Dagiti Agtuturay Iti Lubong Dagiti Espiritu

SIASINO ti agturturay iti lubong? Addada kadi kita ti panangaywan a nalablabes ngem iti tao? Wenno binaybay-an kadin ti Dios dagiti tao a mangaywan iti bagbagida? Iti panagbirok kadagiti sungbat dagitoy a salsaludsod, usigentay pay nga umuna ti maysa a pasamak a naaramid bayat ti naindagaan a ministerio ni Jesu-Kristo.

Di nagbayag kalpasan ti bautismona, ni Jesus ket sinulisog ti maysa a di makita nga espiritu a parsua a maaw-awagan Satanas a Diablo. Iti panangdakamat iti maysa kadagiti sulisog, kunaen ti Biblia: “Impan ti Diablo [ni Jesus] iti maysa a bantay a di gagangay ti kangatona, ket imparangna kenkuana dagiti isuamin a pagpagarian ti lubong ken ti dayagda.” (Mateo 4:8) Kalpasanna, imbaga ni Satanas ken Jesus: “Itedkonto kenka amin daytoy a kinaturay ken ti dayagda, agsipud ta naiyawat kaniak, ket iti asinoman a kayatko itedko dayta. Ngarud, no mangaramidka iti maysa a tignay a panagdayaw iti sanguanak, kukuamto amin dayta.”​—Lucas 4:6, 7.

Binigbig ni Satanas nga isut’ agturay iti isuamin a pagarian, wenno gobierno, itoy a lubong. Inlibak aya ni Jesus daytoy a panangbigbig? Saan. Kinapudnona, pinatalgedanna daytoy iti maysa pay a gundaway babaen ti panangdakamatna ken ni Satanas kas “ti agturay iti lubong.”​—Juan 14:30.

Sigun iti Biblia, ni Satanas ket maysa a dakes nga anghel nga addaan dakkel a pannakabalin. Inaig ni Kristiano nga apostol Pablo ni Satanas “kadagiti nadangkes nga espiritu a puersa” ken salaysayenna ida kas dagiti “agturay iti lubong daytoy a kinasipnget.” (Efeso 6:11, 12) Kasta met, kinuna ni apostol Juan a “ti intero a lubong adda iti pannakabalin daydiay nadangkes.” (1 Juan 5:19) Kuna ti libro ti Biblia nga Apocalipsis a ni Satanas ket “mangiyaw-awan iti intero a mapagnaedan a daga.” (Apocalipsis 12:9) Iti simboliko a sasao, ti Apocalipsis iladawanna met ni Satanas kas maysa a dragon a mangipapaay iti napolitikaan a sistema ti lubong iti “pannakabalinna ken ti tronona ken dakkel a kinaturay.”​—Apocalipsis 13:2.

Paneknekan met dagiti pasamak iti lubong nga adda dakes a pannakabalin nga agtigtignay, a mangiturturong kadagiti tattao iti pagdaksanda. Iti ania a sabali pay a rason a mapapaay dagiti gobierno ti tao a mangipasdek iti talna? Ania pay ti makagapu iti panaggiginnura ken panagpipinnatay dagiti tao? Gaput’ pannakakellaatna iti panangikisap ken ipapatay iti gerra sibil, kinuna ti maysa a nakapaneknek: “Diak pulos mapanunot no kasano a napasamak daytoy. Nakarkaro pay ngem iti panaggiginnura. Maysa daytoy a dakes nga espiritu a mangar-aramat kadagitoy a tattao tapno agpipinnatay.”

Pudpudno a Persona a Bimmusor iti Dios

Ita, adu ti saan a mamati nga adda Satanas a Diablo. Ngem, isut’ saan laeng a prinsipio ti kinadakes iti sangatauan, kas pammati ti dadduma. Agpadpada nga ipakita ti Biblia ken dagiti pasamak iti lubong nga isut’ pudpudno a persona. Maysa pay, ni Satanas ket naan-anay a bimmusor ken Jehova a Dios. Siempre, ni Satanas saanna a katupag ti Dios. Tangay ni Jehova ti mannakabalin-amin a Namarsua, isut’ maiparbeng nga Agturay iti amin a sangaparsuaan.​—Apocalipsis 4:11.

