Ti Pamendision ni Jehova iti “Dagatayo”

“Amin a banag agbiagdanto, iti sadinoman a danonan ti karayan.”​—EZEQUIEL 47:9.

1, 2. (a) Kasano kapateg ti danum? (b) Ania ti iladladawan ti danum iti karayan a nasirmata ni Ezequiel?

NAPATEG a pluido ti danum. Agpannuray iti dayta ti amin a banag nga adda biagna. Awan uray maysa kadatayo ti agbayag no awan dayta. Us-usarentay met dayta a pagdalus, tangay kabaelan ti danum a runawen ken iyanud amin a rugit. Dayta ti pagdigus, paglaba, ken pagugastay pay ketdi iti taraon tapno agpaut ti biagtayo.

² Iti Biblia, naaramat ti danum a mangiladawan kadagiti naespirituan a probision ni Jehova a maipaay iti biag. (Jeremias 2:13; Juan 4:7-15) Nairaman kadagitoy a probision ti pannakadalus ti ilina babaen ti daton a panubbot ni Kristo ken ti pannakaammo iti Dios a masarakan iti Saona. (Efeso 5:25-27) Iti sirmata ni Ezequiel maipapan iti templo, ti datdatlag a karayan nga agay-ayus manipud iti templo isimbolona dagiti kasta a mangted-biag a bendision. Ngem kaano nga agayus dayta a karayan, ket ania ti kaipapanan dayta kadatayo ita?

Agayus ti Karayan iti Napabaro a Daga

3. Ania ti napasaran ni Ezequiel, kas nailanad iti Ezequiel 47:2-12?

³ Kas kautibo idiay Babilonia, kasapulan unay idi dagiti kailian ni Ezequiel dagiti probision ni Jehova. No kasta, anian a makaparegta ken Ezequiel ti pannakakitana iti panagaruyot ti danum manipud iti santuario sa agayus iti nasirmata a templo! Rinukod ti anghel ti karayan iti kada sag-1,000 a siko. Umadalem nga umadalem, manipud pagatlipaylipay agingga a pagattumeng, santo pagatsiket agingga a ti naapres a karayan masapulen a langoyen. Mangbiag ken mangpadam-eg dayta a karayan. (Ezequiel 47:2-11) Naibaga ken Ezequiel: “Iti denna ti karayan iti igidna, iti daytoy a sikigan, ken iti dayta a sikigan, tumubonto tunggal kayo a maipaay a taraon.” (Ezequiel 47:12a) No makamang ti karayan ti Natay a Baybay​—danum nga awan biagna​—rumsua ti biag! Umariwekwek dagiti ikan. Napigsa ti industria ti panagkalap.

4, 5. Kasano nga umarngi iti padto ni Ezequiel ti padto ni Joel maipapan iti maysa a karayan, ken apay a napateg daytoy?

⁴ Daytoy naimnas a padto nalabit impalagipna kadagiti Judio a naidestiero ti maysa pay a padto a naisurat iti nasurok a dua a siglo kasakbayanna: “Rummuarto ti maysa a burayok iti balay ni Jehova, ken sibugannanto ti lubong ti Sittim.”a (Joel 3:18) Kas iti padto ni Ezequiel, impakauna ti padto ni Joel nga agayusto ti maysa a karayan manipud iti balay ti Dios, ti templo, ket biagenna ti naganggangan a disso.

⁵ Nabayagen nga inlawlawag ti Pagwanawanan a matungtungpalen ti padto ni Joel iti kaaldawantayo.b Sigurado, ngarud, a matungtungpal metten ti umarngi a sirmata ni Ezequiel. Iti napabaro a daga ti ili ti Dios ita, kas iti nagkauna nga Israel, pudno nga agay-ayusen dagiti bendision nga aggapu ken Jehova.

