Pakasaritaan ti Biag

“Awan ti Baliwak!”

KAS INSALAYSAY NI GLADYS ALLEN

Mayimtuod kaniak no dadduma, “No maisubli ti kinaubingmo, ania ti baliwam?” Sipupudno a maisungbatko, “Awan ti baliwak!” Ipalubosyo nga ilawlawagko no apay.

ITI kalgaw idi 1929, idi agtawenak iti dua, nagsayaat ti napagteng ken ni tatangko a ni Matthew Allen. Nagun-odna ti bokleta a Millions Now Living Will Never Die!, nga impablaak dagiti International Bible Student, kas awag idi kadagiti Saksi ni Jehova. Kalpasan ti sigagagar a panangbasana iti sumagmamano laeng a panid, kinuna ni Tatang, “Daytoy ti kasayaatan pay laeng a nabasak!”

Di nagbayag kalpasanna, nagun-od ni Tatang ti sabali pay a publikasion dagiti Estudiante ti Biblia. Inrugina a dagus nga iranud ti naadalna iti amin a kaarruba. Ngem awan ti kongregasion dagiti Saksi ni Jehova iti away a pagnanaedanmi. Gapu ta nabigbigna a masapul ti regular a pannakitimpuyog kadagiti Kristiano, inyakar ni Tatang ti pamiliami idiay Orangeville, Ontario, Canada, idi 1935 agsipud ta adda kongregasion sadiay.

Kadagidi a tiempo, saan a kanayon a maparegta dagiti ubbing a tumabuno kadagiti gimong ti kongregasion; masansan nga agbatida iti ruar ti paggigimongan ken agay-ayamda agingga a malpas ti gimong dagiti nataengan. Saan a makaay-ayo dayta ken ni Tatang. Inrasonna, “No pagsayaatak dagiti gimong, pagsayaatan met dagiti annakko.” Isu a nupay kabbaro laeng a naitimpuyog, imbilin ni Tatang kadakami ken ni manongko a Bob, ken kada manangko nga Ella ken Ruby, a makigimongkami a kadua dagiti nataengan, ket kasta ti inaramidmi. Di nagbayag, timmabuno met ti annak dagiti dadduma a Saksi. Ti itatabuno ken panagkomento kadagiti gimong ket nagbalin a napateg unay a paset ti biagmi.

Impateg ni Tatang ti Biblia, ken makaay-ayo ti pamay-anna a mangiladawan kadagiti estoria iti Biblia. Babaen dagitoy, intukitna iti naganus a puspusomi dagiti napateg a leksion a malaglagipko pay laeng buyogen ti panangipateg. Ti maysa a malagipko a leksion ket ni Jehova bembendisionanna dagiti natulnog kenkuana.

Insuronakami met ni Tatang a mangusar iti Biblia a mangidepensa iti pammatimi. Masansan nga aramidenmi a paglinglingayan daytoy. Ibaga ni Tatang, “Patiek a mapanakto idiay langit no matayak. Ita, paneknekanyo a saanak a mapan.” Sukimatenmi ken ni Ruby ti konkordansia tapno agsapul kadagiti kasuratan a mangpaneknek a biddut dayta a sursuro. Kalpasan a maibasami ti nasukimatmi a kasuratan, ibaga ni Tatang, “Makapainteres dayta, ngem saanak latta a kombinsido.” Isu nga agsukimatkami manen iti konkordansia. Masansan nga agpaut daytoy iti sumagmamano nga oras agingga a mapnek ni Tatang kadagiti sungbatmi. Kas resultana, nagsayaat ti pannakaisuromi ken ni Ruby a mangilawlawag iti patpatienmi ken mangidepensa iti pammatimi.

Panangparmek iti Panagbuteng iti Tao

Iti laksid ti nasayaat a pannakasanayko iti pagtaengan ken kadagiti gimong ti kongregasion, maibagak nga adda dagiti aspeto iti panagbalin a Kristiano a makakarit. Kas kadagiti adu nga agtutubo, diak kayat a naidumaak iti sabsabali, nangruna kadagiti kaeskuelak. Ti damo a nangsubok iti pammatik isu ti inawaganmi a mangimpormar a parada.