Saan a namarsua ti Dios iti managdakdakes a parsua a bumusor kenkuana a mismo. Imbes ketdi, pinatanor ti maysa kadagiti anghel nga “annak ti Dios” ti naagum a tarigagay tapno matagikuana a mismo ti panagdayaw a maiparbeng a para ken Jehova. (Job 38:7; Santiago 1:14, 15) Daytoy a tarigagay ti nangiturong kenkuana nga umalsa maibusor iti Dios. Babaen iti iyaalsana, pinagbalin daytoy nga espiritu a parsua ti bagina a Satanas (kaipapananna “bumusbusor”) ken Diablo (kaipapananna “manangpardaya”). Gapu iti daytoy, nalabit masdaawkayo no apay a napalubosan ni Satanas nga agturay iti lubong.

No Apay a Napalubosan ni Satanas nga Agturay

Malagipyo kadi ti imbaga ni Satanas ken Jesus maipapan iti panagturay iti daga? “Itedkonto kenka amin daytoy a kinaturay . . . agsipud ta naiyawat kaniak,” kinuna ni Satanas. (Lucas 4:6) Ipakita dayta a sasao nga agturturay ni Satanas a Diablo gapu laeng iti pammalubos ti Dios. Ngem apay a palpalubosan ti Dios ni Satanas?

Mainaig ti sungbat dayta a saludsod kadagiti pasamak idiay minuyongan ti Eden, a sadiay rinugian ni Satanas ti karerana kas agturay iti lubong. Sadiay a pinagminar ni Satanas nga agturturay ti Dios iti dakes a pamay-an gapu iti panangipaidamna ti maysa a banag a nasayaat iti immuna a lalaki ken babai, da Adan ken Eva. Sigun ken Satanas, no kanenda ti bunga ti kayo nga imparit ti Dios, mawayawayaandanto. Mawayawayaan ken makapagwaywayasto da Adan ken Eva manipud ken Jehova. Umaspingdanto iti Dios a mismo!​—Genesis 2:16, 17; 3:1-5.

Iti kastoy a panangulbod ken pananggargarina ken Eva ken babaen ti panangallukoyna [ni Eva] ken Adan nga agsalungasing iti linteg ti Dios, inyeg ni Satanas ti immuna a natauan a pagassawaan iti sidong ti panangidaulo ken panangtengngelna. Iti kasta, nagbalin ti Diablo a diosda, daydiay bumusor ken Jehova. Nupay kasta, imbes a pannakawayawaya, napasaran da Adan ken Eva ti panangadipen ni Satanas, ti basol, ken ti ipapatay.​—Roma 6:16; Hebreo 2:14, 15.

Maitunos iti naan-anay a kinahustisiana, nabaelan koma a pinapatay a dagus ni Jehova ni Satanas ken ti dua a kabbaro a pasurotna. (Deuteronomio 32:4) Ngem, adda moral nga isyu a nairaman. Kinarit ni Satanas ti kinanainkalintegan ti pamay-an a panangituray ni Jehova. Iti kinasiribna, pinalubosan ti Dios nga aglabas ti panawen tapno mapaneknekan a ti isisina kenkuana mangyeg iti didigra. Pinalubosan ni Jehova dagiti managalsa nga agtultuloy nga agbiag iti apagbiit, a pinalubosanna da Adan ken Eva a maaddaan kadagiti annak.​—Genesis 3:14-19.

Nupay kaaduan kadagiti annak ni Adan saanda a nagpasakop iti panangituray ni Jehova, ti pannakilangen ti Dios kadagiti agdaydayaw Kenkuana nangipakita iti kinaturayna. Ti umiso a panangbigbig iti kinaturay ni Jehova mangyeg iti kinaragsak ken pudno a kinatalged. Iti sabali a bangir, nagbanag iti panagsagaba ken kinaawan talged ti natauan a panagturay iti sidong ti impluensia ni Satanas. Wen, ti “tao inturayanna ti tao iti pagdaksanna.” (Eclesiastes 8:9) Saan a nakasarak dagiti tattao iti pudpudno a talged ken manayon a kinaragsak iti sidong ti natauan a turay iti daytoy lubong nga adda iti pannakabalin ni Satanas. Nupay kasta, adda natalged a rason tapno mangnamnama.

