“Bendituem ni Jehova, O Kararuak”

KADAGITI kallabes a bulan, aglaladut ken awan ragsakko iti ministeriok,” kuna ni Nancy.a Agarup sangapulo a tawenen nga agserserbi kas payunir, maysa nga amin-tiempo a manangiwaragawag iti naimbag a damag. Nupay kasta, intuloyna a kinuna: “Diak kayat ti mapaspasamak kaniak. Kasla awanen ti gagarko a mangipakaammo iti mensahe ti Pagarian ken saan a naimpusuan. Ania ti rumbeng nga aramidek?”

Usigenyo met ti kasasaad ni Keith, maysa a panglakayen iti kongregasion dagiti Saksi ni Jehova. Naklaat a nakangngeg iti kinuna ni baketna: “Sabalin sa ket ti pampanunotem. Iti kalkalpas a kararagmo, pinagyamanam ketdin ti taraon idinto ta saan met a pannangan!” Inamin ni Keith: “Mautobko a saanen a naimpusuan dagiti kararagko.”

Di pagduaduaan, diyo kayat nga agbalin a nalamiis ken di napasnek dagiti ebkas ti panangidaydayawyo ken Jehova a Dios. Imbes ketdi, kayatyo a naimpusuan dagitoy, nga agubbog iti panagyaman. Nupay kasta, ti rikna ket saan a kas iti pagan-anay a mabalin nga ikawes wenno uksoben. Masapul nga aggubuay dayta iti kaunggan ti maysa a tao. Kasano a makarikna ti maysa iti naimpusuan a panagyaman? Ipaayannatayo ti maika-103 a Salmo 103 iti nauneg a pannakaawat iti daytoy a banag.

Ni David nga ari ti nagkauna nga Israel ti nangputar iti maika-103 a Salmo 103. Inrugina babaen kadagitoy a sasao: “Bendituem ni Jehova, O kararuak, ken amin nga adda iti unegko, bendituenyo koma ti nasantuan a naganna.” (Salmo 103:1) “Ti sao a bendituen, no mayaplikar iti Dios,” kuna ti maysa a reperensia, “kaipapananna ti panangidaydayaw, a kanayon nga ipasimudaagna ti nasged a panangipateg kenkuana, agraman panagyaman.” Gapu ta kayatna nga idaydayaw ni Jehova a buyogen ti puso a napno iti ayat ken apresasion, ginutugot ni David ti mismo a kararuana​—ti bagina​—a ‘mangbendito ken Jehova.’ Ngem ania ti nangtukay iti daytoy a nabara a rikna iti puso ni David maipaay iti Dios a pagdaydayawanna?

Intuloy a kinuna ni David: “Dika lipaten dagiti amin a paraburna [“aramidna,”].” (Salmo 103:2) Ti panagyaman ken Jehova ket nabatad a nainaig iti panangutob a buyogen ti apresasion kadagiti “aramidna.” Ania nga ar-aramid ni Jehova ti adda iti panunot ni David? Ti panangimatang kadagiti parsua ni Jehova a Dios, kas kadagiti naiwaras a bituen iti langit iti naariwanas a rabii, malapunosna ti puso iti panagyaman iti Namarsua. Natukay iti kasta unay ti rikna ni David iti nabituen a langit. (Salmo 8:3,4; 19:1) Ngem iti maika-103 a Salm 103o, linagip ni David ti sabali pay nga aramid ni Jehova.

Ni Jehova “Mamakawan Kadagiti Amin a Kinadangkesmo”

Iti daytoy a salmo, imbinsabinsa ni David dagiti aramid ti Dios a pakakitaan iti naayat a kinamanangngaasina. Maipapan iti umuna ken kangrunaan kadagitoy, inkantana: ‘Ni Jehova mamakawan kadagiti amin a kinadangkesmo.’ (Salmo 103:3) Nalawag a sipapanunot ni David iti managbasol a kasasaadna. Kalpasan nga imparupa kenkuana ni propeta Natan ti pannakikamalalana ken Bat-seba, inaklon ni David: “Sika [Jehova], sika laeng, ti nakabasolak, ken nakaaramidak iti dakes iti sanguanam.” (Salmo 51:4) Buyogen ti nadudog a puso, impakpakaasina: “Kaasiannak, O Dios, kas mayannurot iti kinamanagayatmo: kas mayannurot iti karuay dagiti nasnekan a kaasim punasem dagiti kinasalungasingko. Bugguannak iti amin a kinadakesko, ket ugasannak iti basolko.” (Salmo 51:1,2) Anian a yaman la ketdi ni David idi napakawan! Kas imperpekto a tao, nakaaramid kadagiti dadduma pay a basol iti unos ti panagbiagna, ngem nagbabawi, inakseptarna ti pannubngar, ken inlintegna dagiti dalanna. Ti panangut-utobna kadagiti agkakaimbag nga aramid ti Dios a pakakitaan iti asina kenkuana tinignayna ni David a mangbendito ken Jehova.

