Ania Koma ti Panangmatmattayo Kadagiti Tattao Bayat nga Umad-adani ti Aldaw ni Jehova?

“Saan a nabannayat ni Jehova maipapan iti karina, . . . no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.”​—2 PEDRO 3:9.

1, 2. (a) Ania ti panangmatmat ni Jehova kadagiti tattao ita? (b) Ania a salsaludsod ti mabalintay nga iyimtuod iti bagitayo?

ADDA annongen dagiti adipen ni Jehova a ‘mangaramid iti ad-adalan kadagiti tattao iti amin a nasion.’ (Mateo 28:19) Bayat nga itungtungpaltayo daytoy a trabaho ken ur-urayen “ti dakkel nga aldaw ni Jehova,” masapul a matmatantayo dagiti tattao a kas iti panangmatmat ti Dios. (Sofonias 1:14) Ania aya ti panangmatmatna? Kuna ni apostol Pedro: “Saan a nabannayat ni Jehova maipapan iti karina, kas ti panangibilang ti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) Ti Dios matmatanna dagiti tattao kas indibidual a posible nga agbabawi. “Ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Wen, maragsakan ni Jehova no ‘agtallikud ti maysa a nadangkes manipud iti dalanna ket pudno nga agtultuloy nga agbiag’!​—Ezequiel 33:11.

² Tultuladentayo kadi ti panangmatmat ni Jehova kadagiti tattao? Kas kenkuana, matmatantayo kadi a posible nga agbalin a “karnero iti pagpaarabanna” dagiti indibidual manipud iti nadumaduma a puli ken nasion? (Salmo 100:3; Aramid 10:34, 35) Usigentayo ti dua a pagarigan a mangipakita iti kinapateg ti panangtulad iti panangmatmat ti Dios. Iti dayta dua a pagarigan, agpada nga umad-adani ti pannakadadael, ken nasaksakbay a napakaammuan dagiti adipen ni Jehova maipapan iti dayta. Talaga a napateg dagitoy a pagarigan bayat nga ur-urayentayo ti dakkel nga aldaw ni Jehova.

Tinulad ni Abraham ti Panangmatmat ni Jehova

3. Ania ti panangmatmat ni Jehova kadagiti agnanaed iti Sodoma ken Gomorra?

³ Ti umuna a pagarigan ket maipapan ken ni matalek a patriarka nga Abraham ken ti dakes a siudad ti Sodoma ken Gomorra. Idi nangngeg ni Jehova “ti ikkis ti panagreklamo maipapan ti Sodoma ken Gomorra,” dina insigida a dinadael dagidi a siudad ken dagiti agnanaed kadagita. Nagpaliiw pay nga umuna. (Genesis 18:20, 21) Naibaon idiay Sodoma ti dua nga anghel, ket nagnaedda iti balay ti nalinteg a tao a ni Lot. Iti rabii nga idadateng dagiti anghel, “dagiti lallaki ti siudad . . . pinalikmutanda ti balay, manipud ubing agingga iti lakay, amin dagiti tattao kas maymaysa a bunggoy dagiti managderraaw,” a kayatda ti homoseksual a pannakidenna kadagiti anghel. Nalawag, ti nalulok a kasasaad dagiti agnanaed iti siudad ipakitana a maikari dayta a madadael. Kaskasdi, kinuna dagiti anghel ken ni Lot: “Adda kadi pay asinoman a kaduam ditoy? Manugang-a-lalaki ken annakmo a lallaki ken annakmo a babbai ken isuamin a kukuam iti siudad, iruarmo manipud itoy a disso!” Nangted ni Jehova iti gundaway a maispal ti dadduma nga agnanaed iti dayta a siudad, ngem idi agangay, ni laeng Lot ken ti dua a babbalasangna ti nakalasat.​—Genesis 19:4, 5, 12, 16, 23-26.

4, 5. Apay a nagpakaasi ni Abraham agpaay kadagiti agnanaed iti Sodoma, ken maitunos kadi iti panangmatmat ni Jehova ti panangmatmatna kadagiti tattao?