Panggep daytoy nga adda ti grupo dagiti kakabsat a lallaki ken babbai nga agparada kadagiti kangrunaan a kalsada iti ili a nakaawitda iti karatula. Agaammo dagiti agarup 3,000 a tattao iti ilimi. Bayat ti maysa a mangimpormar a parada, addaak iti likudan a nakaawit iti karatula a nasuratan iti “Ti Relihion Ket Maysa a Silo ken Pananggundaway.” Nakitadak ti dadduma a kaeskuelak, ket dagus a napanda iti likudak, nga ikankantada “Ispalen ti Dios ti Ari.” Kasano a nadaerak daytoy? Sipapasnek nga inkararagko a maaddaanak koma iti bileg nga agtultuloy. Idi nalpas met laengen ti parada, nagdardarasak a napan iti Kingdom Hall tapno isublik ti karatula ket kalpasanna agawidakon. Ngem imbaga kaniak ti mangiturturong nga adda sabali pay a parada ket masapulda ti maysa pay a tao a mangawit iti karatula. Isu a rimmuarak manen, ket ad-adda a nagkararagak a sipapasnek. Ngem iti dayta a kanito, nabannog dagiti kaeskuelak ket nagawiddan. Ti kararagko tapno mapabilegak ket nagbalin a kararag ti panagyaman!​—Proverbio 3:5.

Kanayon a silulukat ti balaymi kadagiti amin-tiempo nga ad-adipen. Naragsakda a grupo ken nakaay-ayatda a sangailien. Malagipko pay ti kanayon a pammagbaga dagiti nagannak kadakami a ti amin-tiempo a ministerio ti kasayaatan a karera.

Idi 1945, kas sungbat ti pammaregtada, simrekak iti amin-tiempo a ministerio. Idi agangay, kinaduaak ti kabsatko a ni Ella, nga agpaypayunir idiay London, Ontario. Sadiay, nayam-ammo kaniak ti kita ti panagserbi nga impapanko a diak pulos kabaelan. Masansan a pindaen dagiti kakabsat dagiti lamisaan kadagiti paginuman ti arak ket itukonda kadagiti agiinum dagiti kopia Ti Pagwanawanan ken Consolation (Agriingkayo! ita). Imbag ta naaramid dayta a trabaho kadagiti malem ti Sabado, isu nga adda makalawas a gundawayko nga agkararag tapno kumiddaw iti tured a makipaset! Saan a nalaka kaniak ti trabaho, ngem makagunggona.

Iti sabali a bangir, naammuak met no kasano ti mangipaima kadagiti naisangsangayan a ruar ti Consolation maipapan iti pannakaidadanes dagiti kakabsatmi kadagiti kampo konsentrasion ti Nazi, nangruna ti iyaasideg kadagiti nalatak a negosiante idiay Canada, agraman dagiti presidente ti dadakkel a korporasion. Kadagiti naglabas a tawtawen, napaneknekak a kanayon a tumultulong kadakami ni Jehova no la ketdi ta agpannuraykami iti pammabilegna. Kas masansan nga ibaga ni Tatang, bembendisionan ni Jehova dagidiay natulnog Kenkuana.

Panangawat iti Awis nga Agserbi Idiay Quebec

Idi Hulio 4, 1940, naiparit ti trabaho dagiti Saksi ni Jehova idiay Canada. Idi agangay, naipalubos manen, ngem naidadaneskami latta iti Romano Katoliko a probinsia ti Quebec. Tapno maipakaammo ti naulpit a pannakatrato dagiti kakabsatmi sadiay, nangaramidkami iti naisangsangayan a kampania nga inusarmi ti mangbabalaw a tract a Quebec’s Burning Hate for God and Christ and Freedom Is the Shame of All Canada. Ni Nathan H. Knorr, miembro ti Bagi a Manarawidwid dagiti Saksi ni Jehova, ket nakisarita iti ginasut a payunir iti siudad ti Montreal tapno ilawlawagna ti kaipapanan ti aramidenmi. Kinuna ni kabsat Knorr a no makiramankami iti kampania, mabalin a maaresto ken maibaludkami. Kasta a talaga ti napasamak! Adda tiempo a naarestoak iti 15 a daras. No rummuarkami iti tay-ak ti serbisio, siguraduenmi ti agitugot iti sipilio ken sagaysay tapno adda usarenmi no bilang ta maibaludkami iti agpatnag.

