Kamakamennakay Kadi ti Bendision ni Jehova?

“Umayto kenka dagitoy amin a bendision ket kamakamendaka, agsipud ta umim-imdengka iti timek ni Jehova a Diosmo.”​—DEUTERONOMIO 28:2.

1. Ania idi ti mangikeddeng no bendision wenno lunod ti dumteng kadagiti Israelita?

IDI nganngani agngudon ti 40 a tawen a panagalla-alla dagiti Israelita iti let-ang, nagpakarsoda iti Tanap ti Moab. Asidegda idin iti Naikari a Daga. Iti daydi a tiempo nga insurat ni Moises ti libro a Deuteronomio, a nakailanadan dagiti agsasaruno a bendision ken lunod. No agtultuloy nga ‘umimdeng [dagiti Israelita] iti timek ni Jehova’ babaen ti panagtulnogda kenkuana, ‘kamakamen’ ida dagiti bendision. Ay-ayaten ida ni Jehova kas “naisangsangayan a sanikua[na]” ken kayatna nga ipakita ti bilegna maigapu kadakuada. Ngem no saanda nga agtultuloy nga umimdeng kenkuana, sigurado a kamakamen met ida dagiti lunod.​—Deuteronomio 8:10-14; 26:18; 28:2, 15.

2. Ania ti kaipapanan dagiti Hebreo a berbo a naipatarus nga ‘umim-imdeng’ ken ‘kamakamen’ iti Deuteronomio 28:2?

² Ti Hebreo a berbo a naipatarus nga ‘umim-imdeng’ iti Deuteronomio 28:2 ipasimudaagna ti agtultuloy a tignay. Saan la a sagpaminsan a masapul nga umimdeng ken ni Jehova dagiti tattaona; masapul nga umimdengda a kanayon. Iti kasta, kamakamen ida dagiti bendision ti Dios. Ti Hebreo a berbo a naipatarus a ‘kamakamen’ ket maysa a termino a mainaig iti panaganup. Kaaduanna, “kamaten” wenno “danonen” ti kaipapananna.

3. Kasanotayo nga agbalin a kas ken Josue, ken apay a nagpateg daytoy?

³ Inkeddeng ni Josue a panguluen dagiti Israelita ti umimdeng ken ni Jehova, isut’ gapuna a dimteng kenkuana dagiti bendision. Kinuna ni Josue: “Agpilikayo ita nga aldaw maipaay iti bagbagiyo no siasino ti pagserbianyonto . . . Ngem no maipapan kaniak ken iti sangakabbalayak, agserbikamto ken Jehova.” Simmungbat dagiti tattao: “Narigat a pagarupen, iti biangmi, a panawanmi ni Jehova tapno agserbikami kadagiti sabali a didios.” (Josue 24:15, 16) Gapu iti nagsayaat a kababalinna, maysa ni Josue kadagiti sumagmamano iti henerasionna a naparaburan a simrek iti Naikari a Daga. Mapaspasungadantay itan ti nasaysayaat nga amang a Naikari a Daga​—maysa a paraiso a daga a sadiay dagiti amin nga anamongan ti Dios sagrapendanto dagiti bendision a nasaysayaat nga adayo ngem idi kaaldawan ni Josue. Kamakamennakayto kadi dagita a bendision? Wen, no agtultuloy nga umimdengkayo ken ni Jehova. Tapno tumibker ti determinasionyo a mangaramid iti kasta, usigenyo ti pakasaritaan ti nagkauna nga Israel agraman dagiti indibidual a pakasursuruantayo.​—Roma 15:4.

Bendision Wenno Lunod?

4. Kas sungbat iti kararag ni Solomon, ania ti inted ti Dios kenkuana, ket ania koma ti panangmatmattayo kadagita a bendision?

