Tuladem ti Naindaklan a Mannursuro

“Inkayo ngarud ket mangaramidkayo iti ad-adalan kadagiti tattao . . . , nga isuroyo kadakuada a tungpalenda ti amin a bambanag nga imbilinko kadakayo.”​—MATEO 28:19, 20.

1, 2. (a) Iti ania nga anag a mannursurotayo amin? (b) No maipapan iti panangisuro, ania ti naisangsangayan nga annongen dagiti pudno a Kristiano?

MAYSAKA kadi a mannursuro? No an-anagen, mannursurotayo amin. Mangisursuroka no itudom ti dalan ti nayaw-awan a biahero, no iwardasmo ti padam a trabahador no kasanona nga ibanag ti maysa nga annongen, wenno no ilawlawagmo iti maysa nga ubing no kasanona nga ikurdon ti sapatosna. Saan kadi a mangyeg iti pannakapnek dagiti kasta a panangtulong kadagiti sabsabali?

² No maipapan iti panangisuro, adda naisangsangayan nga annongen dagiti pudno a Kristiano. Naibilin a ‘mangaramidtayo iti ad-adalan kadagiti tattao, nga isurotayo ida.’ (Mateo 28:19, 20) Adda met gundawaytayo a mangisuro iti uneg ti kongregasion. Nadutokan dagiti kualipikado a lallaki nga agserbi kas “papastor ken mannursuro,” tapno pabilgenda ti kongregasion. (Efeso 4:11-13) Iti inaldaw a Nakristianuan nga aktibidadda, dagiti nataengan a babbai ket nasken nga agbalin a “mannursuro iti naimbag” kadagiti ub-ubing a babbai. (Tito 2:3-5) Naidagadag kadatayo amin a paregtaentayo dagiti kapammatiantayo, ket maipangagtayo dayta a balakad babaen ti panangusar iti Biblia a mangpabileg iti sabsabali. (1 Tesalonica 5:11) Anian a pribilehio ti mangisuro iti Sao ti Dios ken mangiranud kadagiti naespirituan a prinsipio a mangyeg kadagiti manayon a gunggona!

3. Kasanotayo a maparang-ay ti kinaepektibotayo kas mannursuro?

³ Ngem kasanotayo a maparang-ay ti kinaepektibotayo kas mannursuro? Kangrunaan iti amin, nasken a tuladentayo ti Naindaklan a Mannursuro, ni Jesus. ‘Ngem kasanotayo a matulad ni Jesus?’ nalabit iyimtuod ti dadduma. ‘Isu ket perpekto.’ Pudno, saantayo a kabaelan ti agbalin a perpekto a mannursuro. Kaskasdi, aniaman ti kapasidadtayo, aramidentay ti amin a kabaelantayo a mangtulad iti wagas ti panangisuro ni Jesus. Usigentayo no kasano a mausartayo ti uppat kadagiti metodona​—kinasimple, epektibo a salsaludsod, lohikal a panagrasrason, ken dagiti maitutop nga ilustrasion.

Taginayonen a Simple

4, 5. (a) Apay a ti kinasimple ket maysa a napateg a paset ti kinapudno a linaon ti Biblia? (b) Tapno makaisuro a simple, apay a masapul a siputantayo ti bokabulariotayo?

⁴ Saan a narikut dagiti pamunganayan a kinapudno iti Sao ti Dios. Inkararag ni Jesus: “Idaydayawka iti publiko, Ama, . . . agsipud ta inlemmengmo dagitoy a banag kadagiti mamasirib ken nasaririt ket impalgakmo ida kadagiti ubbing.” (Mateo 11:25) Impalgak ni Jehova dagiti panggepna kadagidiay napudno ken napakumbaba ti pusoda. (1 Corinto 1:26-28) Gapuna, ti kinasimple ket maysa a napateg a galad ti kinapudno a linaon ti Biblia.

