“Ti Templo” ken “ti Pangulo” iti Kaaldawantayo

“No sumrekda, ti prinsipe sumrekto iti tengngada; ket no rummuarda, agkukuyogdanto.”​—EZEQUIEL 46:10.

1, 2. Ania a nagpateg a kinapudno ti tumulong kadatayo a mangibuksil iti adu a paset ti kayulogan ti sirmata ni Ezequiel maipapan iti templo?

ADDA idi dagiti nagkauna a rabbi a saan nga interamente a napnek iti libro nga Ezequiel. Sigun iti Talmud, kinayat pay ketdi ti dadduma kadakuada a di iraman dayta a libro iti Nasantuan a Kasuratan. Narigatanda a mangilawlawag iti sirmata maipapan iti templo ket kinunada a di kabaelan nga ibuksilan ti tao dayta. Dagiti dadduma nga eskolar ti Biblia maburburtiaanda iti sirmata ni Ezequiel maipapan iti templo ni Jehova. Datayo ngay?

² Nanipud idi naisubli ti nasin-aw a panagdayaw, pinaraburan ni Jehova ti ilina iti adu a rimat ti naespirituan a pannakaawat, a pakairamanan ti pannakatarusda no ania ti naespirituan a templo ti Dios​—ti arig templo nga urnos ni Jehova iti nasin-aw a panagdayaw.a Tulongannatayo daytoy nagpateg a kinapudno a mangibuksil iti adu a paset ti kayulogan ti sirmata ni Ezequiel maipapan iti templo. Usigentayo a naimbag dagiti uppat a paset daytoy a sirmata​—ti templo, dagiti papadi, ti pangulo, ken ti daga. Ania ti kaipapanan dagitoy iti kaaldawantayo?

Ti Templo ken Dakayo

3. Ania ti maadaltayo iti nangato a pangatepan ken kadagiti naikitikit iti diding dagiti pasilio ti templo?

³ Ipapantayo a paspasiarentayo daytoy nasirmata a templo. Sungadan satay ulien ti pito a tukad ti agdan ti maysa kadagiti dadakkel a ruangan. Iti las-ud daytoy a pagserkan, tumangadtayo a buyogen ti panagsiddaaw. Nasurok a 30 a metro ti kangato ti pangatepanna! Maipalagip ngarud kadatayo a nangato dagiti pagannurotan iti iseserrek iti urnos ni Jehova iti panagdayaw. Dagiti silnag ti lawag nga aggapu kadagiti tawa raniaganda ti diding a nakitikitan kadagiti kayo a palma, a naaramat iti Kasuratan a mangiladawan iti kinalinteg. (Salmo 92:12; Ezequiel 40:14, 16, 22) Agpaay daytoy sagrado a lugar kadagidiay nalinteg iti moral ken naespirituan. Maitunos iti dayta, kayattayo ti agtalinaed a nalinteg tapno anamongan ni Jehova ti panagdayawtayo.​—Salmo 11:7.

4. Siasino dagiti saan a mapalubosan a sumrek iti templo, ket ania ti maadaltayo iti daytoy?

⁴ Iti agsumbangir a sikigan ti pasilio, adda tallo a siled a pagguardiaan. Palubosandatay kadi dagiti guardia a sumrek iti templo? Imbaga ni Jehova ken Ezequiel a saan a mapalubosan a sumrek ti ganggannaet a “saan a nakugit iti puso.” (Ezequiel 40:10; 44:9) Ania ti kayat a sawen dayta? Dagidiay laeng mangipateg kadagiti lintegna ken agbiag a mayannurot kadagitoy ti awaten ti Dios nga agdayaw kenkuana. (Jeremias 4:4; Roma 2:29) Dagiti kasta a tattao ti pastrekenna iti naespirituan a toldana, ti balay a pagdayawan kenkuana. (Salmo 15:1-5) Nanipud naisubli ti nasin-aw a panagdayaw idi 1919, progresibo nga intandudo ken imbatad ti naindagaan nga organisasion ni Jehova dagiti moral a lintegna. Dagidiay sipapakinakem nga agsukir saandan a maawat a makitimpuyog iti ilina. Iti kaaldawantayo, ti naibatay-Biblia a panangilaksid kadagiti nakabasol a di agbabawi pagtalinaedenna a nadalus ken nasin-aw ti panagdayawtayo.​—1 Corinto 5:13.

