Ti Akikid a Dalan nga Agturong iti Wayawaya
SUPIATEN ti sumagmamano a masirib a tattao a ti uniberso ket iturturayan dagiti linteg ti nakaparsuaan. Dagitoy a linteg ti mangiturong iti isuamin manipud kadagiti bassit-usit nga atomo agingga kadagiti nagdadakkel a galaksi nga addaan kadagiti binilion a bituen. No awan dagiti linteg ti nakaparsuaan, awan koman ti panagplano ken pannakaawat; awan koman a mismo ti biag. Babaen ti panangtarus kadagiti linteg ti nakaparsuaan ken pannakitunos kadagitoy, nakaaramiden ti tao kadagiti nakaskasdaaw a gapuanan, kas ti pannagna idiay bulan ken panagipatulod kadagiti de kolor a ladawan manipud iti sadinoman a lugar ditoy daga wenno uray pay iti labes ti atmospera ti daga kadagiti telebision iti pagtaengantayo.
Ngem komusta ngay dagiti moral a linteg? Makagunggona ken nasayaat kadi ti panangsurot kadakuada? Adut’ kasla mangipapan nga awan dagiti linteg iti moral ket pinilida ti manangpanuynoy a pilosopia wenno relihion a maitunos kadagiti bukodda a tarigagay.
Nupay kasta, adda dadduma a nangpili iti sabali a dalan, ti ‘nailet a dalan nga agturong iti biag’ kas naibalabala iti Biblia. Saantay koma a maklaat a bassit laeng ti mangpilpili iti daytoy, ta kinuna ni Jesus maipapan iti nailet a dalan: “Bassit dagidiay makasarak iti dayta.” (Mateo 7:14) Apay a bassit laeng?
Agsipud ta ti nailet a dalan ket addaan kadagiti mangipawil a paglintegan ken pagalagadan ti Dios. Daydiay laeng agtarigagay a sipapasnek a mangitunos iti biagna kadagiti pagalagadan ti Dios ti maguyugoy iti daytoy. Maigidiat unay iti akaba a dalan, a kasla mangipaay iti wayawaya ngem iti kinapudnona ket pannakaadipen, ti akikid a dalan, a kasla manangipawil, wayawayaanna ti maysa a tao iti tunggal napateg a banag. Dagiti pagbeddenganna ket intuyang ti “perpekto a linteg a kukua ti wayawaya.”—Santiago 1:25.
No Kasano a Mangwayawaya ti Akikid a Dalan
Pudno a saan a kankanayon a nalaka ti agtalinaed iti akikid a dalan. Imperpekto amin nga agbibiag a tattao ken addaan iti natawid a pagannayasan nga agaramid iti di umiso. Isu a mabalin nga agannayas ti maysa a tao a sumiasi bassit. Nupay kasta, dagiti gunggona ti panagtalinaed iti ‘nailet a dalan’ ket lab-awanna ti aniaman a kasapulan a panangdisiplina iti bagi wenno panagbalbaliw, ta ti Dios ‘isursuronatayo iti pakagunggonaantay a mismo.’—Isaias 48:17; Roma 3:23.
Tapno mailadawan: Siaannad dagiti masirib a nagannak a mangaramid iti kasla ‘nailet a dalan’ no maipapan iti pannangan dagiti annakda. No dadduma, daytoy kaipapananna ti kinainget no panawen ti pannangan. Ngem inton dumakkel dagiti annak, apresiarendanto ti naayat a panangdisiplina dagiti dadakkelda. Kas natataengan, magustuandanton dagiti makapasalun-at a taraon. Ket gapu iti kinaadu ti magun-odan a nasustansia a taraon, pulos a didanto marikna a mapawpawilanda.
Iti naespirituan a pamay-an, kasta met laeng ti ar-aramiden ti Dios kadagidiay adda iti akikid a dalan nga agturong iti biag. Patpatanorenna dagiti nasayaat a tarigagay dagiti naemma a mangiturong iti kinaragsak ken pudno a wayawaya. Ar-aramidenna daytoy babaen ti panangipaayna iti Saona, ti Biblia. Mainayon pay, aw-awisennatayo nga agkararag a maipaay iti espirituna a tumulong kadatayo, ken bilbilinennatayo a makitimpuyog kadagiti pada a Kristiano, a mabalin a mangparegta kadatayo nga agtalinaed iti akikid a dalan. (Hebreo 10:24, 25) Wen, ti Dios ket ayat, ket daytoy a katan-okan a galad isut’ nakaibatayan dagiti panggepna ken amin a pamay-anna.—1 Juan 4:8.
