Papanglakayen​—Sanayenyo ti Dadduma a Mangibaklay iti Annongen

KADAGITI kongregasion dagiti Saksi ni Jehova iti sangalubongan, kasapulan unay ti lallaki a makabael nga agserbi kas manangaywan. Adda tallo a kangrunaan a makagapu iti daytoy a panagkasapulan.

Umuna, tungtungpalen ni Jehova ti karina a pagbalinenna “daydiay nagbassitan [a] maysa a mannakabalin a nasion.” (Isaias 60:22) Gapu iti di kaikarian a kinamanangngaasina, nganngani maysa a milion a baro nga adalan ti nabautisaran kas Saksi ni Jehova iti naglabas a tallo a tawen. Kasapulan dagiti responsable a lallaki a tumulong kadagitoy a kabbaro a nabautisaran tapno rumang-ayda iti Nakristianuan a kinanataengan.​—Hebreo 6:1.

Maikadua, dadduma a dinekdekadan a panglakayen ti saanen a makaibaklay iti dadduma nga annongenda iti kongregasion gapu iti kinalakay wenno parikut iti salun-at.

Maikatlo, sumagmamano a naregta a Kristiano a panglakayen ti agserserbi ita kas kameng ti Hospital Liaison Committee, Regional Building Committee, wenno Assembly Hall Committee. Addada gundaway a masapul nga aglusulosda iti dadduma nga annongenda iti kongregasion tapno mataginayonda ti kinabalanse.

Kasano a masolbar ti naganat a panagkasapulan iti kanayonan a kualipikado a lallaki? Ti tulbek isu ti panangsanay. Iparegta ti Biblia kadagiti Kristiano a manangaywan a sanayenda dagiti “matalek a lallaki, a, kalpasanna, makaanayto a kualipikado a mangisuro iti sabsabali.” (2 Timoteo 2:2) Sigun iti maysa a diksionario, ti sao a “mangsanay” kaipapananna “mangisuro tapno agbalin a maikari, kualipikado, wenno nasigo.” Usigentayo no kasano a sanayen dagiti panglakayen ti dadduma a kualipikado a lallaki.

Tuladenyo ti Ulidan ni Jehova

Awan duadua a ‘maikari, kualipikado, ken nasigo’ ni Jesu-Kristo iti trabahona, ket di pagsiddaawan dayta! Ni Jehova a Dios mismo ti nangsanay kenkuana. Ania a bambanag ti namagbalin nga epektibo daytoy a programa ti panangsanay? Adda tallo a dinakamat ti Jesus, kas nairekord iti Juan 5:20: “Ti Ama [1] addaan panagayat iti Anak ket [2] isu ipakitana kenkuana ti amin a bambanag nga aramidenna, ket mangipakitanto kenkuana [3] iti ar-aramid a dakdakkel ngem dagitoy.” Ti panangsukimat iti tunggal maysa kadagitoy a banag ket mangyeg iti nalawlawa a pannakaawat maipapan iti panangsanay.

Imutektekanyo ta kinuna nga umuna ni Jesus: “Ti Ama addaan panagayat iti Anak.” Sipud punganay ti panamarsua, nasinged ni Jehova ken ti Anakna. Lawlawagan ti Proverbio 8:30 dayta a relasion: “Iti kasta addaak [ni Jesus] idi iti sibayna [ni Jehova a Dios] kas nasigo a managobra, ket siak daydiay pakaay-ayatanna unay iti inaldaw, yantangay maragragsakanak iti sanguananna iti isuamin a tiempo.” Ammo ni Jesus a ‘maay-ayatan unay’ ni Jehova kenkuana. Ken impakitana a pagragsakanna ti makipagtrabaho iti Amana. Anian a nagsayaat no nabara ti relasion dagiti Kristiano a panglakayen ken dagiti sansanayenda ken napudnoda iti tunggal maysa!

Ti maikadua a dinakamat ni Jesus isu ti kinapudno a ti Ama “ipakitana kenkuana ti amin a bambanag nga aramidenna.” Patalgedan dagitoy a sasao ti kinuna ti Proverbio 8:30, nga ‘adda ni Jesus iti sibay’ ni Jehova idi madama ti pannakaparsua ti uniberso. (Genesis 1:26) Matulad dagiti panglakayen dayta a nagsayaat nga ulidan babaen ti nasinged a pannakipagtrabahoda kadagiti ministerial nga adipen, nga ipakitada kadakuada no kasanoda a sieepektibo a maibaklay dagiti annongenda. Ngem saan laeng a dagiti kabbaro a nadutokan a ministerial nga adipen ti agkasapulan iti agtultuloy a panangsanay. Komusta met dagiti matalek a kakabsat nga adun a tawen a gumawgaw-at iti akem kas manangaywan ngem di pay nadutokan? (1 Timoteo 3:1) Mangipaay koma dagiti panglakayen kadagiti espesipiko a balakad kadagita a lallaki tapno ammo dagitoy no ania pay ti masapul a parang-ayenda.