5. (a) Ania ti pagpadaan ti sirmata ni Ezequiel ken ti sirmata ni Juan a nailanad iti Apocalipsis 7:9-15? (b) Iti sirmata ni Ezequiel, siasino ti iladladawan dagiti 12 a tribu nga agdaydayaw iti makinruar a paraangan?

⁵ Agturong ti pasilio iti makinruar a paraangan, a sadiay idaydayaw ken itan-ok dagiti umili ni Jehova. Ipalagip daytoy kadatayo ti sirmata ni apostol Juan maipapan iti “dakkel a bunggoy” nga agdaydayaw ken Jehova iti “aldaw ken rabii idiay templona.” Agpada nga adda dagiti kayo a palma kadagita a sirmata. Iti sirmata ni Ezequiel, nayarkosda kadagiti diding iti pagserkan. Iti sirmata ni Juan, adda sangsanga ti palma nga ig-iggaman dagiti agdaydayaw, a mangisimbolo iti rag-oda a mangidaydayaw ken Jehova ken ti panangawatda ken Jesus kas Arida. (Apocalipsis 7:9-15) Iti konteksto ti sirmata ni Ezequiel, dagiti 12 a tribu ti Israel iladladawanda ti “sabsabali a karnero.” (Juan 10:16; idiligyo ti Lucas 22:28-30.) Maysakay met kadi kadagidiay siraragsak a mangidaydayaw ken Jehova babaen ti panangiwaragawagyo iti Pagarianna?

6. Ania ti panggep dagiti komedor iti makinruar a paraangan, ket ania a pribilehio ti ipalagip daytoy kadagidiay kameng ti sabsabali a karnero?

⁶ Bayat a pasiarentayo ti makinruar a paraangan, makitatayo dagiti 30 a komedor a panganan dagiti umili kadagiti daton a sibubulos nga impaayda. (Ezequiel 40:17) Iti kaaldawantayo, dagiti kameng ti sabsabali a karnero saanda nga agidaton kadagiti animal, ngem saanda nga umay nga ima-ima iti naespirituan a templo. (Idiligyo ti Exodo 23:15.) Insurat ni apostol Pablo: “Baeten [ken Jesus] kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna. Mainayon pay, dikay lipatan ti panagaramid iti naimbag ken ti panangiranud kadagiti bambanag kadagiti dadduma, ta babaen kadagiti kakastoy a sakripisio maay-ayo unay ti Dios.” (Hebreo 13:15, 16; Oseas 14:2) Dakkel a pribilehio ti panangidaton ken Jehova iti kakasta a sakripisio.​—Proverbio 3:9, 27.

7. Ania ti ipanamnama kadatayo ti pannakarukod ti templo?

⁷ Nagbuya ni Ezequiel bayat a rinukod ti anghel daytoy nasirmata a templo. (Ezequiel 40:3) Umarngi iti dayta, naibaga ken apostol Juan: “Tumakderka ket rukodem ti templo a santuario ti Dios ken ti altar ken dagidiay agdaydayaw sadiay.” (Apocalipsis 11:1) Ania ti kaipapanan daytoy a panangrukod? Kadagitoy dua a kaso, nabatad nga agserbi daytoy a pammatalged, pagilasinan nga awan makaatipa ken Jehova a mangtungpal kadagiti panggepna mainaig iti nasin-aw a panagdayaw. Kasta met ita, naipanamnama kadatayo nga awan​—uray ti narungsot nga ibubusor dagiti nabileg a gobierno​—ti makaatipa iti pannakaisubli ti nasin-aw a panagdayaw.

