Apay a Masapul a Mabautisaran?
“Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida.”—MATEO 28:19.
1, 2. (a) Iti sidong dagiti ania a kasasaad a naaramid idi ti dadduma a bautismo? (b) Ania a salsaludsod ti napataud maipapan iti bautismo?
IDI 775-77 K.P., ti ari ti Frank a ni Carlomagno indagadagna ti ragup a pannakabautisar dagiti naparmek a Saxon. “Gapu ta pinuersana ida a kinomberte, nagbalin dagitoy a parparawpaw a Kristiano,” insurat ti historiador a ni John Lord. Umasping iti dayta, kalpasan nga inkallaysana ti maysa a Greek Orthodox a prinsesa idi 987 K.P., ti Ruso nga agturay a ni Vladimir I inkeddengna a nasken nga agbalin a “Kristiano” dagiti iturayanna. Imbilinna ti ragup a pannakabautisar ti amin a masakupanna—a napangtaan iti ipapatay dagidiay agkedked!
2 Umiso kadi ti kasta a bautismo? Addaanda kadi iti pudpudno a kaipapanan? Mabalin kadi a mabautisaran ti uray siasino?
Bautismo—Kasano?
3, 4. Apay a di maitunos iti Nakristianuan a bautismo ti panangwarsi wenno panangibukbok iti danum iti ulo?
3 Ti panangpuersa da Carlomagno ken Vladimir I kadagiti tattao nga agpabautisar ket saan a maitunos iti Sao ti Dios. Kinapudnona, awan ti pagimbagan ti bautismo a panangwarsi, panangibukbok iti danum iti ulo, wenno uray ti panangitaneb kadagiti indibidual a saan a nasuruan iti kinapudno a linaon ti Kasuratan.
4 Usigenyo ti napasamak idi a ni Jesus a taga Nazaret ket napan ken ni Juan a Mammautisar idi 29 K.P. Mangbabautisar idi ni Juan kadagiti tattao idiay Karayan Jordan. Boluntario dagitoy a nagpabautisar kenkuana. Basta kadi pinatakderna ida iti Jordan bayat a binukbokanna ti uloda iti bassit a danum ti karayan wenno winarwarsianna ida? Ania ti napasamak idi a ni Juan binautisaranna ni Jesus? Kuna ni Mateo a kalpasan a nabautisaran, “simmang-at ni Jesus manipud iti danum.” (Mateo 3:16) Nairarem ni Jesus iti danum, naitaneb iti Karayan Jordan. Umasping iti dayta, ti napasnek nga Etiope a eunuko ket nabautisaran ‘iti danum.’ Kasapulan dagiti kasta a lugar nga adda danum gapu ta naan-anay a naitaneb ni Jesus ken dagiti adalanna idi nabautisaranda.—Aramid 8:36.
5. Kasano a binautisaran dagiti nagkauna a Kristiano dagiti tattao?
5 Dagiti Griego a sao a naipatarus kas “bautisar,” “bautismo,” ken umarngi iti dayta, tuktukoyenna ti panangitaneb wenno panangirarem iti danum. Kuna ti Smith’s Bible Dictionary: “Ti bautismo ket umiso ken literal a kaipapananna ti panangitaneb.” Gapuna, adda dagiti patarus ti Biblia a nangtukoy ken “Juan a Manangitaneb” ken “Juan a manangirarem.” (Mateo 3:1, Rotherham; Diaglott interlinear) Kastoy ti kuna ti libro ni Augustus Neander a History of the Christian Religion and Church, During the Three First Centuries: “Sigud a maar-aramid idi ti bautismo babaen ti panangitaneb.” Kuna ti nalatak a libro a Pranses a Larousse du XXe Siècle (Paris, 1928): “Nabautisaran dagiti immuna a Kristiano babaen ti pannakaitaneb iti sadinoman a pakasarakan iti danum.” Ken kuna ti New Catholic Encyclopedia: “Nalawag a ti Bautismo iti nagkauna nga Iglesia ket babaen ti panangitaneb.” (1967, Tomo II, panid 56) Isu nga ita, boluntario ti panagbautisar kas maysa a Saksi ni Jehova a mangkalikagum iti naan-anay a pannakaitaneb iti danum.