No adda ayat, talna, kinaimbag, panagteppel, ken dadduma pay a bunga ti espiritu ti Dios, saanen a kasla manangipawil ti akikid a dalan. Kas kuna ti kasuratan, “awan ti linteg a maibusor kadagita a bambanag.” (Galacia 5:22, 23) “No sadino ti yan ti espiritu ni Jehova, adda wayawaya.” (2 Corinto 3:17) Uray pay itan, mapadpadasanen dagiti pudno a Kristiano daytoy a wayawaya. Nawayada manipud iti adu a buteng a mangparparigat iti adu a tattao itatta, kas ti panagbuteng iti masanguanan ken ti an-anito a panagbuteng iti ipapatay. Anian a makaparagsak a panunoten iti masanguanan inton “ti daga mapnonto iti pannakaammo ken ni Jehova a kas la kadagiti dandanum saknapanda ti baybay”! (Isaias 11:9) Sa awanton uray pay ti panagbuteng iti krimen. Maawanton nga agnanayon dagiti kandado ken rehas. Nawaya ken natalgedton ti isuamin—iti aldaw ken rabii, iti uneg ken ruar ti pagtaengan. Daytantot’ pudno a wayawaya!
Naipanamnama Kadatayo ti Tulong ti Dios
Pudno a kasapulan ti panagregget iti panagbiag a maitunos kadagiti pagalagadan ti Dios, yantangay “dagiti bilinna saanda a makapadagsen,” uray pay kadagiti imperpekto a tattao. (1 Juan 5:3) Bayat a mairuamtayo iti akikid a dalan ken mapadasantay dagiti gunggona ti pannagna iti dayta, mapatanortay ti kumarkaro a pannakarurod kadagiti tignay ken panagpampanunot a mangilasin kadagidiay adda iti akaba a dalan. (Salmo 97:10) Ti panagtulnog iti linteg ti Dios ket makaay-ayo iti inted-Dios a konsiensiatayo. Imbes a “ladingit ti puso” ken “tuok ti espiritu” a mapaspasaran ti adu, ikari ti Dios: “Adtoy! Dagiti adipenko agkantadanto a gapu iti rag-o ti puso.” Wen, naragsak ken nawaya ti puso a sinanay ni Jehova.—Isaias 65:14.
Natay ni Jesus tapno pagbalinenna a posible ti pudpudno a wayawaya para kadatayo. Kuna ti Biblia: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Ita, kas Ari iti nailangitan a Pagarian ti Dios, ipatpatungpal ni Jesus dagiti gunggona dayta a daton. Din agbayag, kalpasan ti “dakkel a rigat,” inton madadaelen ti akaba a dalan ken dagidiay adda iti dayta, siaanus nga iruginanton nga idalan ti natulnog a sangatauan agingga iti pungto ti nabatbati pay nga akikid a dalan, ti natauan a kinaperpekto. (Apocalipsis 7:14-17; Mateo 24:21, 29-31) Kamaudiananna, lak-amentayton ti kaitungpalan ti naindaklan a kari: “Ti sangaparsuaan a mismo mawayawayaanto met manipud iti pannakaadipen iti panagrupsa ket maaddaan iti nadayag a wayawaya dagiti annak ti Dios.” Saanto a marimbawan daytoy inted-Dios a wayawaya. Mapukawto metten uray ti ipapatay.—Roma 8:21; Apocalipsis 21:3, 4.