⁵ No mangyadalka iti Biblia wenno agsarungkarka kadagiti interesado a tattao, kasano a mangisuroka buyogen ti kinasimple? Bueno, ania ti naadaltayo iti Naindaklan a Mannursuro? Tapno masiguradona a nalawag kadagiti agdengdengngeg ti isursurona, nga adu kadakuada ti “awan adalna ken gagangay,” nagusar ni Jesus kadagiti simple a sasao a maawatanda. (Aramid 4:13) Tapno simple ngarud ti panangisurotayo, umuna, masapul a siputantayo ti bokabulariotayo. Saantayo a masapul a mangusar kadagiti nauneg a sasao wenno ebkas tapno laeng agbalin nga ad-adda a makakombinsir ti kinapudno nga isursuro ti Sao ti Dios. Mabalin a mamagalusiis dagiti “nadaeg a panagsasao,” nangnangruna kadagidiay limitado ti adal wenno abilidadda. (1 Corinto 2:1, 2) Ipakita ti ulidan ni Jesus a dagiti simple a sasao a siaannad a napili ket mayallatiwda a sieepektibo ti kinapudno.

6. Kasano a maliklikantayo a gabsuonan iti nakaad-adu nga impormasion ti iyad-adalantayo iti Biblia?

⁶ Tapno makaisuro a simple, nasken met a liklikantayo a gabsuonan iti nakaad-adu nga impormasion ti iyad-adalantayo iti Biblia. Inkabilangan ni Jesus ti limitasion dagiti adalanna. (Juan 16:12) Nasken met nga ikabilangantayo ti limitasion ti iyad-adalantayo. Kas pagarigan, no iyad-adaltayo ti libro a Pannakaammo a Mangiturong iti Biag nga Agnanayon, saantayo a kasapulan nga ilawlawag ti tunggal detalye.a Saantayo met a kasapulan ti agdardaras a mangusig kadagiti impormasion, a kunam la no ti kinaadu ti material a maadal ti kapatgan. Imbes ketdi, nainsiriban no aramiden ti panagadal sigun iti kasapulan ken kapasidad ti estudiante. Ti panggeptayo ket tulongan ti estudiante nga agbalin nga adalan ni Kristo ken agdayaw ken ni Jehova. Nasken nga ipaaytayo ti kasapulan a tiempo tapno matulongan ti interesado nga estudiante a mangtarus a naimbag iti ad-adalenna. Iti kasta, mabalin a tukayen ti kinapudno ti pusona ket dayta ti mamagtignay kenkuana.​—Roma 12:2.

7. Ania dagiti singasing a makatulong kadatayo a mangisuro a simple no agpalawagtayo iti kongregasion?

⁷ No agpalawagtayo iti kongregasion, nangnangruna no adda dagiti kabbaro nga agdengdengngeg, kasano a mausartayo dagiti sasao a “nalaka a maawatan”? (1 Corinto 14:9) Usigentayo ti tallo a singasing a makatulong. Umuna, ilawlawagmo ti aniaman a di pamiliar a termino nga inaramatmo. Naidumduma ti bokabulariotayo gapu iti pannakaawattayo iti Sao ti Dios. No usarentayo dagiti ebkas a “ti matalek ken masirib nga adipen,” “sabsabali a karnero,” ken “Babilonia a Dakkel,” nalabit kasapulan nga ilawlawagtayo dagita babaen dagiti simple a sasao a mamagbalin a nalawag ti kaipapananda. Maikadua, liklikan ti nakaad-adu a sasao. Mabalin a dayta ti mangikkat iti interes dagiti agdengdengngeg. Masapul a liklikan dagiti saan a nesesita a sasao ken ebkas tapno nalawag ti ibagbagatayo. Maikatlo, saan koma a nakaad-adu ti material nga ilawlawag. Mabalin a makakitatayo iti adu a makapainteres a detalye bayat ti panagsiraraktayo. Ngem nasayaat no maurnos dagiti material iti sumagmamano a kangrunaan a punto, nga usaren laeng dagiti impormasion a mangsuporta kadagita a punto ken mabalin nga ilawlawag iti naikeddeng a tiempo.

