Ti Kadi Dios ti Maipangpangruna iti Pamiliayo?

“Masapul nga ayatem ni Jehova a Diosmo iti amin a pusom.”​—MARCOS 12:29, 30.

1. Kasanot’ kapateg ti panagayattayo ken Jehova?

“ANIA a bilin ti umuna iti amin?” sinaludsod ti maysa nga eskriba ken ni Jesus. Imbes nga ibagana ti bukodna a kapanunotan, sinungbatan ni Jesus ti saludsodna babaen ti panangadawna iti Sao ti Dios iti Deuteronomio 6:4, 5. Kinunana: “Ti umuna ket, ‘Denggem, O Israel, ni Jehova a Diostayo maymaysa a Jehova, ket masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo ken iti amin a pigsam.’”​—Marcos 12:28-30.

2. (a) Ania nga ibubusor ti masapul a sanguen idi ni Jesus? (b) Aniat’ mangparigat no dadduma iti panangay-ayo ken Jehova?

² Ti panagtulnog iti inawagan ni Jesus nga umuna a bilin​—ti kangrunaan​—kalikagumanna nga aramidentay a kanayon ti makaay-ayo ken Jehova. Kasta ti inaramid ni Jesus, uray pay no iti naminsan sinupiat ni apostol Pedro ti tignay ni Jesus, ken iti sabali pay a gundaway kasta met laeng ti inaramid dagiti mismo a nasinged a kabagianna. (Mateo 16:21-23; Marcos 3:21; Juan 8:29) Kasanon no addakay iti kasta a kasasaad? Ibagatayon a kayat dagiti miembro ti pamiliayo nga isardengyon ti panagadalyo iti Biblia ken ti pannakitimpuyogyo kadagiti Saksi ni Jehova. Ipangpangrunayo kadi ti Dios babaen ti panangaramid iti makaay-ayo kenkuana? Ti kadi Dios ti ipangpangrunayo, uray no busoren dagiti miembro ti pamiliayo ti panagreggetyo nga agserbi kenkuana?

Ti Silo ti Ibubusor ti Pamilia

3. (a) Aniat’ mabalin nga ibunga dagiti pannursuro ni Jesus iti pamilia? (b) Kasano a maipakita dagiti kameng ti pamilia no asino ti ad-adda nga ipatpategda?

³ Saan a tinagibassit ni Jesus ti rigat a patauden ti ibubusor dagiti dadduma iti pamilia iti miembro nga umawat kadagiti pannursurona. “Dagiti kabusor ti maysa a tao isudanto dagiti tattao iti bukodna a sangakabbalayan,” kinuna ni Jesus. Kaskasdi, iti laksid ti kasta a nasaem a pagbanagan, impakita ni Jesus no asino ti rumbeng a maipangpangruna babaen ti panagkunana: “Ti addaan dakdakkel a panagayat maipaay iti ama wenno ina ngem iti maipaay kaniak di maikari kaniak; ket ti addaan dakdakkel a panagayat maipaay iti anak a lalaki wenno anak a babai ngem iti maipaay kaniak di maikari kaniak.” (Mateo 10:34-37) Maipangpangrunatay ni Jehova a Dios babaen ti panangsurot iti pannursuro ti Anakna, ni Jesu-Kristo, nga isu ‘ti apag-isu a ladawan ti mismo a kina-isu [ti Dios].’​—Hebreo 1:3; Juan 14:9.

4. (a) Aniat’ kinuna ni Jesus a nairaman iti panagbalin a pasurotna? (b) Iti ania nga anag a guraen dagiti Kristiano ti kamkameng ti pamilia?

⁴ Iti sabali a gundaway, idi sarsaritaen ni Jesus no ania a talaga ti nairaman iti panagbalin a pudno a pasurotna, kinunana: “No ti asinoman umay kaniak ket dina guraen ni amana ken ni inana ken ni asawana ken dagiti annakna ken dagiti kakabsatna a lallaki ken dagiti kakabsatna a babbai, wen, ken uray ti bukodna a kararua, isu saan a makapagbalin nga adalak.” (Lucas 14:26) Nalawag a di kayat a sawen ni Jesus a dagiti pasurotna literal a guraenda dagiti kameng ti pamiliada, tangay binilinna dagiti tattao nga ayatenda uray dagiti kabusorda. (Mateo 5:44) Imbes ketdi, ti kayat a sawen ni Jesus ditoy ket dagiti pasurotna masapul nga ayatenda ti Dios a nangnangruna ngem dagiti kameng ti pamilia. (Idiligyo ti Mateo 6:24.) Maitunos iti kasta a pannakaawat, kuna ti Biblia a ni Jacob “ginurana” ni Lea ken inayatna ni Raquel, kayatna a sawen, dakdakkel ti panagayatna ken ni Raquel ngem iti kabsatna a ni Lea. (Genesis 29:30-32) Kinuna ni Jesus nga uray ti mismo a “kararua[tayo],” wenno biagtayo, ket guraentay koma, wenno ayatentay ni Jehova nga ad-adda ngem ti panagayattayo iti dayta!