⁴ Ita, subliantayo ti panawen idi impalgak ni Jehova ti panggepna a mangpaliiw kadagiti siudad ti Sodoma ken Gomorra. Iti daydi a tiempo, impakaasi ni Abraham: “Kas pagarigan ta adda limapulo a nalinteg a tattao iti tengnga ti siudad. Punasemto kadi, ngarud, ida ket saanmo a pakawanen ti disso maipagapu iti limapulo a nalinteg nga adda iti unegna? Narigat a pagarupen kenka nga agtigtignayka iti kastoy a pamay-an tapno papatayem ti nalinteg a tao a mairaman iti nadangkes iti kasta kasapulan a mapasamak iti nalinteg a tao ti kas iti maaramid iti nadangkes! Narigat a pagarupen kenka. Ti aya Ukom ti intero a daga saanna nga aramiden no ania ti umiso?” Namindua nga inusar ni Abraham ti ebkas a “narigat a pagarupen kenka.” Manipud iti kapadasanna, ammo ni Abraham a saan nga iraman ni Jehova dagiti nalinteg no dadaelenna dagiti nadangkes. Idi kinuna ni Jehova a dina dadaelen ti Sodoma no adda “limapulo a nalinteg a tattao iti tengnga ti siudad,” pinabassit ni Abraham ti bilang agingga a nagbalin a sangapulo laengen.​—Genesis 18:22-33.

⁵ Impangag ngata ni Jehova dagiti pakaasi ni Abraham no saan a maitunos dagita iti panangmatmatna? Nalawag a maitunosda. Kas “gayyem ni Jehova,” nabatad nga ammo ken tultuladen ni Abraham ti panangmatmat ti Dios. (Santiago 2:23) Idi sinukimat ni Jehova ti Sodoma ken Gomorra, situtulok nga inkabilanganna dagiti pakaasi ni Abraham. Apay? Agsipud ta ti nailangitan nga Amatayo “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.”

Ti Panangmatmat ni Jonas Kadagiti Tattao​—Nabatad a Naiduma

6. Kasano ti panagtignay dagiti taga Nineve iti impakaammo ni Jonas?

⁶ Ita, usigenyo ti maikadua a pagarigan​—ti kapadasan ni Jonas. Naikeddeng idi a madadael ti siudad ti Nineve. Naibilin ken ni propeta Jonas nga ipakaammona a ‘dimmanon ken ni Jehova’ ti kinadakes dayta a siudad. (Jonas 1:2) No iraman dagiti kaparangetna, dakkel a siudad ti Nineve nga “addaan iti kaadayo a mapagpagna iti tallo nga aldaw.” Idi nagtulnog ni Jonas kamaudiananna ket napan idiay Nineve, nagtultuloy nga impakaammona: “Uppat a pulo laengen nga aldaw, ket ti Nineve maduprakto.” Gapu iti dayta, “dagiti tattao ti Nineve nangrugida a maaddaan iti pammati iti Dios, ket nangiwaragawagda iti panagayunar ken nangikawesda iti tinakpil.” Nagbabawi uray ti ari ti Nineve.​—Jonas 3:1-6.

7. Kasano a minatmatan ni Jehova ti panagbabawi dagiti taga Nineve?

⁷ Naiduma dayta iti tignay dagiti taga Sodoma! Kasano a minatmatan ni Jehova dagiti nagbabawi a taga Nineve? Kuna ti Jonas 3:10: “Nagladingitan ti pudno a Dios ti didigra a sinaona nga ipagtengna kadakuada; ket saanna nga impagteng dayta.” ‘Nagladingit’ ni Jehova iti anag a binalbaliwanna ti panangmatmatna kadagiti taga Nineve gapu ta nagbalbaliwda. Saan a nagbalbaliw ti pagalagadan ni Jehova, ngem ti pangngeddengna ti nagbaliw gapu ta nakitana a nagbabawi dagiti taga Nineve.​—Malakias 3:6.

