Mangibaon ti Gilead Kadagiti Misionero “iti Kaadaywan a Paset ti Daga”
NASUROKEN a kagudua a siglo a mangibabaon ti Watchtower Bible School of Gilead kadagiti misionero. Idi Setiembre 11, 1999, nagturpos ti maika-107 a klase ti Gilead. Buklen dayta ti 48 nga estudiante a naggapu iti 11 a pagilian, ket naibaon dagitoy nga agserbi iti 24 a nadumaduma a pagilian. Maibilangda kadagiti rinibu a dadduma pay a misionero nga addaan napateg a paset iti pannakatungpal ti pammakada a sasao ni Jesus sakbay nga immuli sadi langit. Impakpakaunana nga agbalinto dagiti adalanna a ‘saksina . . . agingga iti kaadaywan a paset ti daga.’—Aramid 1:8.
Maysa a naisangsangayan nga okasion ti programa ti panagturpos a naangay iti makaay-ayo a lugar, iti Watchtower Educational Center idiay Patterson, New York. Pagragsakan unay dagiti nagturpos ti itatabuno dagiti kabagian, nasinged a gagayyem, ken bisitada. Agdagup iti 4,992 ti bilang dagiti timmabuno, a pakairamanan dagidiay dimngeg ken nagbuya iti programa a nai-hook up kadagiti pasilidad idiay Brooklyn ken Wallkill.
Agserbi a Simamatalek ken ni Jehova ken iti Kaarruba
“Siasino ti Adda iti Dasig ni Jehova?” Dayta ti tema ti panglukat a palawag ni Carey Barber, miembro ti Bagi a Manarawidwid ken tserman ti programa ti panagturpos. Inlawlawagna a daytoy ti isyu a nakaipasanguan dagiti Israelita idi tiempo ni Moises. Napalagipan dagiti nagturpos ken dagidiay timmabuno nga adu kadagiti Israelita ti natay idiay let-ang agsipud ta saanda a nagtalinaed a nasungdo ken Jehova. Kalpasan a nagrukbabda iti ladawan, “nagtugawda a nangan ken naginum, ket timmakderda a nagay-ayam.” (Exodo 32:1-29) Binallaagan ni Jesus dagiti Kristiano maipapan iti umasping a peggad: “Asikasuenyo ti bagbagiyo tapno dagiti pusoyo dida pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo.”—Lucas 21:34-36.
Ni Gene Smalley iti Writing Department ti simmaruno a nagpalawag. Sinaludsodanna dagiti nagturpos nga estudiante: “Agbalinkayto Kadi a Paregoric?” Inlawlawagna a nausar iti Ingles ti Griego a sao a pa·re·go·riʹa a kas nagan ti maysa nga agas a mangep-ep iti ut-ot. Nupay kasta, inaramat ni apostol Pablo daytoy a nabagas a Griego a sao iti Colosas 4:11 a pangdeskribir kadagiti katrabahuanna. Iti New World Translation, naipatarus daytoy a sao iti “makapabileg a tulong.”
Iti praktikal a pamay-an, agbalin a paregoric iti moderno a panawen dagiti nagturpos a misionero babaen ti sipapakumbaba a panangpabilegda kadagiti kakabsat ken babaen ti pannakitinnulong ken panangipategda kadagiti padada a misionero iti lugar a pakaibaonanda.
“Panagbiag a Mayannurot iti Nabalitokan a Bilin.” Dayta ti tema nga indatag ti simmaruno nga ispiker a ni Daniel Sydlik, miembro ti Bagi a Manarawidwid. Inlawlawagna a ti natan-ok a prinsipio nga intuyang ni Jesus iti Mateo 7:12, “isuamin a bambanag . . . a kayatyo nga aramiden kadakayo dagiti tattao, masapul a kasta met ti aramidenyo kadakuada,” kaipapananna ti panangaramid iti naimbag kadagiti dadduma, saan laeng a di panangaramid iti dakes.
