Pannakaidedikar ti Watchtower Educational Center​—Maysa a Piesta nga Agpaay ken Jehova

SIPUD idi un-unana a panawen, paseten ti pudno a panagdayaw dagiti nararagsak a piesta. Sumagmamano kadagiti piesta a naangay iti nagkauna nga Israel ti nagpaut iti sumagmamano nga aldaw ken tinabunuan ti rinibu a managdaydayaw ni Jehova. Nagpaut iti pito nga aldaw ti pannakaidaton ti templo ni Solomon ken sinaruno ti makalawas a Piesta dagiti Abong-abong. Nangted gundaway daytoy kadagiti Israelita a mangutob iti nakaim-imbag a pamay-an a panangtrato ni Jehova kadakuada. Nagawidda ‘a siraragsak ken sirarag-o iti puso gapu kadagiti amin a kinaimbag nga impakita ni Jehova.’​—1 Ar-ari 8:66.

Ti naangay idi Mayo 17-22, 1999, iti Watchtower Educational Center idiay Patterson, New York, E.U.A., impalagipna kadagiti dimmar-ay dagidi nagkauna a nararagsak a piesta. Daytoy ket lawas ti naisangsangayan nga aktibidad a naisentro iti pannakaidedikar ti 28 nga agaassideg a patakder a nairanta a mangidur-as iti sangalubongan a panangisuro iti Biblia. Naikkan iti gundaway dagiti amin a 5,400 a trabahador ti hedkuarter idiay Brooklyn, Wallkill, ken Patterson a mangpasiar iti amin a paset dagiti patakder iti Patterson kabayatan dayta nakallalagip a lawas. Di kumurang a 8,100 ti dimmar-ay, a pakairamanan dagiti nasurok a 500 a dati a trabahador iti hedkuarter a nakibinnulig idi maibangbangon ti educational center, dagiti pannakabagi ti 23 a sanga nga opisina ti Watch Tower Society, ken dadduma pay manipud kadagiti kabangibang a kongregasion.

Makaisuro Dagiti Tour Display

Adda dagiti nayurnos nga espesial a display, makaisuro a pabuya iti video, ken panagpasiar nga awan ti tour guide kadagiti pasdek tapno mangted kadagiti bisita iti impormasion maipapan ti educational center. Iti main lobby, naatrakar a dagus dagiti bisita iti bassit a modelo ti templo ti Jerusalem idi panawen ti ministerio ni Jesus ditoy daga. Dagiti dadduma a nai-display intampokda ti immuna a pakasaritaan ti Watchtower Bible School of Gilead, napapateg a kombension, dagiti gimong ti kongregasion, irarang-ay ti panangyadal iti Biblia kadagiti pagtaengan iti kaaldawantayo​—a minilion itan ti linawas a maikonkondukta​—ken ti trabaho ti Legal Department tapno agtultuloy dagiti kasta nga aktibidad kas panangtungpal iti bilin ni Jesus.​—Mateo 28:19, 20.

Iti asideg nga auditoriom nga addaan iti 1,700 a pagtugawan, naipabuya kadagiti dimmar-ay iti dedikasion ti 33 a minuto a pabuya iti video a napauluan iti “Not by Power​—By My Spirit!” Ipakita daytoy a video no kasano a nabuangay ti Watchtower Educational Center. Dagiti naisalaysay a pasamak babaen dagiti interbiu nalawag nga ipabigbigda ti panangiturong ni Jehova iti bambanag ken ti panangbendisionna iti panagregget a mangiringpas a sibaballigi iti daytoy 15 a tawen a proyekto. Rinibu ti aktual a nakiraman iti trabaho a panagbangon. Naminsan idi 1994, adda 526 a trabahador iti pagpatakderan, a pakairamanan ti 350 nga amin-tiempo a boluntario, 113 a temporario a trabahador, ken 63 a katao nga inaldaw nga agbiahe tapno laeng tumulong. Adu pay ti nagdonar kas pangsuporta iti trabaho. Bigbigenda amin a nagballigi daytoy gapu iti espiritu ni Jehova.​—Zacarias 4:6.

Maawatan dagiti nagpasiar a ti panggep ti trabaho a maar-aramid idiay educational center ket tapno maitandudo ti nadiosan a pannursuro. Ti naka-display iti pagserkan ti Gilead School nga adda iti umuna a kadsaaran ti pasdek a pageskuelaan intampokna ti nabaknang a naespirituan a tawid ken historia ti eskuelaan. Adda nasuroken a 7,000 nga estudiante a sinanay ti Gilead School kas misionero sipud ti immuna a klasena idi 1943 iti dati a yan ti eskuelaan idiay South Lansing, New York. Iti maikadua a kadsaaran ti pasdek a pageskuelaan, naka-display dagiti ladawan ti School for Branch Committee Members ken School for Traveling Overseers. Dita a maang-angay dagitoy dua nga eskuelaan. Nangrugi idi Nobiembre 1995, ti eskuelaan para iti sangay ket nangipaay iti nalawlawa ti saklawenna nga instruksion kadagiti 360 a kameng ti Branch Committee manipud 106 a pagilian.