Epektibo a Panangusar Kadagiti Saludsod

8, 9. Kasanotayo a pilien dagiti saludsod a maitutop iti interes ti bumalay? Mangted kadagiti pagarigan.

⁸ Laglagipenyo a nalaing ni Jesus nga agusar kadagiti saludsod tapno matulongan dagiti adalanna a mangyebkas iti kapanunotanda ken tapno tignayen ken sanayenna ti panagpampanunotda. Babaen dagiti saludsodna, sitatanang a nadanon ken natukayna ti pusoda. (Mateo 16:13, 15; Juan 11:26) Kas ken Jesus, kasano a mausartayo dagiti epektibo a saludsod?

⁹ No mangasabatayo iti binalaybalay, mausartayo dagiti saludsod a mangriing iti interes, a mangted kadatayo iti gundaway nga agsao maipapan iti Pagarian ti Dios. Kasanotayo a pilien dagiti saludsod a maitutop iti paginteresan ti bumalay? Managpaliiwka koma. No mapanka iti maysa a balay, siputam ti aglikmut. Addada kadi ay-ayam iti arubayan, a mangipamatmat nga adda dagiti ubbing iti dayta a pagtaengan? No adda, mabalin a saludsodentayo, ‘Pinampanunotyo kadi no ania ti kasasaad ti lubong inton dumadakkel dagiti annakyo?’ (Salmo 37:10, 11) Adu kadi ti kandado ti makinsango a ridaw, wenno addaan iti elektroniko a sistema ti seguridad? Mabalintayo nga iyimtuod: ‘Panagkunayo, dumtengto pay ngata ti tiempo a mariknatay a natalgedtayo iti pagtaengantayo ken iti lansangan?’ (Mikias 4:3, 4) Adda kadi pagnaan ti wheelchair? Mabalintayo a saludsoden: ‘Addanto kadi tiempo a nasalun-at ti amin a tattao?’ (Isaias 33:24) Adu a singasing ti masarakan iti libro a Panakirinnason Manipud iti Kasuratan.b

10. Kasanotayo nga usaren dagiti saludsod a ‘mangaon’ kadagiti kapanunotan ken rikrikna ti puso ti estudiante ti Biblia, ngem ania koma ti laglagipentayo?

¹⁰ Kasanotayo nga usaren dagiti epektibo a saludsod no mangyadaltayo iti Biblia? Saantayo a kas ken Jesus a makabasa kadagiti puso. Kaskasdi, dagiti naannad ngem maitutop a saludsod matulongandatayo a ‘mangaon’ kadagiti kapanunotan ken rikrikna ti puso ti estudiante. (Proverbio 20:5) Kas pagarigan, ipapantayo nga iyad-adaltay ti kapitulo a “No Apay a Mangyeg iti Ragsak ti Nadiosan a Panagbiag,” iti libro a Pannakaammo. Ilawlawag dayta a kapitulo ti panangmatmat ti Dios iti di kinamapagpiaran, pannakiabig, ken dadduma pay. Mabalin nga umiso ti sungbat ti estudiante kadagiti nayimprenta a saludsod, ngem umanamong kadi iti maad-adalna? Mabalintayo nga iyimtuod: ‘Nainkalintegan kadi kenka ti panangmatmat ni Jehova kadagita a bambanag?’ ‘Kasano a mayaplikarmo iti panagbiagmo dagita a prinsipio ti Biblia?’ Ngem laglagipentayo a masapul a nadayawtayo, nga ikabilangan ti dignidad ti estudiante. Ditay kayat ti mangyimtuod kadagiti saludsod a makaparurod wenno mangpabain iti estudiante ti Biblia.​—Proverbio 12:18.