⁴ Bayat ti panagturay ni Ari Solomon, kanayon nga umawat dagiti Israelita kadagiti naisangsangayan a bendision a naggapu ken Jehova. Natalgedda ken aglaplapusanan dagiti agkakaimbag a banag nga adda kadakuada. (1 Ar-ari 4:25) Nagdinamag ti kinabaknang ni Solomon, nupay saan a material a kinabaknang ti kiniddawna iti Dios. Yantangay ubing ken awan pay padpadasna, inkararagna ketdi a maaddaan koma iti natulnog a puso​—maysa a kiddaw a pinatgan ni Jehova babaen ti panangtedna kenkuana iti sirib ken pannakaawat. Gapuna, nabaelan ni Solomon ti mangukom a siuumiso kadagiti tattao, a mailasinna ti naimbag ken dakes. Nupay inikkan met ti Dios iti kinabaknang ken kinadayag, kas agkabannuag a lalaki, inapresiar unay ni Solomon ti naespirituan a gameng a napatpateg nga adayo. (1 Ar-ari 3:9-13) Nabaknangtay man iti material wenno saan, anian a yamantayo no adda kadatayo ti bendision ni Jehova ken nabaknangtayo iti naespirituan!

5. Ania ti napasamak idi saan a nagtultuloy nga immimdeng ken ni Jehova dagiti umili ti Israel ken Juda?

⁵ Saan nga inapresiar dagiti Israelita ti bendision ni Jehova. Gapu ta saanda a nagtultuloy nga immimdeng kenkuana, kinamakam ida dagiti naipakpakauna a lunod. Nagbanag daytoy iti panangsakup dagiti kabusorda ken pannakakayaw dagiti agnanaed iti Israel ken Juda. (Deuteronomio 28:36; 2 Ar-ari 17:22, 23; 2 Cronicas 36:17-20) Nakasursuro kadi ti ili ti Dios iti kasta a panagsagaba a dagidiay laeng agtultuloy nga umimdeng ken ni Jehova ti kamakamen dagiti bendision ti Dios? Dagiti natda a Judio a nagsubli iti dagada idi 537 K.K.P. ti naaddaan iti gundaway a mangipakita no nakagun-odda met laeng iti “puso a masirib” ken mabigbigdan a masapul nga agtultuloy nga umimdengda iti Dios.​—Salmo 90:12.

6. (a) Apay nga imbaon ni Jehova da Haggeo ken Zacarias nga agipadto iti ilina? (b) Ania a prinsipio ti naibatad iti mensahe ti Dios babaen ken ni Haggeo?

⁶ Idi nakasublin dagiti Judio, nangbangonda iti altar ken rinugianda a tarimnen ti templo sadi Jerusalem. Ngem idi naipasangoda iti nakaro nga ibubusor, bimmaaw ti regtada ket insardengda ti nagibangon. (Esdras 3:1-3, 10; 4:1-4, 23, 24) Inyun-unada payen dagiti bukodda a pagnam-ayan. Gapuna, imbaon ti Dios da propeta Haggeo ken Zacarias tapno pabaraenda ti regta dagiti umili maipaay iti pudno a panagdayaw. Babaen ken ni Haggeo, kinuna ni Jehova: “Tiempo kadi nga agnaedkayo kadagiti balayyo a nagsukot ti didingna, idinto ta daytoy a balay [a pagdaydayawan] ket rebbek? . . . Isaadyo ta pusoyo iti daldalanyo. Nagimulakayo iti adu a bin-i, ngem bassit ti maiyeg. Adda pannangan, ngem saan nga agingga iti pannakapnek. . . . Ket daydiay patangtangdanan isu a mismo patangtangdanan maipaay iti supot a lussolussok.” (Haggeo 1:4-6) Saan a mangyeg iti bendision ni Jehova ti panangisakripisio kadagiti naespirituan a banag gapu kadagiti material a pagimbagan.​—Lucas 12:15-21.

7. Apay a kinuna ni Jehova kadagiti Judio: “Isaadyo ta pusoyo iti daldalanyo”?

⁷ Gapu ta makumikomda kadagiti inaldaw a pakaringgoran, nalipatan dagiti Judio a kamakamen ida dagiti bendision ti Dios a kas iti tudo ken nawadwad nga apit no la ket ta agtalinaedda a natulnog iti Dios, uray no adda dagiti bumusor kadakuada. (Haggeo 1:9-11) Anian a maitutop ngarud ti pammagbaga nga: “Isaadyo ta pusoyo iti daldalanyo”! (Haggeo 1:7) Kas man la ibagbaga ni Jehova kadakuada: ‘Agpanunotkayo! Kitaenyo no ania ti pakainaigan ti ubbaw a panagbannogyo kadagiti talon iti langalang a kasasaad ti balayko a pagdaydayawan.’ Idi agangay, impapuso dagiti umili ti naipaltiing a sasao dagiti propeta ni Jehova ta intuloyda a tinarimaan ti templo agingga a nalpas idi 515 K.K.P.