5. Kasano a sisisikap a gunggundawayan ni Satanas ti urnos ti pamilia?

⁵ Kas Namarsua ken Manangted-Biag, maikari ni Jehova iti naan-anay a debosion manipud kadagiti amin nga adipenna. (Apocalipsis 4:11) “Agparintumengak iti Ama,” insurat ni apostol Pablo, “isu a nakautangan ti tunggal pamilia idiay langit ken iti daga ti naganna.” (Efeso 3:14, 15) Inaramid ni Jehova ti urnos ti pamilia iti nakaskasdaaw a pamay-an ta addaan dagiti kameng ti pamilia iti nakayanakan a panagayat iti maysa ken maysa. (1 Ar-ari 3:25, 26; 1 Tesalonica 2:7) Nupay kasta, sisisikap a gunggundawayan ni Satanas a Diablo daytoy a nakayanakan a panangipateg iti pamilia, a pakairamanan ti tarigagay a mangay-ayo kadagiti ay-ayatentayo. Degdeganna ti ibubusor ti pamilia, ket adu ti marigatan nga agtakder a sititibker maipaay iti kinapudno iti Biblia no maipasangoda iti dayta.​—Apocalipsis 12:9, 12.

Panangsango iti Karit

6, 7. (a) Kasano a matulongan dagiti kameng ti pamilia a mangapresiar iti kinapateg ti panagadal iti Biblia ken ti Nakristianuan a pannakitimpuyog? (b) Kasanotay a maipakita a talaga nga ay-ayatentay dagiti kameng ti pamiliatayo?

⁶ Aniat’ aramidenyo no pilitendakayo nga agpili iti nagbaetan ti panangay-ayo iti Dios wenno panangay-ayo iti maysa a kameng ti pamilia? Ikalinteganyo kadi a saan a namnamaen ti Dios kadatayo nga adalentay ti Saona ken iyaplikar dagiti prinsipiona no ti panangaramid iti kasta ket agbanag iti pannakasinasina ti pamilia? Ngem panunotenyo daytoy. No sumukokayo ken isardengyon ti agadal iti Biblia wenno makitimpuyog kadagiti Saksi ni Jehova, kasano a maawatan dagiti patpatgenyo a ti umiso a pannakaammo iti Biblia ket kaipapananna ti biag wenno patay?​—Juan 17:3; 2 Tesalonica 1:6-8.

⁷ Mabalintay nga iladawan ti kasasaad iti kastoy: Nalabit a nalabes ti panagin-inum ti maysa a kameng ti pamilia. Pudno kadi a pagimbaganna no diyo ikankano wenno panuynoyanyo ti panaginumna? Nasaysayaat kadi a taginayonen ti talna babaen ti panangpalugod iti dayta imbes a risuten ti parikutna? Saan, nalabit umanamongkayo a ti kasayaatan nga aramiden isu ti panangtulong kenkuana a mangparmek iti panagin-inumna, uray pay no kapungtot ken butbutngennakayo. (Proverbio 29:25) Kasta met, no pudpudno nga ay-ayatenyo dagiti kameng ti pamiliayo, dikay sumuko iti panagreggetda a mangpasardeng kadakayo nga agadal iti Biblia. (Aramid 5:29) Babaen laeng ti panagtakder a sititibker a matulonganyo ida a mangtarus a ti panagbiag a mayannurot iti sursuro ni Kristo kaipapananna ti mismo a biagtayo.

