No Kasano a Makaaramidkayo Kadagiti Nainsiriban a Desision

SAGUT ti Dios ti wayawaya nga agikeddeng. No awan dayta, mayarigtayo kadagiti robot, a ditay kontrolado dagiti tignaytayo. Ngem gapu ta addaantayo iti kasta a wayawaya, maipasangotayo kadagiti karit. Iti panagbiagtayo adda dagiti masapul a desisionantayo gapu ta adda wayawayatayo nga agikeddeng.

Siempre, adu a desision ti saan unay a napateg. Adda met dagidiay mangapektar iti intero a masakbayantayo kas iti panangpili iti karera wenno panangikeddeng no makiasawa wenno saan. Adda met dagidiay mangapektar kadagiti sabsabali. Dadduma a desision dagiti nagannak ti addaan iti dakkel nga epekto kadagiti annakda. Maysa pay, sungsungbatantayo iti Dios ti adu kadagiti pangngeddengtayo.​—Roma 14:12.

Kasapulan ti Tulong

Saan a nasayaat ti pakasaritaan ti tao no maipapan iti panagaramid iti desision. Nakaay-ay-ay ti nagbanagan ti maysa kadagiti nairekord a kaunaan a desision nga inaramid ti tao. Inkeddeng ni Eva ti mangan iti bunga ti kayo a nalawag nga imparit ti Dios. Gapu iti inaagum a desisionna, naituggod ni lakayna nga agsukir met iti Dios ket nagbanag dayta iti nakaro a panagsagaba ti sangatauan. Iti adu a kaso, ti desision dagiti tattao ket maim-impluensiaan pay laeng kadagiti inaagum a tarigagay imbes a kadagiti nalinteg a prinsipio. (Genesis 3:6-19; Jeremias 17:9) Ket no maipasango kadagiti serioso a pangngeddeng, masansan a madlawtayo dagiti limitasiontayo.

Saan ngarud a pakasdaawan a no agaramidda iti napapateg a desision, adu ti agpatulong kadagiti gubuayan a natantan-ok ngem iti tao. Nailanad iti Biblia ti maysa a pasamak, idi adda nasken a desisionan ni Nabucodonosor iti tengnga ti gubat. Nupay maysa nga ari, nariknana a masapul nga “umamang iti panagpadles,” agkonsulta kadagiti espiritu. Isu a kinuna ti salaysay: “Ginunggonna dagiti pana. Nagimtuod babaen iti terafim; kimmita iti dalem.” (Ezequiel 21:21) Adu met ita ti makiuman kadagiti mammadles ken astrologo ken iti dadduma pay a pamay-an tapno dumawatda iti tulong kadagiti espiritu. Ngem mangallilaw ken mangyaw-awan dagitoy.​—Levitico 19:31.

Adda Daydiay naan-anay a mapagtalkan ket iti intero a historia natulonganna dagiti tattao nga agaramid iti nainsiriban a desision. Awan sabali no di ni Jehova a Dios. Kas pagarigan, idi un-unana a panawen, inted ni Jehova iti ilina nga Israel ti Urim ken Tumim​—nalabit sagrado a banag a mapagbibinnunotan no maipasango ti nasion kadagiti narikut a kasasaad. Babaen ti Urim ken Tumim, impaay ni Jehova dagiti direkta a sungbat kadagiti saludsod ken tinulonganna dagiti panglakayen ti Israel a mangsierto no maitunos dagiti desisionda iti pagayatan ti Dios.​—Exodo 28:30; Levitico 8:8; Numeros 27:21.