Panagayus ti Nawadwad a Bendision

6. Ti pannakaiwarsi ti dara iti rabaw ti nasirmata nga altar nagserbi a mangipalagip koma iti ania kadagiti Judio?

⁶ Ania ti gubuayan dagiti bendision iti nangabaruanan nga ili ti Dios? Bueno, imutektekanyo nga agay-ayus ti danum manipud iti templo ti Dios. Kasta met ita, aggapu ken Jehova dagiti bendision babaen ti naindaklan a naespirituan a templona​—ti urnos para iti nasin-aw a panagdayaw. Adda napateg a detalye nga innayon ti sirmata ni Ezequiel. Iti makin-uneg a paraangan, labsan ti agus ti altar, iti laeng abagatanenna. (Ezequiel 47:1) Adda ti altar iti mismo a sentro ti nasirmata a templo. Ni Jehova dineskribirna a naimbag dayta ken ni Ezequiel ken imbilinna ti pannakaiwarsi ti dara ti daton iti rabaw dayta nga altar. (Ezequiel 43:13-18, 20) Dakkel ti kaipapanan dayta nga altar kadagiti amin nga Israelita. Nabayag idin a napatalgedan ti tulagda ken Jehova idi a winarsian ni Moises iti dara ti rabaw ti altar iti arisadsad ti Bantay Sinai. (Exodo 24:4-8) Ti pannakaiwarsi ti dara iti rabaw ti nasirmata nga altar ket mangipalagip koma kadakuada nga apaman a makapagsublida iti napabaro a dagada, agayus ti pamendision ni Jehova no la ket ta tungpalenda ti tulagda kenkuana.​—Deuteronomio 28:1-14.

7. Ania ti kaipapananna kadagiti Kristiano ita ti simboliko nga altar?

⁷ Umasping iti dayta, mabembendisionan ti ili ti Dios ita babaen ti maysa a tulag​—a nasaysayaat, ti baro a tulag. (Jeremias 31:31-34) Nabayag metten a napatalgedan dayta a tulag babaen ti dara, ti dara ni Jesu-Kristo. (Hebreo 9:15-20) Iti kaaldawantayo, adda dakkel a kaipapanan kadatayo ti simboliko nga altar, maibilangtay man kadagiti napulotan, nga adda iti babaen dayta a tulag, wenno iti “sabsabali a karnero,” a magunggonaan iti dayta. Ti altar isimbolona ti pagayatan ti Dios a nainaig iti daton ni Kristo. (Juan 10:16; Hebreo 10:10) No kasano nga adda ti simboliko nga altar iti mismo a sentro ti naespirituan a templo, ti daton a panubbot ni Kristo ket isu ti kangrunaan iti nasin-aw a panagdayaw. Dayta ti pakaibatayan ti pannakapakawan dagiti basoltayo ken kasta met ti amin a namnamatayo iti masanguanan. (1 Juan 2:2) Gapuna, ikagumaantay koma ti agbiag a mayannurot iti linteg a nainaig iti baro a tulag, “ti linteg ni Kristo.” (Galacia 6:2) No aramidentay dayta, magunggonaantayo kadagiti probision ni Jehova a maipaay iti biag.

8. (a) Ania ti awan iti makin-uneg a paraangan ti nasirmata a templo? (b) Iti nasirmata a templo, ania ti mabalin a pagbuggo dagiti papadi?

⁸ Ti maysa kadagita a probision isu ti nadalus a takder iti saklang ni Jehova. Iti nasirmata a templo, adda banag nga awan iti makin-uneg a paraangan a naparang idi iti paraangan ti tabernakulo ken iti templo ni Solomon​—ti dakkel a palanggana, nga idi agangay naawagan baybay, a pagbugguan dagiti papadi. (Exodo 30:18-21; 2 Cronicas 4:2-6) Ania ti usaren a pagbuggo dagiti papadi nga agannong iti templo a nasirmata ni Ezequiel? Ania pay no di ti datdatlag a karayan nga agay-ayus iti makin-uneg a paraangan! Wen, bendisionan ida ni Jehova iti wagas a matagiragsakda ti nadalus, wenno nasantuan, a takder.

