Panangpabileg iti Panagtalektayo iti Kinalinteg ti Dios

“Tapno ti panagtalekmo adda koma ken ni Jehova, impakaammok ida kenka itoy nga aldaw.”​—PROVERBIO 22:19.

1, 2. (a) Apay a dagiti Saksi ni Jehova agtalekda ken Jehova? (Proverbio 22:19) (b) Ania ti mangipamatmat a dagiti dadduma nasken a pabilgenda ti panagtalekda ken Jehova?

NAPARABURAN dagiti pudno a Kristiano iti umiso a pannakaammo ken Jehova ken kadagiti panggepna. Siaayat nga ab-abastuan ida ti “matalek ken masirib nga adipen” iti naespirituan a “taraon iti umiso a tiempo.” (Mateo 24:45) Ti pannakaammo a magun-odda ipaayanna ida iti nalagda a pundasion a pakaibatayan ti panagtalekda iti Dios. Iti kasta, kas grupo, iparparangarang dagiti Saksi ni Jehova ti naisangsangayan a panagtalek ken ni Jehova ken iti kinalintegna.

² Nupay kasta, agparang a kas indibidual mabalin a kasapulan a pabilgen dagiti dadduma a Saksi ti kasta a panagtalek. Pasaray makaawat ti Sosiedad kadagiti surat a mangyeb-ebkas iti panagduadua maipapan iti panangilawlawag dagiti publikasion ti Sosiedad. Dagitoy a panagduadua ti nalabit reaksionda iti pannakaatur ti pannakaawat, wenno nalabit adda pakainaigan dagitoy kadagiti banag a mangapektar iti agim-imtuod, nangruna iti emosional a pamay-an.​—Idiligyo ti Juan 6:60, 61.

3. Ania ti mabalin a mapagteng uray dagiti matalek nga adipen ni Jehova, ken apay?

³ Mapasamak uray kadagiti pudno nga adipen ni Jehova ti kuna ti Eclesiastes 9:11: “Nagbaw-ingak, ket nakitak iti baba ti init, a ti lumba saan nga agpaay kadagiti nasiglat, wenno ti bakal kadagiti napigsa, uray pay ti tinapay iti masirib, uray pay dagiti kinabaknang kadagiti tattao a mannakaawat, uray pay ti parabur kadagiti tattao a nalaing; ngem ti panawen ken gasat [“di mapakpakadaan a pasamak,” NW] mapasamakda kadakuada amin.” Kasano a pudno daytoy iti nalawlawa a kaipapananna, wenno iti naespirituan a pamay-an? Mabalin nga adda dagiti am-ammotayo a Kristiano a nasingdat idi a mangsurot iti balakad ti Biblia, natured a mangidepensa iti kinapudno, nalaing a mangipakat kadagiti prinsipio ti Biblia, ken naanep a gumun-od iti umiso a pannakaammo. Ngem, gapu iti “panawen ken di mapakpakadaan a pasamak,” mabalin nga adda dagiti saan itan a maaramidan dagiti dadduma gapu iti pannakaaksidenteda wenno gapu ta lumallakay ken bumabbaketdan. Nalabit ut-utobenda no makastrekdanto iti baro a lubong ti Dios a saandanton a pulos matay.

4, 5. Apay nga awan panggapuan dagiti Kristiano a maawanan iti panagtalek iti kinalinteg ni Jehova?

⁴ No matay ti asawa ti maysa a Kristiano, nakaro a saem ken pannakaulila ti itden daytoy. Mabalin nga adu a tawen wenno dekada pay ketdi nga agkadua idi dagiti agassawa nga agserserbi ken Jehova. Ammo ti napanawan nga asawa a ti ipapatay gupdenna ti singgalut ti panagasawa.a (1 Corinto 7:39) Ita, tapno saan a madadael ti panagtalekna, masapul a pengdanna ti rikriknana.​—Idiligyo ti Marcos 16:8.

