Saluadanyo ti Pannakariknayo iti Kinaganat

ANIA ti maysa a sigurado, inanamongan ti Dios a pamay-an tapno makapagtultuloy nga agserbi ken Jehova iti amin a kararua? Isu ti pannakaadda iti pudpudno a pannakarikna ti kinaganat iti kaunggan ti pusotayo. Ti panagserbi iti Dios iti amin a kararua kaipapananna ti panagserbi kenkuana a buyogen ti sibubukel a kinataotayo, ken kalikagumanna ti napasnek, naan-anay a panagtulnog iti aniaman a kalikagumanna nga aramidentayo.

Inggunamgunam ni mammadto Moises daytoy a pakasapulan idi binilinna ti nasion nga Israel: “Ayatemto ni Jehova a Diosmo iti isuamin a pusom, ken iti isuamin a kararuam ken iti isuamin a kabaelam.” (Deuteronomio 6:5) Kalpasan ti sumagmamano a siglo inulit ni Kristo Jesus dayta met laeng a bilin: “Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.” (Mateo 22:37) Tinukoy ni apostol Pablo daytoy met laeng a kasapulan idi imbagana kadagiti taga-Efeso nga ‘amin-kararua [nga aramidenda] ti pagayatan ti Dios,’ ken idi pinaregtana dagiti taga-Colosas: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao.”​—Efeso 6:6; Colosas 3:23.

Nupay kasta, narigat nga ipaay ti puso ken kararuatayo iti panagserbitayo iti Dios no saantay a mismo a marikna ti kinaganat iti kaunggantayo wenno no ti pannakariknatayo iti kinaganat idi ket nagmawmawen​—nalabit awan pay ketdin. Itatta, agbibiagtayo iti naganat a panawen nga awan pay kaaspingna iti aniaman a sabali a panawen iti pakasaritaan ti tao.

Dagiti Espesipiko a Naganat a Panawen

Idi kasakbayan ti panawen Kristiano, addan dagiti naganat a panawen. Ti kaaldawan ni Noe ken ti periodo agingga iti pannakadadael ti Sodoma ken Gomorra ket awan duadua a pudpudno a naganat a panawen. (2 Pedro 2:5, 6; Judas 7) Dagiti tawen sakbay ti Layus ket sigurado a napno iti naganat a trabaho. Uray saan nga ammo ni Noe ken ti pamiliana no kaano a mangrugi ti Layus, ti “nadiosan a buteng[da]” ti nangipatalged a saanda a nagtantan.​—Hebreo 11:7.

Kasta met, sakbay a nadadael ti Sodoma ken Gomorra, dagiti anghel “pinagdarasda ni Lot” ket imbagada kenkuana: “Agtalawka gapu iti biagmo!” (Genesis 19:15, 17) Wen, kadaydi met laeng a tiempo, ti kinaganat ti nangisalakan kadagiti nalinteg. Sinigsiglo kalpasanna nabalakadan dagiti Judio a nakayawan idiay Babilonia: “Pumanawkayo, pumanawkayo, rummuarkayo sadiay, dikayo mangsagid iti aniaman a banag a di nadalus; pumanawkayo iti tengngana.” (Isaias 52:11) Idi 537 K.K.P., agarup 200,000 kadagiti nakayawan ti nagdardaras a pimmanaw idiay Babilonia kas panagtulnog iti dayta a naganat, naimpadtuan a bilin.

Ti pannakarikna ti kinaganat kadagidi a kasasaad nagbanag iti amin-kararua a panagserbi dagidiay a nakarikna ken nagtultuloy iti panamati nga agbibiagda kadagidi a naganat a tiempo.

