No Kasanodakay a Matulongan Dagiti Anghel

PASINGKEDAN ti Sao ti Dios ti kaadda dagiti anghel. Ibagana kadatayo nga adda minilmilion kadagitoy a naespirituan a parsua. Ni Daniel nga adipen ni Jehova a Dios nasirmatana dagiti nailangitan a banag, a maipapan iti dayta insuratna: “Rinibribu a ribu iti dayta dagiti nagserbi [iti Dios], ket sangalaksa a laksa ti nagtatakder iti saklangna.”​—Daniel 7:10.

Madlawyo a saan laeng nga imbaga ni Daniel nga adu dagiti anghel. Ipasimudaagna pay a dagiti anghel agserserbida iti Dios. Adipenna ida. Maitunos iti daytoy, inkanta ti salmista: “Bendituenyo ni Jehova, dakayo nga anghelesna, a mannakabalin iti bileg, a manungtungpal iti saona, a nangtimtimud iti timek ti saona. Bendituenyo ni Jehova, dakayo amin a buybuyotna, dakayo amin a ministrona nga agaramid iti pagayatanna.”​—Salmo 103:20, 21.

Ilawlawag pay ti Biblia a dagiti anghel dida nangrugi nga agbiag kas tattao ditoy daga. Pinarsua ni Jehova dagiti anghel sadi langit sakbay pay a pinarsuana ti daga. Idi nga inkabil ti Dios ‘ti pamuon ti daga, amin nga anghel nga annak ti Dios nagdir-ida gapu iti rag-o.’​—Job 38:4-7.

Espiritu a parsua dagiti anghel​—di makita, mannakabalin, nasaririt. Iti Biblia, ti Hebreo a sao a mal·ʼakhʹ ken ti Griego a termino nga agʹge·los naipatarusda nga “anghel” no ti ipasimudaagda ket ti espiritu a parsua. Agarup 400 a daras a nagparang dagitoy a sasao iti Biblia. Agpada ti kaipapananda, nga isu ti “mensahero.”

Panagparang Dagiti Anghel

Talaga a mensahero dagiti anghel. Nalabit kabesadoyo ti salaysay ti Biblia maipapan iti panagparang ni anghel Gabriel ken ni Maria. Imbagana kenkuana a nupay birhen, ipasngaynanto ti maysa nga anak a mapanaganan iti Jesus. (Lucas 1:26-33) Nagparang met ti maysa nga anghel kadagiti pastor idiay tay-ak. Impakaammona: “Naiyanak kadakayo ita nga aldaw ti maysa a Manangisalakan, nga isu ti Kristo nga Apo.” (Lucas 2:8-11) Kasta met, nangidanon dagiti anghel kadagiti mensahe kada Agar, Abraham, Lot, Jacob, Moises, Gedeon, Jesus, ken dadduma pay sigun iti rekord ti Biblia.​—Genesis 16:7-12; 18:1-5, 10; 19:1-3; 32:24-30; Exodo 3:1, 2; Oc-ocom 6:11-22; Lucas 22:39-43; Hebreo 13:2.

Nakadidillaw nga amin dagitoy a mensahe nga indanon dagiti anghel ket maitunos iti kaitungpalan ti pangpanggep ti Dios imbes ketdi a kadagidiay tattao a nagparanganda. Nagparang dagiti anghel kas pannakabagi ti Dios, sigun iti pagayatanna ken tiempona. Saan a tattao ti nangayab kadakuada.

Rumbeng Aya nga Awagan ken Agpatulongtayo Kadagiti Anghel?

Maitutop aya nga awagan dagiti anghel no tiempo ti rigat? No wen, kayattayo koma nga ammuen ti nagan ti anghel a kasayaatan a tumulong kadatayo. Dayta ti gapuna nga adda dagiti mailaklako a libro a mangilista iti ipagarupda a nagnagan dagiti adu nga anghel, agraman ti ranggo, titulo, ken annongda. Adda libro a nangilista iti inawaganna a “kangrunaan a sangapulo nga anghel,” “dagiti kalalatakan nga anghel iti Makinlaud a lubong.” Nainayon iti listaan ti balakad a panagkidem, mamin-adu a panangulit a sibabannayat iti nagan ti anghel, panaganges iti nauneg, nabannayat a panaganges, “ken agsaganakayo iti posibilidad a makisarita kadakuada.”

Maisupadi iti dayta, ited ti Biblia ti dua laeng a nagan dagiti matalek nga anghel ti Dios, da Miguel ken Gabriel. (Daniel 12:1; Lucas 1:26) Nalabit, naited dagitoy a nagan tapno ipakitana a tunggal anghel ket nagpaiduma nga espiritu a persona nga adda naganna, saan ket a basta impersonal nga enerhia wenno puersa.

