“Ti Sao ni Jehova Nagtultuloy a Rimmang-ay”
“Ibaonna ti sasaona iti daga; buyogen ti kinapardas agtaray ti saona.”—SALMO 147:15.
1, 2. Ania nga annongen ti inted ni Jesus kadagiti adalanna, ket ania ti nairaman iti dayta?
MASARAKAN iti Aramid 1:8 ti maysa kadagiti naisangsangayan unay a padto iti Biblia. Sakbay la unay nga immuli ni Jesus sadi langit, kinunana kadagiti matalek a pasurotna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik . . . agingga iti kaadaywan a paset ti daga.” Anian a nagdakkel a trabaho dayta!
2 Ti panangiwaragawag iti sao ti Dios iti intero a daga ket kasla maysa a karit kadagidi a sumagmamano laeng nga adalan a nakaitedan dayta nga annongen. Usigenyo no ania ti nairaman. Nasken a tulonganda dagiti tattao a mangtarus iti naimbag a damag maipapan iti Pagarian ti Dios. (Mateo 24:14) Iti panangsaksida ken Jesus, masapul nga iranudda met kadagiti sabsabali ti nabileg a pannursurona ken ilawlawagda ti akemna iti panggep ni Jehova. Maysa pay, karaman iti dayta a trabaho ti panangaramidda kadagiti adalan ket kalpasanna bautisaranda ida. Ket aramidenda daytoy iti intero a lubong!—Mateo 28:19, 20.
3. Ania ti impanamnama ni Jesus kadagiti pasurotna, ket kasanoda nga intungpal ti trabaho a naited kadakuada?
3 Nupay kasta, impanamnama ni Jesus kadagiti pasurotna nga addanto kadakuada ti nasantuan nga espiritu tapno maitungpalda ti trabaho nga intedna kadakuada. Gapuna, iti laksid ti kadakkel ti trabaho ken ti di agsarday ken naranggas a panangipamuspusan dagiti bumusbusor a mangpaulimek kadakuada, sibaballigi a naitungpal dagiti nagkauna nga adalan ni Jesus ti imbilinna kadakuada. Pasamak dayta iti historia a di mailibak.
4. Kasano a naiparangarang ti ayat ti Dios iti annongen a mangasaba ken mangisuro kadagiti sabsabali?
4 Ti sangalubongan a trabaho a panangasaba ken panangisuro ket ebkas ti ayat ti Dios kadagidiay di makaammo kenkuana. Dayta ti mangted kadakuada iti gundaway nga umadani ken ni Jehova ken tapno mapakawan dagiti basolda. (Aramid 26:18) Ti annongen a mangasaba ken mangisuro iparangarangna met ti ayat ti Dios kadagidiay mangipakpakaammo iti mensahe, tangay dayta ti mangted kadakuada iti gundaway a mangyebkas iti debosionda ken ni Jehova ken mangipakita iti ayatda kadagiti padada a tattao. (Mateo 22:37-39) Impateg unay ni apostol Pablo ti Nakristianuan a ministeriona ta imbilangna dayta a “gameng.”—2 Corinto 4:7.
5. (a) Sadino ti pakasarakantayo iti mapagtalkan unay a pakasaritaan dagiti nagkauna a Kristiano, ket ania nga irarang-ay ti nadakamat iti dayta? (b) Apay a napnuan kaipapanan kadagiti adipen ti Dios ita ti libro nga Aramid?