8. Siasino dagiti sumrek kadagiti ruangan nga agturong iti makin-uneg a paraangan, ket ania ti ipalagip kadatayo dagitoy a ruangan?

⁸ Bayat a lasatentayo ti makinruar a paraangan, makitatayo nga adda tallo a ruangan nga agturong iti makin-uneg a paraangan; dagiti makin-uneg a ruangan naibatog ken agkakadakkelda kadagiti makinruar a ruangan. (Ezequiel 40:6, 20, 23, 24, 27) Dagiti laeng papadi ti mabalin a sumrek iti makin-uneg a paraangan. Ipalagip kadatayo dagiti makin-uneg a ruangan a masapul a tungpalen dagiti napulotan dagiti pagalagadan ken linteg ti Dios, ngem dagita met la a pagalagadan ken linteg ti mangiwanwan kadagiti amin a pudno a Kristiano. Ngem ania ti trabaho dagiti papadi, ken ania ti kaipapananna ita?

Matalek a Papadi

9, 10. Kasano a mangipapaay ti “naarian a kinapadi” iti naespirituan a pannursuro, kas iladladawan ti klase papadi iti sirmata ni Ezequiel?

⁹ Sakbay ti panawen dagiti Kristiano, nadagsen ti trabaho dagiti papadi idiay templo. Makabannog a trabaho ti panangparti kadagiti animal a maisakripisio, panangidaton kadagita iti altar, ken panagserbi kadagiti padada a papadi ken kadagiti umili. Ngem adda pay napateg a trabahoda. Maipapan kadagiti papadi, imbilin ni Jehova: “Isurodanto ti ilik iti paggidiatan ti nasantuan ken ti sapasap [“natulawan,” NW], ket pailasindanto kadakuada ti narugit ken ti nadalus.”​—Ezequiel 44:23; Malakias 2:7.

¹⁰ Ap-apresiarenyo met la kadi ti panagbannog ken ti nanumo a panagserbi dagiti napulotan, a mangbukel iti “naarian a kinapadi,” a maipaay iti nasin-aw a panagdayaw? (1 Pedro 2:9) Kas kadagiti papadi a Levita idi ugma, isuda ti mangidadaulo a mangipaay iti naespirituan a pannursuro, a tultulonganda dagiti tattao a mangtarus no ania ti nadalus ken makaay-ayo iti imatang ti Dios ken no ania ti saan. (Mateo 24:45) Gapu iti kasta a pannursuro, a maipapaay babaen kadagiti publikasion a naibasar iti Biblia ken babaen kadagiti Nakristianuan a gimong ken kombension, minilionen a tattao ti natulongan a makikappia iti Dios.​—2 Corinto 5:20.

11. (a) Kasano nga ipaganetget ti sirmata ni Ezequiel ti pateg ti kinadalus iti biang dagiti papadi? (b) Kadagiti maudi nga al-aldaw, kasano a nadalusan dagiti napulotan iti naespirituan a wagas?

¹¹ Nupay kasta, dagiti papadi saanda laeng a basta isuro dagiti sabsabali nga agbalin a nadalus; masapul a nadalusda a mismo. Gapuna, nakita a nasaksakbay ni Ezequiel ti pannakagugor dagiti papadi ti Israel. (Ezequiel 44:10-16) Umasping iti dayta, ipakita ti historia nga idi 1918, nagtugaw ni Jehova ‘kas mananggugor’ iti naespirituan a templona, a sinukimatna ti klase napulotan a papadi. (Malakias 3:1-5) Dagidiay naibilang a nadalus iti naespirituan wenno nagbabawyanda ti pannakainaigda iti idolatria napalubosanda nga agtultuloy iti pribilehioda nga agserbi iti naespirituan a templona. Ngem, kas met la iti uray asinoman, posible nga agbalin a narugit​—iti naespirituan wenno moral​—ti asinoman kadagiti napulotan. (Ezequiel 44:22, 25-27) Rumbeng nga ikagumaanda ti agtalinaed “nga awanan mulit manipud iti lubong.”​—Santiago 1:27; idiligyo ti Marcos 7:20-23.