8. Apay a nalpay ni Jonas?

⁸ Idi makita ni Jonas a saan a madadael ti Nineve, minatmatanna kadi dagiti bambanag sigun iti panangmatmat ni Jehova? Saan, ta naibaga kadatayo: “Ken Jonas, nupay kasta, makaparurod unay dayta, ket nagpudot buyogen ti unget.” Ania pay ti inaramid ni Jonas? Kuna ti salaysay: “Nagkararag ken Jehova ket kinunana: ‘Ah, ita, O Jehova, saan kadi a daytoy ti pakaseknak idi, bayat nga addaak iti bukodko a daga? Dayta ti makagapu a napanak nga immun-una ket nagtalawak nga agturong idiay Tarsis; ta ammok a maysaka a Dios a managparabur ken naasi, nabannayat nga agunget ken naruay iti naayat a kinamanangngaasi, ken pagladingitam ti didigra.’” (Jonas 4:1, 2) Ammo ni Jonas dagiti galad ni Jehova. Ngem iti dayta a gundaway, nalpay ti propeta ken saan a kas iti panangmatmat ti Dios ti panangmatmatna kadagiti nagbabawi a taga Nineve.

9, 10. (a) Ania a leksion ti insuro ni Jehova ken ni Jonas? (b) Apay a maibagatayo nga idi agangay intunos ni Jonas ti panangmatmatna iti panangmatmat ni Jehova kadagiti taga Nineve?

⁹ Rimmuar ni Jonas iti Nineve, nangaramid iti abong-abong, sa nagtugaw iti sirokna “agingga a makitana no ania ti pagbalinan ti siudad.” Pinagkalatkat ni Jehova ti maysa a mula a tabungaw tapno paglinongan ni Jonas. Ngem kabigatanna, nagango ti mula. Idi nakaunget ni Jonas iti dayta, kinuna ni Jehova: “Sika, iti biangmo, naasianka iti mula a tabungaw . . . Ket, iti biangko, saanak kadi a rumbeng a maasian iti Nineve a dakkel a siudad, nga iti dayta adda nasurok a sangagasut ket duapulo a ribu a tattao a saan a pulos makaammo iti nagdumaan ti makannawanda ken ti makannigidda, malaksid pay kadagiti adu a naamo nga animal?” (Jonas 4:5-11) Anian a leksion dayta ken ni Jonas maipapan iti panangmatmat ni Jehova kadagiti tattao!

¹⁰ Saan a nairekord ti sungbat ni Jonas iti sinao ti Dios maipapan iti pannakarikna iti asi kadagiti taga Nineve. Kaskasdi, nabatad a binalbaliwan ti propeta ti panangmatmatna kadagiti nagbabawi a taga Nineve. Maikunatayo dayta gapu ta isu ti inusar ni Jehova a nangirekord iti daytoy naipaltiing a salaysay.

Ania a Panangmatmat ti Tultuladenyo?

11. Ania ti mabalin a panangmatmat ni Abraham kadagiti tattao ita?

¹¹ Ita, ur-urayentayo ti sabali a pannakadadael​—ti panungpalan ti agdama a dakes a sistema ti bambanag bayat ti dakkel nga aldaw ni Jehova. (Lucas 17:26-30; Galacia 1:4; 2 Pedro 3:10) No sibibiag koma ita ni Abraham, ania ti panangmatmatna kadagiti tattao nga agbibiag iti daytoy lubong nga asidegen a madadael? Maseknan la ketdi kadagidiay di pay nakangngeg iti “naimbag a damag ti pagarian.” (Mateo 24:14) Maulit-ulit a nagpakaasi ni Abraham iti Dios mainaig iti posibilidad nga addada pay nalinteg a tattao iti Sodoma. Personal met kadi a maseknantayo kadagiti tattao a posible a mangiwaksi iti nailubongan a panagbiag iti sidong ti impluensia ni Satanas no la ket ta maikkanda iti gundaway nga agbabawi ken agserbi iti Dios?​—1 Juan 5:19; Apocalipsis 18:2-4.

12. Apay a nalakatayo a matulad ti kababalin ni Jonas kadagiti tattao a makasaritatayo iti ministeriotayo, ken ania ti mabalintayo nga aramiden maipapan iti dayta?