8. Kasanotay a magunggonaan iti simamatalek a panangaramid ni Jesus iti pagayatan ti Dios?

⁸ No dadduma, mabalin a narigat unay nga iyun-una ti Dios. Ngem laglagipenyo, pinagbalin met ni Satanas a narigat para ken Jesus ti panangaramid iti pagayatan ti Dios. Ngem pulos a di simmuko ni Jesus; inibturanna uray ti rigat iti kayo a pagtutuokan gapu kadatayo. ‘Ni Jesu-Kristo isut’ Manangisalakantayo,’ kuna ti Biblia. “Isu natay maipaay kadatayo.” (Tito 3:6; 1 Tesalonica 5:10) Saantay kadi nga agyaman ta saan a simmuko ni Jesus iti ibubusor? Gapu ta inibturanna ti sakripisio nga ipapatay, addaantay iti namnama nga agbiag nga agnanayon iti maysa a natalna a baro a lubong ti kinalinteg babaen ti panangalagad ti pammati iti naiparukpok a darana.​—Juan 3:16, 36; Apocalipsis 21:3, 4.

Posible a Dakkel a Gunggona

9. (a) Kasano a maisalakan dagiti Kristiano ti sabsabali? (b) Ania ti kasasaad ti pamilia ni Timoteo?

⁹ Nabigbigyo kadi a mabalin a maaddaankay met iti paset iti panangisalakan kadagiti dadduma, a pakairamanan dagiti patpatgenyo unay a kakabagian? Indagadag ni apostol Pablo ken ni Timoteo: “Agtalinaedka kadagitoy a bambanag [a naisuro kenka], ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.” (1 Timoteo 4:16) Nagnaed ni Timoteo iti nabingaybingay a pamilia, saan a manamati ti Griego nga amana. (Aramid 16:1; 2 Timoteo 1:5; 3:14) Nupay ditay ammo no nagbalin a manamati ti ama ni Timoteo, posible [a nagbalin a manamati] gapu iti matalek a kababalin ni Eunice nga asawana, ken ni Timoteo.

10. Aniat’ maaramidan dagiti Kristiano maipaay kadagiti di manamati nga assawada?

¹⁰ Ipalgak ti Kasuratan a dagiti assawa a lallaki ken babbai a sititibker a mangitandudo iti kinapudno ti Biblia mabalin a makatulongda iti pannakaisalakan dagiti di-Kristiano nga assawada babaen ti panangtulong kadakuada nga agbalin a manamati. Insurat ni apostol Pablo: “No ti asinoman a kabsat a lalaki addaan iti di mamati nga asawa, ket kaskasdi isu umanamong a makipagnaed kenkuana, dina koma panawan; ket ti maysa a babai nga addaan iti di mamati nga asawa, ket kaskasdi isu umanamong a makipagnaed kenkuana, dina koma panawan ti asawana a lalaki. Ta, asawa a babai, kasano ti pannakaammom no maisalakanmonto ti asawam? Wenno, asawa a lalaki, kasano ti pannakaammom no maisalakanmonto ti asawam?” (1 Corinto 7:12, 13, 16) Inlawlawag ni apostol Pedro no kasano a maisalakan dagiti assawa a babbai ti lallakayda, nga indagadagna: “Agpasakopkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od ida nga awan ti sao babaen iti kababalin dagiti assawada a babbai.”​—1 Pedro 3:1.

11, 12. (a) Ania a gunggona ti inawat dagiti rinibu a Kristiano, ken aniat’ inaramidda tapno magun-odda dayta? (b) Mangisalaysaykayo iti maysa a kapadasan ti kameng ti pamilia a nagunggonaan gapu iti matalek a panagibturna.

¹¹ Kadagiti kallabes a tawen, rinibu dagiti nagbalin a Saksi ni Jehova kalpasan ti adu a bulan ken uray tawtawen nga ibubusor iti Nakristianuan nga aktibidad dagiti Saksi a kabagianda. Anian a gunggona daytoy kadagiti Kristiano a nagtalinaed a natibker, ken anian a bendision kadagiti sigud a bumusbusor! Sipapasnek a kinuna ti maysa a 74-años a Kristiano a panglakayen: “Masansan a pagyamanak ti asawak ken dagiti annakko gapu iti panagtalinaedda iti kinapudno kabayatan ti adu a tawen a panangbusorko kadakuada.” Kinunana a tallo a tawen a sitatangken a nagkedked a mangipalubos iti asawana a makisarita kenkuana maipapan iti Biblia. “Ngem gundawayannak idi a kasarita no natanangak,” kinunana, “ken rugiannak a kasabaan bayat nga ap-aprosanna dagiti sakak. Anian a yamanko ta saan a simmuko iti ibubusorko!”