Baro a Rason a Mabautisaran
6, 7. (a) Ania ti panggep ti panangbautisar ni Juan? (b) Ania ti baro maipapan iti bautismo dagiti pasurot ni Jesus?
6 Naiduma ti panggep ti bautismo nga inaramid ni Juan iti panangitaneb nga inaramid dagiti pasurot ni Jesus. (Juan 4:1, 2) Binautisaran ni Juan dagiti tattao kas publiko a simbolo ti panagbabawida kadagiti basolda iti Linteg.a (Lucas 3:3) Ngem adda baro a banag a nairaman iti bautismo dagiti pasurot ni Jesus. Idi Pentecostes 33 K.P., indagadag ni apostol Pedro kadagiti agdengdengngeg: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo.” (Aramid 2:37-41) Nupay dagiti Judio ken proselita ti kasarsaritana, saan a ti bautismo a mangisimbolo iti panagbabawi kadagiti basol iti Linteg ti tuktukoyen ni Pedro; saanna met nga impasimudaag a ti bautismo iti nagan ni Jesus ket pannakaugas dagiti basol.—Aramid 2:10.
7 Iti dayta nga okasion, inaramat ni Pedro ti umuna ‘kadagiti tulbek ti pagarian.’ Agpaay iti ania a panggep? Tapno ipalgakna kadagiti agdengdengngeg ti maipapan iti gundawayda a makastrek iti Pagarian ti langit. (Mateo 16:19) Yantangay dagiti Judio dida binigbig ni Jesus kas ti Mesias, ti panagbabawi ken panamati kenkuana ket maysa a baro ken napateg a banag iti panangbirok ken pananggun-od iti pammakawan ti Dios. Publiko a maipakitada ti kasta a pammatida babaen ti panagpaitaneb iti danum iti nagan ni Jesu-Kristo. Iti dayta a wagas, maisimboloda ti personal a panagdedikarda iti Dios babaen ken Kristo. Amin nga agtarigagay iti anamong ti Dios ita ket nasken a mangipakita iti kasta a pammati, idedikarda ti bagida ken ni Jehova a Dios, ken maipasidongda iti Nakristianuan a bautismo kas simbolo ti naan-anay a dedikasionda iti Kangatuan a Dios.
Napateg ti Umiso a Pannakaammo
8. Apay a saan nga amin ket maikari iti Nakristianuan a bautismo?
8 Saan nga amin ket maikari iti Nakristianuan a bautismo. Imbilin ni Jesus kadagiti pasurotna: “Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Sakbay a mabautisaran, nasken a ‘masursuruan dagiti tattao a mangtungpal iti amin a bambanag nga imbilin ni Jesus kadagiti adalanna.’ Gapuna, awan serserbina ken maikaniwas iti imbilin ni Jesus kadagiti pudno a pasurotna no piliten a bautisaran dagidiay awanan iti pammati a naibatay iti umiso a pannakaammo iti Sao ti Dios.—Hebreo 11:6.
9. Ania ti kaipapanan ti mabautisaran “iti nagan ti Ama”?
9 Ania ti kaipapanan ti mabautisaran “iti nagan ti Ama”? Kaipapananna a bigbigen ti agpabautisar ti saad ken autoridad ti nailangitan nga Amatayo. Bigbigenna ngarud ni Jehova a Dios kas ti Namarsua kadatayo, “ti Kangatuan iti intero a daga,” ken ti Sapasap a Soberano.—Salmo 83:18; Isaias 40:28; Aramid 4:24.
