Mapagulidanan a Tao a Nangawat iti Pannubngar

“AGSIDSIDA Dagiti Buaya iti Zambia iti 30 a Tao Kada Bulan.” Kasta ti impadamag ti maysa a pagiwarnak idiay Africa sumagmamano a tawenen ti napalabas. Sigun iti maysa a zoologist a nangtiliw kadagitoy a reptilia tapno adalenna, “12 a tao ti kasapulan a mangtengngel iti maysa a buaya.” Nakabutbuteng nga ayup ti buaya agsipud ta napigsa unay ti ipus ken pangana!

Iti panangtukoyna iti buaya kas “Leviatan,” inusar ti Namarsua daytoy nga ‘ari dagiti amin a nadaeg nga atap nga animal’ a mangisuro iti napateg a leksion ken Job nga adipenna. (Job 41:1, 34, NW) Napasamak daytoy iti agarup 3,500 a tawenen ti napalabas iti daga ti Uz, nalabit iti makin-amianan a deppaar ti Arabia. Iti panangiladawanna iti daytoy a parsua, kinuna ti Dios ken Job: “Awan ti kauyongan nga agtured a mangriing kenkuana; asino ngarud ti makapagtakder iti sanguanak?” (Job 41:10) Pudno la unay dayta! No kabutengtayo ti buaya, ad-adda koma a mabutengtayo nga agsao iti maibusor iti Daydiay namarsua iti dayta! Naawatan ni Job daytoy a leksion babaen ti panangbigbigna iti biddutna.​—Job 42:1-6.

No madakamat ni Job, mabalin a malagiptayo ti kinamatalek ken panagibturna iti sidong ti pakasuotan. (Santiago 5:11) Kinapudnona, naay-ayo ni Jehova ken Job uray idi sakbay a nasuot iti kasta unay ti pammatina. Iti panangmatmat ti Dios, iti daydi a tiempo “awan ti umasping kenkuana idiay daga, maysa a napalungdo ken nalinteg a lalaki, maysa a managaligaget iti Dios, ken liklikanna ti dakes.” (Job 1:8) Tignayennatay koma daytoy a mangammo iti ad-adu pay maipapan ken Job, iti kasta makitatayo no kasanotay met a maparagsak ti Dios.

Impangrunana ti Relasionna iti Dios

Nabaknang a tao ni Job. Malaksid iti balitok, addaan iti 7,000 a karnero, 3,000 a kamelio, 500 a kabaian nga asno, 1,000 a baka, ken adu nga adipen. (Job 1:3) Ngem nagtalek ni Job ken Jehova, saan nga iti kinabaknang. Kinunana: “No inaramidko a namnamak ti balitok, ken kinunak iti nasudi a balitok, Sika ti talekko; No nagrag-oak agsipud ta ti sanikuak idi dakkel, ken agsipud ta ti imak nakagun-od iti adu . . . Dagitoy isuda met ti kinadangkes a madusaan babaen kadagiti ukom; ta inlibakko koma ti Dios nga adda sadi ngato.” (Job 31:24-28) Kas ken Job, ad-adda koma nga ipategtayo ti nasinged a relasion ken Jehova a Dios ngem dagiti material a banag.

Nainkalintegan a Panangtrato iti Padana a Tao

Kasano ti panangtrato ni Job kadagiti adipenna? Nainkalintegan ken nalaka a maasitgan ni Job kas ipasimudaag dagiti mismo a saona: “No diak impateg ti panggep ti adipenko a lalaki wenno babai, idi nakisinnurotanda kaniak; ania ngarud ti aramidekto intono tumakder ti Dios? Ken intono agsarungkar, ania ti isungbatkonto kenkuana?” (Job 31:13, 14) Impateg ni Job ti asi ni Jehova, isu a naasi met kadagiti adipenna. Anian a nagsayaat nga ulidan, nangruna kadagidiay agak-akem a manangaywan iti uneg ti kongregasion Kristiano! Masapul met a nainkalinteganda, di mangidumduma, ken nalaka a maasitgan.

