Asidegen ti Aldaw ti Panangukom ni Jehova!

“Ti dakkel nga aldaw ni Jehova asideg, isu asideg ken napardas unay.” ​—SOFONIAS 1:14.

1. Ania ti impakdaar ti Dios babaen ken Sofonias?

ASIDEGEN nga agtignay ni Jehova a maibusor kadagiti nadangkes. Imdenganyo! Daytoy ti pakdaarna: “Ibusekto ti tao . . . Dadaelekto ti tao iti rabaw ti daga.” (Sofonias 1:3) Dayta ti mensahe nga impakaammo ni Soberano nga Apo Jehova babaen ken Sofonias a propetana, a nalabit apoko iti dapan ni matalek nga Ari Ezekias. Naipakaammo dayta idi kaaldawan ni Ari Josias kas pakdaar nga addanto dakes a mapasamak kadagiti nadangkes nga agnanaed iti daga ti Juda.

2. Apay a ti inaramid ni Josias dina nalapdan ti aldaw ti panangukom ni Jehova?

² Di pagduaduaan a ti panagipadto ni Sofonias ad-adda nga impabigbigna ken agtutubo a Josias a masapul a maikkat ti narugit a panagdayaw idiay Juda. Ngem idi pinagpatingga ni Josias ti palso a relihion idiay Juda, saan a naikkat nga interamente ti kinadakes kadagiti umili wenno napakawan dagiti basol ni apongna nga Ari Manases, a ‘nangpunno iti Jerusalem iti dara nga awanan basol.’ (2 Ar-ari 24:3, 4; 2 Cronicas 34:3) Sigurado ngarud a dumteng ti aldaw ti panangukom ni Jehova.

3. Kasanotay a masigurado nga adda dagiti makalasat iti “aldaw ti pungtot ni Jehova”?

³ Nupay kasta, adda dagiti makalasat iti dayta nakabutbuteng nga aldaw. Gapuna, indagadag ti propeta ti Dios: “Iti kasakbayan ti pannakaibanag ti naikeddeng, iti kasakbayan ti panaglabas ti aldaw a kas iti taep, iti kasakbayan ti iyaay kadakayo ti narungsot a pungtot ni Jehova, iti kasakbayan ti iyaay kadakayo ti aldaw ti pungtot ni Jehova, birokenyo ni Jehova, dakayo amin a naemma iti daga, a nagtungpal kadagiti bilbilinna; birokenyo ti kinalinteg, birokenyo ti kinaemma: nalabit a dakayo maitalimengkayto iti aldaw ti pungtot ni Jehova.” (Sofonias 2:2, 3) Buyogen ti namnama a makalasat iti aldaw ti panangukom ni Jehova, usigentayo ti libro ti Biblia a Sofonias. Naisurat dayta idiay Juda sakbay ti 648 K.K.P. Paset daytoy ti “naimpadtuan a sao” ti Dios a masapul a naimpusuan nga ipangagtayo amin.​—2 Pedro 1:19.

Iyunnat ni Jehova ti Imana

4, 5. Kasano a natungpal ti Sofonias 1:1-3 kadagiti nadangkes idiay Juda?

⁴ Nangrugi ti “sao ni Jehova” ken Sofonias iti pakdaar a nadakamat iti umuna a parapo. Kinuna ti Dios: “Siak ikisapkonto dagiti isuamin a bambanag iti rabaw ti daga, kuna ni Jehova. Ibusekto ti tao ken animal; ibusekto dagiti tumatayab ti langit, ken dagiti ik-ikan ti taaw, ken dagiti pakaitibkolan kadagiti nadangkes; ket dadaelekto ti tao iti rabaw ti daga, kuna ni Jehova.”​—Sofonias 1:1-3.