Usigenyo ti sabali pay a pagarigan. Idi nadutokan ni Gideon a mangidaulo iti buyot ti Israel maibusor iti Madian, masapul nga agdesision no awatenna dayta a dakkel a pribilehio. Gapu ta kayat ni Gideon a masigurado nga adda kenkuana ti suporta ni Jehova, dimmawat iti namilagruan a pagilasinan. Inkararagna a malnaawan ti dutdot a delana ngem agtalinaed a namaga ti daga a nagsaadanna. Iti simmaganad a rabii, kiniddawna nga agtalinaed koma a namaga ti dutdot a delana idinto ta malnaawan ti daga a nagsaadan daytoy. Siaayat nga impaay ni Jehova dagiti pagilasinan a kiniddaw ni Gideon. Kas resultana, nakaaramid ni Gideon iti umiso a desision, ket iti tulong ti Dios inkisapna amin a kabusor ti Israel.​—Uk-ukom 6:33-40; 7:21, 22.

Iti Kaaldawantayo Met Ngay?

Uray ita, tulongan ni Jehova dagiti adipenna no maipasangoda iti napapateg a pangngeddeng. Kasano? Kas ken Gideon, rumbeng kadi a dumawattayo iti ‘pangsubok a dutdot a delana,’ dagiti pagilasinan nga aggapu ken Jehova tapno mangiwanwan kadatayo? Maysa a pagassawaan ti agpalplano nga agserbi iti lugar nga agkasapulan iti ad-adu nga agibumbunannag iti Pagarian. Tapno makapangngeddengda, nangaramidda iti pannubok. Ilakoda ti balayda. No mailakoda ti balay iti inkeddengda nga aldaw ken presio wenno nanginngina pay, matmatanda dayta kas pagilasinan a kayat ti Dios nga ituloyda ti planoda. No saan a malako ti balay, pagilasinan dayta a saan a pagayatan ti Dios a mapanda.

Saan a nalako ti balay. Pagilasinan kadi dayta a di kayat ni Jehova nga agserbi ti agassawa iti lugar nga addaan dakdakkel a panagkasapulan? Siempre, panaglablabes no ibagatayo ti eksakto nga aramiden wenno saan nga aramiden ni Jehova para kadagiti adipenna. Ditay maibaga a saan a pulos a bumallaet ita ni Jehova tapno ipakaammona ti pagayatanna agpaay kadatayo. (Isaias 59:1) Nupay kasta, awan ti kalintegantayo a mangnamnama a makibiang ti Dios kadagiti napateg a desisiontayo, a kas man la ipabiangtayon ken Jehova ti panagdesision. Kinapudnona, kaaduanna a nagdesision ni Gideon nga awan ti naggapu ken Jehova a namilagruan a pagilasinan!

Kaskasdi, ibaga ti Biblia a posible ti agpaiwanwan iti Dios. Naipakpakauna maipapan iti kaaldawantayo: “Dagiti bukodmo a lapayag makangngegto iti sao iti likudam a kunkunana: ‘Daytoy ti dalan. Magnakayo iti dayta,’ no kas pagarigan agpakannawankayto wenno no kas pagarigan agpakannigidkayto.” (Isaias 30:21) No maipasangotayo kadagiti napateg a panagdesision, maiparbeng unay ti agpatulong tapno masigurado a dagiti desisiontayo ket maitunos iti pagayatan ti Dios ken mangyanninaw iti naindaklan a siribna. Kasano? Babaen ti panagkonsulta iti Saona ket pagbalinen dayta a ‘pagsilawan ti sakatayo, ken silaw ti danatayo.’ (Salmo 119:105; Proverbio 2:1-6) Tapno maaramidtayo daytoy, nasken nga iyugalitayo ti gumun-od iti umiso a pannakaammo manipud iti Biblia. (Colosas 1:9, 10) Ket no maipasangotayo iti panagdesision, masapul a sukimatentayo a naimbag ti amin a prinsipio ti Biblia a nainaig iti dayta a banag. Tumulong ti kasta a panagsukimat ‘tapno masiguradotayo ti napatpateg a bambanag.’​—Filipos 1:9, 10.