⁵ Anian a nainsiriban nga ibilangtayo ti ipapatay ti asawa, ama wenno ina, anak, wenno nasinged a Kristiano a gayyem kas gundaway a panangipakita iti panagtalek iti kinalinteg ni Jehova! Uray no mapukaw dagiti ipatpategtayo, makapagtalektayo a ni Jehova saan a nakillo. Makapagtalektayo a naragsakto dagiti amin a makagun-od iti biag nga agnanayon​—makalasatdanto man wenno mapagungar. Maipapan iti Dios, kuna ti salmista: “Ukradem ta imam, ket pennekem ti tarigagay ti isuamin a nabiag. Ni Jehova sililinteg kadagiti amin a dalanna, ken sipaparabur kadagiti amin nga aramidna. Ni Jehova siaarpad kadagiti amin nga umawag kenkuana, kadagiti amin nga umawag kenkuana iti kinapudno. Tungpalennanto ti tarigagay dagiti agbuteng kenkuana; denggennanto met ti ikkisda, ket isalakannanto ida.”​—Salmo 145:16-19.

No Mariknatayo nga Agsagsagabatayo nga Awan Gapgapuna

6, 7. (a) Apay a mabalin a sabali itan ti pannakaawat dagiti dadduma a Saksi a nagsagaba iti napalabas? (b) Apay a ditay koma panunoten a nakillo ni Jehova iti panangipalubosna iti kasta a panagsagaba iti napalabas?

⁶ Iti napalabas, adda dagiti Saksi a nagsagaba gapu iti panagkedkedda a mangaramid iti nalabit ipalubos itan ti konsiensiada. Kas pagarigan, nalabit a daytoy ti pangngeddengda no maipapan kadagiti dadduma a kita ti serbisio sibil, sumagmamano a tawenen ti napalabas. Nalabit panunoten itan ti maysa a kabsat a mabalinnan nga aramiden dagita a buyogen ti nadalus a konsiensia a di masalungasing ti neutral a takderna kas Kristiano no maipanggep iti agdama a sistema ti bambanag.

⁷ Kinakillo kadi iti biang ni Jehova ti panangipalubosna kenkuana nga agsagaba gapu iti panagkedkedna iti nalabit maaramidna itan nga awan dakes a pagbanaganna? Mabalin a saan a kasta ti pangipagarupan ti kaaduan a nakapadasen iti dayta. Maragsakanda ketdi ta naaddaanda iti gundaway a mangipanayag iti publiko ken mangibatad a determinadoda nga agtalinaed a natibker no iti isyu maipapan iti sapasap a kinasoberano. (Idiligyo ti Job 27:5.) Ania koma ti pagbabawyan ti asinoman a nangsurot iti konsiensiana iti panagtalinaedna a natibker maipaay ken Jehova? Gapu iti sisusungdo a panangsalimetmetda kadagiti Nakristianuan a prinsipio a mayannurot iti pannakaawatda kadagitoy wenno gapu iti panangipangagda iti ibagbaga ti konsiensiada, napaneknekan a maikarida a makigayyem ken Jehova. Awan duadua a nainsiriban a liklikantayo ti agaramid iti banag a mangburibor iti konsiensiatayo wenno mangitibkol kadagiti sabsabali. Maipanggep iti daytoy a banag, panunotentay koma ti pagwadan nga impakita ni apostol Pablo.​—1 Corinto 8:12, 13; 10:31-33.

8. Apay a dagiti Judio a Kristiano, a nangsalimetmet idi iti Linteg, di rumbeng a pagduaduaanda ti kinalinteg ni Jehova?

⁸ Tapno maay-ayo ni Jehova, nasken idi a tungpalen dagiti Judio dagiti Sangapulo a Bilin ken dagiti nagduduma nga ag-600 a kanayonan a linlinteg. Idi agangay, iti sidong ti Nakristianuan nga urnos, saanen a maipakalikagum iti panagserbi ken Jehova, uray kadagiti natural a Judio, ti panangtungpal kadagitoy a linteg. Karaman kadagiti linteg a saanen a maipaannurot dagidiay maipapan iti panagkugit, panangngilin iti Sabbath, panangidaton kadagiti animal, ken di pannangan kadagiti taraon a maiparit. (1 Corinto 7:19; 10:25; Colosas 2:16, 17; Hebreo 10:1, 11-14) Dagiti Judio a nagbalin a Kristiano​—a pakairamanan dagiti apostol​—ket saan idin nga obligado a mangannurot kadagiti linteg a naipakalikagum a tungpalenda idi addada iti babaen ti tulag ti Linteg. Inreklamoda kadi a saan a nainkalintegan ti urnos ti Dios ta impaalagadna idi kadakuada dagiti banag a saanen a kasapulan? Saan. Naragsakanda ketdi ta ad-adda a nalawlawaganda maipapan iti pangpanggep ni Jehova.​—Aramid 16:4, 5.