5 Ti naipaltiing a libro nga Aramid, nga insurat ni adalan a Lucas, ti pakasarakan iti mapagtalkan unay a rekord maipapan iti trabaho a panangasaba dagiti nagkauna a Kristiano. Pakasaritaan daytoy ti nakaskasdaaw ken napardas nga irarang-ay. Ti kastoy nga irarang-ay ti pannakaammo iti Sao ti Dios ipalagipna kadatayo ti Salmo 147:15, a kunana: “[Ni Jehova] ibaonna ti sasaona iti daga; buyogen ti kinapardas agtaray ti saona.” Agpada a makapagagar ken napnuan kaipapanan kadatayo ita ti salaysay maipapan kadagiti nagkauna a Kristiano, a pinabileg ti nasantuan nga espiritu. Makiramraman dagiti Saksi ni Jehova iti isu met laeng a trabaho a panangasaba ken panangaramid kadagiti adalan, isuna laeng ta nasaksaknap nga amang. Maipaspasangotayo met kadagiti parikut a kas kadagidiay napasaran dagiti Kristiano idi umuna a siglo. Bayat nga usigentayo no kasano a binendisionan ken pinabileg ni Jehova dagiti nagkauna a Kristiano, tumibker ti panagtalektayo iti tulongna.
Immadu Dagiti Adalan
6. Ania a sasao maipapan iti irarang-ay ti namitlo a nagparang iti libro nga Aramid, ket ania ti tuktukoyen dagita a sasao?
6 Adalentayo ti kaitungpalan ti Aramid 1:8 babaen ti panangusig kadagiti balikas a “ti sao ni Jehova nagtultuloy a rimmang-ay,” sasao a namitlo laeng a naaramat iti Biblia ken masarakan amin iti libro nga Aramid, nupay adda bassit nagdudumaanda. (Aramid 6:7; 12:24; 19:20) “Ti sao ni Jehova,” wenno “ti sao ti Dios,” kadagitoy a teksto tuktukoyenna ti naimbag a damag—ti makagutugot a mensahe maipapan iti kinapudno a nagtaud iti Dios. Maysa daytoy a sibibiag ken nabileg a mensahe a nangbalbaliw iti biag dagidiay nangipangag iti dayta.—Hebreo 4:12.
7. Iti ania a nainaig ti irarang-ay ti sao ti Dios a nadakamat iti Aramid 6:7, ket ania ti napasamak iti aldaw ti Pentecostes idi 33 K.P.?
7 Immuna a nadakamat iti Aramid 6:7 ti maipapan iti irarang-ay ti sao ti Dios. Kastoy ti mabasatayo iti dayta a teksto: “Gapu itoy rimmangrang-ay ti sao ti Dios, ket ti bilang dagiti adalan nagtultuloy nga immadu iti kasta unay idiay Jerusalem; ket maysa a dakkel a bunggoy ti papadi ti nangrugi nga agtulnog iti pammati.” Iti daytoy a teksto, nainaig ti irarang-ay iti panagadu dagiti adalan. Sakbayna, iti aldaw ti Pentecostes idi 33 K.P., naiparukpok ti nasantuan nga espiritu ti Dios iti agarup 120 nga adalan a naguurnong iti makinngato a siled. Kalpasanna, nangipaay ni apostol Pedro iti makaguyugoy a palawag, ket kadagidiay dimngeg, agarup 3,000 ti nagbalin a manamati iti daydi met la nga aldaw. Umarimbangaw la ketdi dagiti rinibu a tattao a nagturong iti ban-aw wenno kadagiti ban-aw iti uneg ken iti likmut ti Jerusalem tapno agpabautisarda iti nagan ni Jesus, daydi lalaki a nailansa a kas kriminal agarup 50 nga aldaw sakbayna!—Aramid 2:41.
