Salsaludsod Dagiti Agbasbasa
Maitunos kadi iti Kasuratan ti panangiparabaw ti maysa a Kristiano iti imana iti Biblia ket agsapata nga ibagana ti naan-anay a kinapudno iti korte?
Ti indibidual ti nasken a mangaramid iti bukodna a desision mainaig iti dayta. (Galacia 6:5) Ngem saan nga iparit ti Biblia ti panagsapata nga ibaga ti kinapudno iti korte.
Nabayagen a nakaugalian ti panagsapata. Idi un-unana, kas pagarigan, itag-ay dagiti Griego ti imada wenno sagidenda ti maysa nga altar bayat nga agsapatada. No agsapata idi ti maysa a Romano a hurado, mangiggem iti bato ket isapatana: “No gagaraek ti agulbod, bayat nga isalakanna ti siudad ken ti sarikedked, sapay koma ta ikkaten kaniak ni Jupiter [a dios] ti amin a naimbag a banag, kas iti aramidek iti daytoy a bato.”—Cyclopedia of Biblical, Theological, and Ecclesiastical Literature, da John McClintock ken James Strong, Tomo VII, panid 260.
Dagita nga aramid ket mangipakita a bigbigen ti sangatauan ti kaadda ti maysa a dios a siiimatang kadagiti tattao ken panungsungbatanda. Sipud idi un-unana, bigbigen dagiti pudno nga agdaydayaw ken ni Jehova nga ammona ti insawang ken inaramidda. (Proverbio 5:21; 15:3) Agsapatada iti saklang ti Dios, no ar-arigen, wenno agserbi a saksida ti Dios. Kas pagarigan inaramid dayta da Boaz, David, Solomon, ken Zedekias. (Ruth 3:13; 2 Samuel 3:35; 1 Ar-ari 2:23, 24; Jeremias 38:16) Ipalubos met dagiti pudno nga agdaydayaw iti Dios a pagsapataen ida ti dadduma a tattao. Kasta ti napasamak kada Abraham ken Jesu-Kristo.—Genesis 21:22-24; Mateo 26:63, 64.
Masansan nga adda aramidenna a panagkumpas ti tao nga agsapata ken Jehova. Kinuna ni Abram (Abraham) iti ari ti Sodoma: “Itag-ayko ti imak iti panagsapata ken Jehova a Kangatuan a Dios, Namataud iti langit ken daga.” (Genesis 14:22) Ti anghel a makisarsarita ken ni propeta Daniel “intag-ayna ti makannawan nga imana ken ti makannigid nga imana iti langlangit ket nagsapata babaen iti Daydiay sibibiag iti tiempo a di nakedngan.” (Daniel 12:7) Nadakamat met ti Dios kas simboliko a nangitag-ay iti imana kas panagsapata.—Deuteronomio 32:40; Isaias 62:8.
Saan nga iparit ti Kasuratan ti panagsapata. Ngem saan a masapul nga agsapata ti Kristiano kas pammatalged iti tunggal sawenna. Kinuna ni Jesus: “Ti koma latta saoyo a Wen kaipapananna ti Wen, ti saoyo a Saan, Saan.” (Mateo 5:33-37) Kasta met laeng ti kinuna ni adalan a Santiago. Idi kinunana nga “isardengyo ti agsapata,” mangbalballaag maibusor iti awan kaes-eskanna a panagsapata. (Santiago 5:12) Awan kada Jesus ken Santiago ti nagkuna a dakes ti agsapata tapno ibaga ti kinapudno iti korte.
Kasano ngarud no ti maysa a Kristiano ket nakiddaw nga agsapata a pudno ti ibagbagana iti korte? Marikna ti maysa a mabalinna ti agsapata. Ta no saan, mapalubosan nga ibaga lattan nga isu ket saan nga agul-ulbod.—Galacia 1:20.
Mabalin nga umannugot ti maysa a Kristiano no nairaman iti bista ti korte ti panangitag-ay iti ima wenno panangiparabaw iti dayta iti Biblia no agsapata. Mabalin a pampanunotenna dagiti pagarigan iti Kasuratan maipapan iti panagsapata a nairaman ti maysa a posision ti ima. Ngem para iti maysa a Kristiano, ad-adda a napateg no panunotenna nga isu ket agsapsapata iti imatang ti Dios nga ibagana ti kinapudno imbes a ti panagkumpas nga aramidenna. Serioso ti kasta a panagsapata. No marikna ti maysa a Kristiano a kabaelanna ken rumbeng a sungbatanna ti maysa a saludsod a nayimtuod kenkuana iti kasta a kasasaad, masapul a laglagipenna nga isu ket nagsapata nga ibagana ti kinapudno. Kayat ngamin ti maysa a Kristiano a napudno ti sawenna iti amin a gundaway.