Biktimanakayo Kadi ti Panagilem?
ANIAT’ nagpapadaan ti kinaranggas iti pulí, rasismo, diskriminasion, panamaglalasin, ken panangtalipupos iti pulí? Dagitoy ti bunga amin ti maysa a nasaknap a pagannayasan ti tao—ti panagilem!
Ania ti panagilem? Depinaren dayta ti maysa nga encyclopedia kas “maysa a kapanunotan a nabukel a saan a mangbusbos iti panawen wenno pannakaseknan a mangukom a siuumiso.” Kas imperpekto a tattao, adda pagannayasantayo a mangidumduma. Nalabit a malagipyo dagiti gundaway a nangukomkayo a diyo ammo dagiti amin a pasamak. Ipakpakita ti Biblia ti pakaidumaan ti kasta a pagannayasan nga agilem iti pamay-an a panangukom ni Jehova a Dios. Kunana: “Saan a kumita ti Dios a kas ti ikikita ti tao, ta ti tao kitaenna ti akinruar a panagparang, ngem ni Jehova kitaenna ti puso.”—1 Samuel 16:7.
Makadangran ti Panagilem
Di pagduaduaan a tunggal maysa ti napagbiddutanen nga inukom ti sabali. (Idiligyo ti Eclesiastes 7:21, 22.) Gagangay, biktimanatayo amin ti panagilem. Nupay kasta, no dagus a nalipatan, nalabit a sangkabassit wenno di makadangran dagiti managilem a kapanunotan. Ti panangpanemnem kadagiti kasta a kapanunotan mangibunga iti pannakadangran. Allilawennatayo a mamati iti maysa a kinaulbod. Kas pagarigan, iti sidong ti impluensia ti panagilem, mamati ti sumagmamano a tattao a mabalin a naagum, nasadut, maag, wenno napasindayag ti maysa a tao gapu laeng ta naikadua iti grupo ti relihion, pulí, wenno nasion.
Iti adu a kaso, ti kasta a biddut a panangukom mangibunga iti di-nainkalintegan, manangabuso, wenno naranggas pay ketdi a panangtrato iti sabsabali. Riniwriw a tattao ti napapatay kadagiti nasaknap a panangpapatay, panangtalipupos iti pulí, panagpipinnatay iti pulí, ken dadduma pay a kita ti nakaro a panagilem.
Iti intero a lubong, makidangdangadang dagiti gobierno iti panagilem babaen ti legal a pananggarantia iti di-masalungasing a karbengan iti wayawaya, talged, ken panagpapada. No basaenyo ti konstitusion wenno kangrunaan a pakabuklan dagiti linteg iti pagilianyo, sigurado a masarakanyo ti maysa a grupo ti sasao wenno kanayonan a sasao a nairanta a mangsalaknib kadagiti karbengan ti amin nga umili, aniaman ti pulí, katatao, wenno relihionda. Nupay kasta, nasaknap ti panangidumduma ken diskriminasion iti intero a lubong.
Biktimanakayo kadi ti panagilem? Nabirngasankayo kadin iti agum, sadut, maag, wenno napasindayag gapu laeng iti pulí, edad, katatao, nasionalidad, wenno narelihiosuan a pammatiyo? Mapapaidamankayo kadi kadagiti gundaway iti maitutop nga edukasion, trabaho, balay, ken serbisio publiko gapu iti panagilem? No kasta, kasanoyo a masaranget?
[Ladawan iti panid 3]
Ti panangpampanunot iti panagilem seggedanna ti panaggiginnura iti pulí
[Credit Line]
Nina Berman/Sipa Press