Kinaganat iti Panawen Kristiano

Ti kinaganat ket maulit-ulit met a nadakamat iti intero a Kristiano a Griego a Kasuratan. “Agtultuloykayo a kumitkita,” “agtultuloykayo a siririing,” “agtultuloykayo nga agbantay,” “paneknekanyo a sisasaganakayo”​—amin dagitoy ket sasao nga inaramat ni Kristo Jesus tapno maimula kadagiti pasurotna ti umiso a pannakarikna ti kinaganat. (Mateo 24:42-44; Marcos 13:32-37) Mainayon pay, dagiti ilustrasionna maipanggep kadagiti sangapulo a birhen, dakes nga adipen, dagiti talento, ken pannakailasin dagiti karnero manipud kadagiti kalding, amin pataudenna ti panaggagar ken ti pannakarikna ti kinaganat.​—Mateo 25:1, 14, 15, 32, 33.

Saan laeng a dinakamat ni Jesus ti maipapan iti kinaganat no di ket pinasingkedanna met ti kinapudno ti sasaona babaen ti panagtrabahona a buyogen ti kinaganat. Iti naminsan imbagana kadagiti bunggoy idi padasenda nga igawid: “Kasta met a kadagiti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak a maigapu iti daytoy.” (Lucas 4:42, 43) Maysa pay, pinaregtana dagiti adalanna a dawatenda iti Apo ti panagani a mangibaon iti ad-adu pay a managobra iti paganianna gapu ta “ti anien dakkel, ngem bassit dagiti managobra.” (Mateo 9:37, 38) Ti kasta a kiddaw iti Dios babaen ti kararag pudno a mangipasimudaag iti espiritu ti kinaganat.

Naintiempuan Kadi ti Kasta a Kinaganat?

Mabalin a mangibangon ti dadduma iti lohikal a saludsod, Apay a kasapulan idi ti pannakarikna ti kinaganat no ginasgasut pay a tawen ti naipadto a “dakkel a rigat”?​—Mateo 24:21.

Masiguradotayo a dayta ket saan laeng a maysa a pangallilaw nga inaramat ni Jesus tapno makapagtalinaed dagiti pasurotna nga okupado iti trabaho a panangasaba ken panangisuro. Saan, ti panangipateg ni Kristo kadagiti adalanna, kasta met ti naan-anay a pannakaawatna iti panangmatmat ni Jehova iti tiempo, ti nakaibatayan ti balakadna maipapan iti kinaganat. Wen, ammo ni Kristo Jesus a kasapulan ti kinaganat tapno maibanag ti pagayatan ni Jehova sigun iti panggep ti Dios. Maysa pay, ammona a dagiti adalanna a mismo magunggonaanda iti naespirituan babaen ti agtultuloy a pannakarikna ti kinaganat agingga iti panagsublina.

Silalawag nga impakita ni Jesu-Kristo nga adda sangalubongan a trabaho a panangpaneknek a mairingpas ken iti limitado a panawen. (Mateo 24:14; Marcos 13:10) Dagiti rumangrang-ay a tukad daytoy a trabaho ket naipalgak laeng bayat nga agtultuloy ti trabaho. Ngem kasapulan ti kinaganat tapno matungpal ti tunggal addang. Impakita ni Jesus ti irarang-ay daytoy a trabaho idi kinunana: “Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Ket kastat’ pannakaibanag ti trabaho agingga kadagitoy nga aldaw. Kaipapanan daytoy ti sumagmamano a sorpresa para kadagiti adipen ti Dios iti panaglabas ti panawen, a kasapulan no dadduma dagiti panagbalbaliw iti pannakaawat.

Ti Nakristianuan a pannakarikna ti kinaganat ket nagserbi iti panggep ni Jehova. Timmulong dayta kadagiti adalan ni Kristo a mangitungpal iti irarang-ay ti trabahoda sigun iti di agbiddut nga eskediul ni Jehova. Gapuna itatta, no taliawen ti napalabas nga agarup 2,000 a tawen, ad-adda a naan-anay a maawatantayo dayta a nadibinuan nga eskediul.

