Makalasatto Ngata iti Apuy ti Aramidyo?
“Aluadan koma ti tunggal maysa no kasano ti panagibangonna iti [pamuon].”—1 CORINTO 3:10.
1. Ania ti namnamaen dagiti matalek a Kristiano kadagiti agbalin nga adalan?
MINGMINGMINGAN ti agassawa a Kristiano ti kappasngay nga anakda. Makita ti agibumbunannag iti Pagarian ti gagar ken interes iti rupa ti iyad-adalanna iti Biblia. Bayat nga adda iti plataporma a mangisursuro, mapaliiw ti maysa a Kristiano a panglakayen nga iti tallaong adda maysa a kabbaro nga interesado a sipapasnek a mangsuksukimat kadagiti kasuratan iti Bibliana. Napnuan namnama ti puso dagitoy a matalek nga adipen ni Jehova. Gagangay laeng a maisaludsodda, ‘Ayaten ken agserbinto ngata ken ni Jehova daytoy a tao—ken agtalinaed a matalek?’ Siempre, saan nga automatiko nga agbanag a kasta. Kalikaguman daytoy ti panagbannog.
2. Kasano nga impalagip ni apostol Pablo kadagiti Kristiano a Hebreo ti kinapateg ti trabaho a panangisuro, ket tignayennatay daytoy a mangsukimat iti ania maipapan iti bagbagitayo?
2 Kas maysa a nalaing a mannursuro, naawatan ni apostol Pablo ti kinapateg ti trabaho a panangisuro ken panangaramid kadagiti adalan idi insuratna: “Rebbeng koman a mannursurokayo gapu iti panawenen.” (Hebreo 5:12) Nabannayat ti panagrang-ay dagiti Kristiano a sinuratanna, idinto ta nabayag idin a nagbalinda a manamati. Saan laeng a maikuna a dida nakasagana a mangisuro kadagiti sabsabali, no di ket masapul pay a mapalagipanda maipapan kadagiti pagdamdamuan nga aspeto ti kinapudno. Iti kaaldawantayo, nasayaat nga usigentayo sagpaminsan ti abilidadtayo kas mannursuro ket kitaentayo no kasanotay a rumang-ay. Agpegpeggad ti biag dagiti tattao. Ania ti maaramidtayo?
3. (a) Ania ti nangyarigan ni apostol Pablo iti panangaramid iti Kristiano nga adalan? (b) Kas Kristiano a managibangon, ania a dakkel a pribilehio ti naited kadatayo?
3 Iti napalawa nga ilustrasion, inyarig ni Pablo ti panagaramid kadagiti adalan iti panagbangon iti pasdek. Kastoy ti panangirugina: “Dakami ket katrabahuan ti Dios. Dakayo a tattao ti daga a talonen ti Dios, ti patakder ti Dios.” (1 Corinto 3:9) Isu a makiramramantayo iti trabaho a panagbangon; tultulongantayo dagiti tattao nga agbalin nga ad-adalan ni Kristo. Ar-aramidentay dayta kas katrabahuan Daydiay “nangibangon iti isuamin a bambanag.” (Hebreo 3:4) Anian a pribilehio! Kitaentayo no kasano a ti naipaltiing a balakad ni Pablo kadagiti taga Corinto matulongannatayo nga agbalin a nalalaing iti trabahotayo. Ipamaysatayo a nangnangruna ti “arte ti panangisuro[tayo].”—2 Timoteo 4:2.
Panangisaad iti Umiso a Pamuon
4. (a) Ania ti akem ni Pablo iti panangbangon kadagiti Kristiano? (b) Apay a maikunatayo nga agpada nga ammo ni Jesus ken dagiti agdengdengngeg kenkuana ti kinapateg dagiti nasayaat a pamuon?
4 Tapno nalagda ken agpaut ti maysa a pasdek, kasapulan daytoy ti nasayaat a pamuon. Gapuna, insurat ni Pablo: “Maitunos iti di kaikarian a kinamanangaasi ti Dios a naited kaniak, kas masirib a manangiturong kadagiti trabaho nangisaadak iti pamuon.” (1 Corinto 3:10) Nagaramat met idi ni Jesu-Kristo iti umasping nga ilustrasion. Sinaritana ti maipapan iti balay a saan a naan-ano idi dimteng ti bagyo ta natibker ti pamuon a pinili ti nangbangon iti dayta. (Lucas 6:47-49) Ammo ni Jesus ti pateg dagiti pamuon. Adda ni Jesus idi impasdek ni Jehova ti pamuon ti mismo a daga.a (Proverbio 8:29-31) Ammo met dagiti agdengdengngeg idi ken Jesus no kasano kapateg dagiti nasayaat a pamuon. Dagiti laeng balay a nasayaat ti pamuonda ti makalasat kadagiti layus ken ginggined a mapasamak idi no dadduma idiay Palestina. Ngem ania a pamuon ti adda iti panunot ni Pablo?