Maseknan met ni Job kadagidiay saan a kameng ti sangakabbalayanna. Maipapan iti panangisakitna kadagiti dadduma, kinunana: “No pinaritak dagiti napanglaw kadagiti kalikagumda, wenno pinagkullaapko dagiti mata ti balo a babai, . . . no intag-ayko ti imak a maibusor iti ulila, agsipud ta nakitak ti badangko idiay ruangan: no kasta malpay koma ti abagak manipud iti akloaklo, ken ti takkiagko marumek manipud iti tulang.” (Job 31:16-22) Maseknantayo koma kadagiti daksanggasat a kakongregasiontayo.

Gapu ta pudno a maseknan iti padana a tao, managpadagus ni Job kadagiti ganggannaet, isu a nakunana: “Ti ganggannaet saan a nagdagus idiay lansangan; no di ket linuktak dagiti ruanganko iti agpagpagna.” (Job 31:32) Anian a nagsayaat daytoy nga ulidan para kadagiti adipen ti Dios ita! No makigimong iti Kingdom Hall dagiti kabbaro nga interesado iti kinapudno a masarakan iti Biblia, makatulong iti irarang-ayda iti naespirituan no pasangbayentay ida. Siempre, nasken a siaayat a pasangbayentay met dagiti agdaldaliasat a manangaywan ken dadduma pay a Kristiano.​—1 Pedro 4:9; 3 Juan 5-8.

Impakita ni Job ti umiso a kababalin uray kadagiti bumusbusor kenkuana. Saan a maragsakan no dumteng ti didigra iti asinoman a gumurgura kenkuana. (Job 31:29, 30) Imbes ketdi, situtulok a mangaramid iti naimbag kadagiti kasta a tattao. Naipasimudaag daytoy idi sidadaan nga inkararaganna dagiti tallo a lallaki nga immay mangliwliwa kampay idi kenkuana.​—Job 16:2; 42:8, 9; idiligyo ti Mateo 5:43-48.

Saan nga Imoral

Napudno ni Job iti asawana. Pulos a dina impalubos a rumusing iti pusona ti di umiso a rikna iti sabali a babai. Kinuna ni Job: “Nakitulagak kadagiti matak; kasano ngarud ti panagkitak koma iti maysa a birhen? No ti pusok nangituggod iti babai, ken no nagsanebak idiay ruangan ti kaarrubak; no kasta aggiling koma ni asawak nga agpaay iti sabali, ket isu asawaen koma dagiti sabali. Ta dayta isu ti maysa a nakaal-aliaw a biddut; wen, isu ti maysa a kinadangkes a madusaan babaen kadagiti uk-ukom.”​—Job 31:1, 9-11.

Di impalubos ni Job a matulawan ti pusona kadagiti imoral a tarigagay. Imbes ketdi, nalinteg ti kabibiagna. Di pakasdaawan a naay-ayo ti Dios iti daytoy matalek a tao a nangsaranget kadagiti imoral a pakagargarian!​—Mateo 5:27-30.

Maseknan iti Espiritualidad ti Pamilia

Adda idi dagiti tiempo nga agpadaya dagiti annak ni Job ket agiinnawisda nga agkakabsat. Tunggal malpas ti padaya, madanagan ni Job di la ket ta nagbasol dagiti annakna ken Jehova. Isu a nagtignay ni Job, ta kuna ti Nainkasuratan a salaysay: “Kasta idi a dagiti al-aldaw ti panagdayada nabatangbatangdan, a nagbaon ni Job ket sinantipikarna ida, ket bimmangon a nasapa iti bigat, ket nangipaay kadagiti datdaton a mapuoran kas mayalubog iti bilangda amin: ta ni Job kinunana, Mabalin a nagbasol dagiti annakko a lallaki, ket indianda ti Dios kadagiti puspusoda.” (Job 1:4, 5) Sigurado a naitukit kadagiti kameng ti pamilia ni Job ti pannakaseknanna a rumbeng a pagraemanda ni Jehova, agbutengda kenkuana, ken magnada kadagiti dalanna!