12. Apay a rebbeng nga apresiarentayo ti trabaho dagiti napulotan?

¹² Mabalin nga iyimtuod ti tunggal maysa kadatayo, ‘Ap-apresiarek met la kadi ti ulidan dagiti napulotan iti matalek a panagserbida iti adun a tawen? Tultuladek kadi ti pammatida?’ Nasayaat a laglagipen dagiti kameng ti dakkel a bunggoy a saan a kankanayon a kaduadanto ditoy daga dagiti napulotan. Maipapan kadagiti papadi iti sirmata ni Ezequiel, kinuna ni Jehova: “Awanto ti itedyo kadakuada [a daga] idiay Israel; Siak ti kukuada.” (Ezequiel 44:28) Umasping iti dayta, dagiti napulotan awan agnanayon a lugarda ditoy daga. Nailangitan ti tawidda, ket dagiti kameng ti dakkel a bunggoy ibilangda a pribilehio ti panangsuporta ken panangparegta kadakuada bayat nga addada pay ditoy daga.​—Mateo 25:34-40; 1 Pedro 1:3, 4.

Ti Pangulo​—Asino?

13, 14. (a) Apay a ti pangulo ket kameng la ketdi ti sabsabali a karnero? (b) Siasino ti iladladawan ti pangulo?

¹³ Ita tumaud ti makapainteres a saludsod. Asino, no kasta, ti irepresentar ti pangulo? Tangay agpadpada a nadakamat kas indibidual ken kas grupo, mabalintay nga ipapan nga irepresentarna ti maysa a grupo dagiti lallaki. (Ezequiel 44:3; 45:8, 9) Ngem asinoda? Sigurado a saan a dagiti napulotan. Iti sirmata, nasinged a makipagtartrabaho daytoy kadagiti papadi, ngem saan a maysa kadakuada. Saan a kas kadagiti papadi, adda daga a tawidna; no kasta ngarud, ditoy daga ti masakbayanna, saan nga idiay langit. (Ezequiel 48:21) Mainayon pay, kuna ti Ezequiel 46:10: “No [dagiti tribu a saan a papadi] sumrekda [iti makinruar a paraangan ti templo], ti prinsipe [“pangulo,” NW] sumrekto iti tengngada; ket no rummuarda, agkukuyogdanto.” Saan daytoy a sumrek iti makin-uneg a paraangan no di ket agdayaw iti makinruar a paraangan, a sumrek ken rummuar iti templo a kadua dagiti umili. Nabatad nga ipakita dagitoy a ti pangulo ket kameng ti dakkel a bunggoy dagiti sabsabali a karnero.

¹⁴ Nalawag nga adda rebbengen ti pangulo iti ili ti Dios. Iti makinruar a paraangan, agtugaw idiay balkon ti Makindaya a Ruangan. (Ezequiel 44:2, 3) Ipasimudaag daytoy ti saad a panangaywan, nga umarngi iti akem dagiti lallakay iti Israel, nga agtugaw idi iti ruangan ti siudad ken mangukom. (Ruth 4:1-12; Proverbio 22:22) Siasino kadagiti kameng ti sabsabali a karnero ti agak-akem ita kas manangaywan? Dagiti panglakayen nga addaan naindagaan a namnama a dinutokan ti nasantuan nga espiritu. (Aramid 20:28) No kasta, madama a masansanay ti klase pangulo a manamnama nga agakemto iti administratibo a saad iti baro a lubong.

15. (a) Kasano a lawlawagen ti sirmata ni Ezequiel ti relasion dagiti panglakayen a kameng ti dakkel a bunggoy ken dagiti napulotan a klase papadi? (b) Ania ti idadaulo dagiti napulotan a panglakayen iti organisasion ti Dios ditoy daga?