Timmulong ti Nakristianuan a kinaganat kadagiti adalan a mangipaay iti naan-anay a pammaneknek idiay Jerusalem, Judea, Samaria, ken kadagiti nawarawara a Judio sakbay ti 36 K.P. idi nagngudo ti naisangsangayan a pabor iti Israel. (Daniel 9:27; Aramid 2:46, 47) Kasta met, timmulong ti Nakristianuan a kinaganat iti immuna a kongregasion iti panangipaay iti nalawag a pakdaar iti amin a Judio nga asideg idin nga agpatingga ti sistemada. (Lucas 19:43, 44; Colosas 1:5, 6, 23) Ket kalpasan ti di ninamnama a panagpatinggana idi 70 K.P., ti kinaganat ti timmulong kadagiti immuna-siglo a saksi ni Kristo a mangiwaragawag ti nailangitan a namnama iti adu sakbay ti makapapatay a panagsaknap ti naespirituan a kinasipnget ti naipadto nga apostasia. (2 Tesalonica 2:3; 2 Timoteo 4:2) Kalpasanna, iti las-ud ti adu a siglo ti Dark-Ages, pinagtalinaed a sibibiag ti sumagmamano nga arig-trigo a Kristiano ti namnama iti Pagarian, kas impadto ni Kristo Jesus. (Mateo 13:28-30) Kamaudiananna, iti naikeddeng a panawenna, nangbuangay ni Jehova iti maysa a nabileg, moderno-aldaw a kongregasion, a natignay iti naganat a mensahena a pangukom kadagiti agbibiag iti daytoy maudi a kaputotan.​—Mateo 24:34.

Kas ken Daniel idi ugma, dagiti matalek a moderno-aldaw a Saksi pulos a saanda a maitured a kuestionaran ni Jehova, a saludsoden kenkuana: “Ania ti ar-aramidem?” (Daniel 4:35) Agtalekda nga ammo unay ni Jehova no ania ti nasken tapno maibanag ti trabahona iti umiso a panawen. Isu nga imbes a kuestionaran ti pamay-an a panangyurnos ni Jehova kadagiti bambanag, maragsakanda ta impaayan ida ti Dios iti gundaway a makipagtrabaho kenkuana kadagitoy nagpateg a panawen.​—1 Corinto 3:9.

Kanayonan Pay a Pammaregta iti Kinaganat

Ti sabali pay a makagapu ti kinaganat isut’ kinaawan kabaelantayo a mangituding ti apag-isu nga aldaw ken oras para iti kellaat a panangrugi ti dakkel a rigat. Direkta nga imbaga ni Kristo Jesus nga awan siasinoman ditoy daga ti makaammo iti naikeddeng nga aldaw ken oras ti panangrugi dayta napateg a pasamak. (Mateo 24:36) Iti maysa pay a gundaway imbagana kadagiti magagaran nga apostolna: “Saan nga agpaay kadakayo ti panangammo kadagiti tiempo wenno pampanawen nga inkabil ti Ama iti bukodna a masakupan.” (Aramid 1:7) Wen, nalawag ti resulta, ngem saantay nga ammo ti amin a detalye.

Addaan ni apostol Pablo iti umiso a kababalin ti kinaganat. Mabalin nga adda iti panunotna ti sasao ni Jesus idi nagsurat kadagiti taga-Tesalonica maipapan iti kaadda ni Kristo: “Ita no maipapan kadagiti tiempo ken pampanawen, kakabsat, awan pakasapulanyo a maisurat kadakayo.” (1 Tesalonica 5:1) Insuratna daytoy agarup 17 a tawen kalpasan a kinuna ni Jesus: “Dakayto dagiti saksik . . . agingga iti kaadaywan a paset ti daga.” (Aramid 1:8) Kadayta a tiempo awan idin ti naisurat gapu ta awanen ti naipalgak. Uray pay kasta makapagtalekda a ti aldaw ni Jehova awan duadua a dumteng “kas maysa a mannanakaw iti rabii” bayat a dagiti Kristiano sigaganatda pay laeng a mangaskasaba.​—1 Tesalonica 5:2.

