Kasanoyo a Rukoden ti Balligi?

ITI maysa a diksionario, nadepinar ti balligi kas “ti pannakagun-od iti kinabaknang, pabor, wenno kinatan-ok.” Kompleto kadi dayta a depinasion? Kinabaknang, pabor, wenno kinatan-ok la kadi ti pakarukodan iti balligi? Sakbay a sumungbatkayo, usigenyo daytoy: Saan a bimmaknang iti material ni Jesu-Kristo bayat ti panagbiagna. Saanna a nagun-od ti anamong ti kaaduan a tattao; ken di met pinadayawan dagiti nalatak a tattao idi kaaldawanna. Kaskasdi, naballigi a tao ni Jesus. Apay?

Idi adda ni Jesus ditoy daga, isu ket “nabaknang iti Dios.” (Lucas 12:21) Kalpasan ti panagungarna, binalangatan ti Dios “iti dayag ken dayaw” kas gunggonana. Intan-ok ni Jehova ti Anakna “iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan.” (Hebreo 2:9; Filipos 2:9) Ti panagbiag ni Jesus pinaragsakna ti puso ni Jehova. (Proverbio 27:11) Naballigi ti panagbiagna ditoy daga gapu ta natungpal ti panggep daytoy. Inaramid ni Jesus ti pagayatan ti Dios ken indayawna ti naganna. Kas supapak, pinadayawan ti Dios ni Jesus iti maysa a kita ti kinabaknang, pabor, ken kinatan-ok a nikaanoman dinto mapadasan ti siasinoman a de adal, politiko, wenno popular nga atleta. Kinapudnona, ni Jesus ti kaballigian a tao a nagbiag ditoy daga.

Ammo dagiti Kristiano a nagannak a no suroten dagiti annakda ti addang ni Kristo, nga agbalinda a nabaknang iti Dios kas ken Jesus, masagrapda ita ti nawadwad a bendision ken tagiragsakenda dagiti nakaskasdaaw a gunggona iti umay a sistema dagiti bambanag. Awanen ti nasaysayaat para iti maysa nga agtutubo a panangsurot iti addang ni Kristo ngem iti panagaramid iti trabaho nga inaramid ni Jesus​—babaen ti pannakiraman iti amin-tiempo a ministerio no mabalin.

Ngem iti dadduma a kultura, saan a kadawyan kadagiti agtutubo ti makipaset iti amin-tiempo a ministerio. No malpas nga ageskuela ti maysa nga agtutubo a lalaki, manamnama nga agtrabaho, mangasawa, ken agpamilia. No dadduma, dagiti agtutubo a dimmakkel kadagita a kultura di nainkalintegan a bumdengda a sumrek iti amin-tiempo a ministerio. (Proverbio 3:27) Apay? Gapu iti panangpilit, tumulokda kadagiti nakaugalian a pagalagadan. Kasta ti napasamak ken Robert.a

No Agsupadi ti Kultura ken Konsiensia

Napadakkel ni Robert kas maysa kadagiti Saksi ni Jehova. Bayat ti kinatin-edyerna, saan a nasayaat ti kababalin ken dagiti kakaduana. Nagdanag ni nanangna. Gapuna, kiniddawna iti maysa a payunir wenno amin-tiempo a ministro dagiti Saksi ni Jehova a paregtaenna ti barona. Insalaysay ni Robert ti simmaruno a napasamak.

“Talaga nga apresiarek ti pannakaseknan kaniak ti kabsat a payunir. Gapu iti nasayaat nga ulidanna, naguyugoyak nga agpayunir kas karerak apaman a makaturposak. Dayta ti namagdanag manen ken Nanang​—ngem gapu iti sabali a rason. Ngamin iti kulturami, awan balena no agpayunir a dagus ti maysa a balasang apaman a makagraduar, ngem maikalikagum iti maysa a baro a maaddaan pay nga umuna iti natalged a pagsapulan sakbay nga agpayunir.