Idi damo, kaaduanna a mangasabakami iti rabii tapno saankami unay a madlaw. Masansan a mangitugotak iti kanayonan nga abasto a tract iti bag nga inyukkorko ken nalingdan iti kawesko. Dakkel ti bag a napno iti tract, isu a kaslaak masikog. Nakatulong kaniak dayta no napno iti pasahero ti pagluganak nga agturong iti teritoria. Masansan nga adda nasingpet a lalaki a tumakder ket ipalubosna a ti “masikog” ti agtugaw.

Iti panaglabas ti tiempo, rinugianmi ti trabaho a panagiwaras bayat ti aldaw. Agibatikami iti tract iti tallo wenno uppat a ruangan, kalpasanna, mapankami iti sabali a teritoria. Masansan a naballigi dayta. Ngem no maammuan ti maysa a Romano Katoliko a padi nga addakami iti dayta a lugar, manamnamami nga adda parikut. Naminsan, maysa a padi ti nangisungsong iti 50 wenno 60 a managderraaw a nataengan ken ubbing a mangbato kadakami iti kamatis ken itlog. Nagkamangkami iti pagtaengan ti maysa a Kristiano a kabsat, ket naturogkami iti datar iti dayta a rabii.

Adu a payunir ti kasapulan idi a mangasaba kadagiti Pranses ti pagsasaoda nga umili ti Quebec, isu nga idi Disiembre 1958, rinugianmi ken ni kabsatko a Ruby nga adalen ti pagsasao a Pranses. Kalpasanna, naibaonkami iti adu a Pranses ti pagsasaona a lugar iti probinsia. Naaddaankami iti naidumduma a kapadasan iti tunggal pakaibaonanmi a lugar. Iti maysa a lugar, iti unos ti dua a tawen, walo nga oras kada aldaw a nagbalaybalaykami nga awan ti nakasaomi! Sumirip laeng dagiti tattao iti de kurtina a tawa ti ridawda. Ngem dikami namingga. Ita, adda dua a naballigi a kongregasion iti dayta nga ili.

Tinaginayon ni Jehova iti Adu a Pamay-an

Nangrugikami kas special pioneer idi 1965. Iti maysa a nakaibaonanmi kas special pioneer, nabigbigmi ti naan-anay a kaipapanan ti sasao ni Pablo a nairekord iti 1 Timoteo 6:8: “No adda pagtaraon ken pagkawestayo, mapnektayon kadagitoy a banag.” Nasken a sursuruenmi ti agbadyet tapno adda gastosenmi. Isu a mangilatangkami iti kuarta para iti heater, abang, koriente, ken taraon. Addanto la nabatbati a 25 sentimo a paggastomi iti aniaman bayat ti bulan.

Gapu iti bassit a pondomi, sumagmamano laeng nga oras iti rabii nga agandar ti heater a mangpabara iti pagtaenganmi. Isu a saan pulos a ngumato iti 15 degrees celsius iti siled a pagturoganmi ken masansan a nalamlam-ek pay. Naminsan, bimmisita kadakami ti anak ti maysa kadagiti iyad-adalan ni Ruby iti Biblia. Idi nagawid, impakaammona la ketdi iti inana a nakaro a malamlamminankami, isu nga idi agangay binulan a nagipatulod ti ina iti sangapulo a doliar a paggatang iti gasolina tapno kanayon nga agandar ti heater. Saankami met laengen a kasla kakaasi. Saankami a nabaknang, ngem kanayon nga adda dagiti kasapulanmi. Mariknami a maysa a bendision ti aniaman a sobra. Anian a pudno ti sasao ti Salmo 37:25: “Saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay”!