Saan kadi a managbasoltayo met? (Roma 5:12) Insennaay uray ni apostol Pablo: “Pudno a pagragsakak ti linteg ti Dios maitunos iti kinatao nga adda iti unegko, ngem makitak iti kamkamengko ti sabali a linteg a makibakbakal maibusor iti linteg ti panunotko ket iturturongnak a sikakayaw iti linteg ti basol nga adda iti kamkamengko. Nakaay-ay-ayak a tao! Siasinonto ti mangalaw kaniak iti bagi nga agpaspasar itoy nga ipapatay?” (Roma 7:22-24) Anian a yamantayo ta saan a bilbilangen ni Jehova dagiti basoltayo! Siaayat a punasenna dagitoy no agbabawi ken dumawattayo iti pammakawan.

Pinalagipan ni David ti bagina: “[Ni Jehova] mamapia kadagiti amin a nasaksakitmo.” (Salmo 103:3) Tangay ti panangpaimbag ket mangpasalun-at, saan la a panangpakawan iti basol ti ramanenna. Ramanenna ti panangikkat kadagiti ‘sakit’​—dagiti dakes a bunga ti di umiso nga aramidtayo. Iti baro a lubongna, pukawento ni Jehova dagiti pisikal a bunga ti basol, kas ti sakit ken ipapatay. (Isaias 25:8; Apocalipsis 21:1-4) Nupay kasta, uray ita papaimbagennatayo ti Dios kadagiti naespirituan a sakit. Kadagiti dadduma, mairaman kadagitoy ti pannakakonsiensia ken naguped a relasion kenkuana. ‘Ditay lipaten’ ti inaramid ni Jehova nga agpaay iti tunggal maysa kadatayo iti daytoy a banag.

‘Subbotenna ti Biagmo’

“[Ni Jehova ti] manubbot ita biagmo iti pannakadadael [“abut,” NW],” inkanta ni David. (Salmo 103:4) Ti “abut” ket isu ti tanem ti sangatauan​—Sheol, wenno Hades. Uray idi sakbay a nagbalin nga ari ti Israel, nagpeligro ti biag ni David. Kas pagarigan, ti ari ti Israel a ni Saul napalalo ti gurana ken David ket ginay-atna a patayen iti nagduduma a gundaway. (1 Samuel 18:9-29; 19:10; 23:6-29) Kayat met idi dagiti Filisteo a matay ni David. (1 Samuel 21:10-15) Ngem kanayon nga inispal ni Jehova iti “abut.” Anian a yaman ni David idi malagipna dagitoy nga aramid ni Jehova!

Dakayo ngay? Sinaranaynakay kadi ni Jehova kadagiti tiempo a malmaldaangankayo wenno natayankayo? Wenno nadamdamagyo kadi ti panangsubbotna iti biag dagiti matalek a Saksina iti abut ti Sheol iti kaaldawantayo? Nalabit natukay ti riknayo kadagiti nabasayo a salaysay iti daytoy a magasin maipapan kadagiti panangisalakan nga inaramidna. Apay a dikay utoben a siyayaman dagitoy nga aramid ti pudno a Dios? Ken, siempre, addaantay amin iti panggapuan nga agyaman ken Jehova gapu iti namnama a panagungar.​—Juan 5:28, 29; Aramid 24:15.

Inikkannatayo ni Jehova iti biag ken kadagiti banag a mamagbalin iti dayta a makaay-ayo ken makagunggona. Kinuna ti salmista a ti Dios ti “mangbalangat kenka iti kinamanagayat ken kadagiti nadungngo a kaasi.” (Salmo 103:4) Iti kanito ti panagkasapulan, dinatay baybay-an ni Jehova no di ket saranayennatayo babaen ti makitkita nga organisasionna ken dagiti nadutokan a panglakayen, wenno papastor, iti kongregasion. Matulongannatay dayta a mangsango iti narikut a kasasaad a di mapukaw ti panagraemtayo iti bagitayo ken ti dignidadtayo. Dagiti Kristiano a papastor maseknanda unay kadagiti karnero. Pabilgenda dagiti masakit ken malmaldaang ken aramidenda ti amin tapno maisubli dagidiay nakabasol. (Isaias 32:1, 2; 1 Pedro 5:2,3; Judas 22, 23) Ti espiritu ni Jehova ti mangtignay kadagitoy a papastor nga agbalin a naasi ken naayat iti arban. Pudno a mayarig ‘ti kinamanagayat ken dagiti nadungngo a kaasina’ iti balangat a mangpapintas kadatayo ken mangted kadatayo iti dignidad! Saantay koma a pulos lipaten dagiti aramidna, no di ket bendituentayo ni Jehova ken ti nasantuan a naganna.

