Aguraykayo a Siaanus

TI PASTOR a namin-adu a nangipukkaw iti “Lobo!” idinto ta awan met ti lobo di naipangag ti panagpaarayatna idi agangay. Umasping ita, adu ti mangyaleng-aleng iti umad-adanin nga aldaw ni Jehova agsipud ta nagadu a pakdaar ti nangngegdan a napaneknekan a palso nga alarma. Ti mismo a kinapudno nga adu ti di makailasin iti pudno a pakdaar ken ipangagda dayta kalpasanna ket gundawayan ti dakkel a kabusor ti Dios, ni Satanas, daydiay palso nga “anghel ti lawag.”​—2 Corinto 11:14.

Napeggad ti espiritu ti kinaaleng-aleng uray kadagidiay agserserbi ken Jehova iti sumagmamanon a tiempo. Apay? Usigenyo ti impakdaar ni apostol Pedro idi umuna a siglo.

Agpanunotkayo a Sisisin-aw

Ti maikadua a naipaltiing a surat ni Pedro ket palagip kadagiti immuna a Kristiano, ken uray kadatayo met. “Dungdunguen,” insuratna, “daytoy itan ti maikadua a surat nga isuratko kadakayo, a ditoy, kas iti daydi immuna, parayrayek dagiti nasin-aw a pannakabalinyo nga agpanunot babaen iti pammalagip.” (2 Pedro 3:1) Apay a kastoy ti pannakaseknan ni Pedro? Impaganetget ni Pedro ti kaadda dagiti managuyaw a ti panaguyawda ti mangpakapuy iti kasapulan a pannakarikna iti kinaganat maipapan iti tiempo a pagbibiagan dagiti adipen ti Dios. Itan ti tiempo nga annadantayo a ditay agpaallilaw kadagiti manangrabak. Isu nga indagadag ni Pedro kadagiti agbasa iti suratna a ‘laglagipenda koma dagiti sasao a napalabasen nga insawang dagiti nasantuan a mammadto.’ (2 Pedro 3:2; Aramid 3:22, 23) Ania ti kinuna dagiti mammadto?

Namin-adun a nayunay-unay kadagiti matalek nga adipen ti Dios no kasano a pinagpatingga dagiti nadiosan a panangukom ti kinadakes. Impalagip ni Pedro kadagiti agbasa iti suratna ti Layus idi kaaldawan ni Noe nga inusar ti Dios kas wagas ti ibaballaetna idi a napno ti daga iti kinadangkes. Daydi a napegges-ayusna a Delubio sieepektibo a pinagpatinggana ti lubong iti daydi a panawen. Ngem intalimeng ti Dios ni Noe ken ti pamiliana iti daong agraman dagiti sibibiag a parsua a pannakabagi “ti amin a lasag.” Paneknekan dagiti sapasap a sariugma ti kinapudno ti salaysay ti Biblia.a​—Genesis 6:19; 2 Pedro 3:5, 6.

Awagan ni Pedro dayta a nadiosan nga ibaballaet a ‘kinapudno a makaliklik iti panangammo’ ti sumagmamano a tattao. Nagbalin dagiti dadduma nga aleng-aleng gapu kadagiti managuyaw idi a tiempo. Ngem, ditay koma liplipatan ti inaramiden ni Jehova. Ibaga ni Pedro kadatayo: “Babaen ti isu met laeng a sao naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.” (2 Pedro 3:7) Wen, bumallaetto manen ti Dios.

Saan a Nabannayat ti Dios

Rinibu a tawenen ti napalabas. Apay a nagbayag ti panaguray ti Dios a mangrisut kadagiti parikut ti sangatauan? Impaganetget manen ni Pedro ti maysa a kinapudno. Kunana: “Di koma makaliklik iti panangammoyo daytoy maysa a kinapudno, dungdunguen, a ti maysa nga aldaw ken Jehova kasla sangaribo a tawen ket ti sangaribo a tawen kasla maysa nga aldaw.” (2 Pedro 3:8) Naiduma ti panangmatmattayo iti panangmatmat ni Jehova iti tiempo. Para iti agnanayon a Dios, awan pay makalawas ti tiempo nanipud idi naparsua ni Adan agingga ita. Ngem aniaman ti panangmatmattayo iti tiempo, tunggal sangaribu a tawen ken tunggal aldaw nga aglabas iyas-asidegdatayo iti pannakaibanag ti panggep ni Jehova.

