Ti Bendision ni Jehova ti Mangpabaknang Kadatayo

“Ti bendision ni Jehova​—isu dayta ti mangpabaknang, ket awan rigat nga inayonna iti dayta.”​—PROVERBIO 10:22.

1, 2. Apay nga awan pakainaigan ti kinaragsak iti material a kinabaknang?

DAGITI material a banag ti kangrunaan iti biag ti minilion a tattao ita. Ngem dagita kadi ti mangparagsak kadakuada? Kuna ti The Australian Women’s Weekly: “Awan ti malagipko a tiempo a saan a naliday dagiti tattao gapu iti sasaaden ti biagda.” Kunana pay: “Narigat a maawatan. Naibaga kadatayo a nagsayaat ti ekonomia ti Australia, a napimpintas nga amang ti biag ita. . . . Ngem adu ti maup-upay iti pagiliantayo. Agpadpada a marikna dagiti lallaki ken babbai nga adda kurang iti biagda ngem saanda a mailawlawag no ania dayta.” Pudno la unay ti kuna ti Kasuratan a ti kinaragsak ken biag saan nga agpannuray iti sanikuatayo!​—Eclesiastes 5:10; Lucas 12:15.

² Isursuro ti Biblia a ti bendision ti Dios ti mangyeg iti kadakkelan a ragsak. Maipapan iti daytoy a banag, kuna ti Proverbio 10:22: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.” Masansan a nasaem ti pagbanagan ti inaagum a pananggun-od iti material a kinabaknang. Maitutop a namallaag ni apostol Pablo: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba. Ta ti ayat iti kuarta isu ti ramut dagiti amin a kita ti makadangran a bambanag, ket babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.”​—1 Timoteo 6:9, 10.

3. Apay a mapasaran dagiti adipen ti Dios dagiti pakasuotan?

³ Iti sabali a bangir, dagiti awanan rigat a bendision ket dumteng kadagiti amin nga ‘umim-imdeng iti timek ni Jehova.’ (Deuteronomio 28:2) Nupay kasta, mabalin nga isaludsod ti dadduma, ‘No awan rigat nga inayon ti bendision ni Jehova, apay nga agsagsagaba ti adu kadagiti adipen ti Dios?’ Ipalgak ti Biblia nga ipalubos ti Dios a dumteng kadatayo dagiti suot ngem ni Satanas, ti dakes a sistemana, ken ti imperpekto a kasasaadtayo ti pagtataudan dagitoy. (Genesis 6:5; Deuteronomio 32:4, 5; Juan 15:19; Santiago 1:14, 15) Ni Jehova ti gubuayan ti “tunggal naimbag a sagut ken tunggal naan-anay a rangkap.” (Santiago 1:17) Gapuna, saan a pulos a mangpataud iti rigat dagiti bendision nga aggapu kenkuana. Intay ngarud usigen ti dadduma kadagiti naan-anay a sagut ti Dios.

Sao ti Dios​—Di Magatadan a Sagut

4. Ania a bendision ken di magatadan a sagut ti tagtagiragsaken ti ili ni Jehova iti daytoy “tiempo ti panungpalan”?

⁴ Maipapan iti “tiempo ti panungpalan,” kuna ti padto ni Daniel: “Ti pudno a pannakaammo umadunto.” Nupay kasta, adda kondisionna daytoy kas ipakita dagitoy a sasao: “Awanto a pulos kadagiti nadangkes ti makaawat; ngem maawatanto dagidiay addaan iti pannakatarus.” (Daniel 12:4, 10) Panunotenyo dayta! Ti Sao ti Dios​—nangruna dagiti padto​—ket nayebkas a buyogen ti nadiosan a sirib, isut’ gapuna a saan a maawatan dagiti nadangkes, ngem maawatan ti ili ni Jehova. Inkararag ti Anak ti Dios: “Idaydayawka iti publiko, Ama, Apo ti langit ken daga, agsipud ta dagitoy a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga.” (Lucas 10:21) Anian a bendision ti kaadda kadatayo ti naisurat a Sao ti Dios, ti Biblia, a maysa a di magatadan a sagut, ken ti maibilang kadagidiay inikkan ni Jehova iti naespirituan a pannakaawat!​—1 Corinto 1:21, 27, 28; 2:14, 15.