8. Ania ti indagadag ni Jehova kadagiti Judio idi kaaldawan ni Malakias, ken apay?

⁸ Idi kaaldawan ni propeta Malakias, nangrugi manen nga agallaalla iti naespirituan dagiti Judio, a mangidatdatagda pay ketdi kadagiti di makaay-ayo a daton iti Dios. (Malakias 1:6-8) Gapuna, indagadag ni Jehova nga iyegda iti kamaligna ti apagkapullo dagiti apitda ket subokenda ti Dios no dina luktan kadakuada dagiti aribengbeng ti langlangit ket ibuyatna kadakuada ti nawadwad a bendision. (Malakias 3:10) Anian a kinamaag ti panagbannog dagiti Judio kadagiti banag a siwawadwad nga ited kadakuada ti Dios no la ket ta agtultuloy nga imdenganda ti timekna!​—2 Cronicas 31:10.

9. Sukimatentayo ti pakasaritaan dagiti siasino a tallo a tattao a nailanad iti Biblia?

⁹ Malaksid pay iti panangidatagna iti pakasaritaan ti nasion ti Israel, salaysayen met ti Biblia ti pakasaritaan ti adu nga indibidual nga immawat kadagiti bendision ti Dios wenno lunod, depende no nagtultuloy nga immimdengda ken ni Jehova wenno saan. Kitaentayo no ania ti maadaltayo iti tallo kadakuada​—da Boaz, Nabal, ken Anna. Iti daytoy a banag, nalabit kayatyo a basaen ti libro a Ruth agraman ti 1 Samuel 1:1–2:21 ken 1 Samuel 25:2-42.

Immimdeng ni Boaz iti Dios

10. Ania dagiti pagpadaan da Boaz ken Nabal?

¹⁰ Nupay saan nga agkapanawenan da Boaz ken Nabal, adda dagiti pagpadaanda. Kas pagarigan, agpadada a nagnaed iti daga ti Juda. Nabaknang ken adda dagada, ken agpada a naaddaanda iti naisangsangayan a gundaway a mangipakita iti kinaimbag iti tao nga agkasapulan. Ngem agingga la dita ti pagpadaanda.

11. Kasano nga impakita ni Boaz a kanayon nga immimdeng ken ni Jehova?

¹¹ Nagbiag ni Boaz idi panawen dagiti ukom ti Israel. Nadayaw ti panangtratona kadagiti sabsabali, ket dakkel ti panagraem kenkuana dagiti para anina. (Ruth 2:4) Kas panagtungpal iti Linteg, sinigurado ni Boaz nga adda mabati iti talonna a matudtod dagiti marigrigat ken napanglaw. (Levitico 19:9, 10) Ania ti inaramid ni Boaz idi naammuanna ti sasaaden da Ruth ken ni Noemi ken nakitana ti kinaagawa ni Ruth a mangasikaso kadagiti kasapulan ti baketen a katuganganna? Pinakitaanna ni Ruth iti naisangsangayan a konsiderasion ket binilinna dagiti tattaona a bay-anda nga agtudtod ni Ruth iti talonna. Babaen ti sao ken naayat nga aramidna, impakita ni Boaz nga isu ket maysa a naespirituan panagpampanunotna a tao nga umim-imdeng ken ni Jehova. Dayta ti gapuna a pinaraburan ken binendisionan ti Dios.​—Levitico 19:18; Ruth 2:5-16.

12, 13. (a) Kasano nga impakita ni Boaz ti nauneg a panagraemna iti linteg ni Jehova maipapan iti panagsaká? (b) Aniada a bendision a naggapu iti Dios ti dimteng ken ni Boaz?