⁵ Wen, pagpatinggaen ni Jehova ti nakaro a kinadakes iti daga ti Juda. Siasino ti usaren ti Dios a ‘mangibus iti isuamin a bambanag iti rabaw ti daga’? Yantangay agparang nga agipadpadto ni Sofonias idi nabiit pay a naisaad nga ari ni Josias, a nangrugi a nagturay idi 659 K.K.P., natungpal dayta a padto idi pinaglangalang dagiti taga Babilonia ti Juda ken ti Jerusalem a kabeserana idi 607 K.K.P. Iti daydi a tiempo, ‘naibus’ dagiti nadangkes idiay Juda.

6-8. Ania ti naipadto iti Sofonias 1:4-6, ket kasano a natungpal dayta a padto iti nagkauna a Juda?

⁶ Maipapan iti aramidento ti Dios kadagiti agdaydayaw iti didiosen, kastoy ti kuna ti Sofonias 1:4-6: “Iyunnatkonto ti imak a maibusor iti Juda, ken kadagiti isuamin nga agnaed ti Jerusalem; ket dadaelekto ti matda ni Baal iti daytoy a disso, ken ti nagan ti Kemarin agraman dagiti papadi; ken dagidiay agkarkararag iti buyot ti langit kadagiti tuktok ti balay; ken dagidiay agkarkararag, nga agsapata gapu ken Jehova ken agsapata gapu ken Malcam: ken dagidiay agbaw-ing iti isusurot ken Jehova; ken dagidiay saan a nagbirok ken Jehova, wenno saan a nagsaludsod maipapan kenkuana.”

⁷ Inyunnat ni Jehova ti imana a maibusor kadagiti tattao ti Juda ken Jerusalem. Determinado a mangikisap kadagiti agdaydayaw ken Baal, ti dios ti kinabunga a daydayawen dagiti taga Canaan. Naawagan a Baal dagiti nagduduma a didiosen gapu ta patien dagiti agdaydayaw kadakuada a kukua ken kontrolado dagita a didiosen ti dadduma a disso. Kas pagarigan, adda Baal a daydayawen dagiti Moabita ken Madianita idiay Bantay Peor. (Numeros 25:1, 3, 6) Iti intero a Juda, pukawen ni Jehova dagiti papadi ni Baal, agraman dagiti di matalek a papadi a Levita a nangsalungasing iti linteg ti Dios babaen ti pannakipulapolda kadagiti papadi ni Baal.​—Exodo 20:2, 3.

⁸ Pukawen met ti Dios dagidiay ‘agkarkararag iti buyot ti langit,’ dagiti tattao a mamati iti astrolohia ken agdaydayaw iti init. (2 Ar-ari 23:11; Jeremias 19:13; 32:29) Idissuor met ti Dios ti pungtotna kadagidiay namaglaok iti pudno a panagdayaw ken palso a relihion babaen ti ‘panagsapatada gapu ken Jehova ken ni Malcam.’ Mabalin a naawagan met a Malcam ni Moloc, ti kangrunaan a dios dagiti Ammonita. Karaman iti panagdayaw ken Moloc ti panangidaton kadagiti ubbing.​—1 Ar-ari 11:5; Jeremias 32:35.

Asidegen a Manungpal ti Kakristianuan!

9. (a) Ania ti nakabasolan ti Kakristianuan? (b) Saan a kas kadagiti di matalek nga umili ti Juda, ania koma ti determinado nga aramidentayo?

⁹ Ipalagip amin daytoy kadatayo ti Kakristianuan, a naigamer iti palso a panagdayaw ken astrolohia. Ket pudno a makarimon ti pasetna iti pannakaidaton ti minilion a biag iti altar ti gubat a supsuportaran dagiti klero! Pulos a ditay koma agbalin a kas kadagiti di matalek nga umili ti Juda a ‘nagbaw-ing iti isusurotda ken Jehova,’ a nagbalinda nga aleng-aleng ket saandan a sinapul ni Jehova wenno nagpaidalan kenkuana. Agtalinaedtay koma ketdi a matalek iti Dios.

