Apay nga Agbalinkayo Koma a Managsakripisio?
Ni Bill ket maysa a de pamilia a di kumurang a 50 ti tawenna ken maestro iti teknolohia ti konstruksion. Adu a lawas iti las-ud ti makatawen a tumultulong nga agplano ken mangbangon kadagiti Kingdom Hall dagiti kongregasion dagiti Saksi ni Jehova babaen ti bukodna a gastos. Ni Emma ket maysa a de adal ken natalento a balasang nga agtawen iti 22. Kas maysa a ministro, nasurok a 70 nga oras iti kada bulan ti busbusbosenna a tumulong kadagiti tattao a maaddaan iti pannakaawat iti Biblia, imbes a bin-ig a personal a kalat wenno ragragsak ti sanguenna. Nagretiron da Maurice ken Betty. Nupay mabalinda koman ti aginana, immakarda iti sabali a pagilian tapno tumulong kadagiti tattao sadiay a mangammo iti panggep ti Dios para iti daga.
SAAN nga ibilang dagitoy nga indibidual ti bagbagida a naisangsangayan wenno naisalsalumina. Gagangayda laeng a tattao a mangar-aramid iti ammoda nga umiso. Apay nga us-usarenda ti tiempo, pigsa, abilidad, ken sanikuada nga agpaay iti pagimbagan ti sabsabali? Nauneg a panagayat iti Dios ken iti padada a tao ti mangtigtignay kadakuada. Aminda ti addaan iti napaypayso nga espiritu ti panagsakripisio a kas bunga ti kasta nga ayat.
Ania ti kayat a sawen ti espiritu ti panagsakripisio? Bueno, ti panagsakripisio dina kaipapanan ti panagbiag a kas panatiko wenno ermitanyo. Dina kalikaguman ti nalabes a panangtallikud iti bagi a mangipaidam iti ragsak wenno pannakapnektayo. Sigun iti The Shorter Oxford English Dictionary, ti panagsakripisio kaipapananna laeng “ti panangisuko kadagiti kabukbukodan a paginteresan, ragsak, ken tarigagay maigapu iti pagrebbengan wenno pagimbagan ti sabsabali.”
Ni Jesu-Kristo—Ti Kangrunaan nga Ulidan
Ni Jesu-Kristo a bugbugtong nga Anak ti Dios ti kangrunaan nga ulidan iti panagsakripisio. Sigurado a naragsak ken makapnek unay ti panagbiagna sakbay a nagbalin a tao. Nadekket ken nasinged ti pannakilangenna ken Amana ken iti adu nga espiritu a parsua. Maysa pay, makapagagar ken makaay-ayo dagiti trabaho a nangipakatanna kadagiti abilidadna kas “mamangulo nga agobra.” (Proverbio 8:30, 31) Adayo a nasaysayaat ti kasasaad ti panagbiagna ngem iti mabalin a tagiragsaken uray ti kabaknangan a tao ditoy daga. Naited kenkuana ti natan-ok ken nasayaat a saad idiay langit, a sumaruno ken Jehova a Dios.
Kaskasdi, ‘inuksoban [ti Anak ti Dios] ti bagina ket innalana ti langa ti maysa nga adipen ket nagbalin a kaas-asping ti tattao.’ (Filipos 2:7) Sitatallugod a pinanawanna dagiti kabukbukodanna a pagimbagan. Nagbalin a tao ken indatonna ti biagna a kas subbot tapno pukawenna ti dakes a kasasaad a pinarnuay ni Satanas. (Genesis 3:1-7; Marcos 10:45) Kaipapanan dayta ti pannakipagnaedna kadagiti managbasol a tattao iti lubong nga iturturayan ni Satanas a Diablo. (1 Juan 5:19) Masapul met nga ibturanna ti rigat ken panagsagaba. Ngem determinado ni Jesu-Kristo a mangaramid iti pagayatan ni Amana aniaman ti mapasamak kenkuana. (Mateo 26:39; Juan 5:30; 6:38) Daytoy ti naan-anay a nakasubokan ti ayat ken kinasungdo ni Jesus. Pagpatinggaan ngata ti panagsakripisiona? “Impakumbabana ti bagina,” kinuna ni apostol Pablo, “ket nagtulnog agingga iti ipapatay, wen, ipapatay iti kayo a pagtutuokan.”—Filipos 2:8.