¹² Ti kangrunaan a pammaneknek a kanayon nga immimdeng ni Boaz ken ni Jehova ket ti situtulok a panangtungpalna iti linteg ti Dios maipapan iti panagsaká. Inaramid ni Boaz ti amin tapno masigurado a ti tawid ti kabagianna​—ti pimmusay nga asawa ni Noemi a ni Elimelec​—ket agtalinaed iti pamilia ni Elimelec. Babaen ti “agkayong a pannakiasawa,” masapul a makiasawa ti balo iti kaasitgan a kabagian ti pimmusay nga asawana tapno mataginayon ti agbalin nga anakda a lalaki ti tawid ti pamilia. (Deuteronomio 25:5-10; Levitico 25:47-49) Immannugot ni Ruth a makiasawa kas kasukat ni Noemi, ta baket ngaminen ni Noemi tapno aganak pay. Idi nagkedked ti as-asideg a kabagian ni Elimelec a tumulong ken ni Noemi, inasawa ni Boaz ni Ruth. Naibilang ti anakda a lalaki a ni Obed kas anak ni Noemi ket isu ti legal nga agtawid iti sanikua ni Elimelec.​—Ruth 2:19, 20; 4:1, 6, 9, 13-16.

¹³ Aglaplapusanan a bendision ti dimteng ken ni Boaz gapu iti situtulok a panangtungpalna iti linteg ti Dios. Babaen ken ni Obed nga anakda, naparaburanda ken ni Ruth iti pribilehio nga agbalin a kapuonan ni Jesu-Kristo. (Ruth 2:12; 4:13, 21, 22; Mateo 1:1, 5, 6) Manipud kadagiti naparabur nga aramid ni Boaz, maadaltayo a dumteng dagiti bendision kadagidiay mangipakita iti ayat kadagiti sabsabali ken agtignay a mayannurot kadagiti bilin ti Dios.

Saan nga Immimdeng ni Nabal

14. Ania a kita ti tao ni Nabal?

¹⁴ Saan a kas ken Boaz, saan nga immimdeng ni Nabal ken ni Jehova. Linabsingna ti linteg ti Dios a: “Masapul nga ayatem ti padam a tao a kas iti bagim.” (Levitico 19:18) Saan a maseknan ni Nabal kadagiti naespirituan a banag; “nagubsang ken dakes iti ar-aramidna.” Uray dagiti mismo nga adipenna imbilangda ni Nabal nga ‘awan kaes-eskanna a tao.’ Maitutop la unay a “kuneng,” wenno “maag,” ti kayat a sawen ti naganna a Nabal. (1 Samuel 25:3, 17, 25) No kasta, ania ti inaramid ni Nabal idi naaddaan iti gundaway a mangipakita iti kinaimbag iti maysa a tao nga agkasapulan​—ni David a pinulotan ni Jehova?​—1 Samuel 16:13.

15. Kasano ti panangtrato ni Nabal ken ni David, ket iti daytoy a banag, kasano a naiduma ni Abigail iti asawana?

¹⁵ Idi nagkampoda iti asideg dagiti arban ni Nabal, awan ti aniaman a bayad a kiniddaw ni David ken dagiti tattaona a kasukat ti panangsalaknibda manipud kadagiti bunggoy dagiti tulisan. “Nagbalinda a maysa a pader iti likmutmi agpadpada iti rabii ken iti aldaw,” kinuna ti maysa kadagiti pastor ni Nabal. Ngem idi nagkiddaw iti taraon dagiti lallaki nga imbaon ni David, “nangibugkaw [ni Nabal] kadagiti pammabalaw kadakuada” ket pinapanawna ida nga ima-ima. (1 Samuel 25:2-16) Nangipatulod a dagus ni Abigail nga asawa ni Nabal iti taraon ken ni David. Iti napalalo a pungtotna, agturong idin ni David a mapan mangikisap ken ni Nabal ken kadagiti tattaona. Gapu iti naalibtak a panagtignay ni Abigail, naispal ti biag ti adu a tattao ken saan a nakabasol ni David iti panangibukbok iti dara. Ngem nakaro unay ti kinaagum ken kinasabrak ni Nabal. Sangapulo nga aldaw kalpasanna, “kinabil ni Jehova ni Nabal, iti kasta natay.”​—1 Samuel 25:18-38.

