag a damag ti pagarian” sakbay a dumteng ti panungpalan. (Mateo 24:14) Kasanot’ kapasnektayo iti daytoy a serbisio? Mabalin a kayattay nga isaludsod iti bagitayo, ‘Ar-aramidek kadi ti amin a kabaelak?’ (2 Timoteo 2:15) Nagduduma dagiti kasasaad. Maay-ayo ni Jehova a mapagserbian “sigun iti adda iti maysa a tao, saan a sigun iti awan iti maysa a tao.” (2 Corinto 8:12; Lucas 21:1-4) Awan koma ti mangukom iti kauneg ken kapasnek ti dedikasion ti sabali. Rumbeng nga usigen ti tunggal maysa ti kauneg ti debosionna ken Jehova. (Galacia 6:4) Rumbeng a tignayennatay ti panagayattayo ken Jehova a mangisaludsod, ‘Kasanok a maparagsak ni Jehova?’
17. Aniat’ pakainaigan ti panangipateg iti debosion? Yilustraryo.
17 Umuneg ti debosiontayo ken Jehova bayat a dumakdakkel ti panangipategtayo kenkuana. Idiay Japan, indedikar ti maysa a 14-años nga agtutubo a lalaki ti bagina ken Jehova ken insimbolona daytoy a dedikasion babaen ti bautismo iti danum. Iti saan a nabayag, kayatna ti gumun-od iti nangato nga adal ken agbalin a sientista. Awan a pulos iti panunotna ti amin-tiempo a ministerio, ngem kas maysa a dedikado nga adipen, dina kayat a panawan ni Jehova ken ti makitkita nga organisasionna. Tapno matungpal ti arapaapna, simrek iti unibersidad. Nakitana sadiay dagiti nagturpos iti unibersidad a napilitan a nangidedikar iti intero a biagda kadagiti kompaniada wenno iti panagadalda. Pinampanunotna, ‘Aniat’ ar-aramidek ditoy? Talaga kadi a kabaelak a suroten ti wagas ti panagbiagda ken idedikar ti bagik iti sekular a trabaho? Saan kadi a dedikadoakon ken Jehova?’ Buyogen ti napabaro a panangipateg, nag-regular pioneer. Immuneg ti pannakaawatna iti dedikasionna ket dayta ti nangtignay kenkuana a mangikeddeng iti pusona a mapan iti sadinoman a pakasapulanda kenkuana. Nagturpos iti Ministerial Training School ket naibaon kas maysa a misionero iti sabali a pagilian.
18. (a) Kasanot’ kalawa ti ramanen ti dedikasiontayo ken Jehova? (b) Aniat’ magunggonatayo iti dedikasiontayo ken Jehova?
18 Ti dedikasion ramanenna ti intero a biagtayo. Masapul a paglikudantay ti bagitayo ket “inaldaw-aldaw” a surotentayo ti nasayaat nga ulidan ni Jesus. (Lucas 9:23) Tangay pinaglikudantayon ti bagitayo, saantay a kiddawen ken Jehova a pagbakasionen, paginanaennatayo. Agbiagtayo a mayannurot kadagiti prinsipio nga impasdek ni Jehova maipaay kadagiti adipenna. Uray kadagiti benneg a mabalintay ti agpili, makagunggona a kitaentayo no ikagkagumaantay met laeng ti agbiag a maitunos iti dedikasiontayo ken Jehova. Bayat nga agserserbitayo kenkuana iti inaldaw-aldaw, nga ar-aramidentay ti amin a kabaelantayo a mangay-ayo kenkuana, agballigitayto kas Kristiano ken maparaburantayto iti anamong ni Jehova, Daydiay maikari iti amin-kararua a debosiontayo.
Mailawlawagyo Kadi?
◻ Aniat’ inraman ti dedikasion para ken Jesu-Kristo?
◻ Apay a rumbeng a liklikantayo ti agtanabutob maibusor ken Jehova?
◻ Iti ania a pamay-an a malapdantay ti idolatria a sumrek a sisisikap iti biagtayo?
◻ Ti pananglaglagip iti ania ti makatulong kadatayo a di “mabannog” iti panagaramid iti pagayatan ti Dios?
[Ladawan iti panid 17]
Dagiti dedikado a Kristiano ‘dida sumuko iti panagaramid ti nasayaat’