¹² Insurat ti sabali pay nga asawa a lalaki a dati a bumusbusor iti pamiliana: ‘Siak ti kadaksan a kabusor ni baketko agsipud ta idi nagun-odna ti kinapudno, binutbutengko, ken inaldaw nga agapakami; kayatko a sawen, kanayon a siak ti mangirugi iti apa. Ngem napaayak; nagtalinaed ni baketko iti Biblia. Sangapulo ket dua a tawen a binusorko ti kinapudno ken ni baketko ken ti anakko. Para kadakuada a dua, siak ti Diablo a nagbalin a tao.’ Idi agangay rinugian ti lalaki nga usigen ti kababalinna. ‘Naamirisko a naulpitak unay,’ inlawlawagna. ‘Binasak ti Biblia, ket gapu iti pannursurona, maysaak itan a bautisado a Saksi.’ Panunotenyo ti dakkel a gunggona ti asawa a babai, wen, ti ‘pannakaisalakan ni lakayna’ gapu iti matalek a panangibtur iti ibubusorna iti las-ud ti 12 a tawen!

Panagsursuro ken Jesus

13. (a) Ania ti kangrunaan a leksion a maadal dagiti assawa a lallaki ken babbai iti panagbiag ni Jesus? (b) Kasano a dagiti tattao a marigatan nga agpasakup iti pagayatan ti Dios magunggonaanda iti ulidan ni Jesus?

¹³ Ti kangrunaan a masursuro dagiti assawa a lallaki ken babbai iti panagbiag ni Jesus isu ti panagtulnog iti Dios. “Kankanayon nga aramidek dagiti bambanag a makaay-ayo kenkuana,” kinuna ni Jesus. “Sapulek, saan a ti bukodko a pagayatan, no di ket ti pagayatan daydiay nangibaon kaniak.” (Juan 5:30; 8:29) Uray idi nasarakan ni Jesus ti maysa a partikular nga aspeto ti pagayatan ti Dios a saan a makaay-ayo, nagtulnog latta. “No kayatmo, ikkatem kaniak daytoy a kopa,” inkararagna. Ngem dagus a kinunana: “Nupay kasta, saan koma a ti pagayatak, no di ket ti pagayatam ti maaramid.” (Lucas 22:42) Saan nga indawat ni Jesus a baliwan ti Dios ti pagayatanna; impakitana a pudpudno nga inay-ayatna ti Dios babaen ti situtulok a panagpasakupna iti aniaman a pagayatan ti Dios kenkuana. (1 Juan 5:3) Ti kankanayon a panangyun-una iti pagayatan ti Dios, kas iti inaramid ni Jesus, ket napateg unay iti panagballigi saan laeng nga iti biag ti agwaywayas no di pay ket iti biag ti naasawaan ken addaan iti pamilia. Usigenyo no apay a kasta.

14. Aniat’ di umiso a panagrasrason ti dadduma a Kristiano?

¹⁴ Kas nakitatayon, no ti Dios ti iyun-una dagiti manamati, ikagumaanda ti agtalinaed kadagiti di manamati nga assawada ken masansan a matulonganda ida a maikari iti pannakaisalakan. Uray pay no agpada a manamati dagiti agassawa, adda ta adda latta rumsua a parikutda. Gapu kadagiti dakes a pagannayasan, dagiti assawa a lallaki ken babbai saan a kanayon a naayat ti pampanunotda iti maysa ken maysa. (Roma 7:19, 20; 1 Corinto 7:28) Dagiti dadduma mabalin nga aglablabesda payen, a sumapuldan iti sabali nga asawa, nupay awan Nainkasuratan a pangibatayan tapno makisinada. (Mateo 19:9; Hebro 13:4) Ikalinteganda a daytoy ti kasayaatan kadakuada, a ti pagayatan ti Dios para kadagiti assawa a lallaki ken babbai a saanda nga agsinsina ket narigat unay. (Malakias 2:16; Mateo 19:5, 6) Awan duadua a maysa pay daytoy a kaso ti panangpampanunot kadagiti kapanunotan ti tao imbes nga iti Dios.

