“Ni Jehova Dinanto Baybay-an ti Ilina”

“Adu dagiti siksikor ti nasingpet; ngem ni Jehova ispalenna kadakuada amin.”​—SALMO 34:19.

1, 2. (a) Kasano a bembendisionan ni Jehova ti ilina ita? (b) Ania ti pakaipaspasanguan ti adu a Kristiano, ket aniada a saludsod ti tumaud?

KAS kaitungpalan ti padto ti Biblia, agnanaed dagiti managdaydayaw ni Jehova iti naespirituan a paraiso. (2 Corinto 12:1-4) Dagiti Saksi ni Jehova buklenda ti maysa nga internasional a timpuyog nga agiinnayat ken nagkaykaysa. (Juan 13:35) Tagtagiragsakenda ti nauneg ken nasaklaw a pannakaammo kadagiti kinapudno iti Biblia. (Isaias 54:13) Anian a yamanda ken Jehova ta inikkanna ida iti pribilehio nga agbalin a sangaili iti naespirituan a toldana!​—Salmo 15:1.

² Nupay tagtagiragsaken dagiti amin nga adda iti organisasion ni Jehova ti naespirituan a kinarang-ay, adda dagiti kasla saan unay a natalna ken natalinaay ti panagbiagda ket dagiti dadduma nadumaduma ti sagsagabaenda. Adu dagiti Kristiano nga adda iti nakaay-ay-ay a kasasaad iti napaut a tiempo ket awan a pulos namnamada a mabang-aran. Gagangay ti maupay kadagita a kasasaad. (Proverbio 13:12) Dagiti kadi pakarigatan ket pammaneknek ti di pannakaay-ayo ti Dios? Isalsalumina kadi ni Jehova a salakniban dagiti sumagmamano a Kristiano idinto ta baybay-anna dagiti dadduma?

3. (a) Ni Jehova kadi ti mapabasol kadagiti rigat a mapaspasaran ti ilina? (b) Apay nga uray dagiti matalek nga agdaydayaw ken Jehova mapasaranda ti rigat?

³ Sumungbat ti Biblia: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta kadagiti dakes a bambanag di mabalin a suoten ti Dios ket isu a mismo dina met suoten ti asinoman.” (Santiago 1:13) Ni Jehova ti Salaknib ken Tarabay ti ilina. (Salmo 91:2-6) “Ni Jehova dinanto baybay-an ti ilina.” (Salmo 94:14, NW) Di kayat a sawen daytoy a dagiti matalek a managdaydayaw saanda a mapasaran ti rigat. Ti agdama a sistema ti bambanag ditoy lubong ket iturayan dagiti tattao a nayanak nga imperpekto. Adu ti rinuker, ket ti sumagmamano dagup ti kinadakesda. Awan kadakuada ti agpampannuray iti sirib nga aggapu ken Jehova. Agbanag daytoy iti nakaro a panagsagaba ti tao. Nabatad a kunaen ti Biblia a saan a kanayon a maliklikan ti ili ni Jehova dagiti nasaem a bunga ti kinaimperpekto ken kinadakes ti tao.​—Aramid 14:22.

Dagiti Nasungdo a Kristiano Namnamaenda nga Agsagabada

4. Ania ti manamnama dagiti amin a Kristiano bayat nga agbibiagda iti daytoy dakes a sistema ti bambanag, ken apay?

⁴ Nupay saanda a paset ti lubong, agbibiag dagiti pasurot ni Jesus iti tengnga daytoy a sistema ti bambanag. (Juan 17:15, 16) Iti Biblia, naibutaktak ni Satanas kas ti agturay iti daytoy a lubong. (1 Juan 5:19) Gapuna, namnamaen dagiti amin a Kristiano nga adda dagiti tiempo a maipasangoda kadagiti nadagsen a parikut. Kasta ti adda iti panunot ni apostol Pedro idi insuratna: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti asinoman nga alun-onenna. Ngem agtakderkayo a bumusor kenkuana, natibker iti pammati, yantangay ammoyo a dagiti isu met laeng a bambanag a sagsagabaen maitungtungpalda iti intero a timpuyog dagiti kakabsatyo ditoy lubong.” (1 Pedro 5:8, 9) Wen, namnamaen dagiti amin a Kristiano nga agsagabada.