9. Kasano a maaddaan ita iti nadalus a takder dagiti napulotan ken ti dakkel a bunggoy?

⁹ Kasta met ita, naparaburan dagiti napulotan iti nadalus a takder iti saklang ni Jehova. Ibilang ida ni Jehova a nasantuan, nga ideklarana ida a nalinteg. (Roma 5:1, 2) Ti ngay “dakkel a bunggoy,” nga iladladawan dagiti tribu a saan a papadi? Agdaydayawda iti makinruar a paraangan, ket lumasat ti isu met laeng nga agus iti dayta a paset ti nasirmata a templo. Anian a maikanatad ngarud a nakita ni apostol Juan ti dakkel a bunggoy a sikakawes iti nadalus a puraw a pagan-anay bayat nga agdaydayawda iti paraangan ti naespirituan a templo! (Apocalipsis 7:9-14) Uray no kasano ti pannakatratoda iti daytoy narugit a lubong, masiguradoda a no la ket ta ipakitada ti pammatida iti daton a panubbot ni Kristo, nadalus ken natarnawda iti imatang ni Jehova. Kasano ti panangipakitada iti pammati? Babaen ti panangsurotda kadagiti addang ni Jesus, a naan-anay nga agtalekda iti daton a panubbot.​—1 Pedro 2:21.

10, 11. Ania ti maysa a napateg a paset ti simboliko a danum, ken kasano a nainaig daytoy iti nakaskasdaaw a panagsaknap ti karayan?

¹⁰ Kas nadakamaten, adda maysa pay a napateg a paset daytoy simboliko a danum​—ti pannakaammo. Iti napabaro nga Israel, pinaraburan ni Jehova ti ilina iti Nainkasuratan a pannursuro babaen kadagiti papadi. (Ezequiel 44:23) Umasping iti dayta, pinaraburan ni Jehova ti ilina ita iti nawadwad a pannursuro maipapan iti Sao ti kinapudno nga aggapu kenkuana, babaen ti “naarian a kinapadi.” (1 Pedro 2:9) Kadagitoy maudi nga al-aldaw, umap-apres ti panagayus ti pannakaammo maipapan ken Jehova a Dios, maipapan kadagiti panggepna para iti sangatauan, ken nangruna maipapan ken Jesu-Kristo ken ti Mesianiko a Pagarian. Anian a nagsayaat ti umad-adalem a layus ti naespirituan a pannakapabang-ar nga aw-awatentayo!​—Daniel 12:4.

¹¹ No kasano nga umadalem nga umadalem ti karayan a rinukod ti anghel, nakaskasdaaw met ti irarang-ay ti panagayus dagiti mangted-biag a bendision nga aggapu ken Jehova tapno maipaayan dagiti nakaad-adu a tattao a sumsumrek iti naparaburan a naespirituan a dagatayo. Impakauna ti maysa pay a padto maipapan iti panangabaruanan: “Ti bassit agbalinto a sangaribu, ket ti kabassitan maysa a napigsa a nasion. Siak, ni Jehova, aramidekto a nadaras iti panawenna.” (Isaias 60:22) Matungtungpalen dagitoy a sasao​—minilionen dagiti nagaaripuno a timmipon kadatayo iti nasin-aw a panagdayaw! Nangiburay ni Jehova iti aglaplapusanan a “danum” kadagiti amin nga agkamang kenkuana. (Apocalipsis 22:17) Siguraduenna nga iwaras ti naindagaan nga organisasionna dagiti Biblia ken literatura ti Biblia iti intero a lubong, iti ginasut a pagsasao. Kasta met, maang-angay dagiti Nakristianuan a gimong ken kombension iti intero a lubong tapno maabastuan ti isuamin kadagiti kasla kristal ti kalitnawna a dandanum ti kinapudno. Kasano a dagiti kasta a probision apektaranda dagiti tattao?

Mangbiag ti Danum!

12. (a) Apay a nabunga dagiti kayo iti sirmata ni Ezequiel? (b) Ania ti irepresentar dagitoy nabunga a kayo kadagitoy maudi nga al-aldaw?

