Malagipyo Pay Kadi?

Nasarakanyo kadi a makagunggona kadakayo dagiti nabiit pay a ruar ti Pagwanawanan? No kasta apay a diyo suboken ti memoriayo kadagiti sumaganad a saludsod?

◻ Ania ti nagdumaan ti “aldaw ti Apo” ken ti “aldaw ni Jehova”? (Apocalipsis 1:10; Joel 2:11)

Ramanen ti “aldaw ti Apo” ti kaitungpalan dagiti 16 a sirmata a nailadawan iti Apocalipsis kapitulo 1 agingga iti 22 ken dagiti kangrunaan a pasamak nga impadto ni Jesus kas sungbat iti saludsod dagiti adalanna maipapan iti pagilasinan ti kaaddana. Iti kangitingitan ti aldaw ti Apo, bumtak ti nakaal-alinggaget nga aldaw ni Jehova inton ukomenna ti rinuker a lubong ni Satanas. (Mateo 24:3-14; Lucas 21:11)​—12/15, panid 11.

◻ Ania ti sumagmamano kadagiti naisangsangayan a linaon ti Biblia ni Makarios?

Ti nagan a Jehova agparang iti nasurok a 3,500 a daras iti Biblia ni Makarios. Kinuna ti maysa nga eskolar ti narelihiosuan a literatura a Ruso: “Sinurot ti patarusna ti Hebreo a teksto, ket nasin-aw ken maitutop iti suheto dagiti sao a naaramat iti patarus.”​—12/15, panid 27.

◻ Ania ti “kinapudno” a kinuna ni Jesus a mangwayawaya kadatayo? (Juan 8:32)

“Ti kinapudno” a tuktukoyen ni Jesus ket isu ti impormasion nga impaltiing ti Dios​—nangnangruna ti impormasion maipanggep iti pagayatan ti Dios​—a naitalimeng iti Biblia.​—1/1, panid 3.

◻ Asino ti moderno-aldaw a Jehu ken Jehonadab?

Ni Jehu iladladawanna ni Jesu-Kristo, nga irepresentar ditoy daga “ti Israel ti Dios,” dagiti napulotan a Kristiano. (Galacia 6:16; Apocalipsis 12:17) Kas ken Jehonadab a rimmuar a sumabet ken Jehu, maysa a “dakkel a bunggoy” manipud kadagiti nasion ti timpuar tapno sumuporta kadagiti pannakabagi ni Jesus ditoy daga. (Apocalipsis 7:9, 10; 2 Ar-ari 10:15)​—1/1, panid 13.

◻ Ania ti kayat a sawen ti ‘pannakipagna iti Dios’? (Genesis 5:24; 6:9)

Kayatna a sawen a dagidiay mangaramid iti kasta, kas kada Enoc ken Noe, agtignayda iti wagas a mangipaneknek iti natibker a pammati iti Dios. Inaramidda ti imbilin ni Jehova kadakuada ken nagbiagda a mayannurot iti ammoda maipapan kenkuana maibatay iti pannakilangenna iti sangatauan.​—1/15, panid 13.

◻ Apay a rumbeng a nasaksakbay nga isaganaan ti maysa a tao ti posible nga ipapatayna?

No an-anagen, ti panangaramid iti kasta nga urnos ket sagut iti pamilia ti maysa a tao. Ipakitana ti ayat. Paneknekanna ti panagtarigagay a ‘mangipaay kadagidiay kameng ti sangakabbalayan ti maysa’ uray no dayta a tao ket awanton iti dennada. (1 Timoteo 5:8)​—1/15, panid 22.

◻ Ania ti naipatungpal ti “daan a tulag”? (2 Corinto 3:14)

Naglaon dayta kadagiti detalye a mangiladawan iti baro a tulag ket, dagiti maulit-ulit a daton nga impaannurotna, impakitana a kasapulan unay ti tao ti pannakasubbot iti basol ken patay. Nagbalin daytoy a “manangisuro a mangiturong ken Kristo.” (Galacia 3:24)​—2/1, panid 14.

◻ Kadagiti ania a pamay-an nga agnanayon ti baro a tulag? (Hebreo 13:20)

Umuna, saan a kas iti Linteg ti tulag, saan a masuktan uray kaano. Maikadua, manayon dagiti maibanagna. Ken maikatlo, dagiti naindagaan a sakup ti Pagarian ti Dios agtultuloy a magunggonaanto manipud iti urnos ti baro a tulag bayat ti Milenio.​—2/1, panid 22.

◻ Aniada a gunggona ti iyeg ti kinamanagyaman?

Ti kinabara a mapaspasaran ti maysa a tao gapu iti naimpusuan a kinamanagyamanna mangyeg kenkuana iti ragsak ken talna. (Idiligyo ti Proverbio 15:13, 15.) Gapu ta positibo a kababalin, ti kinamanagyaman ti mangsaluad kenkuana kadagiti negatibo a rikna kas iti pungtot, imon, ken sakit ti nakem.​—2/15, panid 4.

◻ Kadagiti ania a tulag a naiyeg dagiti napulotan iti espiritu?

Iti baro a tulag, nga inaramid ni Jehova kadagiti kameng ti naespirituan nga Israel, ken iti tulag maipaay iti Pagarian, nga inaramid ni Jesus kadagiti napulotan a pasurotna. (Lucas 22:20, 28-30)​—2/15, panid 16.

◻ Ania dagiti tallo a dadakkel a piesta a naibilin a tabunuan dagiti Israelita?

Ti Piesta ti Tinapay nga Awan Lebadurana, a kasaruno a dagus ti Paskua iti Nisan 14; ti Piesta dagiti Lawas, iti maika-50 nga aldaw manipud Nisan 16; ken ti Piesta ti Panagummong, wenno Piesta dagiti Abong-abong, iti maikapito a bulan. (Deuteronomio 16:1-15)​—3/1, panid 8, 9.

◻ Apay a maysa a pribilehio ti tumabuno kadagiti Nakristianuan a panagtataripnong?

Kinuna ni Jesus: “No sadino nga adda dua wenno tallo a naguurnong iti naganko, sadiay addaak iti nagtengngaanda.” (Mateo 18:20; 28:20) Kasta met, ti napateg a pamay-an a pakaaramidan ti kasta a naespirituan a panangpakan ket babaen kadagiti gimong ti kongregasion ken kadagiti daddadakkel a panagtataripnong. (Mateo 24:45)​—3/1, panid 14.

◻ Ania ti namunganayan ti nagan a Nimrod?

Patien ti sumagmamano nga eskolar a ti nagan a Nimrod ket di naipanagan idi pannakaipasngayna. Imbes ketdi, patienda a naipanagan dayta tapno maibagay iti rebelioso a kababalinna kalpasan ti pannakaiparangarangna.​—3/15, panid 25.

◻ Kasano kapateg ti pamilia iti kagimongan ti tao?

Napateg ti pamilia iti tao. Ipakita ti historia a no madadael ti urnos ti pamilia, kumapuy dagiti komunidad ken dagiti nasion. Gapuna addaan ti pamilia iti direkta nga epekto iti kinatalged ti kagimongan ken iti pagimbagan dagiti annak ken kadagiti masanguanan a kaputotan.​—4/1, panid 6.

◻ Ania dagiti tallo a pammaneknek a ti Biblia ket Sao ti Dios?

(1) Tumunos iti siensia; (2) naglaon kadagiti di agkupas a prinsipio nga agtalinaed a praktikal para iti moderno a panagbiag; (3) naglaon kadagiti espesipiko a padto a natungpalen, kas paneknekan dagiti pasamak iti historia.​—4/1, panid 15.