5. Asino ti pamuon ti kongregasion Kristiano, ken kasano a naipadto daytoy?
5 Insurat ni Pablo: “Awan ti tao a makaisaad iti aniaman a sabali pay a pamuon no di ti naikabilen, nga isu ni Jesu-Kristo.” (1 Corinto 3:11) Saan a daytoy ti damo a pannakayarig ni Jesus iti maysa a pamuon. Kinapudnona, impadto ti Isaias 28:16: “Kastoy ti kuna ni Apo Jehova, Adtoy isaadko idiay Sion ti maysa a bato a maipaay a pamuon, maysa a napadas a bato, maysa a napateg a bato a panuli ti natibker a pamuon.” Nabayag idin a pinanggep ni Jehova a pagbalinen ti Anakna a pamuon ti kongregasion Kristiano.—Salmo 118:22; Efeso 2:19-22; 1 Pedro 2:4-6.
6. Kasano nga insaad ni Pablo ti umiso a pamuon kadagiti Kristiano sadi Corinto?
6 Ania ti pamuon iti tunggal Kristiano? Kas kinuna ni Pablo, awan ti pamuon maipaay iti maysa a pudno a Kristiano no di daydiay naisaad iti Sao ti Dios—ni Jesu-Kristo. Nabatad a nangisaad ni Pablo iti kasta a pamuon. Idiay Corinto, a sadiay maipatpateg unay idi ti pilosopia, saanna a pinagsiddaaw dagiti tattao babaen ti nailubongan a sirib. Imbes ketdi, inkaskasaba ni Pablo a “nailansa ni Kristo,” banag nga impagarup dagiti nasion a nakaro a “kinamaag.” (1 Corinto 1:23) Insuro ni Pablo a ni Jesus ti kangrunaan nga addaan akem kadagiti panggep ni Jehova.—2 Corinto 1:20; Colosas 2:2, 3.
7. Ania ti maadaltayo iti panangtukoy ni Pablo iti bagina kas “masirib a manangiturong kadagiti aramid”?
7 Kinuna ni Pablo nga inaramidna ti kasta a panangisuro “kas masirib a manangiturong kadagiti trabaho.” Saan a panagpasindayag daytoy. Binigbigna laeng ti naisangsangayan a sagut nga inted kenkuana ni Jehova—ti panangorganisar wenno panangiturong iti trabaho. (1 Corinto 12:28) Pudno, saantayo a naikkan ita kadagiti namilagruan a sagut a naiparabur kadagiti Kristiano idi umuna a siglo. Ken mabalin a saantay nga ibilang ti bagbagitayo a naparaburan a mannursuro. Ngem no an-anagen, agpayso a naparaburantayo. Utobenyo: Ipapaay ni Jehova ti nasantuan nga espirituna a tumulong kadatayo. (Idiligyo ti Lucas 12:11, 12.) Sa addaantayo iti ayat ken Jehova ken pannakaammo kadagiti kangrunaan a pannursuro ti Saona. Pudno a naisangsangayan a sagut dagitoy a mausar iti panangisuro kadagiti sabsabali. Determinado nga usarentay koma dagitoy a mangisaad iti umiso a pamuon.
8. Kasanotay a maisaad ni Kristo kas pamuon kadagiti agbalin nga adalan?
8 No isaadtayo ni Kristo kas pamuon, saantay nga iparang kas awanan gaway a maladaga iti kulluong, wenno kas pumada ken Jehova iti maysa a Trinidad. Dagiti kasta a di nainkasuratan a kapanunotan ti mangbukel iti pamuon dagiti sinsinan a Kristiano. Imbes ketdi, isurotayo nga isu ti katan-okan a tao a nagbiag, nga indatonna ti perpekto a biagna gapu kadatayo, ken agturturay itan idiay langit kas Ari a dinutokan ni Jehova. (Roma 5:8; Apocalipsis 11:15) Ikagumaantay met a tignayen dagiti iyad-adalantayo a mangsurot ken Jesus ken mangtulad kadagiti galadna. (1 Pedro 2:21) Kayattayo a magutugotda gapu iti regta ni Jesus iti ministerio, ti pannakipagriknana kadagiti nanumo ken mairurrurumen, ti panangngaasina kadagiti managbasol a maladladingitan gapu iti basolda, ti di maisin a turedna a mangsango kadagiti pakasuotan. Pudno a maysa ni Jesus a nakaskasdaaw a pamuon. Ngem ania ti sumaruno?
