Talaga Kadi nga Adda Pammatim iti Naimbag a Damag?
“Ti pagarian ti Dios immasidegen. Agbabawikayo, ket maaddaankayo iti pammati iti naimbag a damag.”—MARCOS 1:15.
1, 2. Kasanom nga ilawlawag ti Marcos 1:14, 15?
TAWEN 30 K.P. idi. Rinugian ni Jesu-Kristo ti naindaklan a ministeriona idiay Galilea. Inkaskasabana ti “naimbag a damag ti Dios,” ket natignay ti adu a taga Galilea idi kinunana: “Ti naituding a tiempo natungpalen, ket ti pagarian ti Dios immasidegen. Agbabawikayo, ket maaddaankayo iti pammati iti naimbag a damag.”—Marcos 1:14, 15.
2 Dimtengen idi “ti naituding a tiempo” tapno rugian ni Jesus ti ministeriona ken tapno agaramid dagiti tattao iti pangngeddeng a mangyeg kadakuada iti anamong ti Dios. (Lucas 12:54-56) ‘Asidegen ti Pagarian ti Dios’ ta adda idin ti Nadutokan nga Agari a ni Jesus. Natignay nga agbabawi dagiti nasingpet panagpuspusoda a tattao gapu iti panangasabana. Ngem kasanoda—ken kasanotayo—nga iparangarang ti “pammati iti naimbag a damag”?
3. Ania ti inaramid dagiti tattao a mangipakita nga adda pammatida iti naimbag a damag?
3 Kas ken Jesus, indagadag ni apostol Pedro kadagiti tattao nga agbabawida. Kadagiti Judio idiay Jerusalem idi Pentecostes 33 K.P., kinuna ni Pedro: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo, ket awatenyonto ti awan bayadna a sagut ti nasantuan nga espiritu.” Rinibu ti nagbabawi, nabautisaran, ken nagbalin a pasurot ni Jesus. (Aramid 2:38, 41; 4:4) Idi 36 K.P., kasta ti inaramid dagiti nagbabawi a Gentil. (Aramid 10:1-48) Iti kaaldawantayo, ti pammati iti naimbag a damag tigtignayenna ti rinibu a tattao a pagbabawianda dagiti basolda, agdedikar iti Dios, ken agpabautisar. Inawatda ti naimbag a damag maipapan iti pannakaisalakan ket ipakpakitada a patienda ti pangsubbot a daton ni Jesus. Maysa pay, iyap-aplikarda ti kinalinteg ken dimmasigda iti Pagarian ti Dios.
4. Ania ti pammati?
4 Ngem ania ti pammati? Insurat ni apostol Pablo: “Ti pammati isu ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita.” (Hebreo 11:1) Gapu iti pammatitayo, ibilangtayo a natungpalen ti tunggal kari ti Dios nga adda iti Saona, a kasla adda ik-ikutantayo a papeles a mangpaneknek a kukuatayo ti maysa a banag. Kanayonanna, ti pammati ket “nabatad a parangarang,” wenno pammaneknek, a patientayo dagiti bambanag a di pay nakita. Ti pannakaawat ken naimpusuan nga apresasiontayo kombinsirennatayo a pudno dagita, nupay ditay pay nakita ida.—2 Corinto 5:7; Efeso 1:18.
Kasapulantayo ti Pammati!
