Idayawmo ni Jehova “iti Tengnga ti Kongregasion”

DAGITI Nakristianuan a gimong ket probision a naggapu ken Jehova tapno agtalinaed a natibker iti naespirituan dagiti adipenna. Maipakitatayo nga apresiarentayo dagiti probision ni Jehova babaen ti regular a pannakigimong. Kanayonanna, mabalinantayo ti “mangparegta [kadagiti kakabsattayo] iti ayat ken nasayaat nga ar-aramid,” a nagpateg a pamay-an a mangipakita iti ayattayo iti tunggal maysa. (Hebreo 10:24; Juan 13:35) Ngem kasano a maparegtatayo dagiti kakabsattayo kadagiti gimong?

Panagkomento iti Publiko

Maipapan kenkuana, insurat ni Ari David: “Ideklarakto ti naganmo iti kakabsatko; iti tengnga ti kongregasion idaydayawkanto. Agtaudto kenka ti panangidaydayawko iti dakkel a kongregasion.” “Idayawkanto iti dakkel a kongregasion; iti tengnga ti ili a nakaad-adu idaydayawkanto.” “Imbagak ti naimbag a damag ti kinalinteg iti dakkel a kongregasion. Adtoy! Dagiti bibigko saanko a medmedan.”​—Salmo 22:22, 25; 35:18; 40:9.

Idi kaaldawan ni apostol Pablo, no agtitipon dagiti Kristiano tapno agdayawda, inyebkasda met ti pammatida ken indaydayawda ni Jehova. Iti kastoy a pamay-an, mapabileg ken maparegtada ti tunggal maysa iti ayat ken nasayaat nga ar-aramid. Iti kaaldawantayo, sinigsiglon ti napalabas manipud idi tiempo da David ken Pablo, pudno a ‘makitkitatayo nga umas-asidegen ti aldaw ni Jehova.’ (Hebreo 10:24, 25) Agturturongen iti pannakadadael ti sistema ti bambanag ni Satanas, ken umad-adu dagiti parikut. Nangnangruna a ‘kasapulantayo ita ti panagibtur.’ (Hebreo 10:36) Siasino ti mangparegta kadatayo nga agibtur, no saan a dagiti kakabsattayo?

Kas idi un-unana, adda dagiti probision iti kaaldawantayo a naipaay kadagiti amin a manamati tapno mayebkasda ti pammatida “iti tengnga ti kongregasion.” Ti maysa a nakalukat a gundaway para iti amin ket isu ti panagkomento kas sungbat kadagiti saludsod a maidatag iti tallaong kadagiti gimong ti kongregasion. Diyo tagibassiten dagiti pagimbagan daytoy. Kas pagarigan, dagiti komento a mangipakita no kasano a madaeran wenno maliklikan dagiti parikut patibkerenna ti determinasion dagiti kakabsattayo a mangsurot kadagiti prinsipio ti Biblia. Dagiti komento a mangilawlawag kadagiti nadakamat ngem saan a nakotar a teksto iti Biblia wenno dagiti kanayonan a punto a nabasatayo iti personal a panagsukimat mabalin a paregtaenna dagiti dadduma a maaddaan kadagiti nasaysayaat nga ugali iti panagadal.

Rumbeng a matignay dagiti amin a Saksi ni Jehova a mangparmek iti kinamanagbabain gapu ta ammotayo a magunggonaantayo agraman dagiti sabsabali no agkomentotayo kadagiti gimong. Nangnangruna a nasken nga agkomento dagiti panglakayen ken ministerial nga adipen kadagiti gimong, yantangay isuda ti mainanama a mangidaulo iti panagkomento ken pannakigimong. Ngem kasano a rumang-ay ti maysa no marigatan iti daytoy partikular nga aspeto ti Nakristianuan nga aktibidadna?

Dagiti Singasing Tapno Rumang-ay

Laglagipem a ti panagkomento ket paset ti panagdayawtayo ken ni Jehova. Inlawlawag ti maysa a Kristiano a babai a taga Alemania no kasano ti panangmatmatna kadagiti komentona. “Dagita ti personal a sungbatko kadagiti panangpadas ni Satanas a manglapped kadagiti adipen ti Dios a mangyebkas iti pammatida.” Kinuna ti maysa a kabbaro a nabautisaran a kabsat a lalaki a naikameng iti isu met la a kongregasion: “No maipapan iti panagkomento, kasta unay ti panagkararagko.”