¹⁵ Nupay kasta, ania ti relasion ita dagiti napulotan a klase papadi ken dagita a panglakayen a, kas paset ti dakkel a bunggoy, agserserbi kas manangaywan? Ipasimudaag ti sirmata ni Ezequiel a dagiti napulotan ti mangidadaulo iti naespirituan ket adda iti babaenda a mangsupsuportar kadakuada dagiti panglakayen a kameng ti dakkel a bunggoy. Kasano a kasta? Laglagipenyo a dagiti papadi iti sirmata naikkanda iti rebbengen a mangisuro kadagiti umili maipapan iti naespirituan a bambanag. Nabilinda met nga agakem a kas uk-ukom no adda dagiti darum. Maysa pay, natudingan dagiti Levita nga “agbantay” kadagiti ruangan ti templo. (Ezequiel 44:11, 23, 24) Nalawag a ti pangulo sipapakumbaba nga agpasakup iti naespirituan a serbisio ken panangidaulo dagiti papadi. Maikanatad, ngarud, nga iti moderno a panawen, dagiti napulotan ti mangidadaulo iti nasin-aw a panagdayaw. Kas pagarigan, dagiti kameng ti Bagi a Manarawidwid dagiti Saksi ni Jehova napilida manipud kadagiti napulotan. Sansanayen dagita a matalek a napulotan a panglakayen daytoy tumantanor a klase pangulo iti adun a dekada, nga isagsaganada dagiti agbalinto a kameng daytoy a klase para iti aldaw a pannakaipabaklay kadakuada ti naan-anay nga autoridadda iti um-umay a baro a lubong ti Dios.

16. Sigun iti Isaias 32:1, 2, kasano ti rebbeng a panagtignay dagiti amin a panglakayen?

¹⁶ Ania a kita ti manangaywan dagitoy manamnama a kameng ti klase pangulo a maikkanto iti ad-adu a rebbengen? Kastoy ti kuna ti padto a masarakan iti Isaias 32:1, 2: “Adtoy, maysa nga ari agarinto iti kinalinteg, ken dagiti panguluen [“prinsipe,” NW] agturaydanto iti kinahustisia. Ket isunto ti maysa a tao a kas maysa a paglemmengan no agangin, ken maysa a paglinongan no agbagyo, kas ay-ayus dagiti danum iti disso a namaga, kasla linong ti maysa a dakkel a bato iti daga a napaksuyan.” Matungtungpalen daytoy a padto bayat nga ikagkagumaan dagiti Kristiano a panglakayen​—napulotan ken sabsabali a karnero​—a salakniban ti arban manipud ‘kadagiti bagyo’ a kas iti pannakaidadanes ken pannakaupay.

17. Kasano koma a matmatan dagiti Kristiano a papastor ti bagbagida, ken kasano koma ti panangmatmat kadakuada ti arban?

¹⁷ Saan a nausar kas titulo a mangitan-ok kadagiti tattao ti sasao a “prinsipe” ken “pangulo,” nga agpada ti kayuloganda iti Hebreo. Imbes ketdi, deskribirenda ti rebbengen dagitoy a lallaki a mangaywan kadagiti karnero ti Dios. Siiinget a namakdaar ni Jehova: “Umdas koma kadakayo, O piprinsipe [“papangulo,” NW] ti Israel: ikkatenyo ti panagranggas ken panagsamsam, ket agaramidkayo iti kinahustisia ken kinalinteg.” (Ezequiel 45:9) Nasayaat no ipapuso dagiti amin a panglakayen ita dayta a balakad. (1 Pedro 5:2, 3) Iti sabali a bangir, bigbigen ti arban nga impaay ni Jesus dagiti papastor kas “sagut a tattao.” (Efeso 4:8) Nailanad dagiti kualipikasionda iti naipaltiing a Sao ti Dios. (1 Timoteo 3:1-7; Tito 1:5-9) No kasta, suroten dagiti Kristiano ti panangidaulo dagiti panglakayen.​—Hebreo 13:7.

