Addanto Ngata Talna Dagiti Agrigrigat?

KAYATYO kadi a makita nga agpatingga ti panagsagaba, saan laeng a maipaay iti bagiyo no di ket iti intero a sangatauan? Usigenyo dagitoy a pagarigan:

Nakaro unay ti rigat a napasaran ni Sonia.a Umuna, natakuatanna a sangapulo a tawenen nga agbabbabai ni lakayna. Kalpasanna naakaran iti HIV ken natay iti AIDS ti buridek a barona. Dua a tawen kalpasanna nagsakit ti maysa pay a barona, ket di nagbayag natay met iti AIDS. “Pimmaut ti kaudian a tukad ti sakitna,” malagip ni Sonia. “Nalmes iti liday, nagurot ti buokna, ken di unay makakita. Talaga a nakalkaldaang.”

Ni Fabiana, maysa nga estudiante iti unibersidad iti Brazil, ket maseknan maipapan iti kinaawan-hustisia iti kagimongan ti lubong. Kalpasanna dimteng ti trahedia iti mismo a biagna. Nagpakamatay ti kabsatna a lalaki a nalapunos iti liday. Idi naawanan ni Fabiana iti trabaho, insingasing ti maysa a gayyem a mangsapul iti pai-de-santo (arbulario), nga inrasonna nga adda la ket nangkulam ken Fabiana isu nga agsagsagaba iti kasta a kinadaksanggasat! Ngem awan naited a bang-ar ti pai-de-santo. Imbes ketdi, nagtutuok ni Fabiana, a di makaturog gapu kadagiti sagsagabaenna.

Ubing pay ni Ana idi nangrugi ti panagrigatna. “Idi agtawenak iti maysa,” isalaysayna, “binaybay-annak ni nanang, gapuna inaywanannak ni lola.” Kalpasanna, idi tallo a tawen pay laeng ni Ana, natay ni lolana. Naipan ni Ana iti pagamponan iti Rio de Janeiro, ket nagtalinaed sadiay agingga a nagtengna ti tawen a 13. “Nagdakes ti pannakatratomi sadiay ket nagbalinak a rebelde,” kunana. “Bayat a dimmakkelak, binusorko ti gistay amin a banag.”

Agparang a mapaspasaran ti amin a tao ti rigat iti nadumaduma a pamay-an. Kinapudnona, inaldaw a makadamagtayo iti maipapan kadagiti nasaem a kapadasan ti tao​—no agbuya, agbasa, wenno dumngegtayo iti damdamag. “Iti daytoy laeng . . . panawen ti nasaknap a komunikasion a gistay imposible ti di makadamag kadagiti dakes a damag,” insurat ni Dr. Mary Sykes Wylie. “Dagiti gubat, natural a didigra, pagpeggadan iti industria, makapapatay nga aksidente iti kalsada, krimen, terorismo, seksual a panangabuso, panangrames, kinaranggas iti pagtaengan​—dagitoy amin ti inaldaw a mangpabpabuteng iti maika-20 a siglo.” Realistiko a ginupgop ni Kristiano nga apostol Pablo ti kapadasan ti tao: “Isuamin a sangaparsuaan agtultuloyda nga agas-asug a sangsangkamaysa ken agpapaut-otda.”​—Roma 8:22.

Dakayo ngay? Agsagsagabakay kadi iti rigat? Ania a bang-ar ti in-inanamaenyo? Matagiragsakyonto kadi ti pudno a talna? Nasarakan da Sonia, Fabiana, ken Ana ti pudpudno a liwliwa ken napaypayso a talna! Mabasayo ti maipapan iti dayta iti sumaganad nga artikulo.

[Footnote]