“Nagtrabahoak ken impundarko ti bukodko a negosio. Di nagbayag, naigamerak iti negosio ken gagangay laengen kaniak ti makigimong ken mangasaba. Nakonsiensiaak​—ammok a napaspasnek pay koma ti panagserbik ken Jehova. Nupay kasta, pudno a narigat ti mangpaay iti namnamaen dagiti dadduma nga aramidek, ngem naragsakak ta nabaelak dayta. Naasawaanakon ken dua a tawenmin a payunir ken baketko. Nabiit pay a nadutokanak kas maysa a ministerial nga adipen iti kongregasion. Makunak a sipaprangka a talaga a mapnekak itan nga agserserbi ken Jehova iti amin a pusok ken iti amin a kabaelak.”

Masansan a parparegtaen daytoy a magasin dagiti agtutubo nga adalenda ti agtrabaho wenno agsanayda a naimbag​—bayat nga ages-eskuelada no mabalin. Agpaay iti ania a panggep? Tapno bumaknang? Saan. Ti kangrunaan a rason ket tapno masuportaranda a naimbag ti bagida kas adulto ken makapagserbida a naan-anay ken Jehova iti amin a kabaelanda, nangnangruna iti amin-tiempo a ministerio. Ngem masansan a maigamer dagiti agtutubo iti sekular a karerada ket matagibassiten ti kinapateg ti ministerio. Adda sumagmamano a di pulos agtarigagay a sumrek iti amin-tiempo a panagserbi. Apay a dida sumrek?

Ipanayag dagiti komento ni Robert ti sumagmamano a makagapu. Nagnegosio ni Robert apaman a nasursurona ti trabahona. Di nagbayag, kas man la adda iti treadmill nga awan ti pagturonganna. Kalatna ti agbalin a natalged iti pinansial. Ngem adda aya asinoman iti uneg wenno iti ruar ti kongregasion Kristiano a naan-anay a makaragpat iti dayta a kalat? Rumbeng nga ikagumaan dagiti Kristiano ti responsable a mangged, a sipapasnek nga asikasuenda dagiti pinansial nga obligasionda; ngem rumbeng met a bigbigenda a kadagitoy tiempo ti rigat, manmano laeng dagiti makaragpat iti ibilangda a pudpudno a kinatalged iti pinansial. Gapuna, makaliwliwa unay kadagiti Kristiano ti kari ni Jesus a nailanad iti Mateo 6:33.

Naragsak ni Robert ta sinurotna ti tarigagay ti pusona imbes a ti diktar ti kulturada. Tagtagiragsakenna ita ti amin-tiempo a panagserbi. Wen, maysa a nadayaw a karera ti amin-tiempo a ministerio. Natalna ti rikna ni Robert gapu ta agserserbi ken Jehova, a sigun kenkuana, ‘iti amin a kabaelanna.’

Ipakat ti Amin nga Abilidadyo

Adu dagiti masirib a Saksi ni Jehova. Nasaririt ti dadduma, sa adda met dagiti nasigo a trabahador. Nagtaud amin dagitoy a saguday ken Jehova, a mangmangted “iti biag ken anges ken amin a bambanag iti amin a tattao.” (Aramid 17:25) Awan kaes-eskan dagitoy a saguday no awan biag.

Maiparbeng laeng ngarud a pagserbitay ken Jehova ti naidedikar a biagtayo. Kasta ti inaramid ti masirib nga agtutubo a lalaki a nagbiag idi umuna a siglo K.P. Nagtaud iti natan-ok a pamilia, dimmakkel daytoy a lalaki iti nalatak a siudad ti Tarso iti Cilicia. Nayanak a Judio ngem tinawidna ken tatangna ti pannakipagili iti Roma. Nangted dayta kenkuana iti adu a kalintegan ken pribilehio. Idi nataenganen, inadalna ti Linteg babaen ti maysa kadagiti kalaingan a “propesor” idi a tiempo​—ni Gamaliel. Kasla mabiitna la a magun-od ti ‘kinabaknang, pabor, ken kinatan-ok.’​—Aramid 21:39; 22:3, 27, 28.