Bayat ti panagpasiar dagiti bisita, saan la a basta dagiti naka-display a ladawan ti nakitada iti kaaduan a napananda. Nakastrekda iti nadumaduma a departamento, nakitada dagiti opisina ken dadduma a pagobraan, ket adu ti naammuanda maipapan iti maar-aramid a trabaho. Ti maysa a tampok ti panagpasiar isu ti pasdek ti Audio/Video Services. Anian a nagsayaat dagiti pasilidad a maar-aramat iti panangisuro iti Biblia! Babaen kadagiti agsasaruno a makaisuro a display ken ababa a pabuya iti video, natulongan dagiti bisita a mangtarus no kasano a mairekord ti boses ken maisagana dagiti video. Adda naadalda iti nainget a panagsirarak a nairaman iti pannakaisagana dagiti dekorasion ken kawes. Nakitada ti saan a nagastos a pannakasangal dagiti entablado ngem naasikaso a naimbag ti amin a detalyena. Naimatanganda no kasano a naaramat ti musika tapno marikna dagiti tattao a kasla karamanda iti eksena a buybuyaenda. Nanipud 1990, nakaaramid ti Sosiedad iti sangapulo a video iti 41 a pagsasao, a mangilawlawag iti nadumaduma a tema ti Biblia, malaksid pay kadagiti dadduma a video para kadagidiay makaammo iti American Sign Language.

Adu ti nangpasiar iti Photo Lab, Art Department, Information Services, a mangipapaay iti pannakasanay ken pannakaasikaso iti kompiuter, ti Service Department a mangimatmaton iti trabaho ti 11,242 a kongregasion ken 572 nga agdaldaliasat a manangaywan, ken ti Writing Correspondence a para sungbat iti agarup 14,000 a saludsod kada tawen. Nasdaawda kadagiti naaramid a panagsukimat para kadagiti surat a maipatulod ken ti napudno a pannakaseknan a naipakita kadagidiay a dagiti suratda ipamatmatna a makidangdangadangda kadagiti nakaro a parikut.

Agsasaruno dagiti bisita a nangpasiar iti Translation Services. Nasdaawda a makaammo nga iti kallabes a lima a tawen, nanayonan iti 102 a pagsasao ti bilang dagiti pagsasao a nakaipatarusan dagiti literatura ti Biblia nga ipapaay ti Sosiedad. Iti sangalubongan, agarup 80 porsiento kadagiti Saksi ni Jehova ti agbasbasa kadagiti saan nga Ingles a publikasion ti Sosiedad. Tapno maipaay dagiti kasapulanda, nasurok a 1,700 dagiti boluntario nga agtartrabaho a kas managipatarus iti 100 a pagilian. Naka-display dagiti Ti Pagwanawanan kadagiti pagsasao ti America, Europa, Asia, ken Africa. Nakita dagiti bimmisita ti Biblia a New World Translation iti 31 a pagsasao a nakaipablaakanna. Naammuanda a dagiti publikasion ti Watch Tower ket magun-odanen iti 332 a pagsasao ken naipablaaken ti broshur nga Ania ti Kalikaguman ti Dios Kadatayo? iti 219 a pagsasao.

Naipakita kadagiti nangbisita iti Legal Department ti nadumaduma a trabaho nga agkasapulan iti legal a panangasikaso iti sangalubongan. Iti maysa a video, nabuyada ti aktual a bista a sadiay ket makirinrinnason ti maysa nga abogado a Saksi iti kaso mainaig iti panangyalison iti dara. Naammuanda met no ania ti maar-aramid tapno agtultuloy ti pannakaikasaba ti naimbag a damag kadagiti tattao. (Filipos 1:7) Naiturong ti atensionda iti desision ti federal district court idi Marso daytoy a tawen, idi a naibilin iti distrito ti Oradell, New Jersey, E.U.A., a baliwanna ti paglinteganna tapno maikkat dagiti maiparebbeng a permit ken badge kadagiti Saksi ni Jehova a mangayat a mangasaba iti binalaybalay iti dayta a komunidad.

Saan la a dagitoy ti nakita dagiti nagbisita. Tinaluntonda dagiti naaramid a display iti Precast Shop ken pinasiarda dagiti pasilidad ti Wastewater Treatment, ti Powerhouse, ti Water-Softening Facility, ken ti adu a maintenance shop, malaksid iti dadduma pay. Naisangsangayan dayta a kapadasan.

Ti Programa ti Dedikasion Impaganetgetna ti Nadiosan nga Edukasion

Naangay ti aktual a programa ti dedikasion iti Mierkoles, Mayo 19, a nangrugi iti alas 4:00 t.m. Nakaragragsak ti 6,929 a dimmar-ay a pakairamanan dagiti trabahador ti hedkuarter, bisita ti Sosiedad, ken 372 a naguurnong iti sanga nga opisina idiay Canada a naka-hook-up.

