Salsaludsod Dagiti Agbasbasa

Ania a balakad ti ipaay ti Kasuratan maipapan iti panangsanay iti ubing no saan a Saksi ni Jehova ti maysa kadagiti nagannak?

Adda dua a napateg a Nainkasuratan a prinsipio a mangiwanwan maipapan iti panangsanay iti ubing iti biang ti maysa a Saksi a nagannak a saan a Saksi ti asawana. Ti umuna: “Masapul nga agtulnogkami iti Dios kas agturay imbes a kadagiti tattao.” (Aramid 5:29) Ti maikadua: “Ti lalaki isu ti ulo ti asawana a kas met ti Kristo isu ti ulo ti kongregasion.” (Efeso 5:23) Ti naud-udi ket agaplikar saan laeng a kadagiti assawa a babbai a Saksi ti asawada no di pay ket kadagidiay saan a Saksi ti asawada. (1 Pedro 3:1) Kasano a ti maysa a Saksi nga ama wenno ina mabalansena dagitoy a prinsipio iti panangisurona iti annakna?

No maysa kadagiti Saksi ni Jehova ti asawa a lalaki, pagrebbenganna nga ipaay dagiti naespirituan ken pisikal a kasapulan ti pamiliana. (1 Timoteo 5:8) Nupay mabalin nga ad-adu ti panawen ti di manamati nga ina kadagiti annakda, ti Saksi nga ama rebbeng nga isurona dagiti annakna babaen ti panangipaayna iti naespirituan a panangsanay iti pagtaengan ken babaen ti panangikuyogna kadakuada kadagiti Nakristianuan a gimong, a pakasursuruanda kadagiti moral a prinsipio ken pakasarakanda kadagiti nasayaat a kakadua.

Kasanon no ti di manamati nga asawana ipilitna nga ikuyog dagiti annakda iti lugar a pagdaydayawanna wenno isurona kadakuada dagiti patpatienna? Mabalin a kalinteganna nga aramiden dayta sigun iti linteg ti pagilian a pagnanaedanda. Saan a kaskarina a maguyugoy dagiti annak a mapan kadagita a lugar a pagdaydayawan no nalaing ti ama a mangisuro kadagiti naespirituan a banag. Bayat a dumakdakkel dagiti annak, ti koma panangisuro ti ama maipapan iti Kasuratan tulonganna ida a mangsurot iti kinapudno a masarakan iti Sao ti Dios. Anian a ragsak ti manamati nga asawa a lalaki no ikeddeng dagiti annakna ti dumasig iti kinapudno!

No ti ina ket maysa kadagiti Saksi ni Jehova, masapul a raemenna ti prinsipio maipapan iti kinaulo bayat a maseknan iti agnanayon a pagimbagan dagiti annakna. (1 Corinto 11:3) Iti adu a kasasaad, saan a sumupiat ti di manamati nga asawa no ti Saksi nga asawana sursuruanna dagiti annakda iti moral ken iti naespirituan, ket makatulong iti dayta dagiti gimong ti ili ni Jehova. Matulongan ti ina ti di manamati nga asawana a mangbigbig iti pagsayaatan nga itden dagiti nasayaat a masursuro ti annakda iti organisasion ni Jehova. Mabalinna a sitataktika nga ipaganetget ti pagimbagan ti panangitukit kadagiti moral a prinsipio ti Biblia kadagiti annakda, yantangay agbibiagda iti imoral a lubong.

Nupay kasta, mabalin nga ipilit ti di manamati nga asawa a lalaki a sumurot dagiti annakna iti relihionna, nga ikuyogna ida iti lugar a pagdaydayawanda ken isurona kadakuada ti maipapan iti pammatina. Wenno mabalin a kontra iti amin a relihion ti asawa a lalaki ket dina ipalubos a maisuro dagiti annakna ti maipapan iti relihion. Kas ulo ti pamilia, isu ti kangrunaan a mangikeddeng iti dayta.a

Nupay raemenna ti kinaulo ti asawana, kas dedikado a Kristiano, ti manamati nga asawa a babai laglagipenna koma ti kinuna da apostol Pedro ken Juan: “No kadakami, saan a mabalin nga agsardengkami nga agsao maipapan iti bambanag a nakita ken nangngegmi.” (Aramid 4:19, 20) Gapu iti pannakaseknanna iti naespirituan a pagimbagan dagiti annakna, ipamuspusan ti Saksi nga ina nga ipaayan ida iti moral a pannarabay. Adda rebbengenna ken Jehova a mangisuro kadagiti sabsabali maipapan iti ammona a pudno, ket rumbeng a mairaman dagiti annakna. (Proverbio 1:8; Mateo 28:19, 20) Kasano a mataming ti Saksi nga ina ti kasta a narikut a kasasaad?

Alaentay a pagarigan ti maipapan iti panamati iti Dios. Ti Saksi nga ina mabalin a dina pormal a mayadalan iti Biblia dagiti annakna agsipud ta iparit ni lakayna. Rumbeng kadi a liklikanna nga isarita kadagiti annakna ti maipapan ken Jehova? Saan. Dagiti sao ken aramidna iyanninawna ti pammatina iti Namarsua. Awan duadua nga adda dagiti saludsod dagiti annakna maipapan iti dayta. Nawaya koma a mangannurot iti relihionna babaen ti panangyebkasna iti pammatina iti Namarsua, a pakairamanan dagiti annakna. Uray no dina mayadalan iti Biblia dagiti annakna wenno maikuyog ida a regular kadagiti gimong, mabalinna ida a sursuruan maipapan ken Jehova a Dios.​—Deuteronomio 6:7.

Maipapan iti relasion ti maysa a Saksi ken ti di manamati nga asawana, kinuna ni apostol Pablo: “Ti di mamati a lalaki masantipikar mainaig iti asawana, ket ti di mamati nga asawa a babai masantipikar mainaig iti kabsat; ta no saan a kasta, pudno nga agbalinto a di nadalus ti annakyo, ngem ita nasantuanda.” (1 Corinto 7:14) Ibilang ni Jehova a nasantuan ti relasion ti agassawa gapu iti manamati nga asawa, ket maibilang a nasantuan dagiti annak iti imatang ni Jehova. Ti Saksi nga ina aramidenna koma ti amin a kabaelanna a tumulong kadagiti annakna a mangtarus iti kinapudno, nga ipabiangna ken Jehova ti pagtungpalan dagiti bambanag.

Bayat nga agmataengan dagiti ubbing, masapul nga ikeddengda no ania ti dasiganda maibatay iti nasursuroda kadagiti dadakkelda. Mabalin nga ikeddengda ti agtignay a mayannurot iti kinuna ni Jesus: “Ti addaan dakdakkel a panagayat iti ama wenno ina ngem kaniak saan a maikari kaniak.” (Mateo 10:37) Naibilin met kadakuada: “Annak, agtulnogkayo kadagiti nagannak kadakayo a maikaykaysa iti Apo.” (Efeso 6:1) Adu nga agtutubo ti nangikeddeng nga ‘agtulnog iti Dios kas agturay’ imbes nga iti saan a Saksi a dadakkelda, iti baet ti panangparigat kadakuada dayta a nagannak. Anian a makaparagsak iti Saksi a nagannak ti pannakakitana kadagiti annak a mangikeddeng nga agserbi ken Jehova iti laksid ti ibubusor!

[Footnote]