¹² Maiparbeng nga iliwen ti panungpalan ti kinadakes. (Habakuk 1:2, 3) Ngem naglaka la a matulad ti kababalin ni Jonas, a di maseknan iti pagimbagan dagiti posible nga agbabawi a tattao. Pudno daytoy nangnangruna no kanayontayo a maipasango kadagiti tattao a manangyaleng-aleng, bumusbusor, wenno nauyong pay ketdi no idanontayo iti pagtaenganda ti mensahe ti Pagarian. Mabalin a ditay maikkan iti atension dagidiay iruarto pay la ni Jehova manipud iti daytoy dakes a sistema ti bambanag. (Roma 2:4) Sukimatentayo a naimbag ti bagitayo. No makitatayo a tultuladentayo uray bassit laeng ti damo a panangmatmat ni Jonas kadagiti taga Nineve, mabalintayo nga ikararag ti tulong tapno matuladtayo ti panangmatmat ni Jehova.

13. Apay a maikunatayo a maseknan ni Jehova kadagiti tattao ita?

¹³ Maseknan ni Jehova kadagidiay saan pay nga agserserbi kenkuana, ket imdenganna ti araraw dagiti dedikado nga adipenna. (Mateo 10:11) Kas pagarigan, “ipakatnanto kadakuada ti hustisia” kas sungbat dagiti kararagda. (Lucas 18:7, 8) Maysa pay, tungpalen ni Jehova ti amin a kari ken panggepna iti inkeddengna a tiempo. (Habakuk 2:3) Ramanen daytoy ti panangdalusna iti daga kadagiti amin a kinadakes, no kasano a dinadaelna dagiti taga Nineve idi nagsublida iti kinadakesda.​—Nahum 3:5-7.

14. Ania ti ar-aramidentayo koma bayat nga ur-urayentayo ti dakkel nga aldaw ni Jehova?

¹⁴ Bayat a di pay natalipupos daytoy dakes a sistema ti bambanag iti dakkel nga aldaw ni Jehova, siaanus kadi nga aguraytayo, nga okupado a mangaramid iti pagayatanna? Ditay ammo ti detalye no kasano pay kasaknap ti maaramid a panangasaba sakbay a dumteng ti aldaw ni Jehova. Ngem ammotayo a maikasaba ti naimbag a damag ti Pagarian iti intero a mapagnaedan a daga agingga iti kapkapnekan ti Dios sakbay a dumteng ti panungpalan. Kasta met, maseknantayo koma kadagiti “matarigagayan a bambanag” a maurnong bayat nga itultuloy ni Jehova a punnuen ti balayna iti dayag.​—Haggeo 2:7.

Agminar Kadagiti Tigtignaytayo ti Panangmatmattayo

15. Ania ti makatulong tapno ad-adda a maipategtayo ti trabaho a panangasaba?

¹⁵ Nalabit agnanaedtay iti komunidad a saan unay nga interesado iti panangasabatayo, ken ditay kabaelan ti umakar kadagiti lugar nga agkasapulan iti ad-adu a manangiwaragawag iti Pagarian gapu ta saan nga ipalubos ti kasasaadtayo. Kas pagarigan ta adda sangapulo a masarakan iti teritoriatayo sakbay nga umay ti panungpalan. Ibilangtayo kadi a maikari a biroken dagita a sangapulo? ‘Simnek ti asi’ ni Jesus kadagiti bunggoy “agsipud ta nalalatan ken naiwarawarada a kasla karkarnero nga awanan pastor.” (Mateo 9:36) Babaen ti panagadal iti Biblia ken napasnek a panangbasa kadagiti artikulo iti Ti Pagwanawanan ken Agriingkayo!, lumawa ti pannakaawattayo iti kasasaad daytoy a lubong. Iti kasta, ad-adda a makitatayo ti kinapateg ti panangikasaba iti naimbag a damag. Maysa pay, ti addaan apresasion a panangusar kadagiti naibatay-Biblia a material a maipapaay babaen “ti matalek ken masirib nga adipen” pagbalinennatayo nga ad-adda nga epektibo kadagiti masansan a makasabaan a teritoria.​—Mateo 24:45-47; 2 Timoteo 3:14-17.