Babaen ti nabatad a pannakakita ken pannakatarus no sadino ti pagturongan ti akikid a dalan, ad-adda a matulongan ti maysa a tao a mangpili iti daytoy a dalan ken itultuloyna ti magna iti dayta. Nangnangruna a matultulongan dagiti agtutubo nga agbalin koma a nalawa ti panangmatmatda ken saanda koma a masuron kadagiti ibilbilangda kas panangipawil nga intuyang dagiti pagalagadan ti Dios. Masursuroda a matmatan dagitoy kas pammaneknek iti ayat ti Dios ken kas salaknib maibusor kadagiti kinadakes iti akaba a dalan. (Hebreo 12:5, 6) Siempre, kasapulan nga agbalin a naanus ti maysa, a silalagip a kasapulan ti panawen tapno makapataud kadagiti nadiosan a kababalin ken tarigagay, a kas met laeng iti maysa a kayo a kasapulanna ti naunday a panawen tapno makapataud iti nasayaat a bunga. Ngem makapagbunga ti kayo no masuksukay ken masibsibugan.
Gapuna, agadalkayo iti Sao ti Dios, makitimpuyogkayo iti dadduma a Kristiano, ken ‘agkararagkayo a di agressat’ maipaay iti nasantuan nga espiritu. (1 Tesalonica 5:17) Agtalekkay iti Dios a tumulong kadakayo a ‘mangiturong kadagiti desdesyo.’ (Proverbio 3:5, 6) Ngem praktikal kadi amin daytoy? Pudno aya a makatulong daytoy? Wen, nakatulong daytoy ken ni Tom kasta met ken Mary a nadakamat iti immuna nga artikulo.
Simmardengda a Magna iti Akaba a Dalan
Insurat ni Tom: “Idi katengngaan ti dekada 70’s, naam-ammomi dagiti Saksi ni Jehova idi immay ti maysa kadakuada iti pagtaenganmi. Ti saritaan ket nagresulta iti panagadal iti Biblia. In-inut a rinugiak a dalusan ti panagbiagko. Nabautisaranak idi 1982 ket agserserbiak itan iti lokal a kongregasion. Nabautisaran metten ti baromi. Agyamanak ken baketko ta inan-anusannak kadagidi a tawen sakbay a naammuak ti kinapudno. Ken kangrunaan iti amin, agyamanak ken Jehova ken iti Anakna, ni Kristo Jesus, iti amin nga impaayda kadakami ken iti namnamami itan iti masanguanan.”
Ket komusta met ngay ni Mary? Bueno, nariknana nga isut’ saanen a mapakawan ti Dios, ngem tinarigagayanna a maammuan ti maipapan kenkuana maigapu laeng kadagiti annakna. Idi nadamagna a mangisursuro dagiti Saksi ni Jehova iti Biblia iti kaarrubana, nagpatulong met. Nupay kasta, ti nakaigameranna a dakes a kababalin isut’ namagbalin a narigat ti irarang-ayna. Ti panagadal ket pasaray sumayaat ken pasaray saan. Ngem isut’ pinarparegta ti pito ti tawenna a balasitangna. “Dika sumuksuko Nanang. Kabaelam dayta!” masansan a kunaenna. Kalpasanna, ad-adda manen nga ikagumaan ni Mary.
Idi simmangpet ti nabayagen a kadendennana nga asawa, a maysa met a managabuso iti droga, isut’ nakipagadal met. Idi agangay, naparmekda nga agpadpada dagiti bisioda. Kalpasanna, idi nakapagkasar ken nagpabautisardan, napasaranda ti naindaklan a kinaragsak ken nariknada ti kaipapanan ti pudpudno a pamilia iti kaunaan a gundaway. Nakalkaldaang ta natay ni Mary idi agangay gapu iti AIDS, ngem isut’ natay a naipamaysa ti pusona iti kari ti Biblia a panagungar ken biag iti paraiso a daga, a nadalusan iti amin a lamma ti makapapatay nga akaba a dalan.
Wen, mabalin ti rummuar iti akaba ken nalawa a dalan nga agturong iti pannakadadael. Kinuna ni Kristo Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Gapuna, apay a dikay magna iti akikid a dalan nga agturong iti biag? Babaen ti panangipapuso ken panangyaplikar kadagiti naadalyo iti Sao ti Dios, mabalin a personal a mapadasanyo ti makaparagsak a kari ti Biblia: “Maammuanyonto ti kinapudno, ket ti kinapudno wayawayaannakayto.”—Juan 8:32.