Nakadidillaw a dadduma nga anghel dida impakaammo ti naganda kadagiti tattao. Idi dinamag ni Jacob iti anghel no ania ti naganna, saanna nga imbaga. (Genesis 32:29) Idi nakiddaw nga ipakaammona ti kinasiasinona, ti anghel a nagparang ken Josue kinunana laeng nga isu ti “prinsipe ti buyot ni Jehova.” (Josue 5:14) Idi dinamag dagiti nagannak ken Samson ti nagan ti anghel, kinunana: “Apay-apay saludsodem ti naganko, idinto nga isu ti nakaskasdaaw?” (Oc-ocom 13:17, 18) Saan nga ilista ti Biblia ti nagnagan dagiti anghel tapno maliklikantayo ti panangipaay iti di rumbeng a panangpadayaw ken panagrukbab kadakuada. Kas makitatayto, saannatay met a bilbilinen nga umararaw kadakuada.

Iyaawag iti Dios

Ibaga kadatayo ti Biblia amin a masapul a maammuantayo a mapaspasamak iti naespirituan a lugar. Insurat ni apostol Pablo: “Amin a Kasuratan impaltiing ti Dios ken makagunggona iti panangisuro . . . tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” (2 Timoteo 3:16, 17) No kayat ti Dios a maammuantayo ti nagnagan dagiti adu nga anghel, impalgakna koma dagitoy iti Saona, ti Biblia. Ket no tinarigagayan ti Dios nga isuronatayo a makiuman kadagiti anghel ken makisarita kadakuada babaen ti kararag, intedna koma ti kasta nga impormasion kadagiti Kasuratan.

Imbes ketdi, insuro ni Jesu-Kristo: “Inton agkararagka, sumrekka iti pribado a siledmo ket, kalpasan ti panangirikepmo iti ridawmo, agkararagka ken ni Amam nga adda iti nalimed . . . Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo.’” (Mateo 6:6, 9) Daytoy ti Nainkasuratan a panangmatmat: Saantayo nga awagan dagiti anghel wenno agkararag kadakuada, no di ket sikakararag koma nga umadanitayo iti Namarsua kadagiti anghel, ti Dios a mismo. Saan a misterio ti naganna, ket di kasapulan ti maysa a sumisirmata a mangipalgak iti dayta. Nupay pinadasda nga ilemmeng ti nadibinuan a nagan, agparang dayta iti rekord ti Biblia iti nasurok a 7,000 a daras. Kas ehemplo, maipapan iti nailangitan nga Ama, inkanta ti salmista: “Siksika laeng, nga agnagan Jehova, ti Kangatuan a ringbawam iti amin a daga.”​—Salmo 83:18.

Adda tiempo ni Jehova nga umimdeng kadatayo no la ket ta umadanitayo kenkuana a siuumiso babaen ti kararag. Daytoy ti ipasigurado ti Biblia: “Ta dagiti mata ni Jehova mapanda nga agsublisubli iti amin a lubong, tapno isu agparang a napigsa a bumadang kadagidiay a ti pusoda napalungdo a maiturong kenkuana.”​—2 Cronicas 16:9.

Dagiti Anghel ken ti Moralidad

Maisungani kadagiti masansan a mailadladawan iti warnakan, dagiti anghel dida ukomen dagiti tattao. Maikanatad dayta, ta dagiti anghel saanda a naautorisaran a mangukom iti tattao. Ni Jehova isu ti “Ukom dagiti isuamin,” nupay “impabiangna ti amin a panangukom iti Anak,” ni Jesu-Kristo. (Hebreo 12:23; Juan 5:22) Kaskasdi, nagbidduttayo no ipapantayo a dagiti anghel awan bibiangda iti panagbiagtayo. Kinuna ni Jesus: “Adda panagrag-o kadagiti anghel ti Dios gapu iti maysa a managbasol nga agbabawi.”​—Lucas 15:10.

Ngem, dagiti anghel saanda a basta agpalpaliiw laeng. Idi ugma, nagserbida kas manangpapatay, nga intungpalda dagiti panangukom ti Dios. Kas pagarigan, inusar ti Dios dagiti anghel a maibusor kadagiti Egipcio idi ugma. Sigun iti Salmo 78:49, “impalladawna met kadakuada ti kinarungsot ti pungtotna, rurod, ken gura, ken riribuk, bunggoy ti espiritu a dakes [“dagiti anghel a nangyeg iti didigra,” NW].” Umarngi iti dayta, ibaga ti Biblia nga iti maysa a rabii, pinapatay ti maysa nga anghel ti 185,000 a soldado ti Asiria.​—2 Ar-ari 19:35.