Panagibangon Babaen Kadagiti Umiso a Materiales
9. Nupay, kangrunaanna, maysa ni Pablo a manangisaad iti pamuon, ania ti pakaseknanna kadagidiay nangawat iti kinapudno nga insurona?
9 Insurat ni Pablo: “Ita no ti asinoman agibangon iti pamuon iti balitok, pirak, napapateg a batbato, materiales a kayo, garami, pinaggapasan, ti aramid ti tunggal maysa maiparangarangto, ta ti aldaw ilataknanto dayta, agsipud ta maipanayagto babaen ti apuy; ket ti apuy met laeng paneknekannanto no ania a kita ti aramid ti tunggal maysa.” (1 Corinto 3:12, 13) Ania ti kayat a sawen ni Pablo? Usigenyo ti kasasaad. Kangrunaanna, maysa ni Pablo a manangisaad iti pamuon. Kadagiti panagdaliasatna kas misionero, napan iti nadumaduma a siudad, a nangaskasaba kadagiti adu a saan pay a nakangngeg iti maipapan ken Kristo. (Roma 15:20) Idi inawat dagiti tattao ti kinapudno nga insurona, nabuangay dagiti kongregasion. Maseknan unay ni Pablo kadagitoy a matalek a tattao. (2 Corinto 11:28, 29) Nupay kasta, nasken idi nga agakar-akar. Isu a kalpasan ti 18 a bulan a panangisaadna iti pamuon idiay Corinto, napan nangaskasaba kadagiti sabali a siudad. Kaskasdi, magagaran a mangammo no kasano a sinurnadan dagiti dadduma ti trabaho nga inrugina sadiay.—Aramid 18:8-11; 1 Corinto 3:6.
10, 11. (a) Kasano a pinaggidiat ni Pablo dagiti agduduma a klase ti materiales a pagbangon? (b) Ania a klase dagiti literal a pasdek ti nalabit adda iti nagkauna a Corinto? (c) Aniada a klase ti pasdek ti nalabit naan-andur iti apuy, ket ania ti maadal iti dayta dagiti Kristiano a manangaramid kadagiti adalan?
10 Agparang a nakapuy ti trabaho dagiti dadduma nga agibangbangon idi iti rabaw ti pamuon nga insaad ni Pablo idiay Corinto. Tapno maipanayag ti problema, pinaggidiat ni Pablo ti dua a klase ti materiales a pagbangon. Umuna: balitok, pirak, ken dagiti napateg a bato. Maikadua: kayo, garami, ken pinaggapasan. Mabalin nga aramaten a pagbangon iti pasdek dagiti nasayaat, nalagda, ken di mauram a materiales. Mabiit met ti mangbangon iti maysa a pasdek babaen ti panangaramat kadagiti ibebelleng, temporario, ken nalaka a mauram a materiales. Awan duadua nga adu idi dagiti kasta a klase ti pasdek iti dakkel a siudad a kas iti Corinto. Adda dagiti nadaeg a templo a naaramid iti dadakkel, nangingina a bato, a nalabit nakalupkopan wenno naarkosan iti balitok ken pirak ti dadduma a pasetda.b Nalabit nagminar ti kinangayed dagitoy a natibker a pasdek no idilig kadagiti adda iti asideg nga abong-abong, kalapaw, ken tiendaan a naaramid kadagiti saan a nakatam a kayo ken naatepan iti garami.
