Salsaludsod Dagiti Agbasbasa

Kadagiti ania a kasasaad a mayanatup nga agdalungdong ti Kristiano a babai mainaig kadagiti narelihiosuan nga urnos?

“Tunggal babai nga agkararag wenno agipadto a ti ulona di nadalungdongan ibabainna ti ulona,” insurat ni apostol Pablo. Apay? Gapu iti nadiosan a prinsipio ti kinaulo: “Ti ulo ti babai isu ti lalaki.” Kadawyanna nga annongen ti lalaki ti mangikararag wenno mangasaba iti kongregasion Kristiano. Gapuna, no akmen ti Kristiano a babai dagiti annongen mainaig iti panagdayaw a gagangay a trabaho ni lakayna wenno ti maysa a bautisado a lalaki, nasken nga agdalungdong ti babai.​—1 Corinto 11:3-10.

Adda dagiti kasasaad a nasken nga agdalungdong ti Kristiano a babai gapu iti kasado a takderna. Kas pagarigan, no agadal iti Biblia wenno manganda a sangapamiliaan, kadawyanna a ti asawa a lalaki ti mangidaulo iti panagadal ken panagkararagda iti Dios. Ngem no isu ket di manamati, mabalin a ti babai ti mangibaklay iti daytoy a responsabilidad. No kasta, no mangidaulo iti kararag wenno no iyadalanna iti Biblia dagiti annakna a siiimatang ni lakayna, maiparbeng nga agdalungdong ti Kristiano a babai. No awan ni lakayna, saan a masapul nga agdalungdong ti babai, gapu ta adda nadiosan nga autoridadna a mangisuro kadagiti annakna.​—Proverbio 1:8; 6:20.

Ngem kasano no ti maysa nga agtutubo nga anak a lalaki iti pamilia ket dedikado, bautisado nga agserserbi ken ni Jehova a Dios? Gapu ta kameng ti kongregasion Kristiano dayta nga anak a lalaki, masapul a dagiti lallaki a kameng ti kongregasion ti mangisuro kenkuana. (1 Timoteo 2:12) No manamati ni tatangna, isu ti mangisuro kenkuana. Ngem no awan ti ama, masapul nga agdalungdong ti ina no idauluanna ti panagadalda iti Biblia a sangapamiliaan, a pakairamanan ti agtutubo a bautisado nga anakna a lalaki. Ti ina ti mangikeddeng no kiddawenna a ti bautisado nga anakna a lalaki ti mangidaulo iti kararag iti kasta a panagadal wenno iti pannangan. Mabalin a mariknana a saan pay a naan-anay a kabaelan ti anakna ket ikeddengna nga isu a mismo ti mangidaulo iti panagkararag. No ti ina ti mangikararag kadagita a gundaway, nasken nga agdalungdong.

Adda dagiti aktibidad iti kongregasion a masapul nga agdalungdong dagiti Kristiano a babbai bayat a makiramramanda iti dayta. Kas pagarigan, iti maysa a taripnong sakbay ti panangasaba iti tengnga ti lawas, bin-ig a kakabsat a babbai laeng ti presente, awan ti bautisado a lallaki. Mabalin nga adda dagiti gundaway nga awan ti presente a bautisado a lallaki iti gimong ti kongregasion. No maysa a kabsat a babai ti agakem kadagiti annongen a kadawyanna nga akmen ti maysa a kabsat a lalaki kadagiti gimong wenno taripnong sakbay ti panangasaba nga inyurnos ti kongregasion, masapul nga agdalungdong ti kabsat a babai.

Nasken kadi nga agdalungdong dagiti Kristiano a babbai no oral wenno babaen ti senias nga ipatarus dagiti Nainkasuratan a palawag wenno no publiko nga agbasada kadagiti parapo manipud iti maysa a publikasion a katulongan iti panagadal iti Biblia a maar-aramat kadagiti gimong ti kongregasion? Saan. Dagiti babbai nga agakem kadagita nga annongen ket saan a mangidadaulo wenno mangisursuro. Umasping iti dayta, saan a kasapulan nga agdalungdong dagiti babbai a makipaspaset kadagiti demostrasion, mangisalsalaysay kadagiti kapadasan, wenno agak-akem kadagiti paset ti estudiante iti Teokratiko nga Eskuelaan ti Panagministro.

Nupay annongen dagiti bautisado a lallaki ti panangisuro iti kongregasion, agpadpada a responsabilidad dagiti lallaki ken babbai ti mangasaba ken mangisuro iti ruar ti kongregasion. (Mateo 24:14; 28:19, 20) Isu a no makisarsarita ti Kristiano a babai iti maysa a saan a Saksi maipapan iti Sao ti Dios iti imatang ti lalaki a Saksi ni Jehova, saan a masapul nga agdalungdong.

Ngem naiduma ti kasasaad no adda regular, nayeskediul a panagadal iti Biblia a maikonkondukta iti pagtaengan ket presente ti maysa a dedikado, bautisado a lalaki. Maysa daytoy a nasaksakbay a nayurnos a sesion ti panangisuro a ti mangikonkondukta iti panagadal ket kinapudnona, mangidadaulo. Ti kasta a panagadal ket agbalin nga ekstension ti kongregasion. No ti Saksi a babai ti mangidaulo iti kasta a panagadal ket adda kaduana a Saksi a lalaki, maiparbeng laeng nga agdalungdong ti babai. Kaskasdi, ti dedikado a lalaki ti mangidaulo iti kararag. Saan a mangidaulo iti kararag ti kabsat a babai no adda presente a kabsat a lalaki malaksid no adda naisangsangayan a rason, kas koma no napukaw ti kabsat a lalaki ti pisikal nga abilidadna nga agsao.

Mabalin nga adda dagiti gundaway nga agkadua a mangyadal iti Biblia ti Kristiano a babai ken ti maysa a di bautisado a lalaki nga agibumbunannag iti Pagarian. No kayat ti kabsat a babai, mabalinna a kiddawen a ti lalaki ti mangikondukta iti panagadal. Ngem gapu ta saan pay a kabaelan ti lalaki ti mangidaulo iti panagkararag ken ni Jehova, maiparbeng laeng a ti babai ti mangikararag iti panagadal. Masapul nga agdalungdong ti kabsat a babai no isu ti mangikondukta iti panagadal ken mangikararag. Uray saan pay a bautisado ti lalaki nga agibumbunannag, isut’ matmatan dagiti taga ruar kas kameng ti kongregasion gapu iti pannakiramanna iti panangasaba.

“Ti babai rebbeng a maaddaan iti pagilasinan ti kinaturay iti rabaw ti ulona gapu kadagiti anghel,” insurat ni apostol Pablo. Wen, pribilehio dagiti Kristiano a babbai ti agbalin a nasayaat nga ulidan kadagiti minilion nga anghel a sisusungdo nga agpaspasakup ken ni Jehova. Anian a mayanatup nga ikabilangan a naimbag dagiti nadiosan a babbai ti panagdalungdong no kalikaguman ti kasasaad!

[Dagiti Ladawan iti panid 26]

Ti panagdalungdong ket pagilasinan ti panangraem iti kinaulo