5. Apay a nagpateg ti pammati?
5 Nayanaktayo nga addaan iti naespirituan a kasapulan ngem saantayo a nayanak nga addaan iti pammati. Kinapudnona, “ti pammati saan nga ik-ikutan dagiti amin a tattao.” (2 Tesalonica 3:2) Ngem masapul a maaddaan iti pammati dagiti Kristiano tapno tawidenda dagiti kari ti Dios. (Hebreo 6:12) Kalpasan a dinakamatna ti adu a mapagulidanan a pammati, insurat ni Pablo: “Agsipud ta addaantayo iti kastoy kadakkel nga ulep dagiti saksi a mangliklikmut kadatayo, ikkatentayo met ti tunggal dadagsen ken ti basol a silalaka a mangsagud kadatayo, ket buyogen ti panagibtur tarayentayo ti lumba a naikabil iti sanguanantayo, bayat a kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” (Hebreo 12:1, 2) Ania ti “basol a silalaka a mangsagud kadatayo”? Isu ti kinaawan ti pammati, uray ti pannakapukaw ti pammati a sigud nga ik-ikutan. Tapno mataginayon ti natibker a pammati, nasken a ‘kumitatayo a sipapasnek ken ni Jesus’ ket suroten ti ulidanna. Masapul met nga ilaksidtayo ti imoralidad, makidangadang kadagiti aramid ti lasag, ken liklikan ti materialismo, nailubongan a pilosopia, ken di nainkasuratan a tradision. (Galacia 5:19-21; Colosas 2:8; 1 Timoteo 6:9, 10; Judas 3, 4) Maysa pay, nasken a patientayo nga adda kadatayo ti Dios ken talaga nga epektibo dagiti balakad ti Saona.
6, 7. Apay a maiparbeng nga ikararag ti pammati?
6 Saantayo a mapatanor ti pammati iti bukodtayo a pigsa. Ti pammati ket maysa kadagiti bunga ti nasantuan nga espiritu, wenno aktibo a puersa, ti Dios. (Galacia 5:22, 23) Kasano ngarud no kasapulan ti pammatitayo ti pammabileg? Kinuna ni Jesus: “No dakayo . . . ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Lucas 11:13) Wen, ikararagtayo ti nasantuan nga espiritu, ta mapatanorna kadatayo ti pammati a kasapulan tapno maaramidtayo ti pagayatan ti Dios uray iti sidong ti karigatan a kasasaad.—Efeso 3:20.
7 Maiparbeng nga ikararag ti kanayonan a pammati. Idi paruaren ni Jesus ti demonio a nanglugan iti maysa nga ubing a lalaki, impakaasi ti ama ti ubing: “Addaanak iti pammati! Tulongannak no sadino a kasapulak ti pammati!” (Marcos 9:24) “Ikkannakami iti ad-adu pay a pammati,” kinuna dagiti adalan ni Jesus. (Lucas 17:5) Gapuna, ikararagtayo koma a rumayray ti pammatitayo, nga agtalektayo a sungbatan ti Dios dagiti kasta a kararag.—1 Juan 5:14.
Napateg ti Pammati iti Sao ti Dios
8. Kasano a matulongannatayo ti pammati iti Sao ti Dios?
8 Sakbay unay ti sakripisio nga ipapatayna, kinuna ni Jesus kadagiti pasurotna: “Dikay palubosan a mariribukan dagiti pusoyo. Watwatenyo ti pammati iti Dios, watwatenyo met ti pammati kaniak.” (Juan 14:1) Kas Kristiano, adda pammatitayo iti Dios ken iti Anakna. Ngem komusta met ngay ti pammatitayo iti Sao ti Dios? Dakkel ti iyegna a naimbag nga epekto iti biagtayo no adalen ken iyaplikartayo dayta buyogen ti naan-anay a panagtalek a dayta ti mangipaay iti kasayaatan a balakad ken panangiwanwan kadatayo.—Hebreo 4:12.
9, 10. Ilawlawagyo ti kinuna ti Santiago 1:5-8 maipapan iti pammati.
9 Napno iti riribuk ti biagtayo kas imperpekto a tattao. Kaskasdi, ti pammati iti Sao ti Dios ket pudno a makatulong kadatayo. (Job 14:1) Kas pagarigan, ipapantayo a ditay ammo no kasano a sarangten ti maysa a suot. Balakadannatayo ti Sao ti Dios: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana. Ngem isu agtultuloy koma nga agdawat buyogen ti pammati, a saan a pulos agduadua, ta ti agduadua umasping iti dalluyon ti baybay nga iduron ti angin ket maipalpallayog. Iti kinapudnona, saan koma a pagarupen dayta a tao nga umawatto iti aniaman manipud ken Jehova; isu ket di makapangngeddeng a tao, di agtaltalinaed kadagiti amin a dalanna.”—Santiago 1:5-8.