Siasino daytoy nga agtutubo a lalaki? Saulo ti naganna. Ngem nagbalin a Kristiano ni Saulo ket idi agangay nagbalin a ni apostol Pablo. Binaybay-anna dagiti sigud nga ambisionna ket inusarna ti intero a biagna iti panagserbi ken Jehova kas Kristiano. Nagdinamag ni Pablo kas maysa a naregta a manangaskasaba iti naimbag a damag, saan a kas maysa a nalatak nga abogado. Kalpasan ti dandani 30 a tawen a panagmisionerona, nagsurat ni Pablo kadagiti gagayyemna a taga Filipos. Impalagipna ti sumagmamano a nagapuananna sakbay a nagbalin a Kristiano sana kinuna: “Maigapu ken [Jesu-Kristo] inawatko ti pannakaipukaw ti amin a bambanag ket ibilangko ida kas adu a basura, tapno magun-odak ni Kristo.” (Filipos 3:8) Saan a nagbabawyan ni Pablo ti wagas ti panagbiagna!

Komusta met ngay ti nasursuro ni Pablo ken Gamaliel? Nakatulong aya dayta kenkuana? Wen! Adu a gundaway nga isut’ nakatulong iti “panangidepensa ken legal a panangipasdek iti naimbag a damag.” Ngem kangrunaan a trabaho ni Pablo ti panangikasaba iti naimbag a damag​—banag a nikaanoman di naisuro ti immun-una a panagadalna.​—Filipos 1:7; Aramid 26:24, 25.

Kasta met itatta, naipakat ti dadduma dagiti saguday ken abilidadda ken uray ti adalda a maipaay iti intereses ti Pagarian. Kas pagarigan, naiturpos ni Amy dagiti kurso a komersio ken abogasia iti unibersidad. Dakkel ti sueldona idi agtartrabaho iti opisina ti abogado, ngem agserserbi itan iti maysa kadagiti sanga nga opisina ti Watch Tower Society kas boluntario a ministro nga awan sueldona. Kastoy ti panangdeskribir ni Amy iti agdama a kasasaadna: “Patiek a napilik ti kasayaatan iti biag. . . . Diak gamden nga isukat ti sasaadek iti asinoman kadagiti kapatadak iti unibersidad. Pagpannakkelko ti kurso a pinilik. Adda aminen a kasapulak ken kayatko​—ti makapnek, naragsak a biag ken karera a makagunggona ken makaay-ayo.”

Pinili ni Amy ti kurso a nangyeg kenkuana iti natalna a panunot, pannakapnek, ken parabur ni Jehova. Sigurado a kasta met ti kayat dagiti Kristiano a nagannak para kadagiti annakda!

Balligi iti Nakristianuan a Ministerio

Siempre, nasken ti umiso a panangmatmat iti balligi iti Nakristianuan a ministerio. Mariknatayo a naballigitayo no natagiragsaktayo ti nakiraman iti tay-ak ti ministerio, no nakaipaimatayo iti literatura iti Biblia wenno nakasaritatayo a naimbag dagiti bumalay maipapan iti Biblia. Ngem no manmano ti dumngeg kadatayo, nalabit ipatotayo a saysayangentay laeng ti oras. Kaskasdi, laglagipenyo a maysa a kayulogan ti balligi ket ‘ti pannakagun-od iti pabor.’ Makinpabor kadi ti tartarigagayantayo? Siempre, ti pabor ni Jehova. Magun-odtayo dayta, dumngeg man dagiti tattao iti mensahetayo wenno saan. Insuro ni Jesus dagiti adalanna iti makapabileg a leksion iti daytoy a banag.