5. Kasano nga imbatad ni Jesus a dagiti matalek a Kristiano mapasaranda dagiti nasaem a kasasaad iti biag?

⁵ Uray no ay-ayatentay unay ni Jehova ken nasungdotayo kadagiti prinsipiona, mapasarantayo dagiti nasaem a kasasaad iti biag. Imbatad daytoy ni Jesus iti pangngarigna a nailanad iti Mateo 7:24-27, nga iti dayta pinagdiligna dagidiay mangtungpal kadagiti saona ken dagidiay saan. Inyarigna dagiti natulnog nga adalan iti masirib a tao a nagpatakder iti balayna iti rabaw ti natibker a bato. Dagidiay saan a mangtungpal kadagiti saona inyarigna iti maag a tao a nagpatakder iti balayna iti kadaratan. Kalpasan ti nadawel a bagyo, ti laeng balay a naipatakder iti bato ti saan a narba. Imutektekanyo ta no maipapan iti balay ti masirib a tao, “nagtinnag ti tudo ken immay dagiti layus ket nagpuyupoy dagiti angin ken immablatda iti dayta a balay, ngem di narba.” Saan nga inkari ni Jesus a kanayon a talna ken kinatalinaay ti lak-amen ti masirib a tao. Imbes ketdi, ti kinamanakem dayta a tao ti mangisagana kenkuana a mangdaer iti bagyo. Kasta met laeng a kapanunotan ti ipasimudaag ti pangngarig maipapan iti agmulmula. Iti dayta, inlawlawag ni Jesus nga uray dagiti natulnog a managdaydayaw nga addaan “nasayaat ken naimbag a puso” “agbungada buyogen ti panagibtur.”​—Lucas 8:4-15.

6. Iti ilustrasion ni Pablo maipapan kadagiti materiales a di mauram, siasino ti makalasat iti kasla apuy a pakasuotan?

⁶ Idi nagsurat kadagiti taga-Corinto, nagaramat ni apostol Pablo iti piguratibo a sasao a mangiladawan iti pannakasapul kadagiti naandur a galad a makatulong kadatayo a mangsango kadagiti pakasuotan. Dagiti materiales a di mauram kas iti balitok, pirak, ken napapateg a batbato katupagda dagiti nadiosan a galad. (Idiligyo ti Proverbio 3:13-15; 1 Pedro 1:6, 7.) Iti sabali a bangir, dagiti nainlasagan a kababalin mayarigda kadagiti materiales a mauram. Sa kuna ni Pablo: “Ti aramid ti tunggal maysa maiparangarangto, ta ti aldaw ilataknanto dayta, agsipud ta maipanayagto babaen ti apuy; ket ti apuy met laeng paneknekannanto no ania a kita ti aramid ti tunggal maysa. No agtalinaed ti aramid nga imbangon iti dayta ti asinoman, awatennanto ti gunggona.” (1 Corinto 3:10-14) Uray ditoy, ilawlawag ti Biblia nga amintayo ditay maliklikan ti kasla apuy a pakasuotan.

7. Sigun iti Roma 15:4, kasanonatay a matulongan dagiti Kasuratan a mangibtur kadagiti suot?

⁷ Adu dagiti salaysay iti Biblia maipapan kadagiti nasungdo nga adipen ti Dios a nangibtur kadagiti pakarigatan, no dadduma iti naunday a panawen. Ngem saan ida a binaybay-an ni Jehova. Nalabit a dagita ti adda iti panunot ni apostol Pablo idi kinunana: “Amin dagiti bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Usigenyo ti napasamak iti tallo a lallaki a, nupay nasingedda iti Dios, adu a rigat ti sinagabada.