10 Saannatayo nga umsien ni Jehova a Dios no agkurangtayo iti sirib ket ikararagtayo dayta. Imbes ketdi, tulongannatayo a mangmatmat a siuumiso iti dayta a suot. Mabalin a maipalagip kadatayo dagiti makatulong a teksto babaen dagiti kapammatiantayo wenno bayat nga agad-adaltayo iti Biblia. Wenno mabalin nga iwanwannatayo ti nasantuan nga espiritu ni Jehova iti dadduma a pamay-an. Ipaay ti nailangitan nga Amatayo ti sirib a mangsaranget kadagiti suot no ‘agtultuloytayo nga agdawat buyogen ti pammati, a saan a pulos agduadua.’ No kaslatayo iti dalluyon ti baybay a maipalpallayog, saantayo a manamnama a makaawattayo iti aniaman manipud iti Dios. Apay? Gapu ta kaipapananna nga agduadua ken ditay talken ti kararagtayo wenno ti dadduma a banag—wen, uray ti panangipakita iti pammatitayo. Masapul ngarud a maaddaantayo iti natibker a pammati iti Sao ti Dios ken iti panangiwanwanna. Usigentayo ti dadduma a pagarigan no kasano a tumulong ken mangiwanwan dayta.
Pammati ken Material a Kasapulan
11. No mamatitayo iti Sao ti Dios, ania ti ipanamnamana kadatayo no maipapan iti inaldaw a kasapulantayo?
11 Komusta ngay no agsagsagabatayo iti rigat ti biag wenno kinapanglaw? Ti panamati iti Sao Dios ket sitatalged a mangipanamnama kadatayo nga ipaay ni Jehova dagiti inaldaw a kasapulantayo ken aglaplapusanan nga ipaayna dagiti probision kadagidiay mangay-ayat kenkuana. (Salmo 72:16; Lucas 11:2, 3) Mabalin a makapabileg kadatayo no lagipentayo no kasano a tinaraonan ni Jehova ni propetana nga Elias bayat ti maysa a panagbisin. Kalpasanna, simimilagro nga impaay ti Dios ti suplay nga arina ken lana a nangsustiner iti biag ti maysa a babai, ti anakna, ken ni Elias. (1 Ar-ari 17:2-16) Kasta met laeng ti inaramid ni Jehova ken ni propeta Jeremias kabayatan ti pananglakub ti Babilonia iti Jerusalem. (Jeremias 37:21) Nupay nakirang ti taraon da Jeremias ken Elias, inaywanan ida ni Jehova. Kasta met laeng ti aramidenna kadagidiay mangipakita ita iti pammati kenkuana.—Mateo 6:11, 25-34.
12. Kasano a ti pammati tulongannatayo a maaddaan kadagiti kasapulantayo?
12 Ti pammati a nabuyogan iti panangyaplikar kadagiti prinsipio ti Biblia dinatayo pabaknangen iti material, ngem tulongannatayo a maaddaan kadagiti kasapulantayo. Kas panangyilustrar: Balakadannatayo ti Biblia a nasken nga agbalintayo a mapagpiaran, nasigo, nagaget. (Proverbio 22:29; Eclesiastes 5:18, 19; 2 Corinto 8:21) Ditay koma pulos tagilag-anen ti pateg ti nasayaat a reputasion kas maysa a trabahador. Uray kadagiti lugar a manmano ti trabaho a dakkel ti sueldo, nasaysayaat ti nagbanagan dagiti mapagpiaran, nasigo, nagaget a trabahador ngem kadagiti dadduma. Nupay saanda a nabaknang iti material, kaaduanna nga addaanda kadagiti banag a kasapulanda ken mariknada ti pannakapnek kadagiti taraon a nagbannoganda.—2 Tesalonica 3:11, 12.