“Pagtalinaedenyo Kadakayo Daytoy a Kababalin iti Isip”
Maparegtatayo a mangtulad iti ulidan ni Jesus. “Pagtalinaedenyo kadakayo daytoy a kababalin iti isip nga adda met ken Kristo Jesus,” indagadag ni Pablo. (Filipos 2:5) Kasanotay a maaramid daytoy? Ti maysa a pamay-an ket babaen ti ‘agtultuloy a panangkita, saan nga iti personal a panaginteres kadagiti laeng bukodyo a bambanag, no di ket kasta met iti personal a panaginteres kadagiti bambanag ti sabsabali.’ (Filipos 2:4) Ti napaypayso nga ayat “saanna a sapulen dagiti bukodna a pagimbagan.”—1 Corinto 13:5.
Kanayon a madadaan ken sipapasnek dagiti naayat a tattao nga agserbi kadagiti sabsabali. Nupay kasta, ti laeng bukodda a pagimbagan ti pampanunoten ti kaaduan a tattao ita. Managimbubukodan ti lubong. Masapul nga agaluadtayo iti espiritu ti lubong ta no dayta ti mangtubay iti panunot ken ugalitayo, mabalin a dagiti kabukbukodantayo a tarigagay ti maipangpangruna. Iti kasta, malapunosto iti naagum a panggep ti aniaman nga aramidentayo—ti panangusartayo iti panawen, pigsa, ken sanikuatayo. Masapul ngarud a sipipinget a sarangtentayo ti kasta nga impluensia.
Addada tiempo nga uray ti naayat a balakad mabalin a pakapsutenna ti determinasiontayo nga agsakripisio. Tangay ammona ti pagtungpalan ti panagsakripisio ni Jesus, kinuna ni apostol Pedro: “Kaasiam ta bagim, Apo.” (Mateo 16:22) Agminar a dina maawat a situtulok ni Jesus a matay maigapu iti kinasoberano ni Amana ken ti pannakaisalakan ti sangatauan. Gapuna, ginay-atna nga allukoyen ni Jesus a dina koma aramiden ti kasta.
‘Paglikudam ti Bagim’
Ania ti insungbat ni Jesus? Kuna ti salaysay: “Isu timmaliaw, kimmita kadagiti adalanna ket binabalawna ni Pedro, ket kinunana: ‘Inka iti likudak, Satanas, agsipud ta pampanunotem, saan a ti pampanunot ti Dios, no di ket ti pampanunot dagiti tattao.’” Kalpasanna pinaasideg ni Jesus dagiti tattao ken dagiti adalanna ket kinunana: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan ket agtultuloy a surotennak.”—Marcos 8:33, 34.
Agarup 30 a tawen kalpasan ti panangbalakadna ken Jesus, impakita ni Pedro a maawatanna idin ti kaipapanan ti panagsakripisio. Dina binalakadan dagiti padana a manamati nga agpamayan ken ay-ayenda ti bagida. Imbes ketdi, binagbagaan ida ni Pedro nga isaganada dagiti panunotda nga agtignay ken saandan a pasukog kadagiti sigud a nailubongan a tarigagayda. Masapul nga ipangpangrunada ti panangaramid iti pagayatan ti Dios iti biagda iti laksid dagiti pakasuotan.—1 Pedro 1:6, 13, 14; 4:1, 2.
Ti kasayaatan a maaramid ti asinoman kadatayo isu ti panangipaay ken Jehova iti amin nga adda kadatayo, a simamatalek a tuladentayo ni Jesu-Kristo ken agpaidalan iti Dios iti amin nga aramidtayo. Nasayaat a pagwadan ti impakita ni Pablo iti daytoy a banag. Gapu ta nariknana ti kinaganat ti tiempo ken gapu iti panagyamanna ken Jehova, inidianna dagiti nailubongan nga ambision ken kalat a nanglapped koma kenkuana a nangaramid iti pagayatan ti Dios. “Iti biangko,” kinunana, “siraragsakakto unay a mangbusbos ken naan-anay a mabusbos” a maipaay iti pagimbagan ti sabsabali. (2 Corinto 12:15) Impakat ni Pablo dagiti abilidadna a nangitandudo iti pagayatan ti Dios, saan a ti bukodna a pagayatan.—Aramid 20:24; Filipos 3:8.