“Saan nga agburek ti mabambantayan a banga” ket pagsasao a kaipapananna a ti basta panaguray iti maysa a pasamak kasla itantanna ti pannakatungpalna. Nupay kasta, isingasing ni Pedro ti ‘panaguray ken panagtalinaed a silalagip unay iti kaadda ti aldaw ni Jehova.’ (2 Pedro 3:12) Kasanotay a mapatanor ti panagpampanunot a mamagsiglat kadatayo iti kinaasidegen ti nadiosan nga ibaballaet?

Aramid ti Pakakitaan

Ipamaysa ni Pedro ti atension kadagiti aramid ken tigtignay. Tukoyenna ti “nasantuan a panagbibiag” agraman “ar-aramid ti nadiosan a debosion.” (2 Pedro 3:11) Ania ti ramanen dagitoy?

Agtignay ti pudno nga adipen ti Dios iti wagas a makaay-ayo Kenkuana. Agminar ti pammati ti kasta a pudno a managdaydayaw iti kababalinna. Daytoy ti pakaidumaanna kadagidiay agkunkuna laeng a patienda ti Dios ken dagiti karina. Nalabit napaliiwyon a ti publiko a ministerio dagiti Saksi ni Jehova ti nakaidumaanda. Sumarungkarda iti pagtaenganyo tapno iturong ti atensionyo kadagiti kari ti Dios a naibalabala iti Biblia. Ngem mangipaayda met iti pammaneknek iti namnama ken patpatienda sadinoman a pakasarakanda kadagiti tattao.

Ti Saksi nga okupado a mangirakurak iti pammatina kadagiti sabsabali mapatibker ken mapabilegna ti pammatina. Ti panagsao mapaunegna ti apresasion ket maigiddato iti dayta mangted iti makin-uneg a rag-o ken pannakapnek. Maparagsaktay met ni Jehova no ibunannagtayo ti naimbag a damag ti Pagarian ti Dios. Ammotayo a ‘saan a nakillo ti Dios tapno lipatenna ti aramidtayo ken ti ayat nga ipakpakitatayo iti naganna,’ kas imbaga ni Pablo a pada nga apostol ni Pedro.​—Hebreo 6:10; Roma 10:9, 10.

Aniat’ resulta daytoy a pannakakumikom a mangirakurak iti naimbag a damag ti Pagarian bayat ti maudi nga al-aldaw daytoy agdama a dakes a sistema? Ginasut a ribu a nasingpet panagpuspusoda a tattao ti makasursuro no kasano a maaddaanda iti nasinged a relasion ken Jehova, tapno magunggonaanda manipud iti di-kaikarian a kinamanangngaasina ken masarakanda ti pudno a kinaragsak iti namnama a biag nga agnanayon iti paraiso a daga.

Naipakpakauna a Pannakaammo

Nupay ammotayo manipud Biblia a bumallaetto ni Jehova a Dios iti tiempo nga inkeddengna, masapul nga ipangagtayo ti maysa pay a pakdaar ni Pedro. “[Tangay addaankayo] iti daytoy naipakpakauna a pannakaammo, agaluadkayo tapno dikay maiyadayo a maikanunong kadakuada babaen iti biddut dagiti managsalungasing-linteg a tattao ket matnagkayo manipud bukodyo a kinatibker.”​—2 Pedro 3:17.

Nasaksakbay nga ammo la ketdin ni Jehova a maupay ti dadduma a nakapuy ti pammatida gapu ta kasla naitantan ti nadiosan nga ibaballaet. Ammona met a ti impluensia dagiti nadangkes a tattao ti mangdadael kadagiti pudno nga adipenna wenno, uray kaskasano mangpakapuy iti pammatida nga asidegen ti pannakasantipikar ti nagan ti Dios. Anian a nakalkaldaang ti agkapuykapuy kadagitoy maudi nga al-aldaw!