5. Ania ti sirib, ken kasanotay a magun-od dayta?

⁵ Awan a pulos koma ti naespirituan a pannakaawattayo no saan a gapu iti “sirib manipud ngato.” (Santiago 3:17) Ti sirib ket isu ti abilidad a mangipakat iti pannakaammo ken pannakaawat tapno marisut dagiti problema, maliklikan wenno malapdan dagiti peggad, maragpat dagiti kalat, wenno makaipaay iti nasimbeng a balakad. Kasanotay a magun-od ti nadiosan a sirib? Kuna ti Proverbio 2:6: “Ni met laeng Jehova mangted iti sirib; manipud ngiwatna adda pannakaammo ken panangilasin.” Wen, paraburannatayo ni Jehova iti sirib no agtultuloy nga ikararagtay dayta, kas iti panangtedna ken ni Ari Solomon iti “puso a masirib ken mannakaawat.” (1 Ar-ari 3:11, 12; Santiago 1:5-8) Tapno magun-odtayo ti sirib, masapul met a kanayon nga umimdengtayo ken ni Jehova babaen ti regular a panagadal ken panangyaplikar iti Saona.

6. Apay a nainsiriban nga agbiagtayo a mayannurot kadagiti linteg ken prinsipio ti Dios?

⁶ Dagiti kangrunaan a pagarigan ti nadiosan a sirib ket masarakan kadagiti linteg ken prinsipio ti Biblia. Pagimbagantayo dagitoy iti pisikal, mental, emosional, ken espiritual. Maitutop nga inkanta ti salmista: “Ti linteg ni Jehova perpekto, mamagsubli iti kararua. Ti pammalagip ni Jehova mapagpiaran, mamagsirib iti daydiay awanan kapadasan. Dagiti bilin manipud ken Jehova nalintegda, mamagrag-o iti puso; ti bilin ni Jehova nadalus, mamagsilnag iti matmata. Ti panagbuteng ken Jehova nasin-aw, agtalinaed iti agnanayon. Dagiti hudisial a pangngeddeng ni Jehova pudnoda; napaneknekan a naan-anayda a nalinteg. Ad-addada a matarigagayan ngem iti balitok, wen, ngem iti adu a napasudi a balitok.” ​—Salmo 19:7-10; 119:72.

7. Ania dagiti ibunga ti di panangikankano kadagiti nalinteg a pagalagadan ti Dios?

⁷ Iti sabali a bangir, dagidiay di mangikankano kadagiti nalinteg a pagalagadan ti Dios saanda a masarakan ti ragsak ken wayawaya a birbirokenda. Di agbayag mabigbigdanto a ti Dios ket saan a marabrabak, ta ti aniaman nga imula ti maysa a tao, apitennanto met. (Galacia 6:7) Minilion dagiti di mangikankano kadagiti prinsipio ti Biblia nga agap-apit kadagiti napait a bunga kas iti di matarigagayan a panagsikog, makadurmen a saksakit, wenno nakaro a pannakaadikto. Malaksid no agbabawi ken baliwanda ti kabibiagda, agtungpaldanto ken patay ken nalabit iti pannakadadael iti ima ti Dios.​—Mateo 7:13, 14.