Kasanotay a mailasin no addaantayo iti panangmatmat a kas ken apostol Pablo? Mabalintay nga isaludsod dagitoy: Ania ti pangus-usarak iti tiempo, pigsa, abilidad, ken sanikuak? Us-usarek kadi dagitoy ken ti dadduma pay a napateg a sagut nga agpaay iti bukodko a pagimbagan, wenno us-usarek a pangtulong iti sabsabali? Pinampanunotko kadin ti makipaset a naan-anay iti mangispal-biag a trabaho a panangikasaba iti naimbag a damag, nalabit kas maysa nga amin-tiempo a manangiwaragawag iti Pagarian? Ad-adda pay kadi a makatulongak kadagiti trabaho a kas iti panangbangon ken panangmantener kadagiti Kingdom Hall? Nakasaganaak kadi a tumulong kadagiti makasapul? Ipapaayko kadi ken Jehova ti kasayaatan?—Proverbio 3:9.
“Ad-adu ti Kinaragsak iti Panangted”
Ngem nainsiriban kadi a talaga ti panagsakripisio? Wen! Ammo ni Pablo ta napasaranna a mismo a makagunggona unay ti panagsakripisio. Nangyeg dayta kenkuana iti napalaus a ragsak ken personal a pannakapnek. Kasta ti impalawagna kadagiti panglakayen a taga Efeso idi nakisao kadakuada idiay Mileto. Kinuna ni Pablo: “Impakitak kadakayo iti amin a bambanag a babaen ti kasta a panagbannog [iti managsakripisio a pamay-an] masapul a badanganyo dagidiay nakapuy, ket masapul a laglagipenyo dagiti sasao ni Apo Jesus, idi isu met laeng kinunana, ‘Ad-adu ti kinaragsak iti panangted ngem iti panangawat.’” (Aramid 20:35) Minilion a tattao ita ti naragsak unay gapu ta ipakpakitada daytoy a kita ti espiritu. Agrag-onto met dagidiay gunggonaan ni Jehova iti masanguanan gapu ta impangpangrunada dagiti banag nga agpaay iti Dios ken kadagiti sabsabali imbes a ti bukodda a pagimbagan.—1 Timoteo 4:8-10.
Idi napagsaludsodan ni Bill no apay a tumultulong kadagiti dadduma a mangbangon kadagiti Kingdom Hall, kinunana: “Pagragsakak unay ti tumulong iti kastoy a wagas kadagiti babassit a kongregasion. Makapnek kaniak ti panangaramat kadagiti talento ken abilidadko iti pagsayaatan dagiti dadduma.” Apay nga ar-aramaten ni Emma ti pigsa ken abilidadna a tumulong iti sabsabali a mangammo iti kinapudno manipud iti Kasuratan? “Awanen ti sabali pay a mapanunotko nga aramiden. Tangay kaub-ubingak pay laeng ken maaramidak dayta, kayatko nga aramiden ti amin a kabaelak a mangparagsak ken Jehova ken tumulong kadagiti sabsabali. Nagbassit la a panangsubad ti panangisakripisiok iti sumagmamano a material a pagnam-ayan. Ar-aramidek laeng ti maiparbeng gapu iti naaramidan ni Jehova maipaay kaniak.”
Saan a pagbabawyan da Maurice ken Betty ti dida panangipangpangruna iti nasaliwanwan a panagbiag, kalpasan ti adu a tawen a panangigaedda a nangaywan iti pamiliada. Ita ta nagretirodan, tarigagayanda pay nga aramaten ti biagda iti banag a makatulong ken makagunggona. “Dimi kayat ti napamayan a panagbiag ita,” kunada. “Ti panangtulong iti dadduma a mangammo iti maipapan ken Jehova iti sabali a pagilian ikkannakami iti gundaway nga agtultuloy nga agaramid iti banag a makagunggona.”
Determinadokayo kadi nga agsakripisio? Saan a nalaka dayta. Agtultuloy ti dangadang iti nagbaetan dagiti natauan, managbasol a tarigagaytayo ken ti napasnek a tarigagaytayo a mangparagsak iti Dios. (Roma 7:21-23) Ngem mapagballigiantayo dayta a dangadang no agpaidalantayo ken Jehova iti biagtayo. (Galacia 5:16, 17) Dinanto pulos lipaten ti panagsakripisiotayo nga agserbi kenkuana ket gunggonaannatayto iti nawadwad. Wen, ‘luktanto [ni Jehova a Dios] dagiti tawtawa ti langit, ket ibuyatnanto kadatayo ti bendision, nga awanto ti lugar a makalaon nga umawat.’—Malakias 3:10; Hebreo 6:10.
[Ladawan iti panid 23]
Addaan ni Jesus iti espiritu ti panagsakripisio. Dakayo ngay?
[Dagiti Ladawan iti panid 24]
Inggaed ni Pablo nga inkasaba ti Pagarian