11. Kadagiti ania a wagas a mausar dagiti agpalpalawag dagiti epektibo a saludsod?

¹¹ Mabalin met nga agusar kadagiti epektibo a saludsod dagiti agpalpalawag iti publiko. Dagiti mamagpanunot a saludsod​—dagiti saludsod a ditay namnamaen a sungbatan iti napigsa dagiti agdengdengngeg​—ket makatulong iti maysa nga agdengdengngeg tapno agpanunot ken agrason. Pasaray a nagusar ni Jesus kadagiti kasta a saludsod. (Mateo 11:7-9) Maysa pay, kalpasan ti introduksionna, mabalin nga usaren ti ispiker dagiti saludsod a mangidatag kadagiti kangrunaan a punto a mausig. Mabalinna a kunaen: “Iti palawag ita nga aldaw, usigentayo dagiti sungbat kadagiti sumaganad a saludsod . . .” Sa iti konklusionna, mabalinna manen a dakamaten dagiti saludsod tapno marepaso dagiti kangrunaan a punto.

12. Mangted iti pagarigan a mangipakita no kasano nga agusar dagiti Kristiano a panglakayen kadagiti saludsod a tumulong iti kapammatian a makagun-od iti liwliwa manipud iti Sao ti Dios.

¹² Iti trabahoda a panagipastor, mabalin nga agusar kadagiti saludsod dagiti Kristiano a panglakayen tapno matulonganda ‘ti malmaldaangan a kararua’ a makagun-od iti liwliwa manipud iti Sao ni Jehova. (1 Tesalonica 5:14) Kas pagarigan, tapno matulongan ti maysa a masmasnaayan, mabalin nga itampok ti panglakayen ti Salmo 34:18. Kunana: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” Tapno makita ti malmaldaangan no kasano nga agaplikar dayta kenkuana a mismo, mabalin nga iyimtuod ti panglakayen: ‘Asideg ni Jehova iti siasino? Kasla kadi ‘nadunor ti pusom’ ken ‘naidagel ti espiritum’ no dadduma? No asideg ni Jehova kadagiti kasta a tattao, kas kunaen ti Biblia, saan aya nga ipakpakitana nga asideg kenka ni Jehova?’ Ti kasta a naasi a pammatalged liwliwaenna ti rikna ti maysa a masmasnaayan.​—Isaias 57:15.

Lohikal a Panagrasrason

13, 14. (a) Kasanotayo a makirinnason iti maysa nga agkuna a dina patien ti saanna a makita a Dios? (b) Apay a namnamaentayo a saan nga amin ket makombinsir?

¹³ Iti ministeriotayo, kayattayo a danonen dagiti puso buyogen ti lohikal, makaguyugoy a panagrasrason. (Aramid 19:8; 28:23, 24) Kayatna kadi a sawen a masapul nga agadaltayo no kasano ti agusar iti narikut a panagrasrason tapno makombinsirtayo ti sabsabali maipapan iti kinapudno a linaon ti Sao ti Dios? Saan a pulos. Saan a masapul a komplikado ti panagrasrason tapno makuna a lohikal. Masansan a mas epektibo no simple dagiti lohikal nga argumento. Usigentayo ti maysa a pagarigan.

¹⁴ Ania koma ti sungbattayo no adda agkuna a dina patien ti Dios a dina makita? Mabalintayo nga usaren a makirinnason ti linteg ti nakaparsuaan nga agkuna a no adda ti gapuanan, sigurado nga adda makinggapuanan. Mabalin a kunaentayo: ‘No addakayo iti nasulinek a lugar ket makakitakayo iti napintas ti pannakabangonna a balay a napno kadagiti taraon (gapuanan), sigurado a bigbigenyo nga adda nangbangon (makinggapuanan) iti dayta a balay ken nangpunno (makinggapuanan) kadagiti estantena. Isu a no makitatayo ti nabatad a disenio ti nakaparsuaan ken ti aglaplapusanan a taraon iti “estante” (gapuanan) ditoy daga, saan kadi a lohikal a bigbigen nga adda Maysa (makinggapuanan) a nangaramid kadagita?’ Kastoy ti simple nga argumento ti Biblia: “Siempre, tunggal balay adda nangibangon, ngem ti nangibangon iti amin a bambanag isu ti Dios.” (Hebreo 3:4) Ngem uray kasano kalohikal ti panagrasrasontayo, saan nga amin ket makombinsir. Ipalagip kadatayo ti Biblia a dagidiay laeng “siuumiso nga agannayas” ti agbalin a manamati.​—Aramid 13:48; 2 Tesalonica 3:2.