8. Kasano nga immadu dagiti adalan kadagiti tawen kalpasan ti Pentecostes idi 33 K.P.?
8 Siempre, pangrugian laeng dayta. Napaay ti agtultuloy a panangikagumaan dagiti Judio a panguluen ti relihion a mangpasardeng iti trabaho a panangasaba. Awan maaramidan dagidi a panguluen ta “intultuloy ni Jehova nga itipon [kadagiti adalan] iti inaldaw dagidiay maisalsalakan.” (Aramid 2:47) Di nagbayag, “ti bilang dagiti lallaki nagbalin nga agarup lima ribu.” Kalpasanna, “dagiti manamati iti Apo nagtultuloy a nainayonda, dagiti umariwekwek agpadpada dagiti lallaki ken dagiti babbai.” (Aramid 4:4; 5:14) Idi ud-udina, kastoy ti mabasatayo: “Kinapudnona, ti kongregasion iti intero a Judea ken Galilea ken Samaria simrek iti maysa a panawen ti talna, a mapabpabileg; ket nagtultuloy nga immadu bayat a magmagna dayta iti panagbuteng ken Jehova ken iti panangliwliwa ti nasantuan nga espiritu.” (Aramid 9:31) Sumagmamano a tawen kalpasanna, nalabit idi agarup 58 K.P., nadakamat ti maipapan iti “no mano a ribu a manamati.” (Aramid 21:20) Adu met idin dagiti manamati a Gentil.
9. Ania ti makunayo maipapan kadagiti nagkauna a Kristiano?
9 Ti kastoy a panagadu ti bilang ket maigapu kangrunaanna iti pannakaitipon dagiti kabbaro nga adalan. Nabiit pay la idi a naipasdek ti relihionda—ngem aktibo daytoy. Saan a basta paspasurot laeng dagiti adalan, no di ket naan-anay a dedikadoda ken ni Jehova ken iti Saona. Dagiti dadduma naammuanda ti kinapudno kadagidiay naglak-am iti nakaro a pannakaidadanes. (Aramid 16:23, 26-33) Nagbalinda a Kristiano gapu ta dayta ti diktar ti konsiensiada a nainkalintegan nga aramiden. (Roma 12:1) Nasursuruanda iti daldalan ti Dios; adda ti kinapudno iti panunot ken pusoda. (Hebreo 8:10, 11) Situtulokda a matay gapu iti pammatida.—Aramid 7:51-60.
10. Ania a rebbengen ti inawat dagiti nagkauna a Kristiano, ket ania ti kaasping daytoy ita?
10 Dagidiay nangawat iti Nakristianuan a pannursuro binigbigda ti responsabilidadda a mangiranud iti kinapudno kadagiti sabsabali. Direkta a nakatulong daytoy iti ad-adda pay a panagadu ti bilangda. Kinuna ti maysa nga eskolar ti Biblia: “Saan laeng a ti naregta unay wenno ti nadutokan nga ebanghelisador ti manamnama a mangipakaammo iti pammati. Ti panangasaba ket kalintegan ken rebbengen ti tunggal kameng ti Iglesia. . . . Ti sibubulos a panangasaba dagiti amin a Kristiano dakkel ti naitulongna iti irarang-ay ti Kristianidad sipud pay idi damo.” Insuratna pay: “Ti panangasaba ti kapatgan kadagiti nagkauna a Kristiano.” Agpayso met dayta kadagiti pudno a Kristiano itatta.
Panagsaknap ti Teritoria
11. Ania nga irarang-ay ti nadeskribir iti Aramid 12:24, ket kasano a napasamak daytoy?
11 Ti maikadua a nakadakamatan ti irarang-ay ti sao ti Dios ket masarakan iti Aramid 12:24: “Ti sao ni Jehova nagtultuloy a rimmang-ay ken nagsaknap.” Nainaig dagita a balikas iti panagadu ti teritoria. Iti baet ti ibubusor dagiti agtuturay, nagtultuloy a dimmur-as ti trabaho. Naiparukpok nga umuna ti nasantuan nga espiritu idiay Jerusalem, ket manipud sadiay nagsaknap a dagus ti sao. Gapu iti panangidadanes idiay Jerusalem, nawarawara dagiti adalan iti intero a Judea ken Samaria. Ania ti resultana? “Dagidiay naiwarawara nagsaknapda iti daga nga idekdeklarada ti naimbag a damag ti sao.” (Aramid 8:1, 4) Nabilin ni Felipe a mangasaba iti maysa a lalaki, ket kalpasan a nabautisaran, indanon daytoy a lalaki ti mensahe idiay Etiopia. (Aramid 8:26-28, 38, 39) Nagramut a dagus ti kinapudno idiay Lidda, iti Tanap ti Saron, ken idiay Joppe. (Aramid 9:35, 42) Idi agangay, rinibu a kilometro ti dinaliasat ni apostol Pablo iti taaw ken takdang, a nagipaspasdek kadagiti kongregasion iti adu a pagilian iti deppaar ti Mediteraneo. Napan ni apostol Pedro idiay Babilonia. (1 Pedro 5:13) Iti las-ud ti 30 a tawen manipud pannakaiparukpok ti nasantuan nga espiritu idi Pentecostes, insurat ni Pablo a ti naimbag a damag ‘naikaskasaban iti isuamin a parsua nga adda iti baba ti langit,’ a nalabit tuktukoyenna ti pagaammo idi a lubong.—Colosas 1:23.
