Report Dagiti Manangiwaragawag ti Pagarian

Magunggonaan ti Natibker a Takder Idiay Eskuelaan

IMPAKPAKAUNA ti Biblia: “Amin dagiti annakmo maisuronto kadakuada ni Jehova, ket dakkelto ti talna dagiti annakmo.” (Isaias 54:13) Iti nalawlawa a pamay-an, mayaplikar ti “amin dagiti annakmo” iti intero a gunglo dagiti adipen ti Dios iti daga, agraman dagiti ubbing. Ita, siertuen dagiti Kristiano a nagannak a dagiti annakda “maisuronto kadakuada ni Jehova” iti pagtaengan ken iti Nakristianuan a gimgimong.

No ages-eskuelada, nupay kasta, maipaspasango dagiti agtutubo a Kristiano kadagiti narikut a karit. Masansan a maamirisda a rumbeng a nabileg ti takderda kadagiti nasursuroda iti Biblia. No kastat’ aramidenda, makagunggona dagiti ibungana agpadpada kadagiti estudiante ken mannursuro, kas ipakita ti sumaganad a kapadasan manipud Micronesia.

Iti bassit a puro ti Tol iti makinlaud a Pacifico idiay Chuuk Islands, imbaga dagiti mannursuro iti lokal nga eskuelaan kadagiti amin nga ubbing nga agsagana ken makipasetda iti panangselebrar ti eskuelaan iti Halloween. Ammo dagiti estudiante a Saksi a ti selebrasion iramanna dagiti arkos ken aruaten a mangyilustrar kadagiti al-alia, kaibaan, ken mangkukulam​—a mainaig amin kadagiti espiritistiko a tradision. Saan a makipaset dagitoy nga ubbing gapu iti konsiensiada.a

Gapu iti naibatay-Biblia a pannakasanayda idiay pagtaengan ken iti kongregasion Kristiano, ammoda a di makaay-ayo iti Dios dagita nga aramid, uray pay no paglinglingayan laeng. Tapno ad-adda a mailawlawagda ti takderda, inawis dagiti ubbing ni Barak, maysa kadagiti misionero a Saksi iti puro, a makisarita kadagiti mannursuroda.

Kalpasan a nangngeganda ti panangilawlawag, inyurnos dagiti mannursuro ti maikadua a miting tapno makasarita ni Barak ti intero a kameng ti eskuelaan. Iti daytoy a miting, imparang ni Barak dagiti kinapudno a mangipakita iti pudno a namunganayan ti Halloween. Nanggun-od iti impormasion manipud sumagmamano a publikasion ti Watch Tower, agraman dadduma a gubuayan. Nasdaaw dagiti mannursuro ken administrador iti naammuanda a namunganayan, pakasaritaan, ken narelihiosuan a pakabuklan ti selebrasion. Kayatda ti mangangay iti miting dagiti kameng ti eskuelaan tapno matinong ti kasasaad.

Sumagmamano nga aldaw kalpasanna, naipakaammo ti di ninamnama a pangngeddeng. Nakanselar amin a panagsagana para iti Halloween. Saanen a selebraran ti eskuelaan ti Halloween iti dayta a tawen. Anian a makaay-ayo ti imbunga ti determinasion dagitoy nga agtutubo a Saksi a mangaramid iti umiso idiay eskuelaan! Di rumbeng nga agbuteng wenno agbain dagiti agtutubo a mangitakder a sititibker iti kinapudno ti Biblia.

Iti intero a lubong, isursuro dagiti Saksi ni Jehova kadagiti annakda nga agadalda a siaanep idiay eskuelaan. Masansanay met dagiti agtutubo a Saksi a mangyaplikar kadagiti prinsipio ti Biblia ken iranud ti namnama ken pammatida iti dadduma pay nga estudiante no la ket ta adda gundawayda. Uray no di makaay-ayo wenno madagdagus dagiti resulta a kas iti daytoy a pasamak, agtalek ken mapnek dagiti agtutubo nga umiso ti ar-aramidenda. Ken napatpateg pay, masiertoda a maay-ayo ti nailangitan nga Amada ken bendisionannanto ida iti matalek a kinatulnogda.

[Footnote]