10. Ania ti kaipapanan ti mabautisaran ‘iti nagan ti Anak’?
10 Ti mabautisaran ‘iti nagan ti Anak’ kaipapananna ti panangbigbig iti saad ken autoridad ni Jesus kas ti bugbugtong nga Anak ti Dios. (1 Juan 4:9) Dagidiay kualipikado nga agpabautisar bigbigenda ni Jesus kas daydiay impaay ti Dios a “subbot a kasukat dagiti adu.” (Mateo 20:28; 1 Timoteo 2:5, 6) Nasken met a bigbigen dagidiay agpabautisar ti “nangatngato a saad” a nangitan-okan ti Dios iti Anakna.—Filipos 2:8-11; Apocalipsis 19:16.
11. Ania ti kaipapanan ti mabautisaran ‘iti nagan ti nasantuan nga espiritu’?
11 Ania ti kaipapanan ti mabautisaran ‘iti nagan ti nasantuan nga espiritu’? Ipamatmat daytoy a ti agpabautisar bigbigenna ti nasantuan nga espiritu kas ti aktibo a puersa ni Jehova, a maus-usar iti nadumaduma a pamay-an maitunos iti panggepna. (Genesis 1:2; 2 Samuel 23:1, 2; 2 Pedro 1:21) Bigbigen dagidiay agpabautisar a tulongan ida ti nasantuan nga espiritu a mangtarus kadagiti “nauneg a bambanag ti Dios,” a mangitungpal iti trabaho a panangikasaba iti Pagarian, ken mangiparangarang kadagiti bunga ti espiritu kas iti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”—1 Corinto 2:10; Galacia 5:22, 23; Joel 2:28, 29.
Ti Pateg ti Panagbabawi ken Panagbalbaliw
12. Kasano a nainaig ti panagbabawi iti Nakristianuan a bautismo?
12 Saan a kas iti kaso ti awan basolna a tao a ni Jesus, ti bautismo ket inanamongan ti Dios a simbolo mainaig iti panagbabawi. No agbabawitayo, makariknatayo iti nakaro a ladingit gapu iti maysa a banag a naaramidtayo wenno ditay naaramid. Dagiti Judio idi umuna a siglo nga agtarigagay a mangay-ayo iti Dios ket nasken nga agbabawi kadagiti basolda ken Kristo. (Aramid 3:11-19) Adda dagiti manamati a Gentil idiay Corinto a nagbabawyanda ti pannakiabig, idolatria, panagtakaw, ken dadduma pay a nadagsen a basolda. Gapu iti panagbabawida, ‘naugasanda’ babaen ti dara ni Jesus; ‘nasantipikar’ wenno nailasinda nga agserbi iti Dios; ken ‘naideklarada a nalinteg’ babaen ti nagan ni Kristo ken ti nasantuan nga espiritu ti Dios. (1 Corinto 6:9-11) Ti panagbabawi ket napateg nga addang tapno matagiragsak ti nadalus a konsiensia ken ti pannakabang-ar nga ipaay ti Dios no masidir ti konsiensia gapu iti panagbasol.—1 Pedro 3:21.
13. No maipapan iti bautismo, ania ti kalikaguman ti panagbalbaliw?
13 Nasken ti panagbalbaliw sakbay a mabautisarantayo kas Saksi ni Jehova. Ti panagbalbaliw ket boluntario nga aramiden ti maysa a tao a naimpusuan a mangikeddeng a sumurot ken Kristo Jesus. Iwaksina dagiti dati a dakes nga aramidna ken determinado nga agaramid iti umiso iti imatang ti Dios. Iti Kasuratan, ti Hebreo ken Griego a sasao a mangtukoy iti panagbalbaliw ket addaan iti anag a panagtallikud, panagbaw-ing. Ipasimudaag daytoy ti panagbaw-ing iti Dios manipud iti dakes a kurso. (1 Ar-ari 8:33, 34) Ti panagbalbaliw kalikagumanna dagiti “aramid a maitutop iti panagbabawi.” (Aramid 26:20) Kalikagumanna ti panangilaksidtayo iti ulbod a panagdayaw, agtignay maitunos kadagiti bilin ti Dios, ken ipaay ti naan-anay a debosion ken Jehova. (Deuteronomio 30:2, 8-10; 1 Samuel 7:3) Ti panagbalbaliw ket resulta ti pannakaatur ti panunot, panggep, ken personalidadtayo. (Ezequiel 18:31) ‘Nagbaw-ingtayo’ bayat a sinukatan ti baro a personalidad dagiti dakes a kababalintayo.—Aramid 3:19; Efeso 4:20-24; Colosas 3:5-14.