11 Ania ti mabalin a mapasamak kadagitoy a pasdek no adda uram? Nalawag ti sungbat idi kaaldawan ni Pablo a kas met laeng iti panawentayo. Kinapudnona, idi 146 K.K.P., sinakup ken pinuoran ni Romano a Heneral Mummius ti siudad ti Corinto. Sigurado a dimmapo dagiti adu a pasdek a naaramid iti kayo, garami, wenno pinaggapasan. Dagiti ngay nalagda a pasdek a naaramid iti bato, naarkosan iti pirak ken balitok? Di pagduaduaan a saan a nauram dagitoy. Mabalin nga inaldaw a malabsan dagiti iyad-adalan idi ni Pablo idiay Corinto dagiti kasta a pasdek—nadadaeg a patakder a naaramid iti bato a nakalasat kadagiti didigra a nabayag idin a nangdadael kadagiti narukop a pasdek iti abayda. No kasta, anian a naglawag ti punto ni Pablo! No mangisurotayo, nasken nga ibilangtay ti bagbagitayo a manangibangon. Kayattay nga aramaten dagiti kasasayaatan, kalalagdaan a materiales aginggat’ mabalin. Iti kasta, agpaut la ketdi ti aramidtayo. Ania dagitoy nalagda a materiales, ken apay a nasken nga usarentayo dagitoy?
Makalasatto Ngata iti Apuy ti Aramidyo?
12. Kadagiti ania a wagas a nakapuy ti panagbangon dagiti dadduma a Kristiano idiay Corinto?
12 Nalawag a narikna ni Pablo a sinansinan ti panagbangon ti dadduma kadagiti Kristiano idiay Corinto. Ania ti problema? Kas ipakita ti konteksto, nariribuk ti kongregasion gapu iti pannakabingaybingay, panangitan-ok kadagiti tattao uray no madadael ti panagkaykaysa ti kongregasion. Adda agkuna, “Kaduanak ni Pablo,” ket adda met agkuna, “[Kaduanak ni] Apolos.” Mabalin nga impasindayag dagiti dadduma ti kinasiribda. Di ngad pakasdaawan a nagbanag daytoy iti nailasagan a panagpampanunot, naespirituan a kinamaladaga, ken nasaknap nga “imon ken ringgor.” (1 Corinto 1:12; 3:1-4, 18) Nabatad a maanninaw dagitoy a kababalin iti panangisuroda iti uneg ti kongregasion ken iti ministerio. Kas resultana, barengbareng ti trabahoda a panangaramid kadagiti adalan, kas iti panangusar kadagiti nakapuy a materiales a pagbangon iti maysa a pasdek. Saan a makalasat iti “apuy.” Ania nga apuy ti sarsaritaen ni Pablo?
13. Ania ti iladladawan ti apuy iti ilustrasion ni Pablo, ket ania koma ti laglagipen dagiti amin a Kristiano?
13 Adda apuy a pakaipasanguantay amin iti biag—dagiti pakasuotan ti pammatitayo. (Juan 15:20; Santiago 1:2, 3) Kas kadagiti Kristiano sadi Corinto, nasken a bigbigentayo ita a masuotto ti asinoman a suruantayo iti kinapudno. No nakapuy ti panangisurotayo, mabalin a dakesto ti pagbanaganna. Impakpakauna ni Pablo: “No agtalinaed ti aramid nga imbangon iti dayta ti asinoman, awatennanto ti gunggona; no mapuoran ti aramid ti asinoman, mapukawanto, ngem isu a mismo maisalakanto; ngem, no kasta, daytanto ket kasla babaen ti apuy.”c—1 Corinto 3:14, 15.
14. (a) Kasano a mabalin a “mapukawan” dagiti Kristiano a manangaramid kadagiti adalan, ngem kasano a maisalakandanto a kas babaen ti apuy? (b) Ania ti mabalintay nga aramiden tapno saantayo a mapukawan?
14 Pudno a mamagpanunot a sasao dagitoy! Mabalin a masaktantayo unay no tumulok ti maysa a tao iti sulisog wenno pannakaidadanes ket kalpasanna panawanna ti dana ti kinapudno iti baet ti panangikagumaantayo a timmulong kenkuana nga agbalin nga adalan. Binigbig dayta ni Pablo iti panangibagana a mapukawantayo iti sidong dagiti kasta a kasasaad. Mabalin a nasaem unay ti kasta a kasasaad ket ti pannakaisalakantayo maikuna a “kasla babaen ti apuy”—kas iti maysa a tao a nauram amin a sanikuana ken gistay di pay nakalasat. Iti biangtayo, ania ti mabalintay nga aramiden tapno saantayo a mapukawan? Dagiti nalagda a materiales ti usarentayo a pagbangon! No isurotayo dagiti iyad-adalantayo tapno madanon ti pusoda, a tignayentay ida a mangilala kadagiti napateg a Nakristianuan a galad kas iti sirib, pannakaawat, panagbuteng ken Jehova, ken napudno a pammati, iti kasta agibangbangontayo babaen kadagiti nalagda, di mauram a materiales. (Salmo 19:9, 10; Proverbio 3:13-15; 1 Pedro 1:6, 7) Dagidiay makagun-od kadagitoy a galad ti makapagtultuloy nga agaramid iti pagayatan ti Dios; sigurado ti namnamada nga agbiag nga agnanayon. (1 Juan 2:17) Ngem, kasanotay a mayaplikar ti ilustrasion ni Pablo iti praktikal a wagas? Usigenyo ti sumagmamano nga ehemplo.