10. Kasanoyo nga ilawlawag ti kaipapanan ti padto a nailanad iti Sofonias 1:7?

¹⁰ Dagiti sumaruno a sasao ti propeta ket maitutop agpadpada kadagiti nadangkes idiay Juda ken iti kaaldawantayo. Kuna ti Sofonias 1:7: “Agulimekka iti imatang ni Apo Jehova; ta ti aldaw ni Jehova asidegen: ta ni Jehova nangisagana iti maysa a daton, isu dinalusanna dagiti naawis.” Agparang a dagiti Caldeo a kabusor ti Juda ti tuktukoyenna a “naawis.” Ti “daton” isu ti Juda a mismo, agraman ti kabeserana a siudad. No kasta, impakaammo ni Sofonias ti panggep ti Dios a mangdadael iti Jerusalem, ket daytoy a padto impakdaarna met ti pannakadadael ti Kakristianuan. Kinapudnona, yantangay nakaas-asidegen ti aldaw ti panangukom ti Dios, ‘agulimek [koma ti intero a lubong] iti imatang ni Soberano nga Apo Jehova’ ket denggenda ti ibagbaga ni Jehova babaen ti “bassit nga ipastoran,” dagiti napulotan a pasurot ni Jesus, ken dagiti kakaduada, ti “sabsabali a karnero[na].” (Lucas 12:32; Juan 10:16) Matalipuposto dagiti amin a di mangipangag ken bumusbusor iti turay ti Pagarian ti Dios.​—Salmo 2:1, 2.

Din Agbayag​—Ti Aldaw ti Panagdung-aw!

11. Ania ti kababagas ti Sofonias 1:8-11?

¹¹ Maipanggep iti aldaw ni Jehova, kuna pay ti Sofonias 1:8-11: “Maaramidto iti aldaw ti daton ni Jehova, a dusaekto dagiti piprinsipe, ken dagiti annak ti ari, ken amin a sikakawes iti pagan-anay a ganggannaet. Ket iti daydiay nga aldaw dusaekto amin dagidiay aglaktaw iti dapian, a mangpusek iti balay ni apoda iti panangranggas ken allilaw. Ket iti daydiay nga aldaw, kuna ni Jehova, addanto anabaab ti anug-og nga aggapu iti ruangan ti ikan, ken dung-aw nga aggapu iti maikadua a paset, ken dakkel a daranudor nga aggapu kadagiti turturod. Agdung-awkayo, dakayo nga agnaed ti Mactes, ta isuamin nga ili ti Canaan napaksuyanda, isuamin dagidiay a napaawitan iti pirak madadael.”

12. Kasano a dagiti dadduma ‘sikakawesda iti pagan-anay a ganggannaet’?

¹² Da Jehoacaz, Jehoiaquim, ken Jehoiaquin ti sumukat ken Ari Josias. Kalpasanna, iti panagturay ni Zedekias, madadael ti Jerusalem. Nupay agur-uray kadakuada ti kasta a didigra, mabalin a tinarigagayan dagiti dadduma ti anamong dagiti kabangibang a nasion babaen ti ‘panangikawesda iti pagan-anay a ganggannaet.’ Umasping iti dayta, adu ita dagiti mangipakpakita iti nadumaduma a pamay-an a saanda a paset ti organisasion ni Jehova. Madusadanto gapu ta nalawag a pasetda ti organisasion ni Satanas.