Kas tuloy ti panangbagbagana iti bagina, inkanta ni salmista a David: “[Ni Jehova ti] mangpennek iti tarigagaymo kadagiti naimbag a bambanag, iti kasta ti kinaagtutubom mapabaro a kas ti agila.” (Salmo 103:5) Makapnek ken naragsak ti biag nga ipaay ni Jehova. Ti mismo a pannakaammo iti kinapudno ket maysa nga awan kapadana a gameng ken gubuayan ti dakkel a rag-o! Ken panunotenyo no kasano a makapnek unay ti trabaho nga impaay ni Jehova kadatayo, ti panangasaba ken panangaramid kadagiti adalan. Anian a makaparagsak ti makasarak iti tao nga interesado nga agsursuro maipapan iti pudno a Dios ken ti panangtulong kenkuana a mangammo ken ni Jehova ken mangbendito kenkuana! Nupay kasta, dumngeg man wenno saan dagiti tattao iti lugartayo, naindaklan a pribilehio ti makiraman iti trabaho a nainaig iti pannakasantipikar ti nagan ni Jehova ken pannakaalangon ti kinasoberanona.

Bayat nga agtultuloy ti trabahotayo a panangiwaragawag iti Pagarian ti Dios, siasino ti saan a mabannog wenno mapaksuyan? Ngem agtultuloy a pabaruen ni Jehova ti pigsa dagiti adipenna, a pagbalinenna ida a ‘kas kadagiti agila’ nga addaan kadagiti nabileg a payak ken nakangatngato ti matayabda. Anian a yamantayo ta mangipaay ti naayat a nailangitan nga Amatayo iti kasta a ‘dinamiko nga enerhia’ tapno simamatalek a maitungpaltayo ti ministeriotayo iti inaldaw!​—Isaias 40:29-31.

Kas panangyilustrar: Mangmangged ni Clara iti amin a tiempo sa agarup 50 nga oras ti busbusbosenna iti tay-ak ti ministerio iti kada bulan. Kunana: “Nabannogak no dadduma, ket pilitek ti bagik a mapan mangasaba gapu laeng ta adda katulagko a rummuar. Ngem no addaakon iti tay-ak, kanayon a mapapigsaak.” Mabalin a napadasanyo metten ti napapigsa gapu iti nadibinuan a pannaranay iti Nakristianuan a ministerio. Sapay koma ta matignaykayo a mangikuna, kas ken David iti panglukat a sasao daytoy a salmo: “Bendituem ni Jehova, O kararuak, ken amin nga adda iti unegko, bendituenyo koma ti nasantuan a naganna.”

Isalakan ni Jehova Dagiti Tattaona

Inkanta pay ti salmista: “Ni Jehova ibanagna dagiti nalinteg nga ar-aramid, ken ukomenna dagiti amin a mailupitlupit. Impakaammona dagiti dalanna ken Moises, dagiti ar-aramidna kadagiti annak ti Israel.” (Salmo 103:6,7) Nalabit pampanunoten ni David ti ‘panangilupitlupit’ dagiti manangirurumen nga Egipcio kadagiti Israelita idi kaaldawan ni Moises. Nagubbog la ketdi ti panagyaman iti puso ni David iti panangut-utobna no kasano nga impakaammo ni Jehova ken Moises dagiti pamay-anna a mangisalakan.

Matignaytay met nga agyaman babaen ti panangutob iti pannakilangen ti Dios kadagiti Israelita. Ngem ditay koma liwayan nga utoben ti kapkapadasan dagiti adipen ni Jehova iti moderno a panawen, kas dagidiay nadakamat iti kapitulo 29 ken 30 ti libro a Dagiti Saksi ni Jehova​—Manangiwaragawag iti Pagarian ti Dios. Dagiti salaysay a nailanad iti dayta ken iti dadduma pay a publikasion ti Watch Tower Society tulongandatayo a mangkita no kasano a sinaranay ni Jehova dagiti tattaona iti moderno a panawen tapno maibturanda ti pannakaibalud, derraaw, panangiparit, kampo konsentrasion, ken dagiti kampo nga inkapilitan ti panagtrabaho a kas ad-adipen. Adda dagiti suot kadagiti pagilian a riniribuk ti gubat, kas idiay Burundi, Liberia, Rwanda, ken idiay dati a Yugoslavia. No adda mapasamak a panangidadanes, kanayon a saranayen ni Jehova dagiti matalek nga adipenna. Ti panangpampanunot kadagitoy nga aramid ti naidaklan a Diostayo, ni Jehova, maaramidanna kadatayo ti naaramidanna ken David ti panangut-utobna iti panangisalakan ni Jehova iti ilina idiay Egipto.