Nasken met a makisaritatayo ken Jehova babaen ti kararag, nga agtalektayo nga imdengannatayo. Anian a makapabang-ar nga ilawlawag iti naayat nga Amatayo ti maipapan iti desision a nasken nga aramidentayo ken dagiti alternatibo a pampanunotentayo! Iti kasta, natalgedtayo nga agpaiwanwan nga agaramid iti umiso a desision. Masansan a ti nasantuan nga espiritu ipalagipna kadatayo dagiti prinsipio ti Biblia a maitutop, wenno tulongannatayo a mangtarus a naimbag kadagiti teksto a mainaig iti kasasaadtayo.​—Santiago 1:5, 6.

Impaay met ni Jehova dagiti nataengan a kakabsat iti kongregasion a mabalintay a pakisaritaan maipapan kadagiti desisiontayo. (Efeso 4:11, 12) Ngem no agkonsulta iti dadduma, ditay koma tuladen ti kababalin dagidiay agsaludsod iti sabasabali a tattao agingga a masarakanda daydiay mangibaga iti kayatda a mangngegan. Sada tungpalen ti balakadna. Pakaballaagantayo met koma ti napasamak ken Rehoboam. Idi naipasango iti napateg a panagdesision, nagsayaat ti balakad kenkuana dagiti lallakay a nagserbi iti amana. Ngem imbes nga ipangagna ti balakadda, nagkonsulta ketdi kadagiti agkakabannuag a kasadaranna. Idi sinurotna ti balakadda, nagdakes ti nagbanagan ti desisionna ta napukawna ti nagdakkel a paset ti pagarianna.​—1 Ar-ari 12:1-17.

Agpabalakadkayo kadagidiay natenneb ken addaan iti nauneg a pannakaammo iti Kasuratan ken dakkel a panagraem kadagiti umiso a prinsipio. (Proverbio 1:5; 11:14; 13:20) No posible, iwayaanyo nga utoben dagiti nairaman a prinsipio ken ti amin a nasirarakyo nga impormasion. No mausigyo dagiti bambanag maibatay iti Sao ni Jehova, nalabit ad-adda a makapagdesisionkayo iti umiso.​—Filipos 4:6, 7.

Dagiti Desisiontayo

Adda dagiti nalaka a desisionan. Idi naibilin nga isardengda ti mangaskasaba, ammo dagiti apostol a nasken nga itultuloyda nga irakurak ti maipapan ken Jesus, isu a dagus nga impakaammoda iti Sanhedrin ti desisionda nga agtulnog iti Dios imbes nga iti tao. (Aramid 5:28, 29) Ngem adda dagiti desision a nasken nga usigen a naimbag agsipud ta awan ti direkta a sungbat ti Biblia mainaig iti dayta a banag. Kaskasdi, adda dagiti prinsipio ti Biblia a mangiturong iti kasayaatan a desision. Kas pagarigan, nupay adu ita ti paglinglingayan nga awan idi panawen ni Jesus, adda dagiti nalawag nga ibaga ti Biblia no ania ti makaay-ayo ken di makaay-ayo ken Jehova. No kasta, nakaaramid iti di umiso a desision ti asinoman a Kristiano a makiraman iti paglinglingayan a mangitandudo iti kinaranggas, imoralidad, wenno kinarebelioso.​—Salmo 97:10; Juan 3:19-21; Galacia 5:19-23; Efeso 5:3-5.

No dadduma, mabalin nga umiso ti dua a desision. Ti panagserbi iti lugar nga adda ti dakdakkel a panagkasapulan ket nagsayaat a pribilehio ken mangyeg iti adu a bendision. Ngem no adda makagapu a di aramiden dayta ti maysa, adda latta dagiti nasayaat a maaramidanna iti kongregasionda. No maminsan, mabalin a maipasangotayo kadagiti situasion a mangted kadatayo iti gundaway a mangipakita no kasano kauneg ti debosiontayo ken Jehova wenno no ania ti kapatgan iti biagtayo. No kasta, ipalubos ni Jehova nga usarentayo ti wayawaya a mangikeddeng tapno maipakitatayo no ania a talaga ti linaon ti pusotayo.