Saan a tiempo ita ti panagduadua wenno panagpangadua iti aramidento ni Jehova. (Hebreo 12:1) Imbes ketdi, tiempo itan a parayrayentayo ti panangapresiartayo iti imbunga ti kinaanus ni Jehova​—ti namnama a pannakaisalakan ti minilion nga agbalin a paset ti sangalubongan a dakkel a bunggoy ken mangnamnama a makalasat iti sumungsungad a dakkel a rigat. (Apocalipsis 7:9, 14) Indagadag ni Pedro: “Itultuloyyo ti rumang-ay iti di kaikarian a kinamanangaasi ken pannakaammo iti Apo ken Manangisalakantayo a ni Jesu-Kristo. Kenkuana maadda koma ti dayag agpadpada ita ken iti aldaw ti kinaagnanayon.”​—2 Pedro 3:18.

“Pagtalinaedenyo ti Bagbagiyo iti Ayat ti Dios”

Mangsalaknib kadatayo ti kinaokupadotayo a mangikasaba iti Pagarian ken ti regular nga itatabuno kadagiti Nakristianuan a gimong tapno agdaydayaw ken adalentayo ti Sao ti Dios. Iti kasta, awan tiempotayo a madanagan unay kadagiti dumakdakes a kasasaad ti agdama a dakes a sistema. Di rumbeng a malapunos iti buteng ken danag iti biag dagiti pudno a Kristiano. (1 Corinto 15:58) No ad-adda nga okupadotayo iti panagserbi ken ni Jehova, nabibiit ti panaglabas ti panawen.

Ni Judas, a kasadaran ni Pedro ken kabsat ni Jesus iti ina, balakadannatayo: “Dakayo, dungdunguen, babaen ti panangpabileg iti bagbagiyo iti kasasantuan a pammatiyo, ken panagkararag buyogen ti nasantuan nga espiritu, pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.” (Judas 20, 21) Usigenyo ti kinapateg ti positibo a kababalin a patanoren ti naynay a panagkararag. (1 Tesalonica 5:17) Kinuna pay ni Judas: “Itultuloyyo ti mangipakita iti asi kadagiti sumagmamano nga addaan kadagiti panagduadua; isalakanyo ida babaen ti panangrabsutyo kadakuada manipud iti apuy. Ngem itultuloyyo ti mangipakita iti asi kadagiti dadduma, nga aramidenyo ti kasta buyogen ti buteng, bayat a kagurayo uray pay ti makin-uneg a kawes a namansaan iti lasag.” (Judas 22, 23) Anian a nakapatpateg ti panagpipinnabileg kabayatan dagitoy a tiempo ti rigat! Ket anian a nagpateg ti di masulisog, nga usarentayo daytoy napaatiddog nga “aldaw ti pannakaisalakan” kas pambar iti “nalulok a kababalin,” a nasaknap ita iti agdama a nadangkes a lubong.​—Judas 4; 2 Corinto 6:1, 2.

No ipangagyo ti naayat a balakad da Pedro, Pablo, ken Judas ken no kanayon nga okupado ken aktibokayo iti panagserbi iti Dios, maurayyo a siaanus ti ibaballaet ni Jehova. Ngem aramidenyo aya dayta?

Dikay agkitakit nga agpatulong kadagiti Saksi iti lugaryo tapno mapatibkeryo ti pammatiyo iti inkari ti Namarsua a biag nga agnanayon. Adalenyo no ania ti makalikaguman tapno maikarikayo a makipaset iti daytoy dinto mauliten a sangalubongan a trabaho a panangasaba a mairingpaston iti umad-adanin a dakkel a rigat. (Marcos 13:10) Iti kasta, manamnamayo nga agbiagkayto iti baro a lubong ti kinalinteg nga inkari ni Jehova. (2 Pedro 3:13) Ipangagyo dagiti palagipna! Aguraykayo a siaanus! Agbalinkayo nga okupado!

[Footnote]

[Ladawan iti panid 7]

Adalenyo itan ti inkari ti Dios a Paraiso

[Picture Credit Line iti panid 5]

Lobo: Animals/Jim Harter/Dover Publications, Inc.; agtutubo a pastor: Children: A Pictorial Archive from Nineteenth-Century Sources/Grafton/Dover Publications, Inc.