¹² Mangbiag ken mangpasalun-at ti karayan a nasirmata ni Ezequiel. Idi naammuan ni Ezequiel ti maipapan kadagiti kayo nga agtubo iti igid ti karayan, naibaga kenkuana: “Ti bulongna saanto a magango, ket saanto met nga agkurang ti bungana. . . . Ket ti bungana maipaayto a taraon ket ti bulongna maipaay a pangagas.” Apay a nakaskasdaaw ti kinabunga dagitoy a kayo? “Agsipud ta dagiti danumna agayusda a rummuar iti santuario.” (Ezequiel 47:12b) Dagitoy a simboliko a kayo iladladawanda ti amin a probision ti Dios para iti pannakaperpekto ti sangatauan maibatay iti daton a panubbot ni Jesus. Ditoy daga ita, idadaulo dagiti napulotan a natda ti naespirituan a panangtaraon ken panangagas. Inton nagun-od amin a 144,000 ti nailangitan a gunggonada, agtultuloyto iti masanguanan dagiti gunggona nga itden ti panagserbida kas papadi a makipagturay ken Kristo, agingga a maparmek a naan-anay ti Adamiko nga ipapatay.​—Apocalipsis 5:9,10; 21:2-4.

13. Ania a pannakaagas ti maar-aramid iti tiempotayo?

¹³ Ti nasirmata a karayan ket agayus nga agturong iti awan biagna a Natay a Baybay ket maimbagan amin a pakadanonanna. Daytoy a baybay iladladawanna ti aglawlaw a natay iti naespirituan. Ngem agbiag dagiti adda “iti amin a disso a danonan dagiti karkarayan.” (Ezequiel 47:9) Kadagiti maudi nga al-aldaw, agbiag met iti naespirituan dagiti tattao iti sadinoman a pakagtengan ti danum ti biag. Dagiti napulotan a natda ti damo a nakaungar idi 1919. Napabiagda iti naespirituan manipud iti arig natay, inaktibo a kasasaadda. (Ezequiel 37:1-14; Apocalipsis 11:3, 7-12) Nanipud idin, nakadanon metten dagita a nagpateg a danum kadagiti dadduma pay a natay iti naespirituan, ket nagbiagda. Isuda ti mangbukel iti umad-adu a dakkel a bunggoy ti sabsabali a karnero, a mangay-ayat ken agserserbi ken Jehova. Din agbayag, dumanonto daytoy a probision kadagiti umariwekwek a mapagungar.

14. Ania ti iladladawan ita ti narang-ay nga industria ti panagkalap iti dandanum ti Natay a Baybay?

¹⁴ Ti naespirituan a kinakired agresulta iti kinabunga. Nailadawan daytoy iti narang-ay nga industria ti panagkalap iti baybay a dati a natay. Kinuna ni Jesus kadagiti pasurotna: “Pagbalinenkayto a dumadaklis kadagiti tattao.” (Mateo 4:19) Iti maudi nga al-aldaw, nangrugi ti trabaho a panagdaklis idi naurnong dagiti natda kadagiti napulotan, ngem saan a nagsardeng dita. Ti mangted-biag a danum nga aggapu iti naespirituan a templo ni Jehova, agraman ti bendision nga umiso a pannakaammo, ap-apektaranna dagiti tattao iti amin a nasion. Napagbiag iti naespirituan dagidiay adda iti sadinoman a nakagtengan ti danum ti karayan.

15. Ania ti mangipakita nga adda dagidiay saan nga umawat kadagiti probision ti Dios a maipaay iti biag, ket anianto ti pagtungpalanda?

¹⁵ Siempre, adda ita dagiti saan a mangipangag iti mensahe ti biag; addanto met dagidiay mapagungar bayat ti Milenio a Panagturay ni Kristo a saan a mangipangag. (Isaias 65:20; Apocalipsis 21:8) Kuna ti anghel nga adda paspaset ti baybay a saan a maimbagan. Dagitoy a lubnak, natay a disso “mabatidanto a pangasinan.” (Ezequiel 47:11) No maipapan kadagiti tattao iti kaaldawantayo, saan nga amin ket umawat iti maididiaya a mangted-biag a danum ni Jehova. (Isaias 6:10) Inton Armagedon, amin dagidiay pinilida ti agtalinaed iti natay ken masakit a kasasaad iti naespirituan mabatidanto a pangasinan, kayatna a sawen, madadaeldanto iti agnanayon. (Apocalipsis 19:11-21) Ngem, dagidiay simamatalek nga umin-inum kadagitoy a dandanum adda namnamada a makalasat ket makitadanto ti maudi a kaitungpalan daytoy a padto.