Masansan a dagiti desisiontayo apektaranda ti dadduma. Kas pagarigan, dagiti Kristiano idi umuna a siglo nagrag-oanda ti pannakawayawayada kadagiti nagadu nga ipawil ti Linteg. Kaipapananna daytoy, kas pagarigan, a mabalinda a kanen wenno liklikan ti taraon a maibilang a narugit iti sidong ti Linteg. Kaskasdi, naidagadag nga ikabilanganda ti konsiensia ti sabsabali no usarenda daytoy a wayawaya. Ti komento ni Pablo maipapan iti dayta a banag ket mabalin a mayaplikar iti adu nga aramidentayo a desision: “Liklikanyo ti agbalin a pakaigapuan ti pannakaitibkol.” (1 Corinto 10:32) Ti tarigagaytayo a di mangitibkol iti dadduma mabalin nga iwanwanna ti adu a pangngeddengtayo. Ditay liplipatan a ti panagayat iti kaarruba ti maikadua a kangrunaan a bilin.​—Mateo 22:36, 39.

Ti Resulta Dagiti Desisiontayo

Pagangayanna, kanayon a nasayaat ti resulta dagiti pangngeddeng a naibatay iti nadalus a konsiensia ken kadagiti prinsipio ti Biblia. Siempre, saan a maliklikan nga adda dagiti personal a maisakripisio. Idi a dagiti apostol impakaammoda iti Sanhedrin ti desisionda nga itultuloyda nga ikasaba ti maipapan ken Jesus, nasapsaplitda sakbay a nawayawayaanda. (Aramid 5:40) Nagpeggad ti biag ti tallo a Hebreo​—da Sidrac, Misac, ken Abdenago​—idi inkeddengda a dida agruknoy iti balitok a ladawan a binangon ni Nabucodonosor. Nakasaganada a matay maigapu iti desisionda. Ngem ammoda nga anamongan ken bendisionan ida ti Dios.​—Daniel 3:16-19.

No mapasarantay dagiti pakarigatan kalpasan ti naannad a panagdesision, saantay nga ibaga a kamali ti desisiontayo. “Ti tiempo ken ti di mapakpakadaan a pasamak” mabalin nga apektaranda ti pagbanagan ti uray kasayaatan a desision. (Eclesiastes 9:11) Maysa pay, no dadduma ipalubos ni Jehova dagiti pakarigatan tapno subokenna no kasano kapudno ti debosiontayo kenkuana. Nagpatnag a nakigubal ni Jacob iti maysa nga anghel sakbay nga inawatna ti bendision. (Genesis 32:24-26) Mabalin met a maipasangotayo kadagiti pakarigatan nupay husto ti ar-aramidentayo. Kaskasdi, no dagiti desisiontayo ket maitunos iti pagayatan ti Dios, makapagtalektayo a tulongannatayo nga agibtur ken bendisionannatayto.​—2 Corinto 4:7.

No kasta, dikay agpannuray iti bukodyo a sirib no agar-aramidkayo kadagiti napateg a desision. Kitaenyo no ania dagiti maitutop a prinsipio ti Biblia. Ikararagyo ken Jehova dayta a banag. No mabalbalin, iyumanyo kadagiti nataengan a padayo a Kristiano. Kalpasanna, pakirdenyo ti nakemyo. Usarenyo a nainsiriban ti inted ti Dios a wayawaya nga agikeddeng. Agaramidkayo iti umiso a desision ket ipakitayo ken Jehova a nalinteg ti pusoyo.

Ladawan iti panid 28]

Agkonsulta iti Sao ti Dios sakbay nga agaramid kadagiti napateg a desision

Dagiti Ladawan iti panid 29]

Ikararagyo ken Jehova dagiti aramidenyo a desision

Ladawan iti panid 30]

Mabalinyo a pakisaritaan kadagiti nataengan a Kristiano dagiti napateg a desisionyo