9. Ania ti kasasaad idi dagiti dadduma a Saksi, ngem apay nga awan ti rumbeng a pagbabawyanda?

⁹ Iti moderno a panawen, adda dagiti Saksi a nainget unay idi ti panangmatmatda no ania ti aramidenda wenno saanda nga aramiden. Dayta ti gapuna a narigrigat ti kasasaadda idi ngem kadagiti sabsabali. Idi agangay, limmawa ti panangmatmatda kadagiti bambanag gapu iti irarang-ay ti pannakaammo. Ngem awan pagbabawyanda a nangaramid iti maitunos iti konsiensiada, uray pay no mabalin a dimmegdeg ti panagsagabada gapu iti daytoy. Pudno a makomendaran ti kinamasindadaanda nga agsagaba gapu iti kinamatalekda ken Jehova, a ‘mangaramid iti isuamin a bambanag maigapu iti naimbag a damag.’ Bendisionan ni Jehova ti kasta a nadiosan a debosion. (1 Corinto 9:23; Hebreo 6:10) Insurat ni apostol Pedro buyogen ti nauneg a pannakaawat: “No, inton agar-aramidkayo iti naimbag ket agsagabakayo, ibturanyo dayta, daytoy ket maanamongan a banag iti Dios.”​—1 Pedro 2:20.

Panagsursuro ken Jonas

10, 11. Kasano nga impakita ni Jonas nga awan panagtalekna ken Jehova (a) idi nabilin a mapan idiay Nineve? (b) idi saan a dinadael ti Dios dagiti taga Nineve?

¹⁰ Idi nabilin a mapan sadi Nineve, saan nga impateg ni Jonas ti panangpakired ni Jehova iti pakinakemna. Kalpasan ti nakaam-amak a napagtengna gapu iti dina panagtulnog, nakapanunot met laeng ni Jonas, nabigbigna ti biddutna, napan iti pagilian a nakaibaonanna, ket pinakdaaranna dagiti taga Nineve maipapan iti sumungsungad a didigra. Idin, adda di ninamnama a napasamak: Gapu iti panagbabawi dagiti taga Nineve, saan nga impatuloy ni Jehova ti panangdadaelna kadakuada.​—Jonas 1:1–​3:10.

¹¹ Ania ti reaksion ni Jonas? Iti kararagna, makaluksaw a nagreklamo iti Dios. Kastoy ti kababagas ti reklamona: ‘Kunak la ngaruden a kastoy ti pagtungpalan dagiti bambanag. Dayta ti gapuna a diak kayat idi ti mapan idiay Nineve. Ita, kalpasan ti amin a napagtengko, agraman ti nakabutbuteng ken nakababain a panangalun-on kaniak ti dakkel nga ikan, ken kalpasan ti rigatko a nangpakdaar kadagiti taga Nineve maipapan iti sumungsungad a didigra, kastoy met la gayam ti mapasamak! Nagbambannogak laeng ken awan nagmamaayanna ti amin a panagrigatko! Naim-imbag la koman a matayakon!’​—Jonas 4:1-3.

12. Ania ti maadaltayo iti kapadasan ni Jonas?

¹² Nainkalintegan kadi ti panagreklamo ni Jonas? Nakillo kadi ni Jehova iti panangngaasina kadagiti managbasol a nagbabawi? Kinapudnona, rebbengna a naragsakan koma ni Jonas; pinullo a ribu a tattao ti nailisi iti didigra! (Jonas 4:11) Ngem impakita ti kinaawan panagraem ken ti panagreklamona a saan a naan-anay ti panagtalekna iti kinalinteg ni Jehova. Ti laeng bagina ti pinanunotna ket awan pannakaseknanna kadagiti sabsabali. Makasursurotayo koma ken Jonas babaen ti ditay panangipangruna iti bagbagitayo ken iti personal a rikriknatayo. Kombinsidotay koma a ti umiso nga aramiden isu ti panagtulnog ken Jehova, panagpaidalan iti organisasionna ken panangawat kadagiti pangngeddengna. Kapkapnekantayo a “naimbagto ti pagbanagan dagidiay agbuteng iti pudno a Dios.”​—Eclesiastes 8:12, NW.

Itan ti Tiempo a Pabilgentayo ti Panagtalektayo!