Agsagana a naimbag. No saanmo nga inadal a nasaksakbay ti material, marigatanka nga agkomento ken saan unay nga epektibo dagiti komentom. Dagiti singasing iti panagkomento kadagiti gimong ti kongregasion ket masarakan iti publikasion a Magunggonaan iti Edukasion nga Ipaay ti Teokratiko nga Eskuelaan ti Panagministro, panid 70.a

Aramidem a kalat ti agkomento iti uray maminsan laeng kada gimong. Kaipapanan dayta a mangisaganaka iti sumagmamano a sungbat, yantangay dakdakkel ti posibilidadna nga awagannaka ti kabsat a mangidadaulo no mamin-adu nga itayagmo ti imam. Mabalin a kayatmo ti makitulag kenkuana a nasaksakbay no ania a saludsod ti kayatmo a sungbatan. Makatulong a nangnangruna daytoy no agdadamoka. Yantangay mabalin nga agkedkedka a mangitayag iti imam “iti dakkel a kongregasion,” maparegtaka nga agkomento no ammom a dayta ti sinaganaam a parapo ken segseggaan ti mangikonkondukta iti panagadal nga itayagmo ti imam.

Isapsapam ti agkomento. Saan a lumaka ti narigat a trabaho no itantanmo dayta. Makatulong no isapsapam ti agkomento iti gimong. Masdaawkanto a makakita a nalaklakan ti agkomento iti maikadua wenno maikatlo a gundaway no nakapagkomentokan.

Piliem ti maitutop a pagtugawan. Para kadagiti dadduma, nalaklaka ti agkomento no agtugawda iti makinsango a paset ti Kingdom Hall. Manmano dagiti makasinga, ken nalaklaka a makita ida ti mangikonkondukta iti panagadal. No padasem daytoy, laglagipem ti agsao iti napigsa tapno mangngeg ti amin, nangruna no saan nga agus-usar ti kongregasion kadagiti maipasa a mikropono.

Dumngegka a naimbag. Makatulong daytoy tapno dimo maulit ti naibagan ti dadduma. Kanayonanna, ti komento dagiti dadduma mabalin nga ipalagipna kenka ti maysa a kasuratan wenno punto a mabalin a mangpasingked iti kaibagbaga a kapanunotan. No dadduma, mabalin a mailawlawag ti punto a mapagsasaritaan babaen ti ababa a kapadasan. Dakkel ti maitulongna dagiti kasta a komento.

Sursuruem ti sumungbat iti bukodmo a sasao. No basaem ti komento manipud iti maad-adal a material, mabalin nga ipasimudaagna a nabirokam ti umiso a sungbat, ken mabalin a nasayaat daytoy a pangrugiam nga agkomento. Ngem no ikagumaam ti sumungbat iti bukodmo a sasao, ipakitana a naawatam ti punto. Saan a nesesita a sao por sao nga ibasatayo dagiti adda iti publikasiontayo. Saan a basta uliten dagiti Saksi ni Jehova no ania ti kuna dagiti publikasionda.

Dika umadayo iti topiko. Saan a maitutop dagiti komento nga awan pakainaiganda iti topiko wenno adayo iti kangrunaan a punto. Kaipapanan daytoy a masapul a nainaig dagiti komentom iti topiko a mapagsasaritaan. Makatulong daytoy iti makapabileg iti naespirituan a panangusig iti nabukel a tema.

Pagbalinem a kalat ti mangparegta. Yantangay ti napateg a rason no apay nga agkomentotayo ket tapno pabilgen dagiti dadduma, ikagumaantay a liklikan ti mangisao kadagiti banag a mabalin a mangupay kadakuada. Kanayonanna, dimo komentuan ti intero a parapo nga uray la bassit laengen wenno awan pay ketdin ti maisao ti dadduma. Mabalin a makariro dagiti atiddog ken komplikado a sungbat. Mabalin nga ad-adda nga epektibo dagiti ababa a sungbat a buklen ti sumagmamano la a sasao, ken pabilgenna dagiti kabbaro a mangted kadagiti ababa a komento.

Ti Akem Dagiti Mangikonkondukta Kadagiti Gimong

No maipapan iti panangparegta, nadagsen ti responsabilidad ti mangikonkondukta kadagiti gimong. Maipakitana ti napaypayso nga interes iti amin a komento babaen ti panagimdengna a naimbag ken panangkitana iti agkomkomento imbes a sabali ti in-intonaranna. Anian a nakababain no saan a dimngeg a naimbag ket, kas resultana, inulitna ti naibagan wenno insaludsodna manen ti saludsod a kalkalpas a nasungbatan!