Ti Karayan Agayus Idiay Paraiso

16. Kaano ken kasanonto a maaddaan iti maudi a kaitungpalan ti sirmata ni Ezequiel maipapan iti templo?

¹⁶ Kas kadagiti dadduma pay a padto maipapan iti panangabaruanan, ti sirmata ni Ezequiel maipapan iti templo maaddaanto iti maudi a kaitungpalan bayat ti Milenio. Awanton ditoy daga ti klase papadi. “Isudanto dagiti papadi ti Dios ken ni Kristo, ket makipagturaydanto kenkuana [idiay langit] kas ar-ari iti sangaribu a tawen.” (Apocalipsis 20:6) Dagitoy nailangitan a papadi kaduadanto ni Kristo a mangiburay iti naan-anay a pagimbagan ti daton a panubbot ni Kristo. Iti kasta, maisalakanto ti nalinteg a sangatauan, maisublinto iti kinaperpekto.​—Juan 3:17.

17, 18. (a) Kasano a nailadawan idiay Apocalipsis 22:1, 2 ti mangted-biag a karayan, ket kaano ti kangrunaan a pannakatungpal dayta a sirmata? (b) Idiay Paraiso, apay nga agdinakkelto iti kasta unay ti karayan ti danum ti biag?

¹⁷ Maikuna a nabirtudto unay ti danum ti biag nga agayus iti karayan a nakita ni Ezequiel. Daytoyto ti kangrunaan a tiempo a pannakatungpal ti padto a nailanad iti Apocalipsis 22:1,2: “Impakitana kaniak ti maysa a karayan ti danum ti biag, nalitnaw a kas kristal, nga agay-ayus manipud iti trono ti Dios ken iti Kordero nga agpababa iti tengnga ti akaba a dalanna. Ket iti daytoy nga igid ti karayan ken iti dayta nga igid adda dagiti kayo ti biag a mangpatpataud iti sangapulo ket dua nga ap-apit a bunga, a mangipapaay kadagiti bungada iti tunggal bulan. Ket dagiti bulong dagiti kayo agpaayda iti pannakaagas dagiti nasion.”

¹⁸ Inton Milenio, maagasanto amin nga an-annayen​—pisikal, mental, ken emosional. Nagimnas ti pannakailadawan daytoy iti “pannakaagas dagiti nasion” babaen kadagiti simboliko a kayo. Gapu kadagiti probision nga iburayto ni Kristo ken dagiti 144,000, “ti agtaeng dinanto kunaen, Masakitak.” (Isaias 33:24) Ket iti dayta a tiempo, agdinakkelto iti kasta unay ti karayan. Masapul a lumawa ken umadalem tapno magabenanna dagiti minilion, nalabit binilion, a nagungar a tattao nga uminumto kadagitoy nadalus a dandanum ti biag. Ti nasirmata a karayan inagasanna ti Natay a Baybay, a nangted iti biag iti sadinoman a nagayusan dagiti danumna. Idiay Paraiso, agbiagto a naan-anay dagiti lallaki ken babbai, a maagasanda iti ipapatay nga impatawid ni Adan no ipakitada ti pammatida kadagiti pagimbagan nga itden kadakuada ti subbot. Naipadto iti Apocalipsis 20:12 a maukradto kadagita nga aldaw “dagiti lukot,” a naglaon iti kanayonan a silnag ti pannakaawat a pakabenepisiaranto dagiti nagungar. Nakalkaldaang ta addanto dagiti madi a paagasan, uray idiay Paraiso. Dagitoy a rebelde isudanto dagidiay “mabati a pangasinan,” kayatna a sawen, madadaelda iti agnanayon.​—Apocalipsis 20:15.

19. (a) Kasanonto a matungpal idiay Paraiso ti pannakabingbingay ti daga? (b) Ania a banag idiay Paraiso ti iladladawan ti siudad? (c) Ania ti kaipapanan ti kaadda ti siudad iti medio adayo manipud iti templo?