13. Kasano a mapabilegtay amin ti panagtalektayo ken Jehova?

¹³ Nainsiriban a pabilgen ti panagtalektayo ken Jehova. (Proverbio 3:5-8) Siempre, saan koma a basta ikararagtay laeng ken Jehova a tulongannatayo a mangpabileg iti panagtalektayo. Bumileg ti panagtalek maibatay iti umiso a pannakaammo, isut’ gapuna a masapul nga inaldaw a personal nga adalentayo ti Biblia, a basaentayo nga agpadpada ti Biblia ken dagiti literatura a mangilawlawag iti Biblia. Nasken ti regular nga itatabuno kadagiti Nakristianuan a gimong, a kas met ti panagsagana a naimbag ken pannakipartisipar aginggat’ mabalin. Dumakkel met ti panagtalektayo ken ni Jehova ken iti Saona no iyugalitayo nga iranud kadagiti sabsabali dagiti kinapudno iti Biblia, a sitataktika a parmekentayo dagiti isusupiat. Iti kasta, inaldaw a sumingedtayo kenkuana.

14. Iti mabiit, apay a dagiti tattao ti Dios nasken nga ad-addanto nga agtalekda ken Jehova?

¹⁴ Iti mabiit, kellaatto a dumteng ti kakaruan a panawen ti rigat a di pay napasaran ti sangatauan. (Mateo 24:21) No mapasamak dayta, ad-addanto a nasken nga agtalek dagiti adipen ti Dios iti kinalinteg ni Jehova ken iti panangiturong ti organisasionna. Iti simboliko a pamay-an, sitatalek a tungpalendanto ti bilin ti Dios nga: “Umayka, ilik, sumrekka kadagiti siledmo, ket rikpam dagiti ruangan a maipaay kenka: aglemmengka iti bassit a kanito agingga iti masibet ti pungtot.” (Isaias 26:20) Uray pay itan, nakastrekdan iti natalged a pannalaknib ti nasurok a 85,000 a kongregasion iti 232 a daga. Uray no anianto pay ti mairaman iti bilin a “sumrekka kadagiti siledmo,” makapagtalektayo a tulongannatayto ni Jehova a mangaramid iti dayta.

15. Iti 1998, kasano a maipagpaganetget ti maipapan iti panagtalek, ken apay a maitutop dayta?

¹⁵ Nasken a pabilgentay itan ti panagtalektayo. No awan panagtalektayo kadagiti Kristiano a kakabsattayo, iti organisasion ni Jehova ken, kangrunaan iti amin, ken ni Jehova a mismo, saantayo a maisalakan. Isu nga anian a maikanatad nga iti 1998, maulit-ulit a mapalpalagipan dagiti Saksi ni Jehova iti sasao ti tekstoda ita a tawen a “tunggal maysa nga umawag iti nagan ni Jehova maisalakanto”! (Roma 10:13) Masapul nga itultuloytayo ti agtalek iti dayta. No adda uray bassit a panagduaduatayo iti dayta, iwaksitay koma itan dayta a panagduadua, wen, ita nga aldaw.

Nalintegto ti Panangukom ni Jehova

16. Ania ti mabalin a mapasamak iti panagtalek no saan a mapatanor, ket ania ti aramidentayo tapno saan a mapasamak daytoy?

¹⁶ Iti Hebreo 3:14, napakdaaran dagiti napulotan a Kristiano: “Agpayso nga agbalintayo a makiraman ken Kristo no la ket irutantayo a sititibker ti panangpetpettayo iti panagtalek nga adda kadatayo idi damo agingga iti panungpalan.” No anagen, agaplikar met dagitoy a sao kadagiti Kristiano a ditoy daga ti namnamada. Mabalin a kumapuy ti damo a panagtalektayo no saantay a patanoren. Anian a nagpateg nga itultuloytayo ti gumun-od iti umiso a pannakaammo, iti kasta lumagda ti pundasion a nakaibatayan ti panagtalektayo!