16. Kasanotay a matulad ni Boaz ken maiwaksi dagiti aramid ni Nabal?

¹⁶ Anian a nagduma da Boaz ken Nabal! Ditay koma tultuladen ti kinasabrak ken kinaagum ni Nabal. Tuladentay ketdi ti kinaimbag ken di panagimbubukodan ni Boaz. (Hebreo 13:16) Maaramidtay dayta babaen ti panangsurot iti balakad ni apostol Pablo a: “Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti amin, ngem nangnangruna kadagidiay nainaig kadatayo iti pammati.” (Galacia 6:10) Iti kaaldawantayo, ti “sabsabali a karnero” ni Jesus, dagiti Kristiano a mangnamnama nga agbiag nga agnanayon ditoy daga, ket addaan iti pribilehio a mangaramid iti naimbag kadagiti napulotan nga adipen ni Jehova, ti natda kadagiti 144,000, nga umawatto iti imortal a biag idiay langit. (Juan 10:16; 1 Corinto 15:50-53; Apocalipsis 14:1, 4) Ibilang ni Jesus dagiti kasta a naayat nga aramid a kas man la isu a mismo ti nakaipaayanna, ket mangyeg iti aglaplapusanan a bendision ni Jehova ti panangaramid kadagitoy a naimbag a banag.​—Mateo 25:34-40; 1 Juan 3:18.

Dagiti Pannubok ken Bendision a Dimteng ken Anna

17. Ania dagiti pannubok a dimteng ken Anna, ket ania a kababalin ti imparangarangna?

¹⁷ Binendisionan met ni Jehova ti managbuteng-Dios a babai a ni Anna. Agnanaedda idi iti Levita nga asawana a ni Elcana iti kabambantayan a rehion ti Efraim. Kas impalubos ken mayannurot iti Linteg, addaan ni Elcana iti maikadua nga asawa​—ni Penina. Lupes ni Anna, ket pakaumsian daytoy ti maysa a babai nga Israelita, idinto ta adda annak ni Penina. (1 Samuel 1:1-3; 1 Cronicas 6:16, 33, 34) Ngem imbes a liwliwaenna, rinurod ni Penina ni Anna nga uray la a nagsangsangit ken saanen a makapangan. Nakarkaro pay, kasta ti ar-aramiden ni Penina “iti kada tawen,” tunggal mapan ti pamilia ni Elcana iti balay ni Jehova idiay Silo. (1 Samuel 1:4-8) Nagulpit ketdin ni Penina, ken anian a pannubok dayta ken ni Anna! Ngem saan a pulos a pinabasol ni Anna ni Jehova; saan met a nagbati lattan iti balayda no kasta a mapan ni lakayna idiay Silo. Gapuna, idi kamaudiananna, dimteng kenkuana ti nabaknang a bendision.

18. Ania nga ulidan ti impaay ni Anna?

¹⁸ Maysa ni Anna a nagsayaat a pagwadan dagiti tattao ni Jehova ita, nangruna dagidiay nalabit nasair gapu iti nasakit a panagsasao dagiti dadduma. Kadagita a kasasaad, saan a makatulong ti panangisinsina iti bagi. (Proverbio 18:1) Saan nga impalubos ni Anna a dagiti pannubok a dimteng kenkuana ti mangpakapsut iti tarigagayna a mapan iti lugar a pakaisuruan ti Sao ti Dios ken pagdaydayawan dagiti tattaona. Iti kasta, nagtalinaed a natibker iti naespirituan. Ti kinauneg ti espiritualidadna ket naipalgak iti nagimnas a kararagna a nailanad iti 1 Samuel 2:1-10.a

19. Kasanotay a maipakita ti panangipategtayo kadagiti naespirituan a banag?

¹⁹ Kas ad-adipen ni Jehova kadagitoy a tiempo, saantay nga agdaydayaw iti maysa a tabernakulo. Nupay kasta, maipakitatayo ti panangipategtayo kadagiti naespirituan a banag, kas iti inaramid ni Anna. Kas pagarigan, maipakitatayo ti nauneg a panangipategtayo kadagiti naespirituan a gameng babaen ti regular nga itatabuno kadagiti Nakristianuan a gimong, asamblea, ken kombension. Usarentayo dagitoy a gundaway nga agpipinnaregta iti pudno a panagdayaw ken Jehova, a nangted kadatayo iti “pribilehio nga awanan buteng a panangipaay iti sagrado a panagserbi kenkuana buyogen ti kinasungdo ken kinalinteg.”​—Lucas 1:74, 75; Hebreo 10:24, 25.