12. Kasano a dagiti bumusbusor iti Kristianidad binigbigda ti panagsaknap ti sao ti Dios iti adu a lugar?
12 Uray dagiti bumusbusor iti Kristianidad binigbigda a nagramuten ti sao ti Dios iti intero nga Imperio ti Roma. Kas pagarigan, salaysayen ti Aramid 17:6 nga idiay Tesalonica, makin-amianan a Grecia, impukpukkaw dagiti bumusbusor: “Dagitoy a tattao a nangbalintuag iti mapagnaedan a daga addada met ditoy.” Maysa pay, iti rugrugi ti maikadua a siglo, idi adda ni Pliny nga Ub-ubing idiay Bitinia, sinuratanna ni Trajan nga emperador ti Roma maipapan iti Kristianidad. Inreklamona: “Saan laeng a kadagiti siudad a nagsaknap no di ket kadagiti kabangibang a purok ken pagilian.”
13. Kasano a ti panagsaknap ti sao ti Dios inyanninawna ti ayat ti Dios iti sangatauan?
13 Daytoy a panagsaknap ket ebkas ti nauneg a panagayat ni Jehova iti sangatauan a makasapul iti subbot. Idi naimatangan ni Pedro nga adda ti nasantuan nga espiritu iti Gentil a ni Cornelio, kinunana: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Wen, ti naimbag a damag ket maysa a mensahe nga agpaay iti amin a tattao idi ken ita, ket ti pannakaisaknap ti sao ti Dios inikkanna dagiti tattao iti amin a disso iti gundaway a sumubad iti ayat ti Dios. Iti daytoy maika-21 a siglo, literal a nagsaknapen ti sao ti Dios iti dandani amin a suli ti daga.
Naballigi nga Irarang-ay
14. Ania nga irarang-ay ti nadeskribir iti Aramid 19:20, ket maibusor iti ania a nagballigi ti sao ti Dios?
14 Ti maikatlo a nakadakamatan ti irarang-ay ti sao ti Dios ket masarakan iti Aramid 19:20: “Iti nabileg a pamay-an nagtultuloy a rimmang-ay ken nagballigi ti sao ni Jehova.” “Pumigsa” ti kayat a sawen ti orihinal a Griego a sao a naipatarus a “nagballigi.” Salaysayen dagiti immun-una a bersikulo nga adu idiay Efeso ti nagbalin a manamati, ket adu kadagiti managsalamangka ti nangpuor kadagiti libroda iti sanguanan ti amin a tao. No kasta, nagballigi ti sao ti Dios maibusor kadagiti di umiso a narelihiosuan a sursuro. Nagballigi met ti naimbag a damag maibusor kadagiti dadduma pay a tubeng, kas iti pannakaidadanes. Awan a pulos ti makapasardeng iti dayta. Iti daytoy a banag, kasta met laeng ti kasasaad ti pudno a Kristianidad iti tiempotayo.
15. (a) Ania ti insurat ti maysa a historiador ti Biblia maipapan kadagiti nagkauna a Kristiano? (b) Siasino ti binigbig dagiti adalan a namagballigi kadakuada?