Pudno a nagustuan dagiti timmabuno ti nabara a pangabrasa a palawag ni Milton G. Henschel, ti presidente ti Watch Tower Society. Ni William Malenfant ti simmaruno nga inyam-ammo ni Theodore Jaracz, kameng ti Bagi a Manarawidwid ken tserman ti programa. Idi imparangna ti “Dagiti Tampok ti Panagbangon,” ininterbiuna ti tallo a kakabsat a lallaki nga addaan nagpateg nga akem iti pannakaiplano, pannakadisenio, ken konstruksion ti Watchtower Educational Center. Bayat dagiti interbiu, nadakamat a bayat dagiti tawen ti aktual a trabaho a panagbangon, adda nasurok a 8,700 a temporario a trabahador nga immay iti bukodda a gastos tapno tumulongda iti proyekto. Anian a nagsayaat a pammaneknek iti panagkaykaysa ken kinaparabur kas resulta ti nadiosan a pannursuro!

Simmaruno ti simposium a napauluan “Nadiosan nga Edukasion iti Sangalubongan.” Imparang daytoy ti uppat a kameng ti Bagi a Manarawidwid. Inyunay-unay ni John E. Barr a ti nadiosan nga edukasion ket naibatay iti Biblia a Sao ti Dios, ket iparegtana kadagiti Kristiano nga ‘agtultuloyda nga agbunga iti tunggal naimbag nga aramid ket rumang-ayda iti umiso a pannakaammo iti Dios.’ (Colosas 1:10) Inlawlawag ni Daniel Sydlik no kasano ti nateokratikuan a pannakaorganisar ti nadiosan nga edukasion manipud iti ulo ti kongregasion Kristiano, ni Jesu-Kristo, agingga iti amin a kameng ti sangalubongan a panagkakabsat. (1 Corinto 12:12-27) Iti dua a maudi a paset ti simposium nga imparang da Gerrit Lösch ken Carey Barber, nailawlawag no kasano a ti nadiosan nga edukasion pagbalinenna dagiti ministro a maikari a mangdanon iti tattao iti aniaman a lugar ken mangisuro kadakuada tapno magnada met koma iti dalan ti Dios.​—Isaias 2:1-4; 2 Corinto 3:5.

Tapno maaddaan iti pamanunotan dagiti timmabuno maipapan iti nadumaduma nga eskuelaan a maang-angay iti educational center, adda dagiti interbiu ken diskusion nga imparang dagiti instruktor ken dadduma pay a nairaman iti panagandar dagita. Naipakita ti akem ti tunggal eskuelaan iti pannakaipatungpal ti programa ti nadiosan nga edukasion iti intero a lubong. Nailawlawag a ti Gilead School ket naipamaysa iti panangadal iti tunggal libro ti Biblia, iti historia ti moderno-aldaw nga ili ni Jehova, ken panangsanay kadagidiay agserbi kas misionero. Ti eskuelaan para iti sangay ket maysa a nagsayaat ken nalawat’ saklawenna a panangadal iti nadumaduma a trabaho a nakainaigan dagiti kameng ti Branch Committee. Ti Eskuelaan Dagiti Agdaldaliasat a Manangaywan ket nairanta saan laeng a tapno mangpunno kadagiti kasapulan dagiti agdaldaliasat a kakabsat no di pay ket mangkabal kadakuada tapno makaipaayda iti naespirituan a tulong a pakagunggonaan dagiti kongregasion.

Kas pangserra iti nakapimpintas a programa, ti kameng ti Bagi a Manarawidwid a ni Lloyd Barry impaayna ti palawag ti dedikasion a napauluan “Pannakipagbangon iti Naindaklan a Namarsua Kadatayo.” Imbatadna a pagragsakan ni Jehova a Namarsua kadatayo dagiti amin a pinarsuana ket aw-awisennatayo a makipagrag-o kenkuana. (Isaias 65:18) Yantangay “ti nangibangon iti isuamin a bambanag isu ti Dios,” maiturong ti pammadayaw ken Jehova a Dios gapu kadagitoy amin a naibangon. (Hebreo 3:4) Kalpasan nga inlawlawagna dagita a kapanunotan, indauluan ti nagpalawag ti maysa a naimpusuan a kararag kas panangidedikar iti Watchtower Educational Center ken Jehova, ti Naindaklan a Namarsua kadatayo.a

Sigurado a dinto pulos malipatan dagiti timmabuno dayta a makalawas a rambak. Apay a diyo iplano ti agpasiar iti Watchtower Educational Center? Masiguradomi a ti panagbisita ken panagpasiaryo ket makapabilegto kadakayo bayat a pagreggetanyo nga adalen ti ad-adu pay maipapan iti naayat a Namarsua kadatayo ken agbiag a maitunos kadagiti nalinteg a pagalagadanna.

[Footnote]

[Dagiti Ladawan iti panid 10]

Napusek nga auditoriom ken ti panganan a napno kadagiti bisita

[Dagiti Ladawan iti panid 10]

Dagiti panagpasiar ket naisangsangayan a makaparagsak a pasetna