13. Maitunos iti padto ni Sofonias, ania ti mapasamak no rauten dagiti taga Babilonia ti Jerusalem?

¹³ “Dayta nga aldaw” a pannakasingir ti Juda katupagna ti aldaw inton ukomen ni Jehova dagiti kabusorna, pagpatinggaenna ti kinadakes, ken paneknekanna nga isu ti kangatuan. Iti iraraut dagiti taga Babilonia iti Jerusalem, adda ikkis nga aggapu iti Ruangan ti Ikan. Napanaganan a kasta nalabit gapu ta asideg iti paglakuan iti ikan. (Nehemias 13:16) Serken dagiti buyot ti Babilonia ti lugar a maawagan maikadua a purok, ket ti “dakkel a daranudor nga aggapu kadagiti turturod” mabalin a kaipapananna ti karibuso dagiti sumungsungad a Caldeo. ‘Agdung-aw’ dagiti agnaed iti Mactes, nalabit iti makin-amianan a Tanap ti Tyropoeon. Apay nga agdung-awda? Agsipud ta agsardeng sadiay ti komersio, agraman ti negosio dagidiay “napaawitan [“mangtimtimbang,” NW] iti pirak.”

14. Kasano kainget ti panangsukimat ti Dios kadagiti agkunkuna nga agdaydayaw kenkuana?

¹⁴ Kasano kainget ti panangsukimat ni Jehova kadagiti agkunkuna nga agdaydayaw kenkuana? Ituloy a kunaen ti padto: “Maaramidto iti daydiay a panawen, a sukimatekto ti Jerusalem babaen kadagiti pagsilawan; ket dusaekto dagiti tattao nga agtugaw kas iti arak iti arinsaedna, a kunada kadagiti pusoda, Ni Jehova saanto nga agaramid iti naimbag, saanto met nga agaramid iti dakes. Ket ti sanikuada agbalinto a sinamsam, ket dagiti balbalayda agwalangwalang: wen, mangibangondanto kadagiti balbalay, ngem didanto agnaed kadakuada; ket mangmuladanto ti kaubasan, ngem didanto uminum iti arakna.”​—Sofonias 1:12, 13.

15. (a) Ania ti mapasamak kadagiti apostata a papadi ti Jerusalem? (b) Ania ti agur-uray kadagiti mangan-annurot iti palso a relihion iti kaaldawantayo?

¹⁵ Dagiti apostata a papadi iti Jerusalem pinaglaokda ti panagdayaw ken Jehova ken ti palso a relihion. Nupay ipagarupda a natalgedda, sukimaten ida ti Dios a kas man la babaen dagiti narangrang a silaw a mangsilnag iti naespirituan a kasipngetan a paglemlemmenganda. Awan ti makalisi iti pannakaipakaammo ken pannakaibanag ti panangukom ti Dios. Kasla arak a nagarinsaed dagidi nga apostata a nangipagarup a natalgedda. Dida kayat ti pasinga iti aniaman a pakdaar maipapan iti pannakibiang ti Dios kadagiti ar-aramiden dagiti tattao, ngem saanda a malisian ti panangukom ti Dios kadakuada. Saanto met a makalisi dagiti mangan-annurot iti palso a relihion iti kaaldawantayo, agraman dagiti kameng ti Kakristianuan ken dagiti nagapostasia ken saanen nga agdaydayaw ken ni Jehova. Gapu ta ilibakda nga addatayon iti “maudi nga al-aldaw,” kunada iti pusoda, “Ni Jehova saanto nga agaramid iti naimbag, saanto met nga agaramid iti dakes.” Ngem nagbiddutda!​—2 Timoteo 3:1-5; 2 Pedro 3:3, 4, 10.

16. Ania ti mapasamak no ukomen ti Dios ti Juda, ket kasanonatay koma nga apektaran ti pannakaammotayo iti dayta?

¹⁶ Napakdaaran dagiti apostata ti Juda a samsamen dagiti taga Babilonia ti kinabaknangda, pagwalangwalangenda dagiti balbalayda, ken alaenda dagiti bunga ti kaubasanda. Awan serserbina dagiti material a banag inton ukomen ti Dios ti Juda. Kastanto met ti mapasamak inton dumteng ti aldaw a panangdadael ni Jehova iti agdama a sistema ti bambanag. Gapuna, naespirituan koma ti panangmatmattayo ken ‘agurnongtayo kadagiti gameng idiay langit’ babaen ti panangyun-una iti biagtayo ti panagserbi ken Jehova!​—Mateo 6:19-21, 33.