15. Apay a maysa a salaknib ti panangyun-una iti Dios?

¹⁵ Pudno a maysa a salaknib ti panangyun-una iti Dios! Dagiti agassawa a mangaramid iti kasta ikagumaanda ti agtalinaed iti maysa ken maysa ken risutenda dagiti parikutda babaen ti panangyaplikar iti balakad ti Sao ti Dios. Iti kasta, maliklikanda dagiti amin a pakarigatan nga ibunga ti di panangikabkabilangan iti pagayatanna. (Salmo 19:7-11) Mayilustrar daytoy iti agkabannuag a pagassawaan, a pangpanggependan ti agsina, inkeddengda a suroten ti balakad ti Biblia. Sumagmamano a tawen kamaudiananna, idi pinampanunot ti asawa a babai ti rag-o a tinagiragsakna iti pannakiasawana, kinunana: “Masapul nga agtugawak ken agsangit no panunotek ti posibilidad nga agbiag nga awan iti denna ni lakayko iti las-ud dagitoy a tawen. Kalpasanna, agkararagak ken Jehova a Dios ken agyamanak kenkuana gapu iti balakad ken panangidalanna a namagkaykaysa kadakami iti kasta a naragsak a relasion.”

Assawa a Lallaki, Assawa a Babbai​—Tuladenyo ni Kristo!

16. Ania nga ulidan ti impasdek ni Jesus agpadpada para kadagiti assawa a lallaki ken babbai?

¹⁶ Ni Jesus, a kanayon a nangyun-una iti Dios, nangipaay iti nagsayaat nga ulidan para kadagiti assawa a lallaki ken babbai, ket makagunggona unay kadakuada no imutektekanda a naimbag dayta. Naidagadag kadagiti assawa a lallaki a tuladenda ti nadungngo a panangidaulo ni Jesus kadagiti kameng ti kongregasion Kristiano. (Efeso 5:23) Makasursuro met dagiti Kristiano nga assawa a babbai iti awan pakapilawanna nga ulidan ni Jesus iti panagpasakup iti Dios.​—1 Corinto 11:3.

17, 18. Kadagiti ania a pamay-an a nangipaay ni Jesus iti nasayaat nga ulidan para kadagiti assawa a lallaki?

¹⁷ Ibilin ti Biblia: “Assawa a lallaki, itultuloyyo nga ayaten dagiti assawayo, no kasano a ni Kristo inayatna met ti kongregasion ken inyawatna ti bagina a maipaay iti dayta.” (Efeso 5:25) Ti maysa a napateg a pamay-an a panangipakita ni Jesus iti ayatna iti kongregasion dagiti pasurotna ket babaen ti panagbalinna a nadekket a gayyemda. “Inawagankay iti gagayyem,” kinuna ni Jesus, “agsipud ta isuamin a bambanag a nangngegko manipud iti Amak impakaammok kadakayo.” (Juan 15:15) Panunotenyo ti amin a panawen a binusbos ni Jesus a nakisarsarita kadagiti adalanna​—dagiti adu a pannakisaritana kadakuada​—ken ti panagtalekna kadakuada! Saan kadi a nagsayaat nga ulidan dayta para kadagiti assawa a lallaki?

¹⁸ Pudno nga interesado ni Jesus kadagiti adalanna ken pudpudno a dungdungnguenna ida. (Juan 13:1) Idi saanda unay a naawatan dagiti pannursurona, siaanus nga inlawlawagna dagiti bambanag no kasta nga is-isuda. (Mateo 13:36-43) Dakayo nga assawa a lallaki, napateg kadi kadakayo ti naespirituan a pagimbagan ti asawayo a kas met kadakayo? Mangbusbusboskay kadi iti panawen kenkuana, a siguraduenyo nga agpada a nalawag iti panunot ken pusoyo dagiti kinapudno iti Biblia? Kinuyog ni Jesus dagiti apostolna iti ministerio, nalabit sinanayna ti tunggal maysa kadakuada. Kuykuyogenyo kadi ni baketyo iti ministerio, a kaduayo a mamalaybalay ken iti panangyadal iti Biblia?

19. Kasano a ti panangtaming ni Jesus kadagiti pagkapuyan dagiti apostolna ket mangipaay iti ulidan para kadagiti assawa a lallaki?