16. Kasanotayo a maparang-ay ti kinaepektibo ti ministeriotayo?

¹⁶ Ti panangipategtayo kadagidiay posible a mangipangag iti mangted-biag a mensahe ti Biblia tignayennatayo a mangpanunot kadagiti nadumaduma a gundaway ken pamay-an a makisarita kadagiti tattao iti ministeriotayo. Adu kadi ti awan kadagiti pagtaenganda no mangasabatayo? No kasta, maparang-aytayo ti kinaepektibo ti ministeriotayo babaen ti panangbalbaliw iti lugar ken oras ti panangasabatayo. Mapan agdaklis dagiti mangngalap kadagiti panawen nga adda makalapda. Maaramidtayo kadi ti kasta iti trabahotayo a naespirituan a panagdaklis? (Marcos 1:16-18) Apay a diyo padasen ti mangasaba iti rabii ken babaen ti telepono kadagiti lugar a maipalubos ti kasta? Nasarakan ti dadduma a nabunga a ‘pagdaklisan’ dagiti paradaan, pagsardengan dagiti trak, gasolinaan, ken tiendaan. Mayanninawtayo met ti panangmatmat ni Abraham kadagiti tattao no aprobetsarentayo dagiti gundaway tapno mangasaba a di pormal.

17. Kadagiti ania a pamay-an a maparegtatayo dagiti misionero ken dadduma nga agserserbi kadagiti sabali a pagilian?

¹⁷ Minilion ti saan pay a nakangngeg iti mensahe ti Pagarian. Malaksid iti panangasabatayo, maipakitatayo kadi ti panangipategtayo kadagiti kasta a tattao uray addatayo iti pagtaengantayo? Bueno, adda kadi am-ammoyo a misionero wenno amin-tiempo a ministro nga agserserbi iti ballasiw-taaw? No adda, nasayaat no suratantayo ida ket iyebkas ti apresasion iti trabahoda. Apay a makuna a panangipakita dayta iti pannakaseknan kadagiti tattao? Dagiti surattayo a naglaon iti pammaregta ken komendasion mabalin a pabilgenda dagiti misionero nga agtalinaed iti teritoriada, iti kasta matulonganda ti adu pay a tattao a gumun-od iti pannakaammo iti kinapudno. (Uk-ukom 11:40) Mabalintay met nga ikararagan dagiti misionero ken dagidiay mawaw iti kinapudno nga adda iti sabali a pagilian. (Efeso 6:18-20) Ti sabali pay a pamay-an a maipakita ti pannakaseknan ket babaen ti pinansial a panagdonar iti sangalubongan a trabaho dagiti Saksi ni Jehova.​—2 Corinto 8:13, 14; 9:6, 7.

Mabalinyo Kadi ti Umakar?

18. Ania ti inaramid ti dadduma a Kristiano a mangitandudo kadagiti interes ti Pagarian iti pagilian a pagnanaedanda?

¹⁸ Nabendisionan dagidiay immakar iti sabali a lugar nga agkasapulan iti ad-adu nga agibumbunannag iti Pagarian gapu iti panagsakripisioda. Kadagiti Saksi ni Jehova a saan nga immakar, dadduma kadakuada ti nagadal iti sabali a pagsasao tapno matulonganda iti naespirituan dagiti imigrante. Pudno a makagunggona dagita a panagregget. Kas pagarigan, pito a Saksi a tumultulong kadagiti Tsino iti maysa a siudad ti Texas, E.U.A., ti nangabrasa iti 114 a tattao a nakipagrambak iti Pangrabii ti Apo idi 2001. Nakita dagiti tumultulong kadagiti kasta a grupo a mabalinen nga anien ti talonda.​—Mateo 9:37, 38.

19. Ania ti nasayaat nga aramiden no agplamplano nga umakar iti sabali a pagilian tapno tumulong sadiay iti panangikasaba iti Pagarian?