Kas pagarigan, mabalin a ti maysa a ministerial nga adipen ket mapagtalkan, managsapsapa, ken napasnek kadagiti pagrebbenganna. Mabalin a nalaing met a mangisuro. Iti adu a wagas nalabit nasayaat ti gapuananna iti kongregasion. Nupay kasta, mabalin a dina madmadlaw a nagubsang ti panangtratona kadagiti padana a Kristiano. Masapul nga iparangarang dagiti panglakayen “ti kinaalumamay a kukua ti sirib.” (Santiago 3:13) Saan aya a kinamanagayat iti biang ti panglakayen no kasaritana ti ministerial nga adipen, nga ilawlawagna no ania ti parikut, mangdakamat kadagiti espesipiko a pagarigan, sa mangted kadagiti praktikal a singasing a makatulong? No siaannad nga ‘asinan [ti panglakayen] ti balakadna,’ dakkel ti tsansa a maipangag ti komentona. (Colosas 4:6) Siempre, saan a marigatan ti panglakayen no sidadaan a dumngeg ken ipangag ti ministerial nga adipen ti aniaman a maibalakad kenkuana.​—Salmo 141:5.

Iti dadduma a kongregasion, mangipapaay dagiti panglakayen iti praktikal ken agtultuloy a panangsanay kadagiti ministerial nga adipen. Kas pagarigan, ikuyogda dagiti kualipikado a ministerial nga adipen no sarungkaranda dagiti masakit wenno dagiti lallakay ken babbaket. Iti kastoy a wagas, mapadasan dagiti ministerial nga adipen ti trabaho a panangipastor. Siempre, adu ti mabalin nga aramiden ti maysa a ministerial nga adipen tapno rumang-ay iti naespirituan.​—Kitaenyo ti kahon iti baba a napauluan iti “No Ania ti Maaramidan Dagiti Ministerial nga Adipen.”

Ti maikatlo a rason no apay nga epektibo ti pannakasanay ni Jesus isu daytoy: pampanunoten ni Jehova ti panagrang-ay iti masanguanan bayat a sansanayenna ni Jesus. Kinuna ni Jesus a ti Ama ipakitana iti Anak ti “ar-aramid a dakdakkel ngem dagitoy.” Ti kapadasan ni Jesus ditoy daga ti timmulong kenkuana a nangpatanor kadagiti galad a kasapulanna tapno maibanagna dagiti akemna iti masanguanan. (Hebreo 4:15; 5:8, 9) Kas pagarigan, anian a nagdakkel nga annongen ti agur-uray ken Jesus​—ti panangpagungar ken panangukomna iti binilion a tattao a natayen!​—Juan 5:21, 22.

No sanayenda dagiti ministerial nga adipen, pampanunoten koma dagiti panglakayen dagiti panagkasapulan iti masanguanan. Nupay mabalin nga umdas ti bilang dagiti panglakayen ken ministerial nga adipen a mangibaklay kadagiti agdama a kasapulan, kasanon no adda mabuangay a baro a kongregasion wenno sumagmamano a kongregasion? Iti naglabas a tallo a tawen, adda nasurok nga 6,000 a baro a kongregasion iti intero a lubong. Nakaad-adu la ketdi a panglakayen ken ministerial nga adipen ti kasapulan a mangaywan kadagita a baro a kongregasion!

Dakayo a panglakayen, tultuladenyo kadi ti ulidan ni Jehova babaen ti panangpatanor iti nasinged a relasion kadagiti sansanayenyo a lallaki? Isursuroyo kadi no kasanoda nga itungpal ti trabahoda? Pampanunotenyo kadi ti panagkasapulan iti masanguanan? Ti panangtulad iti ulidan ni Jehova idi sinanayna ni Jesus ket agresulta iti nabaknang a bendision iti adu.

Dikay Maamak a Mangipabaklay

Dagiti makabael a panglakayen a nairuam a mangibaklay a bukbukodda iti adu a nadagsen nga annongen ket mabalin a bumdeng a mangipabaklay iti autoridad kadagiti sabsabali. Nalabit pinadasda idi ngem dida napnek iti nagbanaganna. Gapuna mabalin a panunotenda a, ‘Siak laengen ti mangaramid no kayatko nga umiso ti pannakaaramidna.’ Ngem maitunos kadi daytoy a kapanunotan iti pagayatan ni Jehova a nayebkas iti Kasuratan​—a dagiti ad-adu ti kapadasanda sanayenda dagiti bassit ti kapadasanda?​—2 Timoteo 2:2.