Ti Pammati Tulongannatayo a Mangibtur iti Ladingit
13, 14. Kasano a ti pammati tulongannatayo a mangibtur iti ladingit?
13 Realistiko nga ipakita ti Sao ti Dios a natural laeng ti agladingit no pimmusay ti maysa nga ing-ingungoten. Nagleddaang ni matalek a patriarka nga Abraham idi natay ti dungdungnguenna nga asawa a ni Sara. (Genesis 23:2) Nakaro ti ladingit ni David idi nadamagna a natay ni Absalom nga anakna. (2 Samuel 18:33) Nagsangit uray ti perpekto a tao a ni Jesus idi natay ni Lazaro a gayyemna. (Juan 11:35, 36) No matay ti maysa nga ing-ingungoten, mabalin a malapunostayo iti liday, ngem ti pammati kadagiti kari ti Sao ti Dios tulongannatayo a mangibtur iti kasta a ladingit.
14 ‘Adda inanamak iti Dios,’ kinuna ni Pablo, ‘nga addanto panagungar dagiti nalinteg ken dagiti nakillo.’ (Aramid 24:15) Masapul a patientayo ti probision ti Dios a pagungarenna ti umariwekwek a tattao. (Juan 5:28, 29) Karaman kadagita da Abraham ken Sara, Isaac ken Rebecca, Jacob ken Lea—a matmaturog ita ken patay ken agur-uray iti panagungar iti baro a lubong ti Dios. (Genesis 49:29-32) Anian a rag-otayo inton agungar dagiti ing-ingungoten manipud ken patay ket agbiagda ditoy daga! (Apocalipsis 20:11-15) Iti agdama, saan a punasen ti pammati ti amin a ladingit, ngem pagtalinaedennatayo a nasinged iti Dios, a tumulong kadatayo a mangibtur iti saem ti ipapatay ti ay-ayaten.—Salmo 121:1-3; 2 Corinto 1:3.
Ti Pammati Pabilgenna Dagiti Malmaldaangan
15, 16. (a) Apay a maikunatayo a saan a karkarna no agleddaang dagidiay mangipakpakita iti pammati? (b) Kasano a mabalin a madaeran ti panagleddaang?
15 Ipakita met ti Sao ti Dios a mabalin nga agleddaang uray dagidiay mangipakpakita iti pammati. Bayat ti nakaro a pannakasuotna, impagarup ni Job nga isu ket binaybay-an ti Dios. (Job 29:2-5) Nagladingit ni Nehemias gapu iti pannakarpuog ti Jerusalem ken dagiti paderna. (Nehemias 2:1-3) Nakaro ti liday ni Pedro kalpasan nga inlibakna ni Jesus isu a “nagsangit a sipapait unay.” (Lucas 22:62) Indagadag met ni Pablo kadagiti kapammatianna iti kongregasion ti Tesalonica nga ‘agsaoda iti makaliwliwa kadagiti malmaldaangan.’ (1 Tesalonica 5:14) No kasta, saan a karkarna no agleddaang uray dagidiay mangipakpakita iti pammati ita. Ania ngarud ti mabalintayo nga aramiden tapno madaerantayo ti panagleddaang?
16 Mabalin a maldaangantayo gapu ta maipaspasangotayo iti sumagmamano a serioso a parikut. Imbes a matmatantayo dagita kas maysa a narikut a problema, mabalin a saggaysaentayo a risuten dagita babaen ti panangyaplikar kadagiti prinsipio ti Biblia. Makatulong dayta a mangep-ep iti leddaangtayo. Mabalin met a makatulong ti natimbeng nga aktibidad ken umdas nga inana. Daytoy ti sigurado: Pagimbagan ti espiritualidadtayo no patientayo ti Dios ken ti Saona gapu ta pabilgenna ti pammatitayo a talaga a maseknan ti Dios.