Napateg ti Naimpusuan a Panagdedikar
14. Ania ti ipasimudaag ti panagdedikar dagiti pasurot ni Jesus?
14 Masapul met ti naimpusuan a panagdedikar iti Dios sakbay nga agpabautisar dagiti pasurot ni Jesus. Ti panagdedikar ipasimudaagna ti pannakailasin agpaay iti sagrado a panggep. Napateg unay daytoy nga addang ta kalikagumanna nga ikararagtayo ken ni Jehova ti desisiontayo a mangipamaysa iti debosiontayo kenkuana iti agnanayon. (Deuteronomio 5:9) Siempre, saantayo nga agdedikar iti trabaho wenno iti tao no di ket iti Dios a mismo.
15. Apay a maitaneb dagidiay agpabautisar?
15 No idedikartayo ti bagitayo iti Dios babaen ken Kristo, iyeb-ebkastay ti determinasiontayo a mangusar iti biagtayo a mangitungpal iti pagayatan ti Dios a nailanad iti Kasuratan. Kas simbolo dayta a dedikasion, maitaneb dagidiay agpabautisar, no kasano a ni Jesus ket nabautisaran idiay Karayan Jordan kas simbolo ti panangidatagna iti bagina iti Dios. (Mateo 3:13) Nakadkadlaw nga agkarkararag idi ni Jesus bayat dayta nagpateg nga okasion.—Lucas 3:21, 22.
16. Kasano a mayebkas ti rag-otayo iti umiso a wagas no makitatayo a mabautisaran dagiti tattao?
16 Serioso ngem naragsak a pagteng ti bautismo ni Jesus. Kasta met iti bautismo dagiti Kristiano ita. No makitatayo dagiti tattao nga isimboloda ti dedikasionda iti Dios, mabalin a mayebkas ti rag-otayo babaen ti nadayaw a panagpalakpak ken nabara a komendasion. Ngem ti panagiriag, panagpaswit, ken umarngi kadagita ket nasken a liklikan kas panangraem iti kinasagrado daytoy nga ebkas ti pammati. Mayebkas ti rag-otayo iti nanakman a wagas.
17, 18. Ania ti tumulong a mangsierto no kualipikado met laeng a mabautisaran ti maysa nga indibidual?
17 Saan a kas kadagidiay mangwarsi kadagiti maladaga wenno mangpilit kadagiti bunggoy nga agpabautisar uray awan pannakaammoda iti Biblia, saan a piliten dagiti Saksi ni Jehova ti asinoman tapno agpabautisar. Kinapudnona, dida bautisaran dagidiay saan a kualipikado iti naespirituan. Sakbay nga agbalin ti maysa kas di bautisado a manangikasaba iti naimbag a damag, dagiti Kristiano a panglakayen siguraduenda a maawatanna dagiti pamunganayan a sursuro ti Biblia, nga agbibiag maitunos kadagita a sursuro, ken positibo ti sungbatna iti saludsod a kas iti, “Talaga kadi a kayatmo ti agbalin a maysa kadagiti Saksi ni Jehova?”