15. Kasanotay a masigurado a saan a sinansinan ti panagbangontayo no maipapan kadagiti iyad-adalantayo iti Biblia?
15 No isursurotayo dagiti iyad-adalantayo iti Biblia, saan koma a dagiti tattao ti itan-oktayo no di ket ni Jehova a Dios. Ti panggeptayo ket saan a tapno suruan ida a mangmatmat kadatayo kas kangrunaan a pagtaudan ti sirib. Kayattayo nga agpaidalanda ken Jehova, iti Saona, ken iti organisasionna. Gapuna, saantay a basta sungbatan dagiti saludsodda babaen kadagiti bukodtayo a kapanunotan. Imbes ketdi, isurotay ida a mangbirok kadagiti sungbat, nga aramatentayo ti Biblia ken dagiti publikasion nga ipapaay “ti matalek ken masirib nga adipen.” (Mateo 24:45-47) Gapu kadagitoy met laeng a rason, agannadtayo a ditay bukodan dagiti iyad-adalantayo iti Biblia. Imbes a sintirentayo ti panangipakita dagiti dadduma iti interes kadakuada, paregtaentay koma dagiti iyad-adalantayo a ‘lumawa’ iti pammategda, nga am-ammuen ken ipategda dagiti dadduma pay a kameng ti kongregasion.—2 Corinto 6:12, 13.
16. Kasano a makaibangon dagiti panglakayen babaen kadagiti di mauram a materiales?
16 Napateg met ti akem dagiti Kristiano a panglakayen iti panangbangon kadagiti adalan. No mangisuroda iti kongregasion, dagiti di mauram a materiales ti aramatenda a pagbangon. Mabalin nga agduduma ti abilidadda a mangisuro, kapadasanda, ken personalidadda, ngem saanda a gundawayan dagitoy a pagdudumaan a pangawis kadagiti pasurotda. (Idiligyo ti Aramid 20:29, 30.) Saantay nga ammo nga eksakto no apay a kinuna dagiti dadduma idiay Corinto, “Siak kaduanak ni Pablo” wenno, “Siak ken Apolos.” Ngem masinunuotayo nga awan kadagitoy a matalek a panglakayen ti nangitandudo iti kasta a mamagsisina a panagpampanunot. Saan a napatiray-okan ni Pablo kadagiti kasta a sentimiento; siiinget a sinupiatna dagitoy. (1 Corinto 3:5-7) Iti kaaldawantayo, laglagipen met dagiti panglakayen nga ipaspastoranda ti “arban ti Dios.” (1 Pedro 5:2) Saan a tao ti makinkukua iti dayta. Gapuna, sititibker a sarangten dagiti panglakayen ti aniaman a pagannayasan a mangituray iti arban wenno iti bagi dagiti panglakayen. No la ket ti napakumbaba a tarigagay nga agserbi iti kongregasion ti mangtigtignay kadagiti panglakayen, danonenda ti puso, ken tulonganda dagiti karnero nga agserbi ken Jehova iti amin a kararua, agibangbangonda babaen kadagiti di mauram a materiales.
17. Kasano nga ikagumaan dagiti Kristiano a nagannak ti agibangon babaen kadagiti di mauram a materiales?
17 Maseknan met unay dagiti Kristiano a nagannak iti daytoy a banag. Anian a panagtarigagayda a makita dagiti annakda nga agbiag nga agnanayon! Dayta ti gapuna nga ikagumaanda nga “itukit” dagiti prinsipio ti Sao ti Dios iti puso dagiti annakda. (Deuteronomio 6:6, 7, NW) Kayatda a maammuan dagiti annakda ti kinapudno, saan la a basta buklen dagiti paglintegan wenno maulit-ulit nga impormasion, no di ket kas makapnek, makagunggona, ken naragsak a wagas ti panagbiag. (1 Timoteo 1:11) Tapno agbalin dagiti annakda a matalek nga ad-adalan ni Kristo, ikagumaan dagiti naayat a nagannak ti agusar kadagiti di mauram a materiales. Siaanus a tulonganda dagiti annakda a mangikkat kadagiti kababalin a kagura ni Jehova ken mangpatanor kadagiti galad a kayatna.—Galacia 5:22, 23.