¹⁹ Nalabit mariknayo a sangapamiliaan a mabalinyo ti umakar iti lugar nga agkasapulan iti ad-adu nga agibumbunannag iti Pagarian. Siempre, nainsiriban no ‘agtugaw nga umuna ket pattapattaen ti magastos.’ (Lucas 14:28) Nangnangruna a pudno dayta no pampanunoten ti maysa ti umakar iti sabali a pagilian. Amin nga agplamplano iti kasta nasken nga imtuodenda iti bagida: ‘Masuportarak kadi iti pinansial ti pamiliak? Magun-odko kadi ti kasapulan a bisa? Makapagsaoak kadin iti lenguahe dayta a pagilian, wenno sidadaanak nga agsursuro? Inkabilangak kadi ti klima ken kulturana? ‘Makapabilegak’ kadi imbes a makapadagsen kadagiti kakabsat iti dayta a pagilian?’ (Colosas 4:10, 11) Tapno maammuanyo no kasano kadakkel ti panagkasapulan iti pagilian a pampanunotenyo a pagakaran, kasayaatan latta no agsurat iti sanga nga opisina dagiti Saksi ni Jehova a mangimatmaton iti trabaho a panangasaba iti dayta a lugar.a

20. Ania ti inaramid ti maysa nga agkabannuag a Kristiano tapno magunggonaan dagiti kapammatian ken dadduma a tattao iti sabali a pagilian?

²⁰ Maysa a Kristiano a timmulong iti panangbangon kadagiti Kingdom Hall idiay Japan naammuanna nga adda panagkasapulan kadagiti eksperiensiado a trabahador tapno mangbangon iti lugar a pagdayawan idiay Paraguay. Gapu ta baro pay ken agkabannuag, immakar iti dayta a pagilian ket nagtrabaho iti walo a bulan kas ti kakaisuna nga amin-tiempo a trabahador iti dayta a proyekto. Bayat ti kaaddana sadiay, nasursurona ti agsao iti Espaniol ken nangyadal iti Biblia. Nakitana nga agkasapulan dayta a pagilian kadagiti manangiwaragawag iti Pagarian. Nupay nagawid idiay Japan, nagsubli idiay Paraguay ket timmulong a nangbirok kadagiti tattao a maikameng iti dayta a Kingdom Hall.

21. Ania koma ti kangrunaan a pakaseknantayo ken panangmatmattayo bayat nga ur-urayentayo ti dakkel nga aldaw ni Jehova?

²¹ Siguraduen ti Dios a naan-anay a mairingpas ti trabaho a panangasaba, maitunos iti pagayatanna. Ita, pappapartakenna ti maudi a naespirituan a panagani. (Isaias 60:22) Gapuna, bayat nga ur-urayentayo ti aldaw ni Jehova, sireregta koma a makipasettayo iti trabaho a panagani ken matmatantayo dagiti tattao a kas iti panangmatmat ti Dios kadakuada.

[Footnote]

Malagipyo Pay Kadi?

• Bayat nga ur-urayentayo ti aldaw ni Jehova, ania koma ti panangmatmattayo kadagiti tattao?

• Ania ti panangmatmat ni Abraham kadagiti nalinteg a posible nga agnanaed idiay Sodoma?

• Ania ti panangmatmat ni Jonas kadagiti nagbabawi a taga Nineve?

• Kasanotayo a maipakita a tultuladentayo ti panangmatmat ni Jehova kadagiti tattao a di pay nakangngeg iti naimbag a damag?

[Ladawan iti panid 16]

Tinulad ni Abraham ti panangmatmat ni Jehova kadagiti tattao

[Ladawan iti panid 17]

Nasursuro a tuladen ni Jonas ti panangmatmat ni Jehova kadagiti nagbabawi a taga Nineve

[Dagiti Ladawan iti panid 18]

Ti pannakaseknan kadagiti tattao tignayennatayo a mangpanunot kadagiti nadumaduma a gundaway ken pamay-an a mangikasaba iti naimbag a damag