Dagiti Saludsod Manipud Kadagiti Managbasa
Kinuna “Ti Pagwanawanan” nga Agosto 15, 1996: “Iti maudi a paset ti rigat, maisalakanto ti ‘lasag’ nga agkamang iti dasig ni Jehova.” Iparparipirip kadi dayta a kalpasan ti umuna a paset ti dakkel a rigat, adunto dagiti kabbaro a dumasig iti Dios?
Saan a dayta ti nairuar a punto.
Ti sasao ni Jesus a masarakan iti Mateo 24:22 ket nangnangruna a matungpalto iti masanguanan babaen ti pannakaisalakan iti umuna a paset ti um-umayen a dakkel a rigat, ti pannakaraut ti relihion. Kinuna ti artikulo: “Laglagipenyo nga addan ‘lasag,’ agpadpada dagiti napulotan a natda ken ti ‘dakkel a bunggoy,’ a naisalakanen idi sipapartak ken naan-anay a narban ti Babilonia a Dakkel iti immuna a paset ti rigat.”
Dinto agpeggad dagiti kakasta a matalek a tattao inton agtignay ni Jesus ken ti nailangitan a buyotna iti maudi a paset ti rigat. Ngem siasinonto dagiti makalasat iti dayta a paset ti rigat? Ipakita ti Apocalipsis 7:9, 14 a makalasatto ti dakkel a bunggoy nga addaan naindagaan a namnama. Dagidiay ngay napulotan-espiritu a Kristiano? Insalaysay ti “Dagiti Saludsod Manipud Kadagiti Managbasa” iti Pagwanawanan nga Agosto 15, 1990, no apay a di rumbeng nga agbalintay a dogmatiko maipapan iti panawen a pannakaipalangit dagiti natda kadagiti napulotan. Gapuna di nangipaay iti masnup a konklusion ti nabiit pay nga artikulo (Agosto 15, 1996), a nangaramid iti saan nga espesipiko a komento: “Kasta met iti maudi a paset ti rigat, maisalakanto ti ‘lasag’ nga agkamang iti dasig ni Jehova.”
Maipanggep kadagiti siasinoman a kabbaro no mabalinda nga adalen ti kinapudno ken dumasig iti Dios kalpasan a mangrugi ti dakkel a rigat, kitaenyo ti sasao ni Jesus a nailanad iti Mateo 24:29-31. Kalpasan ti panagbettak ti rigat, agparang ti pagilasinan ti Anak ti tao. Kinuna ni Jesus nga isuamin a tribu ti daga saplitendanto ti bagbagida ken agunnoyda. Awan dinakamatna maipapan kadagiti tao a nariing iti kasasaad, agbabbabawi, dumasig iti Dios, ken agbalin a pudno nga adalan.
Umasping iti dayta, iti pangngarig maipapan kadagiti karnero ken kalding, agparang ti Anak ti tao ket ukomen ken paglalasinenna dagiti tao maibatay iti naaramidanda wenno dida inaramid iti napalabas. Awan dinakamat ni Jesus maipapan kadagiti tao a nabayagen a nangipakita iti arig kalding a galad a pagammuan ta agbalbaliw ken agbalin nga arig karnero. Mangukom maibatay iti nagbalinanen dagiti tao.—Mateo 25:31-46.
Ngem manen, saantay koma nga agbalin a dogmatiko iti daytoy a punto. Ti ili ti Dios, agpadpada dagiti napulotan ken ti dakkel a bunggoy, ammodan ti masapul nga aramidenda ita—mangasaba ken agaramid kadagiti adalan. (Mateo 28:19, 20; Marcos 13:10) Itan ti tiempo a panangipapusotay iti balakad: “Makipagtartrabahokami a sangsangkamaysa kenkuana, ipakaasimi met kadakayo a saanyo nga awaten ti di kaikarian a kinamanangaasi ti Dios ket maikapiskayo iti panggepna. Ta kunana: ‘Iti maysa a makaay-ayo a tiempo dinengngegka, ken iti maysa nga aldaw ti pannakaisalakan tinulonganka.’ Adtoy! Itan ti nangnangruna a makaay-ayo a tiempo. Adtoy! Itan ti aldaw ti pannakaisalakan.”—2 Corinto 6:1, 2.