Iti kaaldawantayo, dagiti Kristiano nga ulo ti pamilia nasken nga isuroda iti pamiliada ti Sao ti Dios, ti Biblia. (1 Timoteo 5:8) Ket awan duadua a maitutop nga ikararaganda dagiti kameng ti pamiliada.​—Roma 12:12.

Simamatalek a Nagibtur iti Sidong ti Pakasuotan

Pagaammo ti kaaduan a managbasa iti Biblia dagiti nakaro a suot a sinagaba ni Job. Imbaga ni Satanas a Diablo nga iti sidong dagiti narigat a kasasaad, ilunod ni Job ti Dios. Inawat ni Jehova daytoy a karit, ket dinidigra a dagus ni Satanas ni Job. Napukaw ti amin nga animalna. Nakarkaro pay, natay amin nga annakna. Di nagbayag, pinakaptan ni Satanas ni Job iti naut-ot a busali manipud ulo agingga iti dapan.​—Job, kapitulo 1, 2.

Ania ti nagbanaganna? Idi sinugsogan ti asawana nga ilunodna ti Dios, kinuna ni Job: “Sika agsaoka a kas ti panagsao ti maysa kadagiti maag a babbai. Ania? Awatentayto aya ti naimbag iti biang ti Dios, ket ditayto awaten ti dakes?” Kuna pay ti rekord ti Biblia: “Iti amin dagitoy saan a nagbasol ni Job kadagiti bibigna.” (Job 2:10) Wen, simamatalek a nagibtur ni Job ket iti kasta pinaneknekanna nga ulbod ti Diablo. Ibturantay met koma dagiti pakasuotan ket paneknekantayo nga agserserbitayo ken Jehova a Dios gapu ta pudpudno nga ay-ayatentayo.​—Mateo 22:36-38.

Sipapakumbaba nga Inawatna ti Pannubngar

Nupay mapagulidanan iti adu a pamay-an, saan a perpekto a tao ni Job. Kinunana a mismo: “Asino ti makabalin a mangyeg iti maysa a nadalus nga agtaud iti narugit? Awan.” (Job 14:4; Roma 5:12) Isu nga idi kinuna ti Dios a napalungdo ni Job, pudno dayta iti anag a nagbiag a mayannurot iti amin a ninamnama ti Dios iti maysa kadagiti imperpekto ken managbasol a tattao nga agserserbi kenkuana. Anian a makaparegta!

Inibturan ni Job ti suot a sinagabana, ngem adda naipalgak a pakapilawanna. Idi nadamagda amin a didigra a dimteng kenkuana, simmarungkar ti tallo a lallaki tapno liwliwaenda kampay idi ni Job. (Job 2:11-13) Imbagada a dusdusaen ni Jehova ni Job gapu kadagiti nadagsen a basolna. Natural laeng a nasaktan ni Job kadagitoy a di umiso a pammabasol, ket sipipinget nga inkalinteganna ti bagina. Ngem nasobraanna. Imparipiripna pay ketdi nga isu ket nalinlinteg ngem iti Dios!​—Job 35:2, 3.