No Ania ti Maadaltayo Kadagiti Salaysay iti Biblia

8. Ania ti impalubos ni Jehova iti kaso ni Jose, ken kasano kapaut?

⁸ Ubing pay ni Jose nga anak ni Jacob idi pinaraburan ni Jehova. Kaskasdi, nupay awan basolna, agsasaruno a rigat ti sinagabana. Kinemmeg ken rinanggasan dagiti mismo a kakabsatna. Nailako a kas adipen iti ganggannaet a daga a sadiay napabasol nga awan gapgapuna ken naipisok iti “pagbaludan.” (Genesis 40:15) Sadiay, “dagiti sakana pinarigatda kadagiti ramal: isu naikabil kadagiti kawar a landok.” (Salmo 105:17, 18) Bayat ti pannakaadipen ken pannakaibaludna, awan duadua a maulit-ulit nga impakpakaasi ni Jose ken Jehova a maruk-atan koma. Kaskasdi, iti las-ud ti 13 a tawen, nupay pinabileg ni Jehova iti nagduduma a wagas, nagtalinaed latta nga adipen wenno balud.​—Genesis 37:2; 41:46.

9. Ania ti inibturan ni David iti adu a tawen?

⁹ Umasping ti kasasaad ni David. Idi agpilpili ni Jehova iti kualipikado a lalaki a mangituray iti Israel, kinunana: “Nasarakak ni David nga anak ni Jesse, lalaki a mayannugot iti pusok.” (Aramid 13:22) Nupay pinaraburan ni Jehova, nakaro ti sinagaba ni David. Idi agpeggad ti biagna, adu a tawen a naglemmeng iti let-ang, kadagiti kueba, rukib, ken iti ganggannaet a daga. Gapu ta maan-anup a kasla atap nga animal, simken kenkuana ti pannakaupay ken buteng. Nupay kasta, nakapagibtur gapu iti bileg ni Jehova. Siuumiso a maikuna ni David maibatay iti mismo a kapadasanna: “Adu dagiti siksikor ti nasingpet; ngem ni Jehova ispalenna kadakuada amin.”​—Salmo 34:19.

10. Ania ti nakas-ang a napagteng ni Nabot ken ti pamiliana?

¹⁰ Idi kaaldawan ni propeta Elias, adda laeng 7,000 iti Israel a saan a nagrukbab iti didiosen a ni Baal. (1 Ar-ari 19:18; Roma 11:4) Ni Nabot, a nalabit maysa kadakuada, ket biktima ti nakaro a kinaawan hustisia. Naibabain gapu ta pinabasolda a nagtabbaaw. Natakuatan a nakabasol, nasentensiaan a maubor agingga a matay iti panangibilin ti ari, ket ti darana dinildilpatan dagiti aso. Napapatay uray dagiti annakna! Nupay kasta, awan basolna. Ulbod dagiti nagtestigo a maibusor kenkuana. Implano amin daytoy ni Reyna Jezebel tapno matagikua ti ari ti kaubasan ni Nabot.​—1 Ar-ari 21:1-19; 2 Ar-ari 9:26.

11. Ania ti kuna kadatayo ni apostol Pablo maipapan kadagiti matalek a lallaki ken babbai idi tiempo ti Biblia?

¹¹ Da Jose, David, ken Nabot ket tallo laeng kadagiti adu a matalek a lallaki ken babbai a nadakamat iti Biblia a naparparigat. Nagsurat ni apostol Pablo iti historikal a panangrepaso maipapan kadagiti adipen ni Jehova kadagiti naglabas a panawen. Dinakamatna dagidiay ‘nangawat iti suotda babaen ti pannakarabrabak ken ti pannakasapsaplit, kinapudnona, ad-adda pay ngem iti dayta, babaen ti pannakaparparaut ken pannakaibalbalud. Nauborda, nasuotda, naragadida a naputedputed, pimmusayda babaen ti pannakapapatay iti kampilan, nagpagnapagnada a sikakawes kadagiti lalat ti karnero, kadagiti lalat ti kalding, bayat nga addada iti kinakirang, iti rigat, iti sidong ti pannakaparigat; ket ti lubong saan idi a maikari kadakuada. Nagalla-allada kadagiti disierto ken bambantay ken kadagiti rukib ken kadagiti gukayab ti daga.’ (Hebreo 11:36-38) Ngem saan ida a binaybay-an ni Jehova.