Siasino ti Manungsungbat?
18. No iwaksi ti maysa nga adalan ti nasayaat a pannursuro, apay a saan a mapabasol daydiay mangikagkagumaan a mangisuro ken mangsanay kenkuana?
18 Mangpataud daytoy a panangusig iti napateg a saludsod. No sumiasi iti kinapudno ti tao nga ikagkagumaantayo a tulongan, kayat kadi a sawen dayta a saantay a naballigi kas mannursuro—a nakapuy dagiti materiales nga inusartayo a pagbangon? Saan met ketdi a kasta. Ipalagip kadatayo ti sasao ni Pablo a maysa a dakkel a responsabilidad ti panangaramid kadagiti adalan. Kayattay nga aramiden ti amin a kabaelantayo tapno nasayaat ti panagbangontayo. Ngem saan nga ibagbaga kadatayo ti Sao ti Dios nga ibaklaytayo nga interamente ti responsabilidad sa pabasolentayo ti bagitayo no sumiasi iti kinapudno dagidiay ikagkagumaantayo a tulongan. Adda dadduma pay a banag a nainaig malaksid iti mismo nga akemtayo kas managibangon. Kas pagarigan, imutektekanyo ti kuna ni Pablo maipapan iti uray mannursuro a nakapuy ti aramidna iti daytoy trabaho a panagbangon: “Mapukawanto, ngem isu a mismo maisalakanto.” (1 Corinto 3:15) No maisalakanto ti mannursuro—idinto ta nailadawan a ‘mauram’ iti arig apuy a suot ti Kristiano a personalidad nga inkagumaanna nga ipasdek iti iyad-adalanna—ania ngarud ti maikunatayo? Nabatad a ti mayad-adalan a mismo ti kangrunaan a manungsungbat ken Jehova no ikeddengna ti agtalinaed a matalek wenno saan.
19. Ania ti usigentayto iti sumaganad nga artikulo?
19 Nagpateg ti personal, wenno indibidual, a responsabilidad. Apektaranna ti tunggal maysa kadatayo. Ania ti espesipiko nga isursuro ti Biblia maipapan iti dayta a banag? Daytoy ti mausig iti sumaganad nga artikulo.
[Footnotes]
a Ti ‘pamuon ti daga’ ket mabalin a tumukoy kadagiti pisikal a puersa a sititibker a mamagtalinaed iti dayta iti lugarna, ken amin a banag iti law-ang. Maysa pay, naaramid ti daga iti pamay-an a di “maisina,” wenno madadael iti uray kaanoman.—Salmo 104:5.
b Saan a dagiti saniata, kas kadagiti diamante ken rubi, ti tuktukoyen ni Pablo a “napapateg a batbato.” Mabalin a dagitoy ket nangina a batbato a pagbangon kas iti marmol, alabastro, wenno granito.
c Pinagduaduaan ni Pablo ti pannakaisalakan ti “aramid” ti nangbangon, saan a ti nangbangon. Kastoy ti panangipatarus ti The New English Bible iti daytoy a bersikulo: “No makalasat ti binangon ti maysa a tao, magunggonaanto; no mauram, mapukawanto; nupay kasta, maisalakanto, a kas iti maysa a nakalasat iti apuy.”
Kasanoyo a Sungbatan?
◻ Ania ti “pamuon” ti pudno a Kristiano, ken kasano a maisaad dayta?
◻ Ania ti maadaltayo iti nagduduma a klase ti materiales a pagbangon?
◻ Ania ti iladladawan ti “apuy,” ken kasano a mabalin a dayta ti pakaigapuan a “mapukawan” dagiti dadduma?
◻ Kasano a dagiti mangisursuro iti Biblia, papanglakayen, ken nagannak makaibangonda babaen kadagiti di mauram a materiales?
[Ladawan iti panid 9]
Iti adu a nagkauna a siudad, adda dagiti pasdek a naaramid iti bato a di mauram ken dagiti narukop a patakder