Iti laksid dagiti ibubusor a nalak-ammi, maragsakanak a makakita iti adu nga inyadalak iti Biblia a nakabigbig iti kinapudno. Adda dagiti simrek iti amin-tiempo a ministerio, a nangipaay kaniak iti naidumduma a rag-o.

Sibaballigi a Panangsango Kadagiti Baro a Pakasuotan

Ti Cornwall, Ontario, ti baro a teritoriami idi 1970. Agarup makatawen kalpasan a nakasangpetkami idiay Cornwall, nagsakit ni Nanang. Natay ni Tatang idi 1957, ket nagsisinnublatkami kadagiti dua a kakabsatko a babbai a nangaywan ken ni Nanang agingga iti ipapatayna idi 1972. Dagiti kakaduami nga special pioneer, da Ella Lisitza ken Ann Kowalenko, ti nangpabileg ken siaayat a timmulong kadakami bayat dagidi a tiempo. Inaywananda dagiti iyad-adalanmi iti Biblia ken dadduma pay nga annongen bayat ti kaawanmi. Agpayso unay ti sasao ti Proverbio 18:24: “Adda gayyem a dumekket a nasingsinged ngem iti maysa a kabsat”!

Talaga a napno ti biag kadagiti pakasuotan. Babaen ti naayat a tulong ni Jehova, nabaelak a sinango dagitoy. Sirarag-o pay laeng nga agserserbiak iti amin-tiempo. Ni Bob, a natay idi 1993, ket nagpayunir iti nasurok 20 a tawen, a pakaibilangan ti 10 a nagpateg a tawen a panagpayunir kaduana ni baketna a Doll. Ti inauna a kabsatko a ni Ella, a pimmusay idi Oktubre 1998, ket nagpayunir iti nasurok 30 a tawen ken kanayon a tinaginayonna ti espiritu ti kinapayunir. Idi 1991, naammuan nga adda kanser ti maysa pay a kabsatko a ni Ruby. Kaskasdi, inusarna ti nabatbati a pigsana a nangikasaba iti naimbag a damag. Nagtultuloy ti naragsak a kababalinna uray agingga iti ipapatayna, idi agsapa ti Setiembre 26, 1999. Nupay awanen dagiti kabsatko a babbai, addaanak iti naespirituan a pamilia dagiti kakabsat a lallaki ken babbai a tumulong kaniak a mangtaginayon iti naragsak a kababalin.

No lagipek ti biagko, ania koma ti baliwak? Diak pulos nakiasawa, ngem naparaburanak iti naayat a nagannak, maysa a kabsat a lalaki, ken kakabsat a babbai a nangipangpangruna iti kinapudno iti biagda. Padpadaanak ti asidegen a pannakakitak kadakuada inton panagungar. Kasla makitkitakon ni Tatang a mangar-arakup kaniak ken ni nanangko nga aglulua bayat ti panagrinnakepmi. Malapunosto la ketdi iti rag-o da Ella, Ruby, ken Bob.

Kabayatanna, panggepko nga itultuloy nga usaren ti nabatbati a salun-at ken pigsak a mangitan-ok ken mangidayaw ken ni Jehova. Nakaay-ayat, makagunggona a biag ti agserbi kas amin-tiempo a payunir. Dayta ket kas iti kinuna ti salmista kadagidiay magmagna iti daldalan ni Jehova: “Naragsakkanto ket naimbagto kenka.”​—Salmo 128:1, 2.

[Dagiti Ladawan iti panid 26]

Inayat ni Tatang ti Biblia. Insuronakami a mangusar iti dayta a mangidepensa iti pammatimi

[Ladawan iti panid 28]

Agpakannawan: Ni Ruby, siak, Bob, Ella, Nanang, ken Tatang idi 1947

[Ladawan iti panid 28]

Makinsango nga intar, agpakannawan: Siak, Ruby, ken Ella iti Kombension Distrito, idi 1998