18 Kaaduanna a no napasnek dagiti indibidual iti panangikasaba iti Pagarian ket iyebkasda ti tarigagayda nga agpabautisar, kasarita ida dagiti Kristiano a panglakayen tapno siguraduenda no manamati ken nagdedikar dagitoy ken ni Jehova ken no naragpatda dagiti kalikaguman ti Dios kadagidiay agpabautisar. (Aramid 4:4; 18:8) Dagiti personal a sungbatda kadagiti nasurok a 100 a saludsod mainaig kadagiti sursuro ti Biblia ket tumulong kadagiti panglakayen a mangsierto no naragpatda dagiti Nainkasuratan a kualipikasion dagiti maitaneb. Adda dagidiay saan a makualipikar isu a saanda a maikari iti Nakristianuan a bautismo.
Adda Kadi Manglaplapped Kadakayo?
19. Mainaig iti Juan 6:44, siasino dagiti makipagtawid ken Jesus?
19 Adu ti napilitan a makiraman iti ragup a panagpabautisar nalabit gapu ta nabagaanda a mapanda idiay langit no matayda. Ngem no maipapan kadagidiay sumursurot iti addangna, kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Ni Jehova inyadanina ken ni Kristo ti 144,000 a makipagtawid kenkuana iti nailangitan a Pagarian. Awan ti napilit kadakuada nga agpabautisar agpaay iti dayta a nadayag a lugar iti urnos ti Dios.—Roma 8:14-17; 2 Tesalonica 2:13; Apocalipsis 14:1.
20. Ania ti makatulong kadagidiay saan pay a nabautisaran?
20 Sipud idi ngalay ti dekada 1930 kangrunaanna, dagiti umariwekwek a mangnamnama a makalasat “iti dakkel a rigat” ken agbiag nga agnanayon ditoy daga ket nagbalin a paset ti “sabsabali a karnero” ni Jesus. (Apocalipsis 7:9, 14; Juan 10:16) Kualipikadoda a mabautisaran gapu ta intunosda ti biagda iti Sao ti Dios ken inayatda ni Jehova iti ‘amin a puso, kararua, pigsa, ken panunotda.’ (Lucas 10:25-28) Nupay bigbigen ti dadduma a tattao a dagiti Saksi ni Jehova ket ‘agdaydayaw iti Dios iti espiritu ken kinapudno,’ saanda pay a sinurot ti ulidan ni Jesus ken dida pay nangipakita iti publiko a pammaneknek iti napudno a panagayat ken naan-anay a debosionda ken ni Jehova babaen ti bautismo. (Juan 4:23, 24; Deuteronomio 4:24; Marcos 1:9-11) Ti napasnek ken espesipiko a panangikararag iti daytoy napateg nga addang ti nalabit kasapulanda tapno matignay ken mapabilegda a tumunos a naan-anay iti Sao ti Dios, a mangipamaysa iti dedikasionda ken ni Jehova, ket agpabautisarda.
21, 22. Ania dagiti rason no apay nga agkedked ti dadduma nga agdedikar ken agpabautisar?
21 Agkedked nga agdedikar ken agpabautisar ti dadduma gapu ta naigamerda kadagiti aramid ti lubong wenno panagpabaknang isu nga awan ti panawenda kadagiti naespirituan a bambanag. (Mateo 13:22; 1 Juan 2:15-17) Anian a ragsakda no balbaliwanda ti panangmatmat ken kalatda! Ti iyaadani ken ni Jehova ket mangpabaknang kadakuada iti naespirituan, mangpalag-an iti pakadanagan, ken mangyeg kadakuada iti talna ken pannakapnek kas resulta ti panangaramid iti pagayatan ti Dios.—Salmo 16:11; 40:8; Proverbio 10:22; Filipos 4:6, 7.