8. Apay a naragsak dagiti mangipatpateg iti Sao ti Dios?

⁸ Nupay kasta, sibabaknang a mabendisionan ita ken iti masanguanan dagiti mangipatpateg iti Sao ti Dios ken mangtungpal iti dayta. Adda rasonda a makarikna a rinuk-atan idan ti linteg ti Dios, pudno a naragsakda, ken sigagagar nga ur-urayenda ti tiempo inton mawayawayaanda iti basol ken kadagiti makapapatay nga epektona. (Roma 8:20, 21; Santiago 1:25) Natalged daytoy a namnama agsipud ta naibatay dayta iti naayat unay a sagut ti Dios iti sangatauan​—ti daton a pangsubbot ti bugbugtong nga Anakna, ni Jesu-Kristo. (Mateo 20:28; Juan 3:16; Roma 6:23) Ti kasta a kasayaatan a sagut pasingkedanna ti kauneg ti ayat ti Dios iti sangatauan ken garantisaranna dagiti agnanayon a bendision a maipaay kadagiti amin nga agtultuloy nga umimdeng ken ni Jehova.​—Roma 8:32.

Agyamantayo Gapu iti Sagut a Nasantuan nga Espiritu

9, 10. Kasano a matulongannatayo ti nasantuan nga espiritu a sagut ni Jehova? Mangtedkayo iti ehemplo.

⁹ Ti sabali pay a naayat a sagut ti Dios a rumbeng a pagyamanantayo isu ti nasantuan nga espirituna. Iti aldaw ti Pentecostes idi 33 K.P., indagadag ni apostol Pedro kadagiti umariwekwek a tattao nga adda idiay Jerusalem: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo, ket awatenyonto ti awan bayadna a sagut ti nasantuan nga espiritu.” (Aramid 2:38) Iti kaaldawantayo, ited ni Jehova ti nasantuan nga espirituna kadagiti dedikado nga adipenna a dumawat iti dayta ken agtarigagay a mangaramid iti pagayatanna. (Lucas 11:9-13) Idi un-unana, daytoy a kabilgan a puersa iti uniberso​—ti nasantuan nga espiritu wenno aktibo a puersa ti Dios​—ti nangpabileg kadagiti matalek a tattao, a pakairamanan dagiti nagkauna a Kristiano. (Zacarias 4:6; Aramid 4:31) Maaramidna met dayta kadatayo, uray pay no maipasangotayo kadagiti nakaro a tubeng wenno rigat kas tattao ni Jehova.​—Joel 2:28, 29.

¹⁰ Alaentay nga ehemplo ni Laurel, a nakaptan iti polio ken nagpannuray iti iron lung iti 37 a tawen.a Iti laksid ti narigat unay a kasasaadna, sireregta a nagserbi iti Dios agingga iti ipapatayna. Iti panaglabas dagiti tawen, sibabaknang a binendisionan ni Jehova ni Laurel. Kas pagarigan, 17 ti natulonganna a makagteng iti umiso a pannakaammo iti kinapudno a masarakan iti Biblia, nupay 24 oras kada aldaw nga adda iti iron lung! Ti kasasaadna ipalagipna kadatayo ti sasao ni apostol Pablo: “Inton nakapuyak, iti kasta nabilegak.” (2 Corinto 12:10) Wen, ti aniaman a balligi a magun-odtayo iti panangikasaba iti naimbag a damag ket saan a gapu iti bukodtayo nga abilidad ken bileg no di ket gapu iti tulong ti Dios babaen ti nasantuan nga espiritu, nga itedna kadagidiay agtultuloy nga umimdeng iti timekna.​—Isaias 40:29-31.

11. Ania dagiti galad a patauden ti espiritu ti Dios kadagidiay mangikawes iti “baro a personalidad”?

¹¹ No sitatallugod nga umimdengtayo iti Dios, ti espirituna pataudenna kadatayo dagiti galad a kas iti ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, ken panagteppel. (Galacia 5:22, 23) Daytoy a “bunga ti espiritu” ket paset ti “baro a personalidad” nga isukat dagiti Kristiano iti aniaman a naranggas, inaanimal a kababalin a nalabit dati nga adda kadakuada. (Efeso 4:20-24; Isaias 11:6-9) Iti daytoy a bunga, napateg unay ti ayat, a “naan-anay a singgalut ti panagkaykaysa.”​—Colosas 3:14.