18. Ania ti dadduma a rebbengen ita ti agbalinto a klase pangulo, ket anianto ti rebbengenda iti masanguanan?

¹⁸ Idi panawen ti Biblia, adda dagiti pangulo a dakkel ti autoridadda; basbassit dagiti dadduma. Iti kaaldawantayo, adu ken nagduduma ti rebbengen dagiti panglakayen iti dakkel a bunggoy. Adda dagiti agserserbi iti maysa a kongregasion; dagiti dadduma agserserbi iti adu a kongregasion kas agdaldaliasat a manangaywan; adda met dagidiay agserserbi iti maysa a pagilian kas miembro ti Branch Committee; dagiti dadduma direkta a tumultulongda kadagiti nagduduma a komite ti Bagi a Manarawidwid. Iti baro a lubong, dutokanto ni Jesus ‘dagiti prinsipe iti amin a daga’ a mangidaulo kadagiti agdaydayaw ken Jehova ditoy daga. (Salmo 45:16) Awan duadua nga adu kadagitoy ti piliennanto manipud kadagiti matalek a panglakayen ita. Gapu ta pampaneknekan ita dagitoy a lallaki ti kinamatalekda, adu kadakuada ti piliennanto a pangitalkan iti ad-adu pay a pribilehio iti masanguanan inton ipalgakna ti akem ti klase pangulo iti baro a lubong.

Ti Daga ti Ili ti Dios Ita

19. Ania ti irepresentar ti daga iti sirmata ni Ezequiel?

¹⁹ Ti sirmata ni Ezequiel iladladawanna met ti napabaro a daga ti Israel. Ania ti irepresentar daytoy a paset ti sirmata? Dagiti dadduma a padto maipapan iti panangabaruanan impakaunada a ti daga, ti Israel, agbalinto a paraiso a kas ti Eden. (Ezequiel 36:34, 35) Tagtagiragsakentayo ita ti napabaro a “daga,” ket no an-anagen, kasla Eden met daytoy. Umasping iti dayta, masansan a madakamattayo ti naespirituan a paraisotayo. Inlawlawag ti Pagwanawanan a ti ‘dagatayo’ isu “ti sakup ti aktibidad” ti ili a pinili ti Dios.b Sadinoman ti yan ti adipen ni Jehova, isu ket adda iti dayta napabaro a daga no la ket ikagkagumaanna nga itandudo ti pudno a panagdayaw babaen ti panangsurotna kadagiti addang ni Kristo Jesus.​—1 Pedro 2:21.

20. Ania a prinsipio ti maadaltayo iti “nasantuan a bingay” iti sirmata ni Ezequiel, ken kasanotay a mayaplikar daytoy a prinsipio?

²⁰ Daydiay ngay paset ti daga a naawagan “nasantuan a bingay”? Isu daytoy idi ti tulong dagiti umili nga agpaay kadagiti papadi ken ti siudad. Nasken met idi nga ‘amin nga umili ti daga’ mangibingayda iti paset ti daga nga agpaay iti pangulo. Ania ti kaipapanan daytoy iti kaaldawantayo? Siempre, saan a tapno mapadagsenan ti ili ti Dios iti masusuelduan a klase klero. (2 Tesalonica 3:8) Imbes ketdi, naespirituan a suporta ti kangrunaan a maipaay kadagiti panglakayen. Ramanenna ti itutulong iti agdama a trabaho ken kasta met ti pannakikooperar ken panagpasakup. Ngem, kas idi kaaldawan ni Ezequiel, agpaay daytoy a bingay “ken Jehova,” saan nga iti asinoman a tao.​—Ezequiel 45:1, 7, 16.