Tapno matungpal daytoy, adda tallo a banag a kasapulan: nasiput a mata, mannakipagrikna a puso, ken mannakitulong nga ima. Kas pananggupgop, kinunana: “No kayattayo ti tumulong, agtignaytayo a dagus. Masapul nga ikagumaantayo nga aramiden kadagiti sabsabali ti kayattayo nga aramidenda kadatayo.” Pudno daytoy nangnangruna kadagiti misionero a mapan kadagiti sabali a pagilian tapno tumulong kadagiti tattao nga agbiag a mayannurot iti pudno a Kinakristiano.
Nabara a Pammalagip Dagiti Instruktor
“Itultuloyyo ti Rumang-ay.” Dayta ti imparegta ti instruktor ti Gilead a ni Karl Adams kadagiti nagturpos a misionero. Kadagiti ania a banag a rumang-ayda? Umuna, iti pannakaammo ken iti abilidad a mangaramat a naimbag iti dayta. Idiay Gilead, nasursuro dagiti estudiante no kasano ti agsukimat tapno maawatanda dagiti kasasaad a mainaig kadagiti salaysay iti Biblia. Naparegtada a mangutob no kasano nga apektaran ti tunggal salaysay ti biagda. Naidagadag nga itultuloyda nga aramiden daytoy.
“Maikadua, itultuloyyo ti rumang-ay iti ayat. Tumarubo ti ayat no mataripato. Matay no mabaybay-an,” kinuna ni Kabsat Adams. (Filipos 1:9) Ita, kas misionero, nasken a rumang-ayda iti ayat iti sidong ti nadumaduma a kasasaad. Ken maikatlo: “Itultuloyyo ti rumang-ay iti di kaikarian a kinamanangaasi ken pannakaammo iti Apo ken Manangisalakantayo a ni Jesu-Kristo.” (2 Pedro 3:18) “Daytoy ti nakaskasdaaw a kinamanangngaasi nga impakita ni Jehova babaen ti Anakna,” kinuna ti ispiker. “Bayat a rumayrayray ti panangipategtayo iti dayta a di kaikarian a kinamanangngaasi, rumayray ti ragsaktayo a mangaramid iti pagayatan ti Dios ken mangitungpal iti impaannongna kadatayo.”
“Sanguenyo Buyogen ti Ayat, ket Maibturanyo.” Daytoy ti tema ti palawag ni Mark Noumair, maysa met nga instruktor ti Gilead. Imbalakadna: “Sursuruenyo a sanguen a buyogen ti ayat dagiti narigat a kasasaad iti biagyo kas misionero, ket maibturanyonto dayta. Dagiti laeng ay-ayaten ni Jehova ti disiplinaenna. Uray no iti panagriknayo ket di nainsiriban, adda idaddadumana, wenno di nainkalintegan ti naipaay a balakad, ti ayat ken ni Jehova ken ti relasionyo kenkuana ti tumulong kadakayo a mangawat iti dayta.”
Inlawlawag ni Kabsat Noumair nga adu ti rebbengen dagiti misionero. “Ngem maumakayto iti rebbengenyo no di mabuyogan iti ayat. No di mabuyogan iti ayat, agbalin a makapasikor unay dagiti annongenyo iti pagtaengan—kas iti panagluto, pannakitienda, panangbuggo iti prutas, panagpaburek iti danum. Agsarimadeng ket saludsodanyo ti bagiyo, ‘Apay nga ar-aramidek dagitoy?’ Bueno, saanyo a rigaten dagitoy no kunayo iti bagiyo, ‘Ar-aramidek daytoy nga agpaay iti salun-at ken ragsak dagiti padak a misionero.’” Kas pananggupgop, indagadagna: “Maipapan man iti panangawat iti disiplina, panangtungpal kadagiti annongenyo kas misionero, wenno panangtaming iti di pagkikinnaawatan, makapagibturkayo iti pakaibaonanyo no aramidenyo dayta a buyogen ti ayat. ‘Ti ayat saan a pulos aggibus.’”—1 Corinto 13:8.