17. Kasanotayo nga ammo nga ipatpategnatayo ni Jehova?
17 Ipaay kadatayo ni Pedro daytoy makaliwliwa a pammatalged: “Agpakumbabakayo . . . iti sidong ti mannakabalin nga ima ti Dios, tapno itan-oknakayo iti naikeddeng a tiempo; bayat nga iyallatiwyo kenkuana ti isuamin a pakaringgoranyo, agsipud ta isu maseknan kadakayo.” (1 Pedro 5:6, 7) Inkanta ti salmista: “Ni Jehova mangipaay iti saranay kadagiti amin a mapasag, ket patakderenna ti isuamin a maparukob.” (Salmo 145:14) Masapul a patientayo dagitoy a pammatalged, ta masarakan da iti Sao ti Dios. Nupay nalabit agtultuloy ti panagleddaang, anian a makapabileg iti pammati a maammuan a mabalintayo nga iyallatiw ti amin a pakaringgorantayo iti naayat a nailangitan nga Amatayo!
Ti Pammati ken ti Dadduma a Suot
18, 19. Kasano a ti pammati tulongannatayo a mangdaer iti sakit ken mangliwliwa kadagiti agsakit a kapammatiantayo?
18 Mabalin a dakkel a pannubok iti pammatitayo no agsakittayo iti nakaro wenno dagiti ay-ayatentayo. Nupay awan ti ibaga ti Biblia a milagro nga immimbag dagiti Kristiano a kas kada Epafrodito, Timoteo, ken Trofimo, awan duadua a tinulongan ida ni Jehova a makapagibtur. (Filipos 2:25-30; 1 Timoteo 5:23; 2 Timoteo 4:20) Maysa pay, no maipapan iti “asinoman nga agtigtignay a buyogen ti konsiderasion iti daydiay nanumo,” inkanta ti salmista: “Isu saranayento ni Jehova a mismo iti idda ti panagsakit; isuamin a pagiddaanna pudno unay a baliwamto bayat ti panagsakitna.” (Salmo 41:1-3) Kasano a ti sasao ti salmista tulongannatayo a mangliwliwa kadagiti masakit a kapammatiantayo?
19 Ti maysa a pamay-an a maipaay ti naespirituan a tulong kadagidiay masakit isu ti panagkararag a kadua ida ken maipaay kadakuada. Nupay saantayo nga idawat ti milagro a pannakapaimbag ita, mabalintayo a kiddawen a pabilgen ida ti Dios tapno maibturanda ti sakitda ken ikararagtayo ti naespirituan a pigsa a kasapulanda tapno maanduranda dagita a panawen ti panagkapuy. Tulongan ida ni Jehova, ket mapabileg ti pammatida bayat a kumitada iti tiempo inton “awanto ti agtataeng nga agkuna: ‘Masakitak.’” (Isaias 33:24) Anian a makaliwliwa a maammuan a babaen ti panagungar ni Jesu-Kristo ken babaen ti Pagarian ti Dios, permanente a mawayawayaan ti natulnog a sangatauan manipud iti basol, sakit, ken ipapatay! Gapu kadagitoy a naindaklan a namnama, agyamantayo ken ni Jehova, ti ‘mangpaimbag kadagiti amin a sakittayo.’—Salmo 103:1-3; Apocalipsis 21:1-5.
20. Apay a maikunatayo a matulongannatayo ti pammati nga agibtur bayat “dagiti makadidigra nga aldaw” ti kinalakay?
20 Ti pammati tulongannatayo met nga agibtur bayat “dagiti makadidigra nga aldaw” ti kinalakay, inton agkapuy ti salun-at ken pigsa. (Eclesiastes 12:1-7) Gapuna, dagiti kakaduatayo a lallakay ken babbaket mabalinda nga ikararag ti kas iti kiniddaw ti lumakay a salmista a nangikanta: “Sika ti namnamak, O Soberano nga Apo Jehova . . . Saannak nga ibelleng iti tiempo ti kinalakay; inton agkapuyen ti bilegko, saannak a baybay-an.” (Salmo 71:5, 9) Narikna ti salmista a kasapulanna ti tulong ni Jehova, kas iti adu a padatayo a Kristiano a limmakayen nga agserserbi iti Dios. Gapu iti pammatida, manamnamada a di agbaliw ti agnanayon a panangaywan ni Jehova.—Deuteronomio 33:27.
