Report Dagiti Manangiwaragawag iti Pagarian
Panagkamang iti Teokratiko nga Organisasion ni Jehova
IDI un-unana natignay ni mammadto Isaias a mangipakdaar: ‘Idaydayawda ni Jehova kadagiti purpuro ti taaw.’ (Isaias 24:15) Matmatan dagiti Saksi ni Jehova ti purpuro ti taaw kas paset ti “mapagnaedan a daga” a nangikunaan ni Jesus ‘masapul a maikaskasaba ti naimbag a damag.’—Mateo 24:14; Marcos 13:10.
Masarakan ti Marquesas Islands agarup 1,400 kilometro iti amianan a daya ti Tahiti. Paset ida ti naiputputong a grupo dagiti puro iti South Pacific a maaw-awagan French Polynesia. Gapu iti nadam-eg, pinataud bulkan a daga ken nabara, nasalimuot a klima, nalangto dagiti mula kadagitoy a puro. Nupay kasta, mangpatpataud met dagiti Marquesas iti sabali a kita ti bunga. Usigenyo ti kaso ti maysa a pamilia a nangipangag iti mensahe ti Pagarian iti puro ti Hiva Oa.
Madukdukotan da Jean ken ni baketna, a Nadine, iti masasao a sibilisado a kagimongan ti Makinlaud a Europa a pagnanaedanda. Gapuna, inkeddengda a panawan dayta naagawa a kabibiag ket immakarda a kadua ti baritoda idiay Marquesas Islands. Ti baro a balayda, a naaramid iti kawayan, masarakan iti naiputputong a ginget. Tapno madanon dagiti kaasitgan a kaarrubada, kasapulan a magnada iti lasonglasong a desdes iti bantay iti dua nga oras. Ti kaasitgan a purok nga ayan ti doktor, eskuelaan, ken dakkel a tiendaan ket tallo nga oras ti kaadayona babaen iti dyip.
Saan nga interesado iti relihion da Jean ken Nadine. Nupay kasta, makitungtongda no maipapan iti namunganayan ti biag. Masansan, lawlawaganda dagiti narikut a teoria ti ebolusion. Ngem awan kadagiti teoriada ti nangpennek kadakuada.
Kalpasan ti panagputputongda iti innem a tawen, nasdaawda iti ibibisita dagiti dua a Saksi ni Jehova. Naammuan dagiti Saksi ti kaadda da Jean ken Nadine kadagiti kabangibang a pumurok. Natural, nagturong ti saritaanda iti diskusion maipapan iti teoria ti ebolusion. Naayatan dagiti agassawa ta nakaitugot dagiti Saksi iti kopia ti libro a Life—How Did It Get Here? By Evolution or by Creation?, nga impablaak dagiti Saksi ni Jehova. Naragsakan da Jean ken Nadine a naaddaan iti libro a nangidatag iti naan-anay a panangsukimat iti nagtaudan ti biag.
Di nagbayag kalpasanna, nairugi ti panangyadal iti Biblia. Iti agarup tallo a tawen, rimmang-ay da Jean ken Nadine. Nakombinsirda a din agbayag agbalinton a paraiso ti intero a daga. Idi tallon ti annakda, dakkel a karit ti panagbiaheda iti uppat nga oras tapno tumabuno kadagiti Nakristianuan a gimong idiay Kingdom Hall. Nupay kasta, saan a dayta ti nangpasardeng iti itatabunoda. Kamaudiananna insimbolo da Jean ken Nadine ti dedikasionda ken Jehova babaen ti panagpabautisar iti danum. Inaramidda dayta iti kombension a naangay iti kangrunaan a purok, a ti kangatuan a bilang ket 38 a tattao!
Tapno makatulongda iti bassit a grupo dagiti agibumbunannag iti Pagarian, inkeddeng ti pamilia a panawanda ti naiputputong a pagtaenganda. Immakarda iti purok nga agarup sangaribu ti agnanaed, a pagserserbian ita ni Jean kas ministerial nga adipen iti lokal a kongregasion dagiti Saksi ni Jehova. Daytoy a pamilia, a dati nagkamang kadagiti puro tapno maitarayanda ti sibilisasion, imbilangda a pribilehio ti pannakasarakda iti kakaisuna a pudno a santuario, ti teokratiko nga organisasion ni Jehova.