Salsaludsod Dagiti Agbasbasa
Iti minuyongan ti Eden, kasano a sinulisog ti serpiente ni Eva tapno salungasingenna ti linteg ti Dios mainaig iti kayo ti pannakaammo iti naimbag ken dakes?
Kuna ti Genesis 3:1: “Ita ti serpiente isu idi ti kaannadan kadagiti amin nga atap nga animal iti tay-ak nga inaramid ni Jehova a Dios. Gapuna rinugianna a kunaen iti babai: ‘Pudno kadi a kinuna ti Dios a dikay mangan manipud iti tunggal kayo iti minuyongan?’” Nadumaduma ti kapanunotan no kasano a nakikomunikar ti serpiente ken ni Eva. Adda agkuna nga inaramidna dayta babaen ti panaggaraw wenno panagkompas. Kas pagarigan, kinuna ti Ingles a klero a ni Joseph Benson: “Agparang a nangusar iti maysa a kita ti panagsenias. Pudno, kunaen ti dadduma nga adda panunot ken makapagsao idi dagiti serpiente, . . . ngem awan ti makapaneknek iti dayta.”
Ngem no babaen laeng ti panaggaraw, kasano koma a nayallatiw ti serpiente ken ni Eva ti ideya a no mangan iti naiparit a bunga, agbalin ti babai a kas iti Dios, a maikeddengna no ania ti naimbag ken no ania ti dakes? Maysa pay, nakipatang ni Eva, a sinungbatanna ti saludsod ti serpiente. (Genesis 3:2-5) Ti kapanunotan a nakikomunikar ti serpiente babaen laeng ti senias wenno panaggaraw ket mangiturong iti konklusion a simmungbat ni Eva babaen ti panagkompas, idinto ta kuna ti Biblia a nakipatang.
Maipapan iti dayta a pasamak, pinakdaaran ni apostol Pablo dagiti pada a Kristiano: “Maamakak a di la ket ta, kas iti panangallilaw ti serpiente ken Eva babaen ti kinasikapna, dagiti panunotyo mapagbalin a rinuker.” Ti peggad a tuktukoyen ni Pablo isu dagiti ‘ulbod nga apostol, manangallilaw a trabahador.’ Saan laeng nga iti panaggaraw ken panagkompas a napeggad ‘dagiti nalabes ti laingna nga apostol.’ Karaman iti dayta ti sasaoda—dagiti makaallilaw a banag a bitlaenda tapno mangyaw-awan iti dadduma.—2 Corinto 11:3-5, 13.
Nupay nausar ti sao a mangyaw-awan ken ni Eva iti minuyongan ti Eden, awan ti mangipamatmat nga adda kuerdas bokales ti literal a serpiente. Kinapudnona, dina kasapulan dayta. Idi nakisarita ti anghel ti Dios ken ni Balaam babaen ti maysa a kabaian nga asno, saan a kasapulan dayta nga animal ti maysa a komplikado a karabukob a kas ti adda iti tao. (Numeros 22:26-31) Nalawag nga idi ‘nagsao iti timek ti maysa a tao [daytoy] awan timekna nga animal,’ dayta a panagtimek ket babaen ti pannakabalin dagiti espiritu.—2 Pedro 2:16.
Ti espiritu a parsua nga adda iti likud ti serpiente a nakisarita ken ni Eva ket natukoy iti Biblia kas “ti kadaanan a serpiente, daydiay naawagan iti Diablo ken Satanas.” (Apocalipsis 12:9) Ti timek a nangngeg ken sinungbatan ni Eva ket nagtaud ken ni Satanas, daydiay ‘namagbalin iti bagina a kasla anghel ti lawag.’—2 Corinto 11:14.
[Ladawan iti panid 27]
“Sigurado nga agbalinkayo a kas iti Dios, a makaammo iti naimbag ken dakes”