Taginayonen ti Pammati iti Sao ti Dios
21, 22. No adda pammatitayo, kasano nga apektaranna ti relasiontayo iti Dios?
21 Ti pammati iti naimbag a damag ken iti intero a Sao ti Dios ad-adda a pasingedennatayo ken ni Jehova. (Santiago 4:8) Pudno, isu ti Soberano nga Apotayo, ngem isu met ti Namarsua ken Amatayo. (Isaias 64:8; Mateo 6:9; Aramid 4:24) Inkanta ti salmista: “Sika ti Amak, ti Diosko ken ti Bato ti pannakaisalakanko.” (Salmo 89:26) No ipakitatayo ti pammatitayo ken ni Jehova ken iti naipaltiing a Saona, mabalintayo met nga ibilang ti Dios kas ‘ti Bato ti pannakaisalakantayo.’ Anian a makapabileg a pribilehio!
22 Ni Jehova ti Ama dagiti napulotan iti espiritu a Kristiano ken dagiti kakaduada nga addaan iti naindagaan a namnama. (Roma 8:15) Ken ti pammati iti nailangitan nga Amatayo di pulos mangyeg iti pannakapaay. Kinuna ni David: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” (Salmo 27:10) Kanayonanna, naipanamnama kadatayo: “Saanto a panawan ni Jehova ti ilina maipagapu iti naindaklan a naganna.”—1 Samuel 12:22.
23. Ania ti makalikaguman tapno matagiragsaktayo ti manayon a relasion ken ni Jehova?
23 Tapno matagiragsaktayo ti natalged a relasion ken ni Jehova, siempre, masapul a mamatitayo iti naimbag a damag ken awatentayo no ania a talaga ti Kasuratan—kas ti Sao ti Dios. (1 Tesalonica 2:13) Nasken a maaddaantayo iti naan-anay a pammati ken ni Jehova ket palubosantayo a lawagan ti Saona ti dalantayo. (Salmo 119:105; Proverbio 3:5, 6) Rumayray ti pammatitayo bayat a sikokompiansa nga ikararagtayo kenkuana ti ayat, asi, ken tulongna.
24. Ania a makaliwliwa a kapanunotan ti nailanad iti Roma 14:8?
24 Ti pammati tignayennatayo nga agdedikar iti Dios iti agnanayon. Uray mataytayo, no nabileg ti pammatitayo, datayo dagiti dedikado nga adipenna a mangnamnama iti panagungar. Wen, “agpadpada a no agbiagtayo ken no mataytayo, kukuanatay ni Jehova.” (Roma 14:8) Sapay koma ta ipapusotayo dayta a makaliwliwa a kapanunotan bayat a taginayonentayo ti panagtalek iti Sao ti Dios ken itultuloy a patien ti naimbag a damag.
Ania ti Sungbatyo?
• Ania ti pammati, ken apay a kasapulantayo dayta a galad?
• Apay a napateg a maaddaan ti pammati iti naimbag a damag ken ti intero a Sao ti Dios?
• Kasano a ti pammati tulongannatayo a mangsaranget kadagiti nadumaduma a suot?
• Ania ti tumulong kadatayo a mangtaginayon iti pammati?
[Dagiti Ladawan iti panid 12]
Sinaranay ni Jehova da Jeremias ken Elias gapu ta adda pammatida
[Dagiti Ladawan iti panid 13]
Nabileg ti pammati da Job, Pedro, ken Nehemias
[Dagiti Ladawan iti panid 15]
Tapno matagiragsak ti natalged a relasion ken ni Jehova, masapul a mamatitayo iti naimbag a damag