21. Ania ti maadaltayo iti pannakabingbingay ti daga iti sirmata ni Ezequiel?

²¹ Saan laeng a ti pangulo ken dagiti papadi ti addaan naituding a lugar iti daytoy napabaro a daga. Ti pannakabingbingay ti daga ipamatmatna a tunggal maysa kadagiti 12 a tribu adda natalged a tawidna. (Ezequiel 47:13, 22,23) Gapuna, saan laeng nga iti naespirituan a paraiso ita nga addaan dagiti kameng ti dakkel a bunggoy iti lugar no di ket umawatdanto met iti naituding a dagada inton agtawidda iti disso iti naindagaan a pagturayan ti Pagarian ti Dios.

22. (a) Ania ti iladladawan ti siudad iti sirmata ni Ezequiel? (b) Ania ti maadaltayo iti kaadda dagiti ruangan ti siudad iti amin a sikigan?

²² Kamaudiananna, ania ti iladladawan ti siudad iti sirmata? Saan a nailangitan a siudad daytoy, ta adda daytoy iti tengnga ti “natulawan” (di sagrado) a daga. (Ezequiel 48:15-17) No kasta, naindagaan la ketdi daytoy. Bueno, ania aya ti siudad? Saan aya nga ipasimudaagna dagiti tattao a nagtitipon kas grupo ken mangbukel iti banag a nasangal ken naorganisar? Wen. Gapuna, ti siudad agparang nga iladladawanna ti naindagaan nga administrasion a pakagunggonaan dagiti amin a tattao a mangbukel iti nalinteg a kagimongan ditoy daga. Agandarto a naan-anay dayta iti um-umay a “baro a daga.” (2 Pedro 3:13) Dagiti ruangan ti siudad iti amin a sikigan, maysa iti tunggal tribu, iladladawanna ti kinapanayag. Iti kaaldawantayo, awan dagiti tattao ti Dios iti babaen ti nalimed, nalmeng nga administrasion. Nalaka a maasitgan dagiti responsable a kakabsat a lallaki; pagaammo ti amin dagiti prinsipio a mangidaldalan kadakuada. Ti banag a dagiti tattao iti amin a tribu talonenda ti daga a mangsupsuporta iti siudad ipalagipna kadatayo a supsuportaran ti sabsabali a karnero, uray iti material a wagas, dagiti administratibo nga urnos nga agpaay iti ili ti Dios iti intero a lubong.​—Ezequiel 48:19, 30-34.

23. Ania ti usigentayo iti sumaganad nga artikulo?

²³ Ngem, daydiay ngay karayan nga agay-ayus manipud iti santuario ti templo? Ti maikatlo ken maudi nga artikulo iti daytoy a serye ilawlawagna no ania ti iladladawan dayta ita ken iti masanguanan.

[Footnotes]

Dagiti Punto a Marepaso

◻ Ania ti iladladawan ti templo iti sirmata ni Ezequiel?

◻ Siasino ti iladladawan dagiti papadi nga agserserbi iti templo?

◻ Ania ti klase pangulo, ket ania ti dadduma kadagiti rebbengenna?

◻ Ania ti daga iti sirmata ni Ezequiel, ket iti ania nga anag a nabingbingay dayta kadagiti 12 a tribu?

◻ Ania ti iladladawan ti siudad?

[Diagram/Mapa iti panid 15]

(Para iti aktual a pannakaurnosna, kitaem ti publikasion)

Ti pannakabingbingay ti daga kas nailadawan iti sirmata ni Ezequiel

TI SANGAPULO KET DUA A TRIBU

Ti Dakkel a Baybay

Baybay ti Galilea

Karayan Jordan

Asin a Baybay

DAN

ASER

NEPHTALI

MANASES

EPHRAIM

RUBEN

JUDA

TI PANGULO

BENJAMIN

SIMEON

ISACAR

ZABULON

GAD

[Diagram]

PANNAKAPADAKKEL TI NASANTUAN A BINGAY

A. “Ni Jehova Adda Dita” (Jehova Samma); B. ti nabunga a daga ti siudad

Ti Bingay Dagiti Levita

Santuario ni Jehova

Ti Bingay Dagiti Papadi

B A B