17. Apay a makapagtalektayo a no maipapan iti pannakaisalakan, umisonto ti panangukom ni Jesus?

¹⁷ Iti mabiit, sukimatento ni Kristo dagiti amin a nasion tapno ‘mapaglalasinna dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding.’ (Mateo 25:31-33) Makapagtalektayo a nalintegto ti panangukom ni Kristo no siasino dagiti maikari a maisalakan. Inted ni Jehova kenkuana ti sirib, pannakaawat, ken dadduma pay a nasken a kalidad tapno ‘mangukom a sililinteg iti mapagnaedan a daga.’ (Aramid 17:30, 31) Agtalektayo koma a kas ken Abraham, a nagkuna: “Adayo koma kenka [Jehova] ti panagaramid ti kasta, a patayem ti nasingpet a maikanunong iti nadangkes, nga iti kasta ti nasingpet maipada met iti nadangkes; adayo koma dayta kenka: Saan aya a ti Ukom ti amin a daga agaramid iti nalinteg?”​—Genesis 18:25.

18. Apay a ditay koma pakaringgoran unay dagiti ditay ammo iti agdama?

¹⁸ Buyogen ti naan-anay a panagtalek iti kinalinteg ni Jehova, di rumbeng a maringgorantayo a mangbirok iti sungbat dagiti saludsod a kas iti: ‘Kasanonto a maukom dagiti maladaga ken dagiti babassit nga ubbing? Saan ngata nga adunto pay dagiti tattao a saan a nakangngeg iti naimbag a damag inton dumteng ti Armagedon? Dagiti ngay adda diperensia ti panunotna? Dagiti ngay . . . ?’ Pudno nga iti agdama ditay ammo no kasanonto a tamingen ni Jehova dagitoy. Nupay kasta, nalinteg ken naasinto ti panangaramidna iti dayta. Pulos a ditay koma pagduaduaan. Kinapudnona, mabalin a masdaaw ken maayatantayto a makakita iti panangtamingna kadagita iti wagas a pulos a ditay impagpagarup.​—Idiligyo ti Job 42:3; Salmo 78:11-16; 136:4-9; Mateo 15:31; Lucas 2:47.

19, 20. (a) Apay a saan a dakes ti mangyimtuod kadagiti nainkalintegan a saludsod? (b) Kaanonto nga ipaay ni Jehova dagiti kasapulan a sungbat?

¹⁹ Saan nga ipagel ti organisasion ni Jehova ti mangibangon kadagiti napasnek, naintiempuan a saludsod, kas sibibiddut nga ibagbaga dagiti bumusbusor. (1 Pedro 1:10-12) Nupay kasta, balakadannatayo ti Biblia nga idiantayo dagiti minamaag, pattapatta a saludsod. (Tito 3:9) Ti panangyimtuod kadagiti nainkalintegan a saludsod ken ti panangbirok kadagiti Nainkasuratan a sungbat babaen ti panagsukisok iti Sao ti Dios ken kadagiti Nakristianuan a publikasion maparang-ayna ti umiso a pannakaammotayo ket iti kasta mapabilegna ti panagtalektayo ken Jehova. Tultuladen ti organisasion ti inaramid idi ni Jesus. Dina sinungbatan dagiti saludsod a saan pay a tiempo idi a sungbatanna. Inlawlawagna: “Adu pay a bambanag ti sawek kadakayo, ngem dikay kabaelan nga awiten ida iti agdama.” (Juan 16:12) Inaminna met nga uray isu a mismo adda dagiti banag a saanna nga ammo idi.​—Mateo 24:36.

²⁰ Adu pay ti ipalgak ni Jehova. Anian a nainsiriban a mangnamnamatayo kenkuana, nga agtalektayo nga ipalgaknanto dagiti panggepna iti maitutop a tiempo. Makapagtalektayo a no dumteng ti panawen nga inkeddeng ni Jehova, maayatantayto a malawlawagan pay maipapan iti daldalanna. Wen, magunggonaantayto, no la ket ta agtalektayo a naan-anay ken Jehova ken iti organisasion nga us-usarenna. Ipatalged kadatayo ti Proverbio 14:26: “Iti panagbuteng ken ni Jehova adda napigsa a panagtalek; ket dagiti annakna addaandanto ayan a pagkamanganda.”

[Footnote]

Ania ti Makunayo?

◻ Apay a di nainsiriban a palubosantayo ti emosion a mangdadael iti panagtalektayo ken Jehova?

◻ Ania ti maadaltayo iti kapadasan ni Jonas?

◻ Apay a nakapatpateg ti panagadal iti Biblia ken pannakigimong?

[Ladawan iti panid 16]

Uray pay no mapukawantayo iti patpatgen, makapagtalektayo a nalinteg ni Jehova

[Dagiti Ladawan iti panid 18]

Talaga met laeng kadi nga agtalekkayo ken Jehova?