Kalpasanna, immatonan ni Wallace Liverance, instruktor ti Gilead, ti pannakaidemostra ti sumagmamano a makaparagsak a kapadasan dagiti estudiante bayat ti pannakipagtrabahoda kadagiti lokal a kongregasion. Malaksid iti panagbalaybalayda, ginundawayanda ti panagsanayda kas misionero a nangbirok iti tattao kadagiti pagsardengan ti trak, labanderia, estasion ti tren, ken dadduma pay a lugar.
Pammatalged Dagiti Natenneb a Misionero
No mapan dagiti baro a misionero iti sabali a pagilian, rumbeng kadi nga agdanagda? Kabaelanda ngata a sanguen dagiti karit iti ganggannaet a lugar? Ania ti ar-aramiden dagiti sanga nga opisina tapno matulongan nga agballigi dagitoy baro a misionero? Tapno masungbatan dagitoy ken dadduma pay a saludsod, ininterbiu da Steven Lett (iti Service Department) ken David Splane (iti Writing Department) dagiti kakabsat a madama idi a tumabtabuno iti eskuelaan para kadagiti miembro ti branch committee idiay Watchtower Educational Center. Agserserbi dagiti kakabsat a nainterbiu kas komite ti sanga idiay España, Hong Kong, Liberia, Benin, Madagascar, Brazil, ken Japan.
Dagitoy a natenneb nga adipen ni Jehova, nga adu kadakuada ti nagserbi kas misionero iti pinulpullo a tawen, pinakiredda ti nakem dagiti agturpos nga estudiante agraman dagiti nagannak ken kakabagianda a timmabuno. Maibatay iti bukodda a kapadasan ken kadagiti padada a misionero, impakitada a masolusionan dagiti parikut ken pakaseknan. Mabalin a dakkel ti parikut a pakaipasanguanda, “ngem masolbar dayta, ken tulongannatayo ti Sosiedad,” kinuna ni Raimo Kuokkanen, maysa a misionero idiay Madagascar. “Saanmi a pinili ti pakaibaonanmi, inawatmi dayta,” kinuna ni Östen Gustavsson, a madama nga agserserbi idiay Brazil. “Isu nga inkeddengmi nga ikagumaanmi ti agtalinaed iti nakaibaonanmi.” Kinuna ni James Linton, nga agserserbi idiay Japan, a ti nakatulong kenkuana isu “ti kaadda dagiti kakabsat a datin nga agserserbi kas misionero.” Ti panagserbi kas misionero ket makaparagsak ken makapnek a wagas ti panagserbi ken Jehova ken iti panangaywan kadagiti karnerona.
Panangliklik iti Angol a Mangpapatay iti Espiritualidad
Ti maudi a palawag a natemaan “Ti Karit ti Panagtalinaed a Sibibiag iti Naespirituan” ket impaay ni Theodore Jaracz, miembro ti Bagi a Manarawidwid, a nagturpos a mismo iti maikapito a klase ti Gilead idi 1946. Dinakamatna nga umuna dagiti nakaal-alingget a kinaranggas a mapaspasamak iti nadumaduma a paset ti lubong, sana impakita nga iti kinapudnona, adda nakarkaro a didigra a mapaspasamak iti sangatauan.
Iti panangadawna iti Salmo 91, inlawlawag ni Kabsat Jaracz no ania ti kaipapanan ti “angol” ken ti “pannakadadael” a namagsakit ken nangpapatay kadagiti minilion a tattao iti naespirituan a pamay-an. Us-usaren ti Diablo ken ti dakes a sistemana dagiti kasla angol a propaganda, a naibatay iti intelektualismo ken materialismo, a mangpakapsut ken mangpapatay iti espiritualidad, ngem ipatalged kadatayo ni Jehova a saan nga umapay daytoy nga angol iti ‘asinoman nga agtaeng iti nalmeng a yan ti Kangatuan.’—Salmo 91:1-7.