20, 21. Kasano a nagunggonaan ni Anna gapu iti nadiosan a debosionna?

²⁰ Sipapanunot ni Jehova iti nadiosan a debosion ni Anna ket sipaparabur a ginunggonaanna. Iti naminsan nga ipapan ti pamiliada idiay Silo, kas tinawen nga ar-aramidenda, agsangsangit ken sipapasnek a nagkararag ni Anna iti Dios ket inkarina: “O Jehova ti buybuyot, no kumitakanto a di bumurong iti pannakaparigat ti adipenmo a babai ket pudno a lagipennak, ket saanmonto a lipaten ti adipenmo a babai ket pudno a mangipaayka iti adipenmo a babai iti anak a lalaki, ipaaykonto ken Jehova iti amin nga al-aldaw ti panagbiagna.” (1 Samuel 1:9-11) Impangag ti Dios ti araraw ni Anna ket pinaraburanna iti anak a lalaki a pinanagananna iti Samuel. Idi naipusoten ni Samuel, impan ti inana idiay Silo tapno makapagserbi iti tabernakulo.​—1 Samuel 1:20, 24-28.

²¹ Imparangarang ni Anna ti ayatna iti Dios ket tinungpalna ti karina mainaig ken ni Samuel. Ken panunotenyo ti aglaplapusanan a bendision a sinagrapda ken ni Elcana gapu iti panagserbi ti patpatgenda nga anak iti tabernakulo ni Jehova! Adu a Kristiano a nagannak ti maragragsakan ken mabembendisionan met agsipud ta agserserbi dagiti annakda kas amin-tiempo a payunir a ministro, kameng ti pamilia ti Bethel, wenno iti dadduma pay a wagas a pakaidayawan ni Jehova.

Agtultuloy nga Umimdengkayo ken ni Jehova!

22, 23. (a) Ania ti masiguradotayo no agtultuloy nga imdengantayo ti timek ni Jehova? (b) Ania ti mausig iti sumaganad nga artikulo?

²² Ania ti masiguradotayo no agtultuloy nga umimdengtayo ken ni Jehova? Bumaknangtayo iti naespirituan no ipakitatayo ti amin-kararua a panagayat iti Dios ken agbiagtayo iti wagas a mangipakita a datayo dagiti dedikado nga adipenna. Uray pay no masapul nga ibturantayo dagiti nakaro a pannubok gapu iti panangaramidtayo iti kasta, sigurado a bendisionannatayto ni Jehova​—masansan kadagiti pamay-an a nasaysayaat ngem iti mapanunottayo.​—Salmo 37:4; Hebreo 6:10.

²³ Naruay a bendision ti sagrapento ti ili ti Dios iti masanguanan. Gapu iti sitatallugod a panagimdengda ken ni Jehova, maisalakanto ti “dakkel a bunggoy” iti “dakkel a rigat” ket siraragsak nga agbiagdanto iti baro a lubong ti Dios. (Apocalipsis 7:9-14; 2 Pedro 3:13) Naan-anay a pennekento ni Jehova dagiti umiso a tarigagay ti amin a tattaona. (Salmo 145:16) Ngem kas ipakita ti sumaganad nga artikulo, uray pay itan, dagidiay agtultuloy nga umimdeng iti timek ni Jehova ket maparaburan kadagiti ‘naimbag a sagut ken naan-anay a rangkap nga aggapu iti ngato.’​—Santiago 1:17.

[Footnote]

Malagipyo Kadi?

• Ania ti maadaltayo iti pakasaritaan ti Israel maipapan kadagiti bendision ti Dios?

• Kasano a nagduma da Boaz ken Nabal?

• Kasanotay a matulad ni Anna?

• Apay a rumbeng nga agtultuloy nga imdengantayo ti timek ni Jehova?

[Ladawan iti panid 10]

Inkararag ni Ari Solomon a maaddaan koma iti natulnog a puso, ket pinaraburan ni Jehova iti sirib

Ladawan iti panid 12]

Nadayaw ken naasi ti panangtrato ni Boaz kadagiti sabsabali

Ladawan iti panid 15]

Sibabaknang a naparaburan ni Anna gapu iti panagpannurayna ken ni Jehova