Maseknan ni Jehova Kadagidiay Agsagsagaba

12. Ania ti dadduma kadagiti rigat a mapaspasaran dagiti Saksi ni Jehova ita?

¹² Komusta met ti ili ni Jehova ita? Kas organisasion, makapagtalektayo iti nadibinuan a pannalaknib ken natalged nga ilalasat iti maudi nga al-aldaw ken iti dakkel a rigat. (Isaias 54:17; Apocalipsis 7:9-17) Ngem, kas indibidual, ammotayo a “ti panawen ken di mapakpakadaan a pasamak” dumteng iti amin a tao. (Eclesiastes 9:11, NW) Adu ita dagiti matalek a Kristiano nga agrigrigat. Dagiti dadduma ib-ibturanda ti nakaro a kinapanglaw. Dakamaten ti Biblia dagiti Kristiano nga “ulila ken balo” nga agrigrigat. (Santiago 1:27) Agsagsagaba dagiti dadduma gapu kadagiti natural a didigra, gubat, krimen, panangabuso iti bileg, sakit, ken ipapatay.

13. Aniada a narikut a kasasaad ti naipadamag iti di pay nabayag?

¹³ Kas pagarigan, iti reportda iti Bagi a Manarawidwid dagiti Saksi ni Jehova idi 1996, impadamag dagiti sanga nga opisina ti Watch Tower nga adda dagiti kakabsattayo a naibalud ken nakakaasi ti kasasaadda gapu iti panangsurotda kadagiti prinsipio ti Biblia. Tallo a kongregasion iti maysa a pagilian ti Sud America ti nawarawara idi pinilit a pinapanaw dagiti gerilia ti ginasut a Saksi. Iti maysa a pagilian ti Makinlaud nga Africa, napapatay ti sumagmamano a Saksi a nadatngan ti gerra sibil. Iti maysa a pagilian ti Central America, kimmaro ti pinansial a panagrigat ti dadduma a kakabsat idi dinidigra ida ti allawig. Iti dadduma a lugar a mabalin a saan unay a parikut ti kinapanglaw ken kinakirang ti taraon, dagiti dakes a kasasaad mabalin a kissayanna ti rag-o dagiti dadduma. Dagiti dadduma madagsenanda kadagiti pakaringgoran iti biag ita. Gapu iti kinaaleng-aleng dagiti tattao, mabalin a maupay ti dadduma no ikasabada ti naimbag a damag ti Pagarian.

14. (a) Ania ti maadaltayo iti napasamak ken Job? (b) Imbes nga agpanunot iti negatibo, ania koma ti aramidentayo no aglak-amtayo iti rigat?

¹⁴ Ditay koma panunoten a dagitoy a kasasaad ket pammaneknek ti di pannakaay-ayo ti Dios. Laglagipenyo ti napasamak ken Job ken ti adu a rigat a sinagabana. Isu ket “maysa a napalungdo ken nalinteg a lalaki.” (Job 1:8) Anian a pannakaupay ni Job idi pinabasol ni Elifaz nga adda dakes nga inaramidna! (Job, kapitulo 4, 5, 22) Ditay kayat nga ipato a dagus nga agrigrigattayo gapu ta pinaaytayo ni Jehova wenno gapu ta inkedkednan ti bendisionna. Ti negatibo a panagpampanunot iti sango ti rigat pakapsutenna ti pammatitayo. (1 Tesalonica 3:1-3, 5) No adda sagsagabaentayo, panunotentay koma a da Jehova ken Jesus asidegda kadagiti nalinteg aniaman ti mapasamak.