Agparang nga imposible a bayat a pampanunotenda dagitoy a sasao, impagarup dagiti Kristiano idi umuna a siglo a ginasgasut a tawen pay ti aglabas sakbay ti aldaw ni Jehova. Agpayso, ammoda ti pangngarig ni Jesus maipapan iti ari a napan iti adayo a daga ken maipapan iti maysa a tao a nagdaliasat iti sabali a daga. Ammoda met nga impakita dagiti pangngarig a ti ari ket agsubli iti “kamaudiananna” ken ti managdaliasat iti “kalpasan ti nabayag a tiempo.” Ngem awan duadua a pinampanunotda dagiti saludsod a kas iti, Kaano ti “kamaudiananna”? Ken aniat’ kaipapanan ti “kalpasan ti nabayag a tiempo”? Sangapulo a tawen? Duapulo a tawen? Limapulo a tawen? Wenno nabaybayag pay? (Lucas 19:12, 15; Mateo 25:14, 19) Agtultuloy a malagipda ti sasao ni Jesus: “Dakayo met, agtultuloykayo a nakasagana, agsipud ta iti oras a dikay ipagarup mabalin a ti Anak ti tao umay.”​—Lucas 12:40.

Positibo nga Epekto ti Kinaganat

Wen, ti pannakarikna ti kinaganat a tinignay ti Dios addaan iti nakaskasdaaw a makaparegta nga epekto kadagiti Kristiano idi umuna a siglo, a timmulong kadakuada nga agtalinaed nga okupado iti kapatgan a trabaho a panangasaba ken panangisuro. Agtultuloy dayta a mangparegta kadatayo itatta iti adu a pamay-an. Ilikliknatayo iti panagbalin nga aleng-aleng wenno ‘mabannog iti aramid a naimbag.’ (Galacia 6:9, King James Version) Salaknibannatay iti nalabes a pannakiraman iti lubong ken iti nasikap a materialismona. Pagtalinaedenna iti isiptayo ti “pudno a biag.” (1 Timoteo 6:19) Kinuna ni Apo Jesus a dagiti adalanna agbalinda a kas “karnero iti nagtetengngaan dagiti lobo,” ken ammona a masapul nga agtalinaedtayo a determinado, addaan natibker a panangmatmat tapno masaranget ti lubong. Wen, masaluadan, masalaknibannatayo ti Nakristianuan a pannakariknatayo ti kinaganat.​—Mateo 10:16.

Ni Jehova a Dios iti awan inggana a kinasiribna kanayon nga ipaayanna dagiti adipenna iti umdas nga impormasion tapno saan a mapukaw ti pannakariknada iti kinaganat. Siaasi nga impasiguradona kadatayo nga addatayon “kadagiti maudi nga al-aldaw” daytoy dakes a sistema dagiti bambanag. (2 Timoteo 3:1) Agtultuloy a maipalpalagip kadatayo a kasapulan a rumaniagtayo kas lawag agingga a lumabas ti kaputotan a pagbibiagantayo iti dakkel a rigat iti tampokna iti Har–Magedon.​—Filipos 2:15; Apocalipsis 7:14; 16:14, 16.

Wen, ti nadiosan a pannakarikna ti kinaganat ket maysa a nagpateg a paset ti amin-kararua a panagserbi ken Jehova. Ilisinatayo ken tulongannatay a mangkeltay iti panaggandat ti Diablo a ‘mangbannog ken mangpakapuy kadagiti kararua’ dagiti adipen ti Dios. (Hebreo 12:3) Iti agnanayon, ti amin-kararua a debosion tignayenna dagiti adipen ni Jehova nga agtulnog kenkuana, ngem itatta, kadagitoy nga al-aldaw sakbay ti Armagedon, ti nauneg, napudno a pannakarikna ti kinaganat ket napateg a paset ti amin-kararua a debosion.

Sapay koma ta tulongannatay amin ni Jehova a Diostayo a mangsaluad ti pannakariknatayo iti kinaganat bayat nga agtultuloy nga ulitentayo ti sasao ni apostol Juan: “Amen! Umayka, Apo Jesus.”​—Apocalipsis 22:20.