15. Ania a panagrasrason ti mausartayo a mangitampok kadagiti galad ken pamay-an ni Jehova, ket ania a dua a pagarigan ti mangidemostra no kasanotayo a mausar ti kasta a panagrasrason?

¹⁵ Iti panangisurotayo, iti man tay-ak ti ministerio wenno iti kongregasion, mausartayo ti lohikal a panagrasrason tapno itampok dagiti galad ken pamay-an ni Jehova. Nangnangruna nga epektibo ti pasaray inusar ni Jesus a panagrasrason nga addaan iti anag nga ‘anianto pay nga ad-adda.’ (Lucas 11:13; 12:24) Naibatay daytoy iti panamagduma. Napuersa daytoy a kita ti panagrasrason. Tapno maibutaktak ti di kinanainkalintegan ti doktrina nga umap-apuy nga impierno, mabalintayo a kunaen: ‘Awan ti naayat nga ama a mangdusa iti anakna babaen ti panangpuorna iti ima ti ubing. Anianto pay nga ad-adda a makarimon iti naayat a nailangitan nga Amatayo ti sursuro nga umap-apuy nga impierno!’ (Jeremias 7:31) Tapno maisurotayo a maseknan ni Jehova iti tunggal adipenna, mabalintayo nga ibaga: ‘No ammo ni Jehova ti nagan ti tunggal maysa kadagiti binilion a bituen, anian nga ad-adda pay a maseknan kadagiti tattao a mangay-ayat kenkuana ken nagatang iti napateg a dara ti Anakna!’ (Isaias 40:26; Aramid 20:28) Ti kasta a makaguyugoy a panagrasrason matulongannatayo a mangdanon iti puso ti sabsabali.

Dagiti Maitutop nga Ilustrasion

16. Apay a napateg dagiti ilustrasion no iti panangisuro?

¹⁶ Dagiti epektibo nga ilustrasion ket rekado a mangpananam iti isursurotayo iti sabsabali. Apay a napateg dagiti ilustrasion no iti panangisuro? Kinuna ti maysa nga edukador: “Ti maysa kadagiti karirigatan nga aramiden ti tao isu ti panangiladawan iti panunotna ti maysa a dina nakita.” Babaen dagiti ilustrasion, mailadawantayo iti isiptayo dagiti napateg a bambanag, a tumulong kadatayo a mangtarus kadagiti baro nga ideya. Naisangsangayan ti panangusar ni Jesus kadagiti ilustrasion. (Marcos 4:33, 34) Usigentayo no kasanotay a mausar daytoy a metodo ti panangisuro.

17. Ania ti uppat a banag a mamagbalin nga epektibo ti ilustrasion?

¹⁷ Kasano nga agbalin nga epektibo ti ilustrasion? Umuna, nasken a maibagay kadagiti agdengdengngeg kadatayo, a naadaw kadagiti kasasaad a pamiliar kadakuada. Malagiptayo nga adu kadagiti ilustrasion ni Jesus ti naadaw manipud iti inaldaw a panagbiag dagiti agdengdengngeg kenkuana. Maikadua, nasken a mayanatup ti ilustrasion iti punto a maipagpaganetget. No saan a maitutop ti ilustrasion, mabalin nga iyaw-awanna laeng dagiti agdengdengngeg. Maikatlo, saan koma a napusek ti ilustrasion kadagiti saan a nesesita a detalye. Laglagipenyo a nangipaay ni Jesus kadagiti nesesita a detalye ngem dina inraman dagiti saan a kasapulan nga impormasion. Maikapat, no agusartayo iti ilustrasion, siguraduentayo a nalawag ti aplikasionna di la ket ta dinto maawatan ti dadduma ti punto a kayattay nga iyallatiw.