“Ti karit,” kinuna ni Kabsat Jaracz, “isu ti panagtalinaed a nasalun-at iti pammati, panagtalinaed iti natalged a lugar. Ditay kayat ti agbalin a kas kadagiti managuyaw nga ‘awanan espiritualidad.’ Daytoy ita ti parikut, a pakaipasanguan ti tunggal maysa kadatayo iti organisasion. Mabalin a maipasangokayo met iti dayta iti pakaibaonanyo kas misionero.” (Judas 18, 19) Ngem naibaga kadagiti agturpos a misionero a kabaelanda a salimetmetan ti espiritualidadda iti pakaibaonanda. Naidagadag a laglagipenda, kas pagarigan, dagiti kakabsat idiay Russia, iti Asia, ken kadagiti pagilian ti Africa nga agib-ibtur iti laksid dagiti panangiparit, nakaro nga ibubusor, pananguyaw, propaganda dagiti ateista, ken pammadakes. Ket iti adu a kaso, adda met dagiti pisikal a problema gapu iti etniko a panagdadangadang ken kinakirang dagiti masapsapul iti biag.
No kumapuy ti espiritualidad, “nasken a tamingen ti makagapu iti problema sa solbaren dayta babaen ti panangyaplikar iti balakad ti Sao ti Dios.” Naipaay dagiti ehemplo iti Biblia. Naidagadag idi ken Josue nga inaldaw a basaenna a siaalumamay ti bukodna a kopia ti Linteg. (Josue 1:8) Idi nasarakan ti libro a naglaon iti Linteg idi kaaldawan ni Josias, binendisionan ni Jehova ti matalek a pannakaipatungpal dagiti bilin a nailanad iti dayta. (2 Ar-ari 23:2, 3) Naammuan ni Timoteo dagiti nasantuan a sursurat manipud iti kinaubingna. (2 Timoteo 3:14, 15) Saan la a basta nalaing a dumngeg dagiti taga Berea; naikuna a ‘natakneng ti panagpampanunotda’ agsipud ta inaldaw a sinukimatda dagiti Kasuratan. (Aramid 17:10, 11) Ket ni Jesu-Kristo ti kangrunaan nga ulidan ti maysa a makaammo ken nangaramat iti Sao ti Dios.—Mateo 4:1-11.
Iti paggibusan ti palawagna, sibabara a binalakadan ni Kabsat Jaracz dagiti baro a misionero: “Ita nakasaganakayon nga agserbi kas misionero. Ket mapankayton iti ballasiw-taaw, iti literal a pamay-an, iti nadumaduma a paset ti daga. No sanguentayo ti karit a panagtalinaed a sibibiag iti naespirituan, iti kasta saantay a palubosan ti uray ania a mangsinga kadatayo a mangitungpal iti inkeddengtayo nga aramiden. Mapankayo mangasaba a buyogen ti regta, gutugotenyo dagiti dadduma a mangtulad iti pammatiyo, ket kaduadakami a mangikarkararag a pagbiagen koma ni Jehova dagidiay suruanyo a kas iti inaramidna kadatayo. Ket iti kasta adu pay ti maalaw iti naespirituan a didigra a mapaspasamak iti intero a lubong. Adudanto a maitipon kadatayo a mangaramid iti pagayatan ni Jehova. Ket sapay koma ta bendisionannakayo ni Jehova iti panangaramidyo iti dayta.”
Kalpasan ti panangibasa ti tserman kadagiti kablaaw a naggapu iti nagduduma a pagilian iti aglikmut ti lubong, nayawat kadagiti agturpos nga estudiante dagiti diplomada. Kalpasanna naibasa ti nabara a surat ti panagyaman a pinutar dagiti estudiante. Anian a yamanda ken ni Jehova ken iti organisasionna gapu iti naisangsangayan a pannakasanayda ken iti pannakaibaonda kas misionero “iti kaadaywan a paset ti daga”!—Aramid 1:8.
[Kahon iti panid 29]
Estadistika ti Klase
Bilang dagiti pagilian a nairepresentar: 11
Bilang dagiti pagilian a pakaibaonanda: 24
Bilang dagiti estudiante: 48
Bilang dagiti agassawa: 24
Promedio nga edad: 34
Promedio a tawen iti kinapudno: 17
Promedio a tawen iti amin-tiempo a ministerio: 12
[Ladawan iti panid 26]
Ti Maika-107 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.