Bassiten ti Tiempo ni Satanas!

Temporario laeng ti impluensia ni Satanas ditoy daga. Dinton pulos palubosan ni Jehova ti panangituray ni Satanas! Iti din agbayag, awanton ti maaramidan ti Diablo. Maysa a baro nga agturay ti mangtengngel iti daga, maysa a nalinteg nga ari a pinili ti Dios a mismo. Dayta nga Ari isu ni Jesu-Kristo. Maipanggep iti pannakaitronona idiay langit, kunaen ti Apocalipsis: “Ti pagarian ti lubong nagbalinen a pagarian ni Apotayo [ni Jehova] ken ni Kristona.” (Apocalipsis 11:15) Paneknekan ti kronolohia ti Biblia, agraman ti kaitungpalan ti padto iti Kasuratan, a napasamak daytoy idi tawen 1914.​—Mateo 24:3, 6, 7.

Iladawan met ti Biblia ti napasamak di nagbayag kalpasan ti pannakaitrono ni Jesus. Kunana: “Bimtak ti gubat sadi langit: Ni Miguel [Jesu-Kristo] ken dagiti anghelna nakibakalda iti dragon [ni Satanas a Diablo], ket ti dragon ken dagiti anghelna nakibakalda ngem saan a nangabak, awan met nasarakanen a lugarda idiay langit. Gapuna naitappuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangiyaw-awan iti intero a mapagnaedan a daga; isu naitappuak iti daga, ket dagiti anghelna naitappuakda a naikanunong kenkuana.”​—Apocalipsis 12:7-9.

Aniat’ ibunga ti pannakapaksiat ni Satanas idiay langit? Agragsak dagidiay adda sadi langit, ngem komusta met ngay dagiti agnaed iti daga? “Asi pay ti daga ken ti baybay,” kunaen ti Apocalipsis 12:12, “agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” Wen, ti pannakaitappuak ni Satanas manipud langit nangyeg iti rigat ditoy daga. Kuna ti The Columbia History of the World: “Ti dakkel a didigra iti Uppat a Tawen a Gubat idi 1914–1918 . . . impakitana iti Makin-laud a lubong a dina masalakniban ti sibilisasion manipud iti bukodna a kinamaag wenno sinasairo a motibo. Ti kinamaingel ti Lumaud saan a pulos a napasubli manipud iti dayta a pannakawarawarana.”

Dagiti rigat daytoy a kaputotan ket mabigbig malaksid pay iti nawarawara a kinamaingel. Impadto ni Jesus: “Ti nasion tumakderto a bumusor iti nasion ket ti pagarian bumusor iti pagarian, ket addanto dagiti kinakirang ti taraon ken dagiti ginggined iti nadumaduma a disso.” Impadtona met dagiti angol. (Mateo 24:7, 8; Lucas 21:11) Kasta met, kunaen ti Biblia a kadagiti “maudi nga al-aldaw” ti sistema ti bambanag ni Satanas, adunto dagiti ‘managayat iti bagbagida, managayat iti kuarta, . . . nasukir kadagiti nagannak, . . . saan a sidadaan iti aniaman a tulagan.’ Dagiti tattao ‘managayatto met iti ragragsak imbes a managayat koma iti Dios.’​—2 Timoteo 3:1-5.

Dagiti gubat, angol, kinakirang ti taraon, ginggined, ken panagbalin a dakes dagiti moral a kababalin​—amin dagitoy ti naaramid sipud pay idi 1914 iti kasaknap nga awan pay kaaspingna, kas impadto ti Biblia. Ipasimudaag dagitoy a ti sumsumged iti pungtotna a kabusor ti Dios ken ti tao​—ni Satanas a Diablo​—ket naitapuak manipud langit ken ita masapul nga ipapasna ti pungtotna iti kaparanget ti daga. Ngem ipakita met ti Biblia a saanen a mapalubosan ni Satanas nga agtignay iti mabayag unay. “Bassit [laengen] a periodo ti panawen” ti natda kenkuana aginggat’ Armagedon, inton dadaelen ti Dios ti sistema ti lubong a tengtenglen ni Satanas.