15 Dagiti apostol ken dadduma pay a nagkauna a Kristiano sireregta nga inwaragawagda ti sao ti Dios. Maipapan kadakuada, kinuna ti maysa a historiador ti Biblia: “No sitatallugod dagiti tattao nga agsao maipapan iti Apoda, adu ti pamay-anda a mangaramid iti dayta. Kinapudnona, ad-adda a dayawentayo ti determinasion dagitoy a lallaki ken babbai ngem dagiti pamay-anda.” Nupay kasta, binigbig dagidi a nagkauna a Kristiano a ti panagballigi ti ministerioda saan a nagpannuray iti bukodda a kabaelan. Imbilin ti Dios nga itultuloyda ti trabahoda, ket tinulonganna ida a mangitungpal iti dayta. Ti Dios ti mangipaay iti naespirituan nga irarang-ay. Binigbig daytoy ni apostol Pablo iti suratna iti kongregasion sadi Corinto. Kinunana: “Nagmulaak, ni Apolos nagsibug, ngem ti Dios ti nangpadpadakkel iti dayta; ta katrabahuannakami ti Dios.”—1 Corinto 3:6, 9.
Agtigtignay ti Nasantuan nga Espiritu
16. Ania ti mangipakita a ti nasantuan nga espiritu pinabilegna dagiti adalan nga agsao a situtured?
16 Laglagipenyo nga impanamnama ni Jesus kadagiti adalanna nga adda paset ti nasantuan nga espiritu iti irarang-ay ti sao ti Dios ket ti nasantuan nga espiritu pabilgenna dagiti adalan a mangasaba. (Aramid 1:8) Kasano a napasamak daytoy? Di nagbayag kalpasan a naiparukpok ti espiritu kadagiti adalan iti Pentecostes, naayaban da Pedro ken Juan nga agpalawag iti Sanhedrin dagiti Judio, ti kangatuan a pangukoman iti pagilian. Dagiti ukom ti Sanhedrin ti manungsungbat iti pannakapapatay ni Jesu-Kristo. Nagbuteng kadi dagiti apostol iti sanguanan ti kasta a natan-ok ken naulpit a pangukoman? Saan a pulos! Ti nasantuan nga espiritu pinabilegna da Pedro ken Juan nga agsao a situtured nga uray la nasdaaw dagiti bumusbusor kadakuada, ket “nangrugi a mabigbigda ti maipapan kadakuada a nakikuykuyogda idi ken Jesus.” (Aramid 4:8, 13) Ti nasantuan nga espiritu ti nangpatured met ken ni Esteban a mangted iti pammaneknek iti Sanhedrin. (Aramid 6:12; 7:55, 56) Sakbayna, tinignay ti nasantuan nga espiritu dagiti adalan a mangasaba a situtured. Impadamag ni Lucas: “Idi a nakaararawdan, nagkintayeg ti lugar a nakaurnonganda a sangsangkamaysa; ket isuda amin napnoda iti nasantuan nga espiritu ket situtured a sasawenda idi ti sao ti Dios.”—Aramid 4:31.
17. Kadagiti ania a dadduma pay a wagas a ti nasantuan nga espiritu tinulonganna dagiti adalan iti ministerioda?
17 Babaen ti nabileg a nasantuan nga espirituna, ni Jehova agraman ni napagungar a Jesus, ti nangiturong iti trabaho a panangasaba. (Juan 14:28; 15:26) Idi naiparukpok ti espiritu ken ni Cornelio, kadagiti kakabagian, ken nasinged a gagayyemna, nabigbig ni apostol Pedro a mabalinen a bautisaran iti nagan ni Jesu-Kristo dagiti di nakugit a Gentil. (Aramid 10:24, 44-48) Idi agangay, naaddaan ti espiritu iti napateg a paset iti pannakadutok da Bernabe ken Saulo (ni apostol Pablo) kas misionero ken iti panangiturong no sadino ti rumbeng ken di rumbeng a papananda. (Aramid 13:2, 4; 16:6, 7) Dayta ti nangiwanwan kadagiti apostol ken lallakay idiay Jerusalem a mangaramid kadagiti desision. (Aramid 15:23, 28, 29) Ti nasantuan nga espiritu ti nangiwanwan met iti pannakadutok dagiti manangaywan iti kongregasion Kristiano.—Aramid 20:28.