18. Kasano a makabukeltayo kadagiti mayanatup nga ilustrasion?

¹⁸ Kasano a makabukeltayo kadagiti mayanatup nga ilustrasion? Ditay kasapulan ti agpanunot kadagiti atiddog, detalyado unay a salaysay. Mabalin nga epektibo unay dagiti ababa nga ilustrasion. Mangpanunotka laeng kadagiti pagarigan ti punto a maus-usig. Kas pagarigan, us-usigentayo ti maipapan iti pammakawan ti Dios, ket kayattayo nga ipaganetget ti punto ti Aramid 3:19, nga agkuna a ni Jehova ‘punasenna’ dagiti basoltayo. Nalawag dayta a sasao, ngem ania nga aktual a pagarigan ti usarentayo a mangipaganetget iti punto​—maysa a borador? maysa nga espongha? Mabalin a kunaentayo: ‘No pakawanen ni Jehova dagiti basoltayo, punasenna dagita a kasla agusar iti espongha (wenno borador).’ Nalaka la a maawatan ti punto ti kasta a simple nga ilustrasion.

19, 20. (a) Pakasarakantayo kadagiti nasayaat nga ilustrasion? (b) Ania ti sumagmamano a pagarigan dagiti epektibo nga ilustrasion a naipablaak kadagiti literaturatayo? (Kitaenyo ti kahon.)

¹⁹ Pakasarakam kadagiti maitutop nga ilustrasion, agraman dagiti pagarigan a naadaw iti pudno a biag? Kitaem ti mismo a biagmo wenno ti nadumaduma a nalikudan ken kapadasan dagiti kapammatian. Mabalin a pilien dagiti ilustrasion kadagiti adu pay a gubuayan, agraman kadagiti sibibiag ken awan biagna a banag, aruaten ti balay, wenno maysa nga agdama a pasamak a pagaammo iti komunidad. Ti maysa a tulbek tapno makasarak kadagiti nasayaat nga ilustrasion isu ti panagbalin nga alerto, a ‘siaannad a paliiwen’ dagiti inaldaw a pasamak iti aglawlawtayo. (Aramid 17:22, 23) Kuna ti maysa a reperensia maipapan iti panagpalawag iti publiko: “Ti ispiker a mangpaliiw iti biag dagiti tattao ken iti nadumaduma nga aktibidadda, a makisarita iti amin a kita ti tattao, a mangsukimat a naimbag kadagiti bambanag ken agsaludsod agingga a maawatanna dagita, ket makagun-od iti adu nga ilustrasion a material a makatulongto kenkuana no kasapulanna.”

²⁰ Adda pay nabaknang a gubuayan dagiti epektibo nga ilustrasion​—Ti Pagwanawanan, Agriingkayo!, ken dadduma pay a literatura nga impablaak dagiti Saksi ni Jehova. Dakkel ti masursurom no imutektekam ti panangusar dagitoy a publikasion kadagiti ilustrasion.c Kas pagarigan, usigem ti ilustrasion a nausar iti parapo 11 iti kapitulo 17 ti libro a Pannakaammo. Ti nadumaduma a personalidad iti kongregasion ket indiligna kadagiti nadumaduma a lugan a lumabas bayat a magmagnaka iti kalsada. Apay nga epektibo dayta? Naibatay ngamin dayta iti inaldaw a pasamak, mayanatup iti maipagpaganetget a punto, ken nalawag ti aplikasionna. Mabalin nga usarentayo iti panangisurotayo dagiti naipablaak nga ilustrasion, nalabit ibagaytayo kadagiti kasapulan ti iyad-adalantayo iti Biblia wenno no agpalawagtayo.