Nakristianuan nga Ayat​—Sagut a Rumbeng nga Ipateg

12. Kasano nga impakita ni Tabita ken dagiti dadduma pay a Kristiano idi umuna a siglo ti ayat?

¹² Maysa met a nagsayaat a sagut a naggapu ken Jehova ti Nakristianuan nga ayat​—a rumbeng nga ipategtayo. Naibatay dayta iti prinsipio, ngem napnuan iti pammateg ta pagbalinenna dagiti agkakapammatian a nasingsinged pay ngem kadagiti kakabagianda iti lasag. (Juan 15:12, 13; 1 Pedro 1:22) Alaentay a pagarigan ni Tabita, maysa a nagsayaat a Kristiano a babai idi umuna a siglo. “Aduan iti naimbag nga ar-aramid ken sagsagut ti asi,” nangruna kadagiti balo iti kongregasion. (Aramid 9:36) Mabalin nga adda kakabagian dagitoy a babbai, ngem kayat ni Tabita nga aramiden ti kabaelanna a tumulong ken mangparegta kadakuada. (1 Juan 3:18) Anian a nagsayaat nga ulidan ti impakita ni Tabita! Ti nainkabsatan nga ayat ti nangtignay kada Prisca ken Aquila a “nangirisgo kadagiti bukodda a tengnged” gapu ken Pablo. Ayat met ti nanggutugot kada Epafras, Lucas, Onesiforo, ken dadduma pay a tumulong iti apostol idi naibalud idiay Roma. (Roma 16:3, 4; 2 Timoteo 1:16; 4:11; Filemon 23, 24) Wen, ti kasta a kita dagiti Kristiano ita ket ‘addaan iti ayat iti maysa ken maysa,’ a nagsayaat a sagut ti Dios a pakailasinan kadakuada kas pudno nga ad-adalan ni Jesus.​—Juan 13:34, 35.

13. Kasanotay a maipakita nga ipatpategtayo unay ti Nakristianuan a panagkakabsattayo?

¹³ Ipatpategyo kadi ti ayat a maiparparangarang iti kongregasion Kristiano? Agyamankayo kadi gapu iti sangalubongan a naespirituan a panagkakabsattayo? Makaparagsak ken nabaknang met a sagut dagitoy a naggapu iti ngato. Kasanotay a maipakita nga ipatpategtayo dagita? Babaen ti sagrado a panagserbi iti Dios, pannakiraman kadagiti Nakristianuan a gimong, ken panangipakita iti ayat ken dadduma pay a bunga ti espiritu ti Dios.​—Filipos 1:9; Hebreo 10:24, 25.

“Sagut a Tattao”

14. Ania ti makalikaguman iti maysa a Kristiano tapno makapagserbi kas panglakayen wenno ministerial nga adipen?

¹⁴ Nasayaat ti kalat dagiti Kristiano a lallaki nga agtarigagay nga agserbi kadagiti padada a managdaydayaw kas papanglakayen wenno ministerial nga ad-adipen. (1 Timoteo 3:1, 8) Tapno kualipikado ti maysa a kabsat a lalaki kadagitoy a pribilehio, masapul nga isu ket naespirituan a tao, kabesadona ti Kasuratan ken naregta iti tay-ak ti ministerio. (Aramid 18:24; 1 Timoteo 4:15; 2 Timoteo 4:5) Masapul a napakumbaba, naemma, ken naanus, ta saan a bendisionan ti Dios dagiti nadursok, natangsit, ken ambisioso. (Proverbio 11:2; Hebreo 6:15; 3 Juan 9, 10) No adda asawana, nasken a maysa a naayat nga ulo ti pamilia a makabael a mangaywan iti intero a sangakabbalayanna iti nasayaat a pamay-an. (1 Timoteo 3:4, 5, 12) Gapu ta ipatpategna dagiti naespirituan a gameng, bendisionan ni Jehova ti kasta a tao.​—Mateo 6:19-21.

15, 16. Siasino dagiti “sagut a tattao”? Mangtedkayo kadagiti ehemplo.