¹⁹ Nangipaay ni Jesus iti nagsayaat nga ulidan para kadagiti assawa a lallaki nangnangruna iti panangtaming iti pagkurkurangan dagiti apostolna. Bayat ti maudi a pannakipanganna kadagiti apostolna, napaliiwna ti masansan a panagsisinnalisalda. Sigugubsang kadi a binabalawna ida? Saan, no di ket sipapakumbaba a binugguanna ti saka ti tunggal maysa. (Marcos 9:33-37; 10:35-45; Juan 13:2-17) Ipakpakitayo kadi ti kasta a kinaanus ken ni baketyo? Imbes a dillawen ti pagkapuyanna, siaanus kadi nga ikagkagumaanyo a tulongan ken danonen ti pusona babaen ti ulidanyo? Mabalin a subadan dagiti assawa a babbai ti kasta a naayat a kinamanangngaasi, kas iti inaramid dagiti apostol iti kamaudiananna.

20. Aniat’ saan koma a pulos liplipatan dagiti Kristiano nga assawa a babbai, ken asino ti naipaay a pagulidananda?

²⁰ Dagiti assawa a babbai kasapulan met a panunotenda ni Jesus, a pulos a dina linipatan a “ti ulo ni Kristo isu ti Dios.” Kanayon a nagpasakup iti nailangitan nga Amana. Kasta met, saan koma a liplipatan dagiti assawa a babbai a “ti ulo ti babai isu ti lalaki,” wen, a ni lakayda isu ti uloda. (1 Corinto 11:3; Efeso 5:23) Indagadag ni apostol Pedro kadagiti Kristiano nga assawa a babbai a panunotenda ti ulidan “dagiti nasantuan a babbai” idi un-unana a tiempo, nangruna ni Sara, a ‘nagtulnog ken Abraham, nga inawaganna iti “apo.”’​—1 Pedro 3:5, 6.

21. Apay a naballigi ti panagasawa da Abraham ken Sara ngem apay a napaay ti panagasawa ni Lot ken ni baketna?

²¹ Nalawag a pinanawan ni Sara ti komportable a pagtaengan iti narang-ay a siudad tapno agnaed kadagiti tolda iti ganggannaet a daga. Apay? Gapu kadi ta kaykayatna ti kasta a panagbiag? Mabalin a saan. Gapu kadi ta kiniddaw ni lakayna a mapan? Awan duadua a maysa daytoy a makagapu, tangay inay-ayat ken rinaem ni Sara ni Abraham gapu kadagiti nadiosan a kababalinna. (Genesis 18:12) Ngem ti kangrunaan a rason a kimmuyog ken lakayna isu ti panagayatna ken Jehova ken ti naimpusuan a tarigagayna nga agpaidalan iti Dios. (Genesis 12:1) Pagragsakanna ti agtulnog iti Dios. Iti sabali a bangir, bimdeng ti asawa ni Lot a mangaramid iti pagayatan ti Dios ket tinaliawna dagiti bambanag a pinanawanna iti pagtaenganna idiay Sodoma gapu ta mailalaan kadagitoy. (Genesis 19:15, 25, 26; Lucas 17:32) Anian a nakalkaldaang a pannakarakrak dayta a panagasawa​—amin ket gapu iti panagsukirna iti Dios!

22. (a) Aniat’ nainsiriban nga usigen dagiti kameng ti pamilia? (b) Aniantot’ usigentay iti sumaganad a panagadaltayo?

²² Isu a kas maysa nga asawa a lalaki wenno asawa a babai, nasken a saludsodam ti bagim, ‘Ti Dios kadi ti mayun-una iti pamiliami? Pudno kadi nga ikagkagumaak a tungpalen ti akemko iti pamilia nga inted ti Dios kaniak? Pudpudno kadi a pagregreggetak nga ayaten ti asawak ken tulongan a manggun-od wenno mangtaginayon iti nasayaat a relasion ken Jehova?’ Iti kaaduan a pamilia, adda met dagiti annak. Sumaruno nga usigentayo ti akem dagiti nagannak ken ti pakasapulan para kadakuada ken kadagiti annakda a mangyun-una iti Dios.

Malagipyo Kadi?

◻ Aniat’ mabalin nga ibunga ti pannursuro ni Jesus iti adu a pamilia?

◻ Ania a gunggona ti inawat ti rinibu a natibker a Kristiano?

◻ Aniat’ makatulong kadagiti assawa a mangliklik iti imoralidad ken diborsio?

◻ Aniat’ masursuro dagiti assawa a lallaki iti ulidan ni Jesus?

◻ Kasano a makatulong dagiti assawa a babbai iti naragsak a panagasawa?

[Ladawan iti panid 10]

Kasano a nakatulong ni Sara iti panagballigi ti panagasawana?