15. Kasanotay nga ammo a maseknan unay ni Jehova kadagiti rigat a sagsagabaen ti ilina?

¹⁵ Impanamnama kadatayo ni apostol Pablo idi kinunana: “Siasinonto ti mangisina kadatayo manipud iti ayat ni Kristo? Ti kadi rigat wenno pannakatuok wenno pannakaidadanes wenno bisin wenno kinalamolamo wenno peggad wenno kampilan? . . . Kumbinsidoak nga uray ti ipapatay wenno ti biag wenno dagiti anghel wenno dagiti gobierno wenno dagiti bambanag nga addan wenno dagiti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua didatayto kabaelan nga isina manipud iti ayat ti Dios nga adda ken Kristo Jesus nga Apotayo.” (Roma 8:35, 38, 39) Maseknan unay ni Jehova kadatayo ken makitana ti panagsagabatayo. Idi aglemlemmeng pay laeng, insurat ni David: “Dagiti mata ni Jehova sisisirayda kadagiti nalinteg, ket dagiti lapayagda silulukatda iti ikkisda. Ni Jehova adda iti asideg kadagiti sitatarumpingay ti pusoda.” (Salmo 34:15, 18; Mateo 18:6, 14) Ti nailangitan nga Amatayo maseknan kadatayo ken kaasianna dagidiay agsagsagaba. (1 Pedro 5:6, 7) Itedna ti kasapulantayo tapno makapagibturtayo, aniaman a rigat ti sagabaentayo.

Dagiti Sagut ni Jehova Sustinerennatayo

16. Ania a probision a naggapu ken Jehova ti tumulong kadatayo nga agibtur, ken kasano?

¹⁶ Nupay ditay manamnama ti awanan-rigat a biag iti daytoy daan a sistema ti bambanag, ‘saantayo a mabaybay-an iti rigat.’ (2 Corinto 4:8, 9) Inkari ni Jesus nga ipaayanna dagiti pasurotna iti katulongan. Kinunana: “Agkiddawakto iti Ama ket ikkannakayto iti sabali a katulongan a maadda kadakayo iti agnanayon, ti espiritu ti kinapudno.” (Juan 14:16, 17) Idi Pentecostes 33 K.P., kinuna ni apostol Pedro kadagiti agdengdengngeg kenkuana a mabalinda ti umawat iti “awan bayadna a sagut ti nasantuan nga espiritu.” (Aramid 2:38) Tultulongannatay kadi ita ti nasantuan nga espiritu? Wen! Ti aktibo a puersa ni Jehova ikkannatayo kadagiti nagsayaat a bunga: “Ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel.” (Galacia 5:22, 23) Nagpateg amin dagitoy a galad a tumulong kadatayo nga agibtur.

17. Aniada a kinapudno iti Biblia ti mangpabileg iti pammati ken determinasiontayo a mangnamnama a siaanus ken Jehova?

¹⁷ Tulongannatayo met ti nasantuan nga espiritu a mangtarus a dagiti agdama a pakarigatan “apagkanito ken nalag-an[da]” no idilig iti gunggona a biag nga agnanayon. (2 Corinto 4:16-18) Kombinsidotayo a ti Dios dinanto lipatan dagiti aramidtayo ken ti ayat nga impakitatayo kenkuana. (Hebreo 6:9-12) No basaentayo dagiti naipaltiing a sao ti Biblia, maliwliwatayo iti ulidan dagiti matalek nga adipen idi un-unana a nangibtur iti adu a rigat ngem naawaganda a naragsak. Insurat ni Santiago: “Kakabsat, alaenyo a pagtuladan dagiti mammadto iti panagsagaba iti dakes ken iti panangalagad iti kinaanus, isuda a nagsao iti nagan ni Jehova. Adtoy! Kunaentayo a naragsak dagidiay nakapagibtur.” (Santiago 5:10, 11) Inkari ti Biblia ti “pannakabalin a nalablabes ngem ti gagangay” a tumulong kadatayo a mangibtur kadagiti suot. Paraburannatayo met ni Jehova babaen ti namnama a panagungar. (2 Corinto 1:8-10; 4:7) No inaldaw a basaentayo ti Biblia ken pampanunotentayo dagitoy a kari, mapabileg ti pammatitayo ken ti determinasiontayo a mangnamnama a siaanus iti Dios.​—Salmo 42:5.

