Report Dagiti Manangiwaragawag ti Pagarian

Dati a Bumusbusor Naammuanna ti Kinapudno

ADUN ti naipadamag maipapan iti gerra sibil idiay Liberia. Pinullo a ribu dagiti natay, ken ad-adu pay dagiti napagtalaw. Iti laksid dagitoy a rigat, itultuloy dagiti nasingpet panagpuspusoda a tattao nga abrasaen ti kinapudno, kas ipakita ti sumaganad a kapadasan.

Nanipud agtawen iti sangapulo, inedukaran ti Lutheran Church ni James. Idi nagbalin nga editor ti pagiwarnak ti simbaan, inusarna ti saadna nga agsurat kadagiti artikulo a maibusor kadagiti Saksi ni Jehova. Inaramidna daytoy nupay awan pay naam-ammona uray maysa kadakuada.

Idi agangay, simmardeng ni James a nagtrabaho iti pagiwarnak ti simbaan ket bimmaknang kas agtagtagikua iti motel. Maysa nga aldaw bayat nga agtugtugaw iti lugar a pagurayan dagiti bisita iti motelna, kinasarita ti dua a sister a desente ti panagkawkawesda. Idi nakitana ti nanakman a panagbadbadoda, pinastrekna ida. Ngem idi inlawlawagda ti panggepda, kinunana, “Okupadoak unay ita.” Intukon dagiti Saksi ti suskripsion dagiti magasin a Pagwanawanan ken Agriingkayo!, ket nangala tapno pumanawdan. Simmangpet dagiti magasin idiay balayna iti las-ud ti 12 a bulan, ngem inkargana ida iti bag a plastik a dina man la inuksot dagiti bungonda.

Madama idi ti gerra sibil, isu a pinunno ni James ti maysa a bag iti kuarta ken dagiti napateg a sanikuana tapno pumanaw apaman a madlawna a marautdan. Maysa nga agsapa, bimtak ti granada iti likudan ti balayna, ket gapu iti panaglagaw ginammatanna ti bagna sa nagtaray tapno saan a maan-ano. Masapul a lumasat kadagiti nagadu a checkpoint a kadua dagiti rinibu a pumampanaw a sibilian. Sadiay, masansan a takawan ken papatayenda dagiti inosente a sibilian uray awan gapgapuna.

Iti damo a checkpoint, napagsaludsodan ni James iti sumagmamano a saludsod sada pinalukatan ti bagna. Idi a linuktanna, sinukimatna ti bagna ket saan a mamati iti nakitana. Nagkullayaw ta ti napidutna a bag ket saan a daydiay naglaon kadagiti napateg a sanikuana. Gaput’ panaglagawna, daydi bag a naglaon kadagiti amin a di pay naluktan a Pagwanawanan ken Agriingkayo! ti napidutna. Ngem, idi nakita ti soldado dagiti magasin ket nabasana ti naganna iti bungonda, kunana: “A, maysaka gayam a Saksi ni Jehova. Saan a dakayo ti birbirokenmi, ammomi a dikay agulbod.” Kalpasan nga inruarna ti sumagmamano a magasin manipud iti bag, binilin ti soldado ni James a mabalinnan ti mapan.

Kasta met la ti napasamak kadagiti siam a sabali pay a checkpoint, tangay impapan dagiti komandante a maysa ni James a Saksi ni Jehova ket pinalusotda a di naan-ano. Nagyaman ni James ta dina naitugot dagiti napateg a sanikuana ta sigun kadagiti naimatanganna, mabalin a pinatayda koman gapu kadagiti sanikuana.

Idi nadanonna ti maudi ken pagbutbutnganda unay a checkpoint, nagalinggaget idi nakitana a nagadu dagiti bangkay iti aglawlaw. Gaput’ panagkullayawna, inawaganna ti nagan ni Jehova. Inkararagna a no tulongan ti Dios a makalasat iti daytoy a paggudasan, agserbinto kenkuana iti intero a biagna.

Impakita ni James ti bagna kadagiti soldado, ket imbagada manen: “Saan a dagitoy a tattao ti birbirokenmi.” Kalpasanna, innayonda a kinuna kenkuana: “Adda kabsatmo nga agnanaed dita arisadsad ti turod. Inkan ket kaduaem.” Iti dayta a kanito nagbaliwen a namimpinsan ti opinion ni James kadagiti Saksi. Dagus a binirokna ti kabsat, ket nayurnos ti panagadalna iti Biblia babaen ti libro a Mabalinyo ti Agbiag nga Agnanayon iti Paraiso a Daga.a

Sumagmamano nga aldaw kalpasanna, maysa a panangraut ti nakapilitanna a mangpanaw iti dayta a lugar. Iti dayta a gundaway, nagkamang ni James iti kasamekan a ti laeng libro nga Agbiag nga Agnanayon ti awitna! Bayat ti 11 a bulan a pannakaisinana kadagiti Saksi, naminlima nga inadalna ti interamente a librona. Idi mabalinnan ti agsubli idiay siudad, intuloyna ti nakiinnadal iti Biblia kadagiti Saksi ket napartak ti panagprogresona. Di nagbayag, nagbautisar ni James, ket agserserbi itan a simamatalek a kaduana dagiti naespirituan a kakabsatna.

[Footnote]