Makapaupay met no ti mangikonkondukta ket kanayonna nga uliten ken baliwan ti sumagmamano a sasao ti nagkomento a kas man la iparparipiripna a saan nga umdas ti naikomento. Iti sabali a bangir, anian a makapabileg no dagiti komento ket mangiturong iti ad-adda pay a panangusig iti napateg a punto. Tapno maipaay dagiti positibo a komento, dakkel ti maitulongna dagiti saludsod a kas iti, ‘Kasanotay nga iyaplikar daytoy iti kongregasiontayo?’ wenno, ‘Ania a kasuratan ti masarakan iti parapo a mangsuporta iti dayta?’

Siempre, nangnangruna a komendaran dagiti kabbaro wenno managbabain no agkomentoda. Mabalin nga aramiden daytoy a personal kalpasan ti panagadal tapno saanda a mabainan ken tapno adda gundaway ti nangikondukta a mangipaay kadagiti singasing no kasapulan.

No bukbukodan ti maysa a tao ti agsao no adda kapatpatangna, malapdan dagiti dadduma nga agsao. Marikna dagiti dumdumngeg kenkuana a din kasapulan nga agsaoda pay. Dida pay ketdin ipamaysa ti dumngeg no dumngegda man. Kasta met laeng ti mapasamak no bukbukodan ti mangikonkondukta ti agsao babaen ti kanayon a panagkomentona. Nupay kasta, matignay dagiti timmabuno ken magutugotda nga agpanunot maipapan iti topiko no ti mangikonkondukta iti gimong ket sagpaminsan a mangibangon kadagiti kanayonan a saludsod. Saan koma a masansan ti pannakausar dagiti kasta a saludsod.

Saan a nesesita nga awagan ti mangikonkondukta ti tao nga immuna a nangitayag iti imana. Mabalin a mangupay dayta kadagidiay saan nga alisto nga agpanunot iti komentoda. No ti mangikonkondukta ket aguray iti apagbiit, ik-ikkanna iti gundaway nga agkomento daydiay di pay nagkomento. Nainsiriban met a dina awagan dagiti ubbing a mangsungbat kadagiti saludsod maipapan iti topiko a dida pay maawatan.

Kasanon no saan nga umiso ti sungbat? Masapul a saan nga ibabain ti mangikonkondukta daydiay simmungbat. Adda latta kinapudno dagiti komento uray no saan nga umiso. Mailinteg dagiti bambanag nga awan ti mabainan no ti mangikonkondukta ket sitataktika a pidutenna ti umiso a punto ti simmungbat, babaen ti panangbaliwna iti saludsod, wenno mangibangon iti kanayonan a saludsod.

Tapno ad-adu ti agkomento, masapul a liklikan ti mangikonkondukta dagiti saan nga espesipiko a saludsod, a kas iti, ‘Adda pay kadi mayat nga agkomento?’ Ti saludsod a, ‘Siasino ti saan pay a nagkomento? Daytoyen ti maudi a gundawayyo!’ ket mabalin a napasnek, ngem dina matignay ti dadduma a mangyebkas iti kapanunotanda. Saan koma a mababalaw dagiti kakabsat no dida nakapagkomento a nasapsapa bayat ti panagadal. Imbes ketdi, maparegtada koma a mangiranud iti ammoda gapu ta maysa nga ebkas ti ayat ti panagririnnanud. Kanayonanna, no adda naawaganen nga agkomento, nasaysayaat no ti mangikonkondukta dina ibaga ti, “Kalpasanna, denggentayo met ti komento ni Kabsat a kua ken ni Kabsat a kua.” Ti mangikonkondukta denggenna pay nga umuna ti komento sa kitaenna no kasapulan ti kanayonan pay a komento.

Maysa a Pribilehio ti Panagkomento

Napateg iti naespirituan ti itatabuno kadagiti Nakristianuan a gimong; ket maysa a pribilehio ti panagkomento kadagita. No makipaspasettayo iti daytoy nagpaiduma a pamay-an a panangidayaw ken Jehova “iti tengnga ti kongregasion,” sursurotentayo ti ulidan ni David ken ipangpangagtayo ti balakad ni Pablo. Pampaneknekantayo nga ay-ayatentayo dagiti kakabsattayo ken pasetnatayo ti dakkel a kongregasion ni Jehova no makipaspasettayo kadagiti gimong. Sadino pay koma ti kayatyo a papanan “bayat a makitkitayo nga umas-asidegen ti aldaw?”​—Hebreo 10:25.

[Footnote]

[Dagiti Ladawan iti panid 20]

Agpada a napateg ti panagimdeng ken panagkomento kadagiti Nakristianuan a gimong

[Ladawan iti panid 21]

Ti mangikonkondukta ipakitana ti napaypayso nga interes iti amin a komento