¹⁵ No naanep a mangasaba, mangipastor, ken mangisuro dagidiay agserserbi kas panglakayen iti kongregasion, adda nasayaat a rasontayo a mangipateg unay kadagita a “sagut a tattao.” (Efeso 4:8, 11) Dagidiay mabenepisiaran iti naayat a panagserbida ket mabalin a saanda a kanayon nga iyebkas ti apresasionda, ngem sikikita ni Jehova iti amin nga ar-aramiden dagiti matalek a panglakayen. Dinanto lipatan ti ayat nga ipakpakitada iti naganna babaen ti panagserbida kadagiti tattaona.​—1 Timoteo 5:17; Hebreo 6:10.

¹⁶ Utobenyo ti maipapan iti maysa a nagaget a panglakayen a simmarungkar iti maysa a Kristiano nga agtutubo a babai a dandani idin maoperaan iti utek. “Nakaim-imbag, mannakaawat, ken maseknan unay,” insurat ti maysa a gayyem ti pamilia. “Dimmawat iti pammalubos a makipagkararag kadakami ken ni Jehova. Bayat nga agkarkararag, nakasangit ti ama [saan a maysa kadagiti Saksi ni Jehova], ket nakalua dagiti amin nga adda iti siled ti ospital. Anian a nakadungdungngo ti kararag daydi a panglakayen, ken anian a kinamanagayat iti biang ni Jehova ti panangibaonna kenkuana iti daydi a kanito!” Kinuna ti maysa pay a Saksi a pasiente maipapan kadagiti panglakayen a simmarungkar kenkuana: “Idi immabayda iti katrek iti intensive care unit, ammok nga uray ania ti mapasamak, makapagibturak. Kimmiredak ken timmalna ti nakemko.” Magatang aya ti kasta a naayat a pannakaseknan? Saan a pulos! Sagut ti Dios dayta, nga impaayna babaen ti kongregasion Kristiano.​—Isaias 32:1, 2.

Ti Sagut a Ministerio iti Tay-ak

17, 18. (a) Ania a sagut a panagserbi ti impaay ni Jehova kadagiti amin a tattaona? (b) Ania a tulong ti impaay ti Dios tapno maitungpaltayo ti ministeriotayo?

¹⁷ Awanen ti dakdakkel pay a dayaw a maipaay iti asinoman a tao ngem ti panagserbi ken Jehova, ti Kangatuan. (Isaias 43:10; 2 Corinto 4:7; 1 Pedro 2:9) Nupay kasta, silulukat iti amin ti pribilehio a makiraman iti panangasaba iti publiko​—kadagiti agtutubo ken natataengan, lallaki ken babbai​—nga addaan iti pudpudno a tarigagay nga agserbi iti Dios. Us-usarenyo kadi daytoy a napateg a sagut? Mabalin a bumdeng dagiti dadduma gapu ta ipagarupda a saanda a kabaelan, ngem laglagipenyo nga ipaay ni Jehova ti nasantuan nga espirituna kadagidiay agserserbi kenkuana, ket dayta ti mangpunno iti aniaman a pagkurangantayo.​—Jeremias 1:6-8; 20:11.

¹⁸ Intalek ni Jehova ti trabaho a panangikasaba iti Pagarian kadagiti napakumbaba nga adipenna, saan a kadagiti tattao nga agannayas nga agpasindayag ken agpannuray kadagiti bukodda nga abilidad. (1 Corinto 1:20, 26-29) Dagiti napakumbaba, naemma a tattao bigbigenda dagiti limitasionda ken agpannurayda iti tulong ti Dios no kasta a makiramanda iti ministerio iti tay-ak. Apresiarenda met ti naespirituan a tulong nga ipapaay ti “matalek a mayordomo.”​—Lucas 12:42-44; Proverbio 22:4.