“Ti Dakkel nga Aldaw ni Jehova Asidegen”

17. Sigun iti Sofonias 1:14-16, kasano kaasideg ti aldaw ti panangukom ni Jehova?

¹⁷ Kasano kaasideg ti aldaw ti panangukom ni Jehova? Sigun iti Sofonias 1:14-16, kastoy ti ipanamnama ti Dios: “Ti dakkel nga aldaw ni Jehova asideg, isu asideg ken napardas unay, ti met laeng timek ti aldaw ni Jehova: ti maingel a lalaki agikkis a sipapait unay sadiay. Daydiay nga aldaw isu ti aldaw ti pungtot, aldaw ti riribuk ken rigat, aldaw ti rakrak ken langalang, aldaw ti sipnget ken lulem, aldaw dagiti ul-ulep ken napuskol a kinasipnget, aldaw ti tangguyob ken panagbuak, a maibusor kadagiti il-ili a nasarikedkedan, ken maibusor kadagiti torre iti pagsulian.”

18. Apay a ditay koma pagarupen a mabayag pay ti aldaw ti panangukom ni Jehova?

¹⁸ Napakdaaran dagiti managbasol a papadi, piprinsipe, ken umili ti Juda nga ‘asidegen ti dakkel nga aldaw ni Jehova.’ Para iti Juda, ‘napardas unay ti iyaay ti aldaw ni Jehova.’ Kasta met iti panawentayo, saan koma a pagarupen ti asinoman a mabayag pay a dumteng ti aldaw a panangukom ni Jehova kadagiti nadangkes. Iti kasupadina, no kasano a ti Dios ket nagtignay a sipapartak maibusor iti Juda, ‘papardasennanto’ met ti iyaay ti aldaw ti panangukomna. (Apocalipsis 16:14, 16) Anian a nagsaemto dayta a tiempo kadagiti amin a di mangipangag kadagiti pakdaar ni Jehova nga ipakpakaammo dagiti Saksina ken kadagiti di mangan-annurot iti pudno a panagdayaw!

19, 20. (a) Ania ti napasamak idi indissuor ti Dios ti pungtotna iti Juda ken Jerusalem? (b) Yantangay naikeddeng a madadael ti agdama a sistema ti bambanag, aniada a saludsod ti tumaud?

¹⁹ Idi indissuor ti Dios ti pungtotna iti Juda ken Jerusalem, maysa daydi nga “aldaw ti riribuk ken rigat.” Adu a rigat ti inyeg dagiti rimmaut a taga Babilonia kadagiti agnanaed iti Juda, a pakairamanan ti panagkullayaw gapu iti pannakapapatay ken pannakadadael. Dayta nga “aldaw ti rakrak ken langalang” ket aldaw ti ul-ulep ken napuskol a kinasipnget, nalabit saan laeng nga iti piguratibo a wagas no di pay ket literal gapu ta naasuk ti aglawlaw ken sapasap ti panangpapatay. Maysa dayta nga “aldaw ti tangguyob ken panagbuak,” ngem awan nagmaayan dagiti pakdaar.

²⁰ Awan gaway dagiti agwanwanawan idiay Jerusalem idi rinebba dagiti taga Babilonia dagiti “torre iti pagsulian.” Awanto met serserbi dagiti sarikedked ti agdama a dakes a sistema ti bambanag inton usaren ti Dios dagiti igamna idiay langit a mangpapatay kadagiti inkeddengna a dadaelen. Namnamaenyo kadi a maisalakankayto? Sititibker kadi a dimmasigkayon ken Jehova, ‘a mangsalaknib kadagiti amin nga agayat kenkuana ngem dadaelennanto dagiti amin a nadangkes’?​—Salmo 145:20.

21, 22. Kasano a matungpal iti kaaldawantayo ti Sofonias 1:17, 18?