18. (a) Iti 2 Corinto 1:3, 4, ania ti maiparegta nga aramidentayo? (b) Kasano a gubuayan ti liwliwa ken bang-ar dagiti Kristiano a manangaywan?

¹⁸ Mainayon pay, impaay ni Jehova kadatayo ti naespirituan a paraiso a pangtagiragsakantayo iti pudpudno nga ayat dagiti Kristiano a kakabsattayo. Makapaglilinniwanliwatayo amin. (2 Corinto 1:3, 4) Dakkel a liwliwa ken bang-ar ti maipaay nangruna dagiti Kristiano a manangaywan. (Isaias 32:2) Kas “sagut a tattao,” natudinganda a mangpabileg kadagidiay agsagsagaba, ‘agsao iti makaliwliwa kadagiti malmaldaangan a kararua,’ ken ‘mangsaranay kadagiti nakapuy.’ (Efeso 4:8, 11, 12; 1 Tesalonica 5:14) Maidagadag kadagiti panglakayen nga usarenda a naimbag ti magasin a Pagwanawanan ken Agriingkayo!, agraman dagiti dadduma pay a publikasion nga ipapaay ti “matalek ken masirib nga adipen.” (Mateo 24:45-47) Naglaon dagitoy iti nabaknang a naibatay-Biblia a balakad a makatulong kadatayo a mangrisut​—ken uray manglapped​—iti dadduma kadagiti parikut a mamagdukot kadatayo. Sapay koma ta tuladentayo ni Jehova babaen ti panaglilinniwanliwa ken panagpipinnaregtatayo kadagiti tiempo ti rigat!

19. (a) Ania ti tumulong kadatayo a mangliklik kadagiti pakarigatan? (b) Siasino ti kangrunaan a masapul a pagtalkantayo, ket ania ti tumulong kadatayo a mangsango kadagiti suot?

¹⁹ Bayat nga umad-adani ti panagpatingga ti maudi nga al-aldaw ken kumarkaro ti kasasaad iti agdama a sistema ti bambanag, ikagumaan dagiti Kristiano a liklikan dagiti pakarigatan. (Proverbio 22:3) Ti kinamanakem, kinasimbeng ti panunot, ken pannakaammo kadagiti prinsipio ti Biblia matulongannatayo a mangaramid kadagiti nainsiriban a desision. (Proverbio 3:21, 22) Ipangagtayo ti Sao ni Jehova ken tungpalentayo tapno ditay makaaramid kadagiti biddut a maliklikan koma. (Salmo 38:4) Nupay kasta, ammotayo nga uray kasanot’ panangikagumaantayo, ditay maliklikan nga interamente dagiti pakarigatan iti biagtayo. Iti daytoy a sistema ti bambanag, adu dagiti nalinteg a maipasango kadagiti nakaro a pakarigatan. Nupay kasta, kabaelantayo a sanguen dagiti suot buyogen ti naan-anay a panagtalek a “ni Jehova dinanto baybay-an ti ilina.” (Salmo 94:14) Ket ammotayo nga iti din agbayag awanton daytoy a sistema ti bambanag ken rigrigat. Sapay koma ngarud ta determinadotayo a ‘di sumuko iti panagaramid ti nasayaat, ta iti naikeddeng a panawen agapittayto no ditay mabannog.’​—Galacia 6:9.

Ania ti Naadaltayo?

◻ Aniada a pakarigatan ti mapaspasaran ti intero a timpuyog dagiti Kristiano?

◻ Aniada nga ehemplo iti Biblia ti tumulong kadatayo a mangtarus a dagiti pakarigatan saan a pammaneknek ti di pannakaay-ayo ni Jehova?

◻ Kasano ti panagrikna ni Jehova kadagiti rigat a sagsagabaen ti ilina?

◻ Ania ti sumagmamano kadagiti sagut a naggapu ken Jehova a tumulong kadatayo a mangibtur kadagiti pakasuotan?

[Dagiti Ladawan iti panid 10]

Agpapada da David, Nabot, ken Jose a nagsagaba iti rigat