18. Kasano nga inyebkas dagiti nagkauna a Kristiano ti ayat?
18 Kanayonanna, naiparangarang ti nasantuan nga espiritu kadagiti Kristiano a mismo, a nangpataud kadagiti nadiosan a galad, kas iti ayat. (Galacia 5:22, 23) Ayat ti nangtignay kadagiti adalan nga agtitinnulong. Kas pagarigan, kalpasan ti Pentecostes idi 33 K.P., nangur-orda iti pondo a pangsaranay kadagiti agkasapulan nga adalan idiay Jerusalem. Kuna ti salaysay ti Biblia: “Awan uray maysa kadakuada ti nagkasapulan; ta amin dagidiay agik-ikut kadagiti talon wenno balbalay ilakoda ida ket iyegda dagiti pateg ti bambanag a nailako ket ikabilda ida iti sakaanan dagiti apostol. Kalpasanna maibunong iti tunggal maysa, a kas iti pakasapulanna.” (Aramid 4:34, 35) Naipakita ti kastoy nga ayat saan laeng a kadagiti kapammatianda no di pay ket kadagiti sabsabali, agpadpada babaen ti panangiranud iti naimbag a damag ken dadduma pay a naayat nga aramid. (Aramid 28:8, 9) Kinuna ni Jesus a ti managsakripisio nga ayat ti pakabigbigan dagiti pasurotna. (Juan 13:34, 35) Wen, ti ayat, a nagpateg a galad, inyadanina dagiti tattao iti Dios ken nakatulong iti irarang-ay idi umuna a siglo a kas met la ita.—Mateo 5:14, 16.
19. (a) Iti ania a tallo a pamay-an a rimmang-ay ti sao ni Jehova idi umuna a siglo? (b) Ania ti usigentayo iti sumaganad nga artikulo?
19 Amin-amin, 41 a daras nga agparang iti libro nga Aramid ti sasao a “nasantuan nga espiritu.” Nalawag a ti irarang-ay dagiti pudno a Kristiano idi umuna a siglo ket nainaig unay iti bileg ken panangiwanwan ti nasantuan nga espiritu. Immadu dagiti adalan, nagsaknap ti sao ti Dios iti adu a lugar, ken nagballigi maibusor kadagiti relihion ken pilosopia idi daydi a tiempo. Ti kastoy nga irarang-ay idi umuna a siglo ket umarngi iti irarang-ay ti trabaho dagiti Saksi ni Jehova iti kaaldawantayo. Iti sumaganad nga artikulo, usigentayo ti nakaskasdaaw met nga irarang-ay ti sao ti Dios iti moderno a panawen.
Malagipyo Kadi?
• Kasano nga immadu dagiti nagkauna nga adalan?
• Kasano a nagsaknap ti sao ti Dios iti adu a lugar?
• Kasano a nagballigi ti sao ti Dios idi umuna a siglo?
• Ania ti paset ti nasantuan nga espiritu iti irarang-ay ti sao ti Dios?
[Ladawan iti panid 12]
Kinasabaan ni Felipe ti Etiope, nga insaknapna ti naimbag a damag iti adu a lugar
[Ladawan iti panid 13
Ti nasantuan nga espiritu inwanwanna dagiti apostol ken lallakay sadi Jerusalem
[Picture Credit Line iti panid 13]
Makinngato a kannawan: Reproduksion ti Siudad ti Jerusalem idi tiempo ti Maikadua a Templo-masarakan iti paraangan ti Holyland Hotel, Jerusalem