“Umaykayo Kaniak, . . . ket Pagin-awaenkayto”
Dagiti Agtutubo a kas Kadagiti Makapabang-ar nga Amor
AWAN duadua nga inraman ni Jesu-Kristo dagiti agtutubo a pasurotna idi kinunana: “Umaykayo kaniak, . . . ket pagin-awaenkayto.” (Mateo 11:28) Idi a dagiti tattao inyegda kenkuana dagiti ubbing, pinadas dagiti adalanna a lapdan ida. Ngem kinuna ni Jesus: “Bay-anyo dagiti ubbing nga umay kaniak; dikay padasen a pawilan ida.” Ni Jesus ‘innalana pay dagiti ubbing kadagiti takiagna ket rinugianna a binendisionan ida.’ (Marcos 10:14-16) Di pagduaduaan a dagiti ubbing napategda ken ni Jesus.
Dakamaten ti Biblia dagiti matalek nga agtutubo a lallaki ken babbai, agraman dagiti tin-edyer ken babassit nga ubbing, a nangipasdek iti nagsayaat nga ulidan iti panagserbi iti Dios. Ti “bunggoy dagiti agtutubo a tattao” a kas kadagiti amor a makapabang-ar ket naipakpakauna iti libro a Salmo. Saritaenna met dagiti “agtutubo a lallaki” ken “birhen” a mangidaydayaw iti nagan ni Jehova.—Salmo 110:3; 148:12, 13.
Lugar a Pagrang-ayan Dagiti Agtutubo
Mayanatup a mayarig dagiti agtutubo kadagiti amor, yantangay nainaig ti amor iti kinawadwad ken bendision. (Genesis 27:28) Dagiti amor ket nalami ken makapabang-ar. Iti daytoy tiempo ti kaadda ni Kristo, adu dagiti Kristiano nga agtutubo a situtulok ken sigagagar a mangipaay iti bagbagida. Kas kadagiti makapabang-ar nga amor, adu nga agtutubo a lallaki ken babbai ti siraragsak nga agserbi iti Dios ken tumulong kadagiti padada nga agdaydayaw.—Salmo 71:17.
Dagiti Kristiano nga agtutubo makapabang-arda saan laeng a kadagiti sabsabali; makapabang-ar a mismo kadakuada ti panagserbida. Agserbi ti organisasion ti Dios kas lugar a mabalinda a pagrang-ayan. Babaen ti panangtaginayonda iti nangato a moralidad, tagiragsaken dagiti agtutubo a lallaki ken babbai ti nasinged a relasion iti Dios. (Salmo 119:9) Iti uneg ti kongregasion, makiramanda met kadagiti makagunggona nga aktibidad ken makasarakda kadagiti nasayaat a gagayyem—bambanag nga ad-adda a mamagbalin iti biag a makapnek ken addaan panggep.
‘Pakapaimbagan ken Pakapabang-aran’
Marikna kadi a mismo dagiti Kristiano nga agtutubo a kasla da “amor”? Am-ammuenyo ni Tania, maysa nga agtutubo a babai nga aktibo iti kongregasion ken siraragsak a mangbusbusbos iti nasurok 70 nga oras kada bulan iti ministerio. Kasano ti panagriknana? “Nabang-aran ken napabilegak,” kunana. “‘Makapaimbag ken makapabang-ar’ ti agbiag a kadua ni Jehova ken ti naindagaan nga organisasionna.”—Proverbio 3:8.
Ni Ariel, maysa pay a balasitang nga amin-tiempo a ministro, pagyamananna ti naespirituan a pannakataraonna iti kongregasion. “No mapanak kadagiti Nakristianuan a gimong, kombension, ken asamblea ket tagiragsakek ti naespirituan a lamisaan ni Jehova, dayta ti talaga a mangpabang-ar kaniak iti naespirituan,” kunana. “Pakapabilgak met a maammuan nga addaanak kadagiti katrabahuan iti intero a lubong.” Iti panangdeskribirna iti kangrunaan a gubuayan ti bang-ar, kunana: “Makapabang-ar ti makigayyem ken ni Jehova, nangruna no mangngeg wenno makitak ti nakaal-alingget a paspasamak ditoy lubong a mangap-apektar kadagiti tattao.”—Santiago 2:23.
Iti tawenna a 20, agserserbi ni Abishai kas amin-tiempo nga ebanghelisador ken ministerial nga adipen iti kongregasion. Dineskribirna ti kapadasanna kadagitoy a sasao: “Mabang-aranak agsipud ta ammok a tamingen dagiti adu a parikut a sangsanguen dagiti agtutubo ita. Ti kinapudno a linaon ti Biblia natulongannak a mangipamaysa iti nasken nga aramidek tapno amin-kararua a makapagserbiak ken ni Jehova.”
Idi rugrugi ti kinatin-edyerna, managpungpungtot ni Antoine. Adda idi kaeskuelaanna a pinang-orna iti tugaw, ken sabali pay ti dinuyokna iti lapis. Saan a makapabang-ar a tao ni Antoine! Ngem nabalbaliwan ti kababalinna babaen ti pannursuro ti Biblia. Ita ta agtawenen iti 19 ken agserserbi kas ministerial nga adipen ken amin-tiempo a ministro iti kongregasion, kunana: “Agyamanak ken ni Jehova ta impalubosna a maaddaanak iti pannakaammo maipapan kenkuana ken gapu ta tinulongannak a makabigbig a kasapulan nga agteppelak ken balbaliwak ti kababalinko. Babaen iti dayta a pamay-an, naliklikak ti adu a parikut.”
Mapaliiw ti sabsabali ti makapabang-ar a kababalin dagiti agtutubo a Kristiano. Ni Matteo ket maysa nga agtutubo a Saksi idiay Italia. Inkeddeng ti mannursurona nga agmulta iti bassit a kantidad ti asinoman a mangisawang iti naalas a sao. Idi agangay, kiniddaw dagiti ubbing a maikkat ti pagannurotan, agsipud ta kinunada nga “imposible ti saan nga agsao iti dakes.” “Ngem,” inlawlawag ni Matteo, “kinuna ti mannursuro a saan nga imposible dayta, ket inusarnak, a maysa a Saksi ni Jehova, kas ulidan, a pinadayawannak iti sango ti intero a klase gapu iti nadalus a panagsasaok.”
Iti sango ti nagulo a klase iti siled ti eskuelaan idiay Thailand, pinagtakder ti mannursuro ti agtawen iti 11 a ni Racha ket kinomendaranna gapu iti nasayaat a kababalinna, a kunkunana: “Dakayo amin, apay a diyo tuladen ni Racha? Naanep nga agadal ken nasingpet.” Kalpasanna, kinunana kadagiti estudiante: “Masapul siguro nga agbalinkayo a Saksi ni Jehova, kas ken ni Racha, tapno sumingpetkayo.”
Makaparagsak a makita ti rinibu a Kristiano nga agtutubo nga umad-adu ti pannakaammoda ken ni Jehova ken mangar-aramid iti pagayatanna. Dagita a naimbag nga agtutubo mangipakpakitada iti kinasirib uray dida pay nataengan. Matulongan ida ti Dios tapno agballigi ti biagda ita ken ipaayanna met ida iti naraniag a masanguanan iti um-umayen a baro a lubong. (1 Timoteo 4:8) Iti daytoy agdama a sistema ti bambanag a langalang ti naespirituan a kasasaadna, a napno kadagiti agtutubo a napaay ken awanan pannakapnek, makapabang-ar dagiti Kristiano nga agtutubo!