21. Ania dagiti gunggona nga iyeg ti panagbalin nga epektibo a mannursuro iti Sao ti Dios?

²¹ Dakkel ti gunggona ti agbalin nga epektibo a mannursuro. No mangisurotayo, mangiranranudtayo; ipapaaytayo ti dadduma nga ik-ikutantayo tapno matulongantayo ti sabsabali. Mangyeg iti ragsak ti kasta a panangted, ta kuna ti Biblia: “Ad-adu ti kinaragsak iti panangted ngem iti panangawat.” (Aramid 20:35) Kadagiti mannursuro iti Sao ti Dios, isu dayta ti ragsak nga iyeg ti pannakaammo nga iranranudtayo ti maysa a banag a pudpudno ken manayon ti pategna​—ti kinapudno maipapan ken ni Jehova. Mabalintayo met a tagiragsaken ti pannakapnek nga iyeg ti pannakaammo a tultuladentayo ti Naindaklan a Mannursuro, ni Jesu-Kristo.

[Footnotes]

Malagipyo Pay Kadi?

• Kasano a mangisurotayo a simple no mangyad-adaltayo iti Biblia? no agpalpalawag iti kongregasion?

• Kasano a mausartayo dagiti epektibo a saludsod no mangaskasabatayo iti binalaybalay?

• Kasano a mausartayo ti lohikal a panagrasrason a mangitampok kadagiti galad ken pamay-an ni Jehova?

• Pakasarakantayo kadagiti maitutop nga ilustrasion?

[Kahon/Ladawan iti panid 23]

Malagipmo Kadi Dagitoy nga Ilustrasion?

Dagiti sumaganad ket sumagmamano laeng nga epektibo nga ilustrasion. Apay a dimo kitaen ti reperensia ket imutektekam no kasano a makatulong ti ilustrasion a mangipaganetget iti punto a maus-usig?

• Kas kadagiti sumisirko wenno maysa a pareha nga aga-ice skate, dakkel ti maaramidan ti nasayaat a kapareha kadagidiay agtarigagay a maaddaan iti naballigi a panagasawa.​—Ti Pagwanawanan, Mayo 15, 2001, panid 16.

• Ti panangyebkas iti rikna ket kasla panagibato iti bola. Mabalin nga in-inayadem nga ibato wenno mabalin a pigsaam nga uray la makadangran.​—Agriingkayo!, Enero 8, 2001, panid 10.

• Ti panagsursuro a mangyebkas iti ayat ket kas iti panagsursuro iti baro a lenguahe.​—Ti Pagwanawanan, Pebrero 15, 1999, panid 18, 22-3.

• Ti natawid a basol ket mayasping iti virus a mangdaddadael kadagiti programa iti kompiuter.​—Is There a Creator Who Cares About You?, panid 156.

• Us-usaren dagiti sairo ti espiritismo no kasano a dagiti mangnganup usarenda ti appan. Kas pangawis iti biktima.​—Pannakaammo a Mangiturong iti Biag nga Agnanayon, panid 111.

• Ti panangsubbot ni Jesus kadagiti annak ni Adan ket mayasping iti maysa a nabaknang a nagbayad iti utang ti kompania (maigapu iti maysa a nakusit a manedyer) ket linuktanna manen ti pabrika, a nakagunggonaan ti adu nga empleado.​—Ti Pagwanawanan, Pebrero 15, 1991, panid 13.

• No kasano a dagiti manangapresiar iti arte ikagumaanda a ritubaren ti naperdi nga obra maestra, saan a kitaen ni Jehova ti pagkurangantayo, kitaenna ketdi ti naimbag nga adda kadatayo, ket isublinatayto iti kinaperpekto a napukaw ni Adan.​—Ti Pagwanawanan, Pebrero 15, 1990, panid 22.

[Dagiti Ladawan iti panid 20]

Dagiti pudno a Kristiano ket mannursuro iti Sao ti Dios

[Ladawan iti panid 21]

Mabalin nga agusar dagiti panglakayen kadagiti saludsod tapno matulonganda dagiti kapammatian a maliwliwa iti Sao ti Dios