Kasta met, iti masanguanan, dadaelento dagiti anghel dagidiay a mamagpeggad iti pagimbagan dagiti sabali gapu ta dida tumunos kadagiti nalinteg nga estandarte ti Dios. Umayto ni Jesus “a kadua dagiti mannakabalin nga anghelna iti dumardarang nga apuy, bayat nga iyegna ti pammales kadagidiay di makaammo iti Dios ken kadagidiay di agtulnog iti naimbag a damag.”​—2 Tesalonica 1:7, 8.

No kasta, ipakita ti Kasuratan a dagiti matalek nga anghel ti Dios kanayon nga aramidenda ti pagayatanna babaen ti panangitungpalda kadagiti instruksionna ken panangitandudoda kadagiti nalinteg nga estandartena. Nalawag, no kayattayo a tulongannatay dagiti anghel ti Dios, masapul nga ammuentayo ti pagayatan ti Dios ket sirereggettay nga ikagumaan nga aramiden dayta.

Dagiti Anghel a Mangbambantay

Maseknan aya dagiti anghel kadagiti tattao ken salaknibanda ida? Inyimtuod ni apostol Pablo: “Saanda aya nga espiritu amin [dagiti anghel] a maipaay iti publiko a panagserbi, a naibaon tapno agserbida kadagidiay agtawidto iti pannakaisalakan?” (Hebreo 1:14) Nalawag, ti sungbat ti saludsod ni Pablo ket wen.

Gapu ta nagkitakitda a nagruknoy iti balitok a ladawan a binangon ni Ari Nabucodonosor ti Babilonia, dagiti tallo a Hebreo a da Sidrac, Misac, ken Abdenago naipalladawda iti sobra ti pudotna nga urno. Nupay kasta, saan a naan-ano dagidiay a matalek nga adipen ti Dios. Idi timman-aw ti ari idiay urno, nakitana “dagiti uppat a nabaneg-pammagina a lallaki,” ket kinunana a “ti langa ti maikapat kas maysa nga anak a lalaki dagiti didios.” (Daniel 3:25, NW) Sumagmamano a tawen kalpasanna, naipisok ni Daniel iti rukib dagiti leon gapu iti kinamatalekna. Nakalasat met a di nadangran ket kinunana: “Ti Diosko imbaonna ti anghelna ket rinipkanna dagiti ngiwat dagiti leon.”​—Daniel 6:22.

Idi naipasdeken ti kongregasion dagiti pasurot ni Kristo idi umuna a siglo K.P., nagparang manen dagiti anghel, a linuk-atanda dagiti apostol idiay pagbaludan. (Aramid 5:17-24; 12:6-12) Ket idi nagngangabit ti biag ni Pablo idiay baybay, impasigurado ti anghel kenkuana nga isu ket sitatalged a dumanon idiay Roma.​—Aramid 27:13-24.

Dagiti agdama nga adipen ni Jehova a Dios kombinsidoda unay a pudno nga adda dagiti di makita nga anghel a puersa ti Dios ken kabaelanda ti mangsalaknib, kas iti inaramidda idi ken ni Eliseo ken iti katulongna. (2 Ar-ari 6:15-17) Talaga, “ti anghel ni Jehova alikubkobenna dagiti agbuteng kenkuana, ket ispalenna ida.”​—Salmo 34:7; 91:11.

Mensahe nga Awit Dagiti Anghel

Saan laeng a maseknan dagiti anghel iti pagimbagan dagidiay agserserbi ken Jehova a Dios no di pay ket sigsiguraduenda a dagiti tattao maammuanda ti maipapan kenkuana ken iti panggepna. Insurat ni apostol Juan: “Nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribu ken pagsasao ken ili, a kunkunana iti natbag a timek: ‘Agbutengkayo iti Dios ket ipaayyo kenkuana ti dayag.’”​—Apocalipsis 14:6, 7.

Kayatyo kadi a maammuan ti linaon daytoy “agnanayon a naimbag a damag”? No wen, agdamagkayo kadagiti Saksi ni Jehova. Maragsakandanto a mangiranud iti dayta kadakayo.

[Dagiti Ladawan iti panid 7]

Adda anghel iti nagtangatangan a mangipakpakaammo iti agnanayon a naimbag a damag. Kayatyo kadi nga ammuen dayta?