Malagipyo Pay Kadi?

Nagustuanyo met la kadi a binasa dagiti nabiit pay a ruar ti Pagwanawanan? Bueno, kitaenyo no masungbatanyo dagiti sumaganad a saludsod:

• Apay a nalaka a nakastrek ti Krismas idiay Korea?

Adda kadaanan a pammati idiay Korea ken iti dadduma a pagilian maipapan iti maysa a dios ti kosina a maipagarup a lumabas iti simburion tapno mangipaay kadagiti regalo iti Disiembre. Kasta met a kalpasan ti Gubat Sangalubongan II, nagibunong kadagiti regalo ken pangsaranay dagiti soldado ti E.U. kadagiti lokal a simbaan.​—12/15, panid 4, 5.

• Kas kaitungpalan ti Isaias 21:8, ania nga “agwanawan” ti insaad ti Dios iti kaaldawantayo?

Kas klase agwanawan, ipakpakaammo dagiti napulotan iti espiritu a Kristiano kadagiti tattao ti kaipapanan dagiti pasamak iti lubong a kaitungpalan ti padto ti Biblia. Tinulonganda met dagiti estudiante ti Biblia a mangilasin ken mangilaksid kadagiti saan a nainkasuratan a doktrina ken ar-aramid.​—1/1, panid 8, 9.

• Asino dagiti “Kakabsat a Polaco”?

Maysa a bassit a narelihiosuan a grupo idiay Poland idi maika-16 ken maika-17 a siglo a nangiparegta iti panangsurot iti Biblia ket iti kasta inlaksidna dagiti agdama idi a doktrina ti simbaan, kas iti Trinidad, panangbuniag iti maladaga, ken ti umap-apuy nga impierno. Idi agangay, nakaro ti pannakaidadanesda ken inkapilitan a naiwarasda iti nadumaduma a pagilian.​—1/1, panid 21-3.

• Apay nga ad-adda a mapagtalkan dagiti padto ti Biblia ngem kadagiti padles dagiti agkunkuna a makaammo iti masanguanan wenno astrologo?

Saan a mapagtalkan dagiti tattao nga agkunkuna a propeta gapu ta laksidenda ni Jehova ken ti Biblia. Dagiti laeng padto ti Biblia ti makatulong tapno maawatanyo no kasano a maikanatad dagiti paspasamak iti panggep ti Dios, a manayon a pakagunggonaanyo ken ti pamiliayo.​—1/15, panid 3.

• Ania dagiti sumagmamano nga ebidensia a mangpaneknek nga agbibiagtayon iti maudi nga al-aldaw?

Makitkitatayo dagiti epekto ti pannakaigarangugong ni Satanas manipud langit. (Apocalipsis 12:9) Agbibiagtayon iti tiempo ti maudi nga “ari” a nadakamat iti Apocalipsis 17:9-11. Bumasbassiten ti bilang dagiti pudno a napulotan a Kristiano, ngem agparang nga adda pay la ditoy daga ti sumagmamano kadakuada inton mangrugi ti dakkel a rigat.​—1/15, panid 12, 13.

• Kaano a naisurat ti libro ni Habacuc, ken apay a paginteresantayo dayta?

Naisurat daytoy a libro ti Biblia idi agarup 628 K.K.P. Naglaon dayta iti panangukom ni Jehova iti nagkauna a Juda ken Babilonia. Imbatadna met ti asidegen a panangukom ti Dios iti agdama a dakes a sistema.​—2/1, panid 8.

• Sadinot’ pakasarakantayo idiay Biblia iti nainsiriban a pammagbaga ti maysa nga ina kadagiti natalunggadingan nga assawa a babbai?

Nagsayaat a gubuayan ti kasta a pammagbaga ti maudi a kapitulo ti libro a Proverbio, kapitulo 31.​—2/1, panid 30, 31.

• Apay a pagyamanantayo ti panangipalgak ni Jehova “iti panunot ni Kristo” kadatayo? (1 Corinto 2:16)

Babaen ti salaysay ti Ebanghelio, insuro kadatayo ni Jehova dagiti pampanunot, rikrikna, ar-aramid, ken impangpangruna ni Jesus. Tumulong daytoy kadatayo nga ad-adda nga agbalin a kas ken Jesus, nangnangruna iti panangipategtayo iti mangsalbar-biag a trabaho a panangasaba.​—2/15, panid 25.

• Sungbatan kadi ti Dios dagiti kararag iti kaaldawantayo?

Wen. Nupay ipakita ti Biblia a saan a sungbatan ti Dios ti amin a kararag, paneknekan dagiti moderno-aldaw a kapadasan a masansan nga ipangagna ti kararag dagiti tattao nga umararaw iti liwliwa ken tulong kas kadagiti bambanag a mainaig iti panangrisut kadagiti parikut ti agassawa.​—3/1, panid 3-7.

• Kasanotay a magun-od ti bileg nga aggapu iti Dios?

Mabalintay a magun-od dayta babaen ti kararag, ti Biblia, ken Nakristianuan a panagtitimpuyog.​—3/1, panid 15, 16.

• Kasano a matulongan dagiti nagannak dagiti annakda nga ad-adda a magunggonaan kadagiti Nakristianuan a gimong?

Matulonganda dagiti annakda nga agtalinaed a siririing, nalabit babaen ti panangpaturogda kadagitoy sakbay a mapanda makigimong. Mabalin a maparegta dagiti ubbing nga “aginotar,” kas iti panangkur-itda iti papelda no mangngegda dagiti kabesadoda a sao wenno nagan.​—3/15, panid 17, 18.

• Ania ti sumagmamano a banag a maadaltayo iti ulidan ni Job?

Impangpangruna ni Job ti relasionna iti Dios, nainkalintegan ti panangtratona iti padana a tao, nagtalinaed a matalek iti asawana, naseknan iti espiritualidad ti pamiliana, ken simamatalek a nagibtur iti sidong ti pakasuotan.​—3/15, panid 25-7.

• Adda kadi nalmeng a kodigo (code) ti Biblia a mangibuksil kadagiti nalimed a mensahe?

Awan. Mabalin met a kunaen nga adda nalimed a mensahe uray kadagiti sekular a libro. Saan a mapagtalkan dagiti maipagarup a mensahe iti Biblia gapu ta agsasabali ti ispeling dagiti sasao kadagiti Hebreo a manuskrito.​—4/1, panid 30, 31.