Gapu ta ay-ayaten ti Dios ni Job, inusarna ti maysa nga agtutubo a mangipatuldo iti biddut ni Job. Kuna ti salaysay: “Idin nakaunget ni Eliu . . . Nagluksaw a maibusor ken Job, agsipud ta pinalpalintegna ti bagina a saan ket nga iti Dios.” Kinuna ni Eliu: “Ni Job kinunana idi, Nalintegak, ket ti Dios inikkatna ti kalintegak.” (Job 32:2; 34:5) Nupay kasta, saan nga inanamongan ni Eliu ti di umiso a panangipapan dagiti tallo a ‘manangliwliwa’ a dusdusaen kano ti Dios ni Job gapu kadagiti basolna. Imbes ketdi, inyebkas ni Eliu ti panagtalekna iti kinatarnaw ni Job, ket imbalakadna kenkuana: “Ti panggep adda iti sango [ni Jehova], ket agpannurayka kenkuana.” Wen, rumbeng a nagpannuray koma ni Job ken Jehova imbes a sidadarasudos nga ikalinteganna ti bagina. Impanamnama ni Eliu ken Job: “Iti kinahustisia ken nawadwad a kinalinteg [ti Dios] dinto mangpaliday.”​—Job 35:14; 37:23.

Nasken a maatur ti panagpampanunot ni Job. Gapuna, inikkan ni Jehova ni Job iti leksion maipapan iti kinabassit ti tao no idilig iti kinanaindaklan ti Dios. Dinakamat ni Jehova ti daga, baybay, nabituen a langit, dagiti animal, ken adu a dadduma pay a nakaskasdaaw a parsua. Kamaudiananna, dinakamat ti Dios ti Leviatan​—ti buaya. Sipapakumbaba nga inawat ni Job ti pannubngar, ket iti daytoy a banag, mapagulidanan met ni Job.

Nupay mabalin a nasayaat ti panagserbitayo ken Jehova, agbidduttayo latta. No serioso ti naaramidtayo a biddut, mabalin nga ilintegnatayo ni Jehova iti nadumaduma a pamay-an. (Proverbio 3:11, 12) Mabalin a sumiplot iti panunottayo ti maysa a teksto a mangsidir iti konsiensiatayo. Nalabit adda mabasatayo iti Pagwanawanan wenno dadduma pay a publikasion ti Watch Tower Society a mangipabigbig iti bidduttayo. Wenno mabalin a siaayat nga ipakita ti maysa kadagiti kapammatiantayo nga adda nasalungasingtayo a prinsipio ti Biblia. Ania ti reaksiontayo iti kasta a pannubngar? Nagbabawi idi ni Job, a kunkunana: “Agbabawiak iti tapok ken dapdapo.”​—Job 42:6.

Ginunggonaan ni Jehova

Ginunggonaan ni Jehova ni Job. Impalubosna nga agbiag ti adipenna iti 140 pay a tawen. Iti las-ud dayta a panawen, ad-adu nga amang ti naited kenkuana ngem ti napukawna. Ket nupay natay ni Job idi agangay, sigurado a mapagungarto iti baro a lubong ti Dios.​—Job 42:12-17; Ezequiel 14:14; Juan 5:28, 29; 2 Pedro 3:13.

Mainanamatayo met ti parabur ken pamendision ti Dios no sisusungdo nga agserbitayo kenkuana ken awatentayo ti amin a naibatay-Biblia a pannubngar. Iti kasta, mainanamatayo ti agbiag iti baro a sistema dagiti bambanag ti Dios. Napatpateg pay, maidaydayawtayto ti Dios. Masupapakanto ti kinamatalektayo ken mangted dayta iti kanayonan a pammaneknek nga agserserbi kenkuana dagiti tattaona, saan a gapu kadagiti personal nga interes, no di ket gapu iti naimpusuan nga ayat. Anian a pribilehiotayo a paragsaken ti puso ni Jehova, kas iti inaramid ni matalek a Job, a sipapakumbaba a nangawat iti pannubngar!​—Proverbio 27:11.

[Dagiti Ladawan iti panid 26]

Impakita ni Job ti naayat a pannakaseknan kadagiti ulila, balo, ken dadduma pay

[Dagiti Ladawan iti panid 28]

Sibabaknang a nagunggonaan ni Job gapu iti sipapakumbaba a panangawatna iti pannubngar