²¹ Anian a nakaal-alingget nga aldaw ti panangukom ti naipadto iti Sofonias 1:17, 18! “Yegkonto ti rigat kadagiti tattao,” kuna ni Jehova a Dios, “tapno magmagnada a kas bulsek a tattao, agsipud ta nagbasolda a maikaniwas ken ni Jehova; ket ti darada maiparukpokto a kasla tapuk, ken ti lasagda a kas iti ibleng. Uray ti pirakda uray ti balitokda didanto mabalin ti mangispal kadakuada iti aldaw ti pungtot ni Jehova; ngem ti isuamin a daga malamutto iti apuy ti imonna: ta aramidennanto ti panungpalan, wen, nakakigkigtot a panungpalan, ti isuamin nga agnaed iti daga.”

²² Kas iti inaramidna idi kaaldawan ni Sofonias, iti saanen a mabayag iyegto ni Jehova ti didigra iti “isuamin nga agnaed iti daga,” kadagidiay di mangipangag iti pakdaarna. Gapu ta nagbasolda iti Dios, kasdanto la bulsek nga agar-arikap iti dalanda, nga awan ti makaispal kadakuada. Iti aldaw ti panangukom ni Jehova, ti darada “maiparukpokto a kasla tapuk,” awanto ti serserbina. Talaga a nakababain ti kanibusananda, ta ‘kaslanto ibleng’ nga iwara ti Dios dagiti bangkay​—ken uray dagiti lalaem​—dagitoy a nadangkes nga agnaed iti daga.

23. Nupay dinto makalisi dagiti nadangkes “iti aldaw ti pungtot ni Jehova,” ania ti ipanamnama ti padto ni Sofonias?

²³ Awan a pulos ti makaisalakan kadagidiay bumusbusor iti Dios ken iti ilina. Saan idi a nabaelan ti pirak ken balitok nga ispalen dagiti nadangkes a tattao idiay Juda. “Iti aldaw ti pungtot ni Jehova” a maibusor iti Kakristianuan ken iti dadduma pay a paset daytoy dakes a sistema, saanto met a makasalaknib wenno makaisalakan dagiti naurnong a kinabaknang ken pasuksok. Iti dayta nga aldaw ti panangukom, “ti isuamin a daga malamutto” babaen ti apuy ti pungtot ti Dios inton talipuposenna dagiti nadangkes. Gapu ta mamatitayo iti naimpadtuan a sao ti Dios, kombinsidotayo nga addatayon iti arinunos “ti tiempo ti panungpalan.” (Daniel 12:4, NW) Asidegen ti aldaw ti panangukom ni Jehova, ket iti saanen a mabayag dadaelennanto dagiti kabusorna. Ngem ipanamnama ti padto ni Sofonias nga addanto dagiti maisalakan. No kasta, ania ti masapul nga aramidentayo tapno maitalimengtayto iti aldaw ti pungtot ni Jehova?

Kasanoyo a Sungbatan?

• Kasano a natungpal ti padto ni Sofonias iti Juda ken Jerusalem?

• Ania ti agur-uray iti Kakristianuan ken kadagiti amin a nadangkes iti kaaldawantayo?

• Apay a ditay koma pagarupen a mabayag pay a dumteng ti aldaw ti panangukom ni Jehova?

[Ladawan iti panid 13]

Situtured nga impakaammo ni Sofonias nga asidegen ti aldaw ti panangukom ni Jehova

[Credit Line]

Manipud iti Self-Pronouncing Edition of the Holy Bible, a naglaon iti King James ken Revised a bersion

[Ladawan iti panid 15]

Dimteng ti aldaw ni Jehova iti Juda ken Jerusalem babaen dagiti taga Babilonia idi 607 K.K.P.

[Ladawan iti panid 16]

Namnamaenyo kadi a maisalakankayto inton dadaelen ni Jehova dagiti nadangkes?