¹⁹ Iti dayta a tiempo, maaddaanto met iti maudi a kaitungpalan ti pannakabingbingay ti daga iti sirmata ni Ezequiel. Nakita ni Ezequiel ti umiso a pannakabingbingay ti daga; kasta met, masigurado ti tunggal matalek a Kristiano nga addanto lugarna, adda tawidna, idiay Paraiso. Mabalin a naurnosto ti pannakatungpal ti tarigagay a maaddaan iti bukod a balay a pagtaengan ken taripatuen. (Isaias 65:21; 1 Corinto 14:33) Ti siudad a nakita ni Ezequiel maitutop nga iladladawanna ti administratibo nga urnos ni Jehova para iti baro a daga. Awanton ti napulotan a klase papadi iti nagbabaetan ti sangatauan iti pisikal a pamay-an. Kasta ti ipasimudaag ti sirmata babaen ti panangipakitana a ti siudad ket masarakan iti “natulawan” a daga a medio adayo manipud iti templo. (Ezequiel 48:15) Nupay makipagturay dagiti 144,000 ken Kristo sadi langit, addanto dagiti pannakabagi ti Ari ditoy daga. Dakkelto ti magunggona dagiti tattao nga iturayanna iti naayat a panangiwanwan ken panangiturong ti klase pangulo. Nupay kasta, saanto a ditoy daga, no di ket idiay langit ti napaypayso a sentro ti gobierno. Iturayanto ti Mesianiko a Pagarian dagiti amin a tattao ditoy daga, agraman ti klase pangulo.​—Daniel 2:44; 7:14, 18, 22.

20, 21. (a) Apay a maitutop ti nagan ti siudad? (b) Mainaig iti pannakaawattayo iti sirmata ni Ezequiel, ania dagiti nasken nga isaludsodtayo iti bagbagitayo?

²⁰ Imutektekanyo ti maudi a sasao ti padto ni Ezequiel: “Ti naganto ti ili [“siudad,” NW] manipud iti daydiay nga aldaw, Ni Jehova Adda Dita.” (Ezequiel 48:35) Saan a nairanta daytoy a siudad a mangted kadagiti tattao iti pannakabalin wenno impluensia; saanto met a nairanta daytoy a mangipatungpal iti pagayatan ti asinoman a tao. Siudad ni Jehova dayta, nga agnanayon nga iyanninawna ti panunotna ken dagiti naayat, nalinteg a daldalanna. (Santiago 3:17) Ikkannatayo daytoy iti makaliwliwa a pammatalged a bendisionanto ni Jehova ti binukelna a “baro a daga” a kagimongan ti sangatauan agingga iti agnanayon a masanguanan.​—2 Pedro 3:13.

²¹ Ditay kadi maragsakan iti adda a namnamatayo iti masanguanan? Maikanatad, ngarud, nga isaludsod ti tunggal maysa kadatayo: ‘Kasano ti panangmatmatko kadagiti nakaskasdaaw a bendision a naipalgak iti sirmata ni Ezequiel? Simamatalek kadi a supsuportarak ti trabaho nga ar-aramiden dagiti naayat a manangaywan, agraman dagidiay kameng ti napulotan a natda ken dagiti agbalinto a kameng ti klase pangulo? Ti kadi nasin-aw a panagdayaw ti kangrunaan iti biagko? Naan-anay kadi nga ap-aprobetsarek ti dandanum ti biag nga aglaplapusanan nga agay-ayus ita?’ Sapay koma ta itultuloy nga aramiden dayta ti tunggal maysa kadatayo ken matagiragsaktayo dagiti probision ni Jehova iti agnanayon!

[Footnotes]

Kasanoyo a Sungbatan?

◻ Ania ti iladladawan ti danum nga agay-ayus manipud iti templo?

◻ Ania a panangagas ti ar-aramiden ni Jehova babaen ti simboliko a karayan, ket apay nga umad-adalem ti karayan?

◻ Ania ti iladladawan dagiti kayo kadagiti igid ti karayan?

◻ Ania ti iladladawan ti siudad bayat ti Milenio a Turay, ken apay a maitutop ti nagan ti siudad?

[Dagiti Ladawan iti panid 23]

Ti karayan ti biag iladladawanna ti probision ti Dios a maipaay iti pannakaisalakan