Nadismaya ni apostol Pablo idi a ti maysa a kaduana a nagdaliasat, ni Juan Marcos, ti nangbaybay-a iti annongenna idiay Pamfilia ket nagawid. (Aramid 15:38, 39) Nupay kasta, saan a dayta ti nangupay ken Pablo tapno sanayenna ti dadduma. Nangpili manen iti maysa nga agtutubo a kabsat, ni Timoteo, ket sinanayna iti trabaho a panagmisionero.a (Aramid 16:1-3) Idiay Berea naipasango dagiti misionero iti nakaro nga ibubusor a namagbalin a di praktikal ti panagtalinaed ni Pablo sadiay. Intalekna ngarud ti baro a kongregasion iti panangaywan ni Silas, maysa a nataengan a kabsat, ken ni Timoteo. (Aramid 17:13-15) Awan duadua nga adu ti nasursuro ni Timoteo ken ni Silas. Idi agangay, idi mabalinen a mangibaklay ni Timoteo iti kanayonan a responsabilidad, isut’ imbaon ni Pablo idiay Tesalonica tapno paregtaenna ti kongregasion sadiay.​—1 Tesalonica 3:1-3.

Saan a nakaporpormal wenno nalamiis ti relasion da Pablo ken Timoteo. Nasingedda iti maysa ken maysa. Idi sinuratanna ti kongregasion idiay Corinto, tinukoy ni Pablo ni Timoteo​—ti panggepna nga ibaon sadiay​—kas ti “dungdungnguen ken matalek nga anakko iti Apo.” Innayonna: “[Ni Timoteo] ipalagipnanto kadakayo dagiti pamay-ak mainaig ken Kristo Jesus.” (1 Corinto 4:17) Inyaplikar ni Timoteo ti pannakasanay nga inawatna ken Pablo, ket nagbalin a kualipikado a mangitungpal kadagiti annongenna. Adu nga agkabannuag a kakabsat ti nagbalin a makabael a ministerial nga adipen, panglakayen, wenno agdaldaliasat a manangaywan pay ketdi gapu iti panangsanay kadakuada dagiti pudno a maseknan a natataengan a lallaki, kas iti panangsanay ni Pablo ken ni Timoteo.

Papanglakayen, Sanayenyo ti Dadduma!

Nabatad a matungtungpal ita ti padto iti Isaias 60:22. Ar-aramiden ni Jehova a ‘mannakabalin a nasion daydiay nagbassitan.’ Nasken nga organisado a naimbag dayta a nasion tapno agtalinaed a “mannakabalin.” Dakayo a panglakayen, apay a dikay usigen dagiti pamay-an no kasanoyo nga ad-adda a masanay dagiti kualipikado a dedikado a lallaki? Siguraduenyo nga ammo ti tunggal ministerial nga adipen ti aniaman a masapul a pasayaatenna tapno rumang-ay. Ket dakayo met a bautisado a lallaki, aprobetsarenyo ti aniaman a pannakasanay a maawatyo. Aprobetsarenyo dagiti gundaway a mangpasayaat iti abilidad, pannakaammo, ken kapadasanyo. Sigurado a bendisionan ni Jehova dagita a programa ti naayat a panangtulong.​—Isaias 61:5.

[Footnote]

[Kahon iti panid 30]

No Ania ti Maaramidan Dagiti Ministerial nga Adipen

Nupay nasken a sanayen dagiti panglakayen dagiti ministerial nga adipen, dakkel ti maaramidan dagiti ministerial nga adipen tapno rumang-ayda iti naespirituan.

​—Nasken a napasnek ken mapagpiaran dagiti ministerial nga adipen a mangitungpal kadagiti annongenda. Masapul met a patanorenda ti nasayaat nga ugali iti panagadal. No iti panagrang-ay, dakkel ti maaramidan ti panagadal ken panangyaplikar kadagiti naadal.

​—No isagana ti ministerial nga adipen ti palawagna iti maysa a Nakristianuan a gimong, saan koma a bumdeng a dumawat iti singasing iti maysa a makabael a panglakayen no kasano nga idatagna ti material.

​—Mabalin met a kiddawen ti ministerial nga adipen a paliiwen ti maysa a panglakayen ti pamay-anna nga agpalawag manipud ti Biblia, sa mangitukon iti balakad no kasano pay a rumang-ay.

Nasken a kiddawen, awaten, ken ipakat dagiti ministerial nga adipen dagiti balakad dagiti panglakayen. Iti kastoy a pamay-an, “maiparangarang [ti panagrang-ayda] iti amin a tattao.”​—1 Timoteo 4:15.