Naragsak a Biag ti Pamilia​—Nagsayaat a Sagut

19. Ania ti mamagballigi iti panangpadakkel kadagiti annak?

¹⁹ Sagut ti Dios ti panagasawa ken ti naragsak a biag ti pamilia. (Ruth 1:9; Efeso 3:14, 15) Dagiti annak ket napateg met a “tawid manipud ken Jehova,” a mangyeg rag-o kadagiti nagannak a makaisuro kadagiti nadiosan a galad kadagiti annakda. (Salmo 127:3) No maysaka nga ama wenno ina, agtultuloy nga imdengam ti timek ni Jehova babaen ti panangsanaymo kadagiti annakmo a mayannurot iti Saona. Sigurado a tulongan ken sibabaknang a bendisionan ni Jehova dagidiay mangaramid iti kasta.​—Proverbio 3:5, 6; 22:6; Efeso 6:1-4.

20. Ania ti makatulong kadagiti nagannak a dagiti annakda ket timmalikud iti pudno a panagdayaw?

²⁰ Iti laksid ti napasnek a panangikagumaan dagiti managbuteng-Dios a nagannak, mabalin a pilien dagiti dadduma nga annak ti tumallikud iti pudno a panagdayaw no dadakkeldan. (Genesis 26:34, 35) Nasaem daytoy kadagiti nagannak. (Proverbio 17:21, 25) Ngem imbes nga interamente a mapukawanda iti namnama, mabalin a makatulong kadakuada no laglagipenda ti pangngarig ni Jesus maipapan iti barayuboy nga anak. Nupay pimmanaw ken naiwawa dayta nga anak, nagsubli met laeng idi kamaudiananna iti balay ti amana, a siraragsak ken siaayat a nangawat kenkuana. (Lucas 15:11-32) Aniaman ti mapasamak, mainanama dagiti matalek a Kristiano a nagannak a maawatan, ay-ayaten, maseknan, ken agtultuloy a saranayen ida ni Jehova.​— Salmo 145:14.

21. Siasino ti rumbeng nga imdengantayo, ken apay?

²¹ Gapuna, siertuen koma ti tunggal maysa kadatayo no ania ti talaga a napateg iti biagtayo. Sipipinget kadi a gunggun-odentayo ti material a kinabaknang, a nalabit mangyeg iti ut-ot kadatayo ken iti pamiliatayo? Wenno gunggun-odentayo kadi dagiti ‘naimbag a sagut ken naan-anay a rangkap’ nga aggapu iti “Ama dagiti nailangitan a lawag”? (Santiago 1:17) Kayat ti “ama ti kinaulbod” a ni Satanas nga agbannogtayo a manggun-od iti material a kinabaknang tapno mapaidamantayo iti ragsak ken mapukaw ti biagtayo. (Juan 8:44; Lucas 12:15) Nupay kasta, maseknan unay ni Jehova iti pagimbagantayo. (Isaias 48:17, 18) Gapuna, agtultuloy nga umimdengtayo iti naayat a nailangitan nga Amatayo ken kanayon nga ‘agragsaktayo iti napalalo’ kenkuana. (Salmo 37:4) No kasta ti aramidentayo, dagiti di magatadan a sagut ken aglaplapusanan a bendision ni Jehova ti mangpabaknang kadatayo​—ket awan ti aniaman a rigat nga iyegna.

[Footnote]

Malagipyo Kadi?

• Pakasarakan iti kadakkelan a ragsak?

• Ania ti sumagmamano kadagiti sagut nga impaay ni Jehova iti ilina?

• Apay a maysa a sagut ti ministerio iti tay-ak?

• Ania ti mabalin nga aramiden dagiti nagannak tapno bendisionan ida ti Dios iti panangpadakkelda kadagiti annakda?

Ladawan iti panid 16]

Ipatpategyo kadi ti naisurat a Sao ti Dios a sagutna kadatayo?

Ladawan iti panid 17]

Iti laksid dagiti narigat unay a kasasaad, sireregta a nagserbi ni Laurel Nisbet iti Dios

Dagiti Ladawan iti panid 18]

Kas ken Tabita, agdindinamag dagiti Kristiano ita gapu kadagiti naayat nga aramidda

Ladawan iti panid 19]

Addaan dagiti Kristiano a panglakayen iti naayat a pannakaseknan kadagiti kapammatianda