Paglemmengan No Agangin
KADAGITI kabambantayan ti Europa, makakitakayo kadagiti natibker a babassit a kayo a maawagan rosa iti kabambantayan wenno, rhododendron. Daytoy bassit a rhododendron ket masansan nga agtubo nga agaaripuno a nakasamsamek iti daga tapno masalakniban iti napigsa nga angin iti kabambantayan. No kanayon nga agangin, agpeggad ti panagbiag dagiti mula iti bantay babaen ti panangpalamiisna, panangpamagana iti angin ken iti daga, ken panangparutna kadagitoy.
Ti rosa iti kabambantayan masansan a malisianna ti angin babaen ti panagtubona kadagiti rengngat kadagiti kabatuan. Nupay mabalin a bassit ti daga kadagitoy a lugar, ti nabato a rengngat ti agserbi a salaknib iti angin ken makaurnong ti mula iti danum. Dandani di makita dagiti rhododendron iti kaaduan a paset ti tawen. Ngem iti kalgaw, arkosanda ti kabambantayan iti narangrang a nalabaga a sabsabong.
Inlawlawag ni propeta nga Isaias a mangdutok ti Dios iti “piprinsipe,” ket tunggal maysa agserbinto a kas “paglemmengan a lugar manipud iti angin.” (Isaias 32:1, 2) Iti sidong ti panangiturong ti Ari, a ni Kristo Jesus, dagitoy a naespirituan a prinsipe, wenno manangaywan, maipadisda kadagiti di maisin a bato, a natibker iti panawen ti riribuk wenno rigat. Agpaayda a natalged a pagkamangan no adda ti didigra ket matulonganda dagiti agkasapulan a mangsalimetmet iti abastoda a naespirituan a danum manipud iti Sao ti Dios.
Dagiti napigsa nga angin ti pannakaidadanes, pannakaupay, wenno sakit, mabalin a pakapuyenna ti pammati ti maysa a Kristiano, ket malpay no saan a masalakniban. Dagiti Kristiano a panglakayen agserbida a salaknib babaen ti panagimdengda a sipapasnek iti parikut, mangipaayda kadagiti naibatay iti Biblia a balakad, ken mangparegta wenno mangipaay iti praktikal a tulong. Kas iti nadutokan nga Ari a ni Kristo Jesus, kayatda a tulongan dagidiay ‘naiwarawara.’ (Mateo 9:36) Ket kayatda a tulongan dagidiay dinadael dagiti angin ti palso a sursuro. (Efeso 4:14) Nasken ti kasta a tulong iti maitutop a tiempo.
“Kasta unay ti ladingitko idi pimmanaw iti kinapudno ti dadduma a nasinged a gagayyemko ken, maigiddato iti dayta, ni tatangko ket nagpadara iti utekna,” kuna ni Miriam. “Iti panangikagumaak a mangliwliwa iti bagik, rinugiak ti nakikuykuyog iti di Saksi a nobiok. Di nagbayag, gapu ta mariknakon a diak maikari, imbagak kadagiti panglakayen iti kongregasion a panawakon ti kinapudno, tangay siguradoak a dinak mabalinen nga ayaten ni Jehova.
“Iti daytoy kritikal a kanito, impalagip kaniak ti naayat a panglakayen ti adu a tawen a panagserbik kas regular pioneer. Imbagana a kankanayon nga inapresiarna ti kinamatalekko, ket siaasi a kiniddawna nga ipalubosko a tulongandak dagiti panglakayen, tapno patalgedanda ti panagayat ni Jehova kaniak. Ti naintiempuan a naayat a pannakaseknanda kabayatan dayta a kritikal a tiempo ket kasla ‘paglemmengan’ para kaniak bayat ti naespirituan a bagyo a nangparigat kaniak. Iti unos ti makabulan, ginupedkon ti relasionko iti nobiok, ket intultuloykon ti nagna iti dalan ti kinapudno sipud idi.”
Makarikna iti pannakapnek dagiti panglakayen no makitada dagiti padada a Kristiano a rumang-ay iti naespirituan, gapu iti salaknib a naipaay kadagitoy iti tiempo ti pakasapulan. Ket dagitoy a ‘paglemmengan’ ipakpakaunada ti aglaplapusanan a naespirituan a tulong a sagrapentayo bayat ti Milenio a Panagturay ni Kristo.