No malagipyo, imbaon ni Jesus dagiti 70 a manangaskasaba iti Pagarian “iti tunggal siudad ken lugar nga umayannanto a mismo.” (Lucas 10:1) Masapul a mangasabada kadagiti ili ken purok a dida kakuyog ni Jesus. Damoda a mapadasan dayta. Gapuna, nangted ni Jesus kadakuada iti detalyado nga instruksion sakbay a pinalubosanna ida. No makasarakda iti “maysa a gayyem ti talna,” masapul a naan-anay a kasabaanda maipapan iti Pagarian. Ngem no adda bumusor kadakuada, pumanawda a di maupay. Inlawlawag ni Jesus a ni Jehova a mismo ti laklaksiden dagidiay saan a dumngeg kadakuada.​—Lucas 10:4-7, 16.

Idi nairingpas dagiti 70 ti naituding a pangasabaanda, nagsublida ken Jesus “nga addaan rag-o, a kunkunada: ‘Apo, uray dagiti sairo naipasakupda kadakami babaen iti panangusar iti naganmo.’” (Lucas 10:17) Sigurado a nakaragragsak dagidiay nga imperpekto a tattao a nangparuar kadagiti mannakabalin nga espiritu a parsua! Nupay kasta, kinuna ni Jesus kadagiti napnuan gagar nga adalanna: “Dikay pagrag-oan daytoy, a dagiti espiritu naipasakupda kadakayo, ngem agrag-okayo agsipud ta ti nagnaganyo nailanaddan iti langlangit.” (Lucas 10:20) Saan a kanayon nga adda pannakabalin dagiti 70 a mangparuar kadagiti sairo, wenno kanayon a makaay-ayo ti resulta ti ministerioda. Ngem no agtalinaedda a matalek, kanayon nga adda kadakuada ti anamong ni Jehova.

Apresiarenyo Kadi Dagiti Amin-tiempo nga Adipen?

Naminsan, kinuna ti agtutubo a lalaki iti Kristiano a panglakayen: “Agsapulakto iti trabahok apaman nga aggraduarak iti haiskul. Saakto la sumrek iti amin-tiempo a serbisio no diak makastrek iti trabaho.” Nupay kasta, saan a kasta ti kapanunotan ti kaaduan kadagiti nagpayunir. Inidian ti dadduma dagiti gundaway nga agtultuloy kadagiti makapabaknang a propesion tapno makapagpayunirda. Pinagkedkedan ti dadduma dagiti makaallukoy a gundaway nga ageskuela. Nagsakripisioda kas ken apostol Pablo, ngem dida nagbabawyan ti pangngeddengda kas kada Pablo, Robert, ken ni Amy. Apresiarenda ti pribilehio a mangusar kadagiti sagudayda iti pakaidayawan ni Jehova, a maikari nga umawat iti kasayaatan a maipaayda.

Adu a matalek a Saksi ni Jehova ti saan a makapagpayunir gapu iti nadumaduma a rason. Nalabit adda Nainkasuratan nga obligasion a masapul nga asikasuenda. Kaskasdi, no la ket ta agserserbida iti Dios iti amin a ‘puso, kararua, ken panunot,’ maay-ayoda ni Jehova. (Mateo 22:37) Nupay dida makapagpayunir, ibilangda a nasayaat a karera ti pinili dagiti payunir.

Insurat ni apostol Pablo: “Sumardengkayo a maisuksukog maitunos iti daytoy a sistema ti bambanag.” (Roma 12:2) Maitunos iti pammagbaga ni Pablo, masapul a ditay itulok a dagiti kaugalian wenno nailubongan a pagalagadan daytoy a sistema ti mangimpluensia iti pampanunottayo. Makapagpayunirkay man wenno saan, ipamaysayo ti biagyo iti panagserbi ken Jehova. Naballigikayo no magun-odyo ti anamong ni Jehova.

[Footnote]

[Ladawan iti panid 19]

Dikay agtalinaed iti arig treadmill nga awan ti pagturonganna