22 Kuna ti dadduma nga ay-ayatenda ni Jehova ngem dida agdedikar ken agpabautisar gapu ta ipapanda a maliklikanda ti manungsungbat iti Dios. Ngem tunggal maysa kadatayo ket adda sungsungbatanna iti Dios. Adda responsabilidadtayo sipud idi nangngegtayo ti sao ni Jehova. (Ezequiel 33:7-9; Roma 14:12) Kas ti ‘napili nga ili,’ nayanak dagiti nagkauna nga Israelita iti maysa a nasion a naidedikar ken ni Jehova isu nga obligadoda nga agserbi a simamatalek kenkuana maitunos kadagiti paglinteganna. (Deuteronomio 7:6, 11) Awan ti nayanak iti kasta a nasion ita, ngem no nagun-odtayo ti umiso a Nainkasuratan nga instruksion, nasken a sipapasnek nga agtignaytayo a maitunos iti pammati.
23, 24. Ania a panagamak ti saan koma a manglapped kadagiti indibidual nga agpabautisar?
23 Agkedked ti dadduma nga agpabautisar gapu ta maamakda nga agkurangda iti umdas a pannakaammo. Kaskasdi, adu pay ti adalentayo amin gapu ta ‘ti sangatauan saannanto a pulos a masarakan ti aramid nga inaramid ti pudno a Dios manipud pangrugian agingga iti pagnguduan.’ (Eclesiastes 3:11) Usigenyo ti Etiope a eunuko. Gapu ta proselita, adda pannakaammona iti Kasuratan, ngem dina masungbatan ti tunggal saludsod maipapan kadagiti panggep ti Dios. Kaskasdi, kalpasan a naammuanna ti probision ni Jehova a pannakaisalakan babaen ti daton a pangsubbot ni Jesus, dagdagus a nagpabautisar iti danum ti eunuko.—Aramid 8:26-38.
24 Dadduma ti agkedked nga agdedikar iti Dios gapu ta maamakda a mapaay. Kuna ti 17 ti tawenna a ni Monique: “Agkedkedak nga agpabautisar gapu ta maamakak a diak matungpal ti dedikasionko.” Ngem no agtalektayo ken ni Jehova buyogen ti amin a pusotayo, ‘palintegennanto dagiti danatayo.’ Tulongannatayo nga ‘agtultuloy a magna iti kinapudno’ kas matalek a dedikado nga adipenna.—Proverbio 3:5, 6; 3 Juan 4.
25. Ania a saludsod ita ti nasken a mausig?
25 Gapu iti naan-anay a panagtalek ken ni Jehova ken naimpusuan a panagayatda kenkuana, tinawen a rinibu ti matignay nga agdedikar ken agpabautisar. Ket sigurado nga amin a dedikado nga adipen ti Dios kayatda ti agmatalek kenkuana. Kaskasdi, agbibiagtayo iti napeggad a tiempo, ket mapasarantayo ti nadumaduma a pakasuotan ti pammati. (2 Timoteo 3:1-5) Ania ti mabalintay nga aramiden tapno matungpaltayo ti dedikasiontayo ken Jehova? Mausig daytoy iti sumaruno nga artikulo.
[Footnote]
a Yantangay awan ti basol ni Jesus, saan a nabautisaran tapno mangisimbolo iti panagbabawi. Ti bautismona ket mangisimbolo iti panangidatagna iti bagina iti Dios tapno aramidenna ti pagayatan ni Amana.—Hebreo 7:26; 10:5-10.
Malagipyo Pay Kadi?
• Kasano ti pannakaaramid ti Nakristianuan a bautismo?
• Ania a pannakaammo ti kasapulan sakbay a mabautisaran ti maysa?
• Ania dagiti addang nga agturong iti bautismo dagiti pudno a Kristiano?
• Apay nga agkedked ti dadduma nga agpabautisar, ngem kasano a matulongan ida?
[Dagiti Ladawan iti panid 14]
Ammoyo kadi no ania ti kaipapanan ti mabautisaran ‘iti nagan ti Ama, ti Anak, ken ti nasantuan nga espiritu’?