Aniat’ mapasamak ken ni Satanas kalpasanna? Insurat ni apostol Juan: “Nakitak ti maysa nga anghel a bumabbaba manipud langit nga addaan iti tulbek ti mangliwengliweng ken maysa a dakkel a kawar iti imana. Ket kinemmegna ti dragon, ti kadaanan a serpiente, nga isu ti Diablo ken Satanas, ket pinarautanna iti las-ud ti sangaribo a tawen. Ket inggarangugongna iti mangliwengliweng ket rinikpanna dayta ken sinelioanna dayta iti rabawna.” (Apocalipsis 20:1-3) Anian a bang-ar agpaay iti agsagsagaba a sangatauan!

Panagrag-o iti Sidong ti Turay ti Pagarian

Inton maawanen ni Satanas, naan-anayton nga agturay iti sangatauan ti Pagarian ti Dios iti sidong ni Jesu-Kristo. Imbes nga adu a gobierno ditoy daga, maymaysa a nailangitan a gobierno laeng ti agtalinaedto a mangituray iti intero a planeta. Awanton ti gubat, ket agrairanto ti kinatalna iti sadinoman. Iti sidong ti panagturay ti Pagarian ti Dios, agnaedto ti isuamin a sangsangkamaysa iti naayat a panagkakabsat.​—Salmo 72:7, 8; 133:1; Daniel 2:44.

Anianto ngata a kita ti agturay ni Jesus? Idi isut’ adda ditoy daga, nangipakita iti nauneg a panangipateg kadagiti tattao. Siaasi a pinakan ni Jesus dagiti mabisin. Pinaimbagna dagiti masakit ken insublina ti panagkita dagiti bulsek, panagsao dagiti umel, ken pannagna dagiti pilay. Pinagungar pay ketdi ni Jesus dagiti natay! (Mateo 15:30-38; Marcos 1:34; Lucas 7:11-17) Pakpakauna laeng dagidiay a datdatlag kadagiti nakaskasdaaw a banag nga aramidennanto kas Ari. Nagragsak ketdin ti maaddaan iti kasta a naparabur nga agturay!

Dagiti awan patinggana a bendision ti sagrapento dagidiay agpasakop iti kinasoberano ni Jehova. Ikari ti Kasuratan: “Iti dayta a tiempo maluktanton dagiti mata ti bulsek, ken dagiti lapayag ti tuleng maluktandanto. Iti dayta a tiempo aglagtonto ti pilay a kas maysa nga ugsa, ken ti dila ti umel agkantanto.” (Isaias 35:5, 6) Tapno mailadawan dayta naindaklan nga aldaw, nagsurat ni apostol Juan: “Nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.’”​—Apocalipsis 21:3, 4.

Dagiti kinaragsak nga ipaay ti panangituray ni Jehova a Dios babaen iti Anakna, ni Jesu-Kristo, siwawadwadto a supapakanna ti aniaman a panagsagaba a mapaspasarantayo iti agdama a sistema ti bambanag nga iturturayan ni Satanas a Diablo. Iti naikari a baro a lubong ti Dios, saanton a masdaaw dagiti tao, ‘Siasino a talaga ti agturturay?’ (2 Pedro 3:13) Naragsak ken natalgedto ti managtulnog a sangatauan iti naindagaan a pagturayan dagiti managayat nga Agtuturay iti lubong dagiti espiritu, ni Jehova ken ni Kristo. Apay a dikay awaten ti namnama nga agbalin a sakupda?

[Ladawan iti panid 7]

Natalgedto ti sangatauan iti naindagaan a pagturayan ti Pagarian ti Dios

[Picture Credit Line iti panid 4]

Ladawan ti NASA