Usigenyo met no kasano a sidudungngo nga isalakannatayo ni Jehova iti basol. Impaayna ti “dara ni Kristo” tapno “dalusanna dagiti konsiensiatayo manipud kadagiti natay nga ar-aramid.” (Hebreo 9:14) No pagbabawyantayo dagiti basoltayo ken dumawattayo iti pammakawan maibatay iti naiparukpok a dara ni Kristo, iyadayo ti Dios kadatayo dagiti salungasingtayo​—“kas panagaddayo ti daya ken ti laud”​—ket isublinatayo iti paborna. Ken panunotenyo dagiti probision ni Jehova kas kadagiti Nakristianuan a gimong, makapabileg a panagtitimpuyog, papastor iti kongregasion, ken dagiti naibatay-Biblia a publikasion nga aw-awatentayo babaen ti “matalek ken masirib nga adipen.” (Mateo 24:45) Saan kadi a matulongandatayo amin dagitoy nga aramid ni Jehova a mangpabileg iti relasiontayo kenkuana? Kinuna ni David: “Ni Jehova sikakaasi ken siaayat, namayamay nga agpungtot, ket aglaplapusanan iti kinamanagayat. . . . Isu saanna nga impaay kadatayo ti kas mayannatup kadagiti basbasoltayo, dinatayo met sinupapakan iti katutopan dagiti kinadangkestayo.” (Salmo 103:8-14) Ti panangut-utob iti naayat a panangaywan ni Jehova sigurado a matignaytayo a mangidayaw kenkuana ken mangitan-ok iti nasantuan a naganna.

“Bendituenyo ni Jehova, Dakayo Amin nga Aramidna”

No maidilig iti imortalidad ni Jehova, ti “Dios ti kinaagnanayon,” pudno nga ababa “dagiti aldaw” ti “mortal a tao”​—“kas iti al-aldaw dagiti ruot.” Ngem siyayaman nga inut-utob ni David: “Ti kinamanagayat ni Jehova kadagiti agbuteng kenkuana manipud iti kinaagnanayon agpapan iti kinaagnanayon, ket ti kinalintegna agpaay kadagiti annak dagiti an-annak; kadagidiay mangsalimetmet iti tulagna, ken kadagiti manglaglagip kadagiti al-alagadenna nga aramidenda ida.” (Genesis 21:33, footnote iti Reference Bible; Salmo 103:15-18,) Saan a lipaten ni Jehova dagidiay agbuteng kenkuana. Iti naikeddeng a panawen, ikkannanto ida iti biag nga agnanayon.​—Juan 3:16; 17:3.

Kas panangyebkas iti panangapresiarna iti kinaari ni Jehova, kuna ni David: “Ni Jehova impasdekna ti tronona kadagiti langlangit; ket ti pagarianna pagturayanna amin.” (Salmo 103:19) Nupay adda idi panawen a nayebkas ti kinaari ni Jehova babaen ti pagarian ti Israel, idiay langit ti aktual a yan ti tronona. Gapu ta isu ti Namarsua, ni Jehova ti Soberano nga Agturay iti uniberso ket aramidenna ti nasantuan a pagayatanna idiay langit ken ditoy daga a maitunos kadagiti panggepna.

Pinaregta ni David uray dagiti anghel sadi langit. Inkantana: “Bendituenyo ni Jehova, dakayo nga anghelesna, a mannakabalin iti bileg, a manungtungpal iti saona, a nangtimtimud iti timek ti saona. Bendituenyo ni Jehova, dakayo amin a buybuyotna, dakayo amin a ministrona nga agaramid iti pagayatanna. Bendituenyo ni Jehova dakayo amin nga aramidna, kadagiti amin a yan ti pagturayanna: bendituem ni Jehova, O kararuak.” (Salmo 103:20-22) Saan kadi a ti panangutob kadagiti aramid ni Jehova a pakakitaan iti naayat a kinamanangngaasina kadatayo tignayennatay met koma a mangbendito kenkuana? Wen! Ket masiguradotayo a ti uni ti timektayo a mangidaydayaw iti Dios saanto a mapukaw iti tengnga ti nabileg a koro dagiti managdaydayaw a pakairamanan uray dagiti nalinteg nga anghel. Sapay koma ta naimpusuan nga idaydayawtayo ti nailangitan nga Amatayo, a kanayon nga agsaotayo iti naimbag maipapan kenkuana. Wen, ipapusotayo ti sasao ni David, “Bendituem ni Jehova, O kararuak.”

[Footnote]

[Ladawan iti panid 23]

Inut-utob ni David dagiti aramid ni